ក្រោមការអំពាវនាវរបស់ “គណបក្សប្រជាជនកន្លាត” ដែលជាចលនានយោបាយទើបបង្កើតថ្មីតាមបណ្តាញអ៊ីនធ័រនែត បាតុករដែលភាគច្រើនជានិស្សិតបានប្រមូលផ្តុំគ្នាក្នុងចំនួនដ៏ច្រើន តាំងពីព្រឹកព្រលឹម មិនខ្លាចភ្លៀងនិងរនាំងប៉ូលិសទេ។ ជាបាតុកម្មដ៏ធំបំផុតមួយ មិនធ្លាប់មានក្នុងរយៈពេលប៉ុន្មានឆ្នាំចុងក្រោយមកនេះ។
បាតុករមានបំណងដង្ហែក្បួនទៅសភា ដែលកំពុងបើកសម័យប្រជុំពេញអង្គនៅថ្ងៃចន្ទទី ២០កក្កដានេះ ដើម្បីបរិហារអំពើលួចបន្លំពេលប្រឡង នៅថ្នាក់មហាវិទ្យាល័យ និងទាមទារឱ្យរដ្ឋមន្ត្រីក្រសួងអប់រំចុះចេញពីតំណែង។ ប៉ុន្តែក្បួនបាតុកម្មរីកកាន់តែធំ ការបង្ក្រាបនិងបំបែក ពីសំណាក់អាជ្ញាធរក៏កាន់តែខ្លាំងដែរ។ នៅរសៀលថ្ងៃចន្ទនេះ ប៉ូលិសបានបាញ់គ្រាប់បែកផ្សែងបង្ហូរទឹកភ្នែក ទៅលើហ្វូងនិស្សិត និងបានប្រើដំបងវាយសំពងលើបាតុករជាច្រើននាក់។ អាជ្ញាធរក្រុងញូវដេលី បានពង្រាយកងកម្លាំងរក្សាសណ្តាប់ធ្នាប់ និងមធ្យោបាយយ៉ាងច្រើនសន្ធឹកសន្ធាប់ នៅមុខសភា និងអគារសាធារណៈជាច្រើនទៀត ដោយបានប្រកាសហាមឃាត់ តាំងពីថ្ងៃអាទិត្យទី១៩ កក្កដាម្សិលមិញ មិនឱ្យមានការប្រមូលផ្តុំគ្នាទេ។
“រដ្ឋាភិបាលប៉ុនប៉ងប្រើកម្លាំងបំបិទមាត់បាតុករ ! តែជាបាតុកម្មដើម្បីអនាគតរបស់យុវវ័យឥណ្ឌារាប់រយពាន់នាក់”។ នេះជាពាក្យរិះគន់របស់ប្រមុខបក្សប្រឆាំង នៅក្នុងសុន្ទរកថាបើកសម័យប្រជុំសភា។ តែលោកនាយករដ្ឋមន្ត្រីឥណ្ឌា ណារិនដ្រាម៉ូឌី គ្មានពាក្យមួយម៉ាត់ទាក់ទងនឹងបាតុកម្មថ្ងៃនេះទេ។
ដឹកនាំដោយចលនា “កន្លាត” បាតុកម្មបរិហារអំពើពុករលួយលួចបន្លំពេលប្រឡង ត្រូវបានរៀបចំធ្វើឡើង តាំងពីជាច្រើនសប្តាហ៍មកហើយ នៅតាមខេត្តក្រុងជាច្រើននៃប្រទេស និងបានទាក់ទាញនិស្សិតកាន់តែច្រើនឡើងៗ ជាពិសេសនិស្សិតទើបបញ្ចប់ការសិក្សានៅមហាវិទ្យាល័យ ដែលរកការងារធ្វើមិនបាន។
គណបក្សប្រជាជនកន្លាត ឬចលនាកន្លាត ហៅកាត់ថា CJP (ស្រដៀងនឹងគណបក្សប្រជាជន BJP កំពុងកាន់អំណាច) ទើបត្រូវបង្កើតឡើង នៅខែឧសភាឆ្នាំ២០២៦ ដោយនិស្សិតឥណ្ឌាទើបបញ្ចប់ការសិក្សានៅសហរដ្ឋអាមេរិកឈ្មោះ អភិជិត ឌីបកេ។ គណបក្សសាកល្បងបំផុសឱ្យមានការប្រយុទ្ធប្រឆាំង នឹងរឿងអាស្រូវលួចបន្លំពេលប្រឡង ដែលតែងតែកើតឡើងជាញឹកញាប់ នៅពេលប្រឡងបញ្ចប់ថ្នាក់ឧត្តមសិក្សា។ កាលពីខែឧសភា២០២៦ ឥណ្ឌាបានលុបចោលលទ្ធផលប្រឡងដែលមានបេក្ខនិស្សិតពេទ្យចូលរួមជាងពីរលាននាក់ ដោយហេតុតែមានការលួចបន្លំក្នុងពេលប្រឡង។ បើតាមសារព័ត៌មានក្នុងស្រុក ការលុបចោលលទ្ធផលប្រឡងនោះបានជំរុញឱ្យនិស្សិតពីរនាក់ខកចិតុ្តរហូតធ្វើអត្តឃាត៕
ប្រភព៖ RFI | ដោយ៖ អៀង សុខម៉ិញ
