សមាគមសម្ព័ន្ធអ្នកសារព័ត៌មានកម្ពុជា

ម៉ាស៊ីនថតសួតឌីជីថល៦គ្រឿង ត្រូវបានដាក់ឱ្យប្រើប្រាស់នៅស្រុកគោលដៅចំនួនដប់ដើម្បីស្វែងរកអ្នកឆ្លងជំងឺរបេង

ម៉ាស៊ីនថតសួតបែបឌីជីថល(Delft Light & FDR Xair) ត្រូវបានប្រគល់ជូនទៅ មជ្ឈមណ្ឌលជាតិកំចាត់រោគរបេង និងហង់សិន ដោយទីភ្នាក់ងារសហរដ្ឋអាមេរិកដើម្បី អភិវឌ្ឍន៏អន្តរជាតិ (USAID) នៅរាជធានីភ្នំពេញ។ រូបថតថ្ងៃទី២៧ ខែមិថុនា ឆ្នាំ២០២២។ ខេមបូចា/ ព្រីង សំរាំង
ម៉ាស៊ីនថតសួតបែបឌីជីថល(Delft Light & FDR Xair) ត្រូវបានប្រគល់ជូនទៅ មជ្ឈមណ្ឌលជាតិកំចាត់រោគរបេង និងហង់សិន ដោយទីភ្នាក់ងារសហរដ្ឋអាមេរិកដើម្បី អភិវឌ្ឍន៏អន្តរជាតិ (USAID) នៅរាជធានីភ្នំពេញ។ រូបថតថ្ងៃទី២៧ ខែមិថុនា ឆ្នាំ២០២២។ ខេមបូចា/ ព្រីង សំរាំង

ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) បានប្រគល់ម៉ាស៊ីនថតសួត ប្រភេទឌីជីថលទំនើបចំនួន៦គ្រឿង ជូនដល់មជ្ឈមណ្ឌលជាតិកំចាត់រោគរបេង និងហង់សិន (CENAT) និងមន្ទីរសុខាភិបាលខេត្ត ដើម្បីស្វែងរកករណីជំងឺរបេងនៅតាមសហគមន៍ នៅក្នុង​ស្រុកគោលដៅចំនួន១០ ដែលមិនសូវមានការឧបត្ថម្ភគាំទ្រ។

លោកស្រី Erin Nicholson នាយិកាបេសកកម្មស្តីទី​ របស់ USAID ចាត់ទុកថា ការលុបបំបាត់​ជំងឺរបេង គឺជាអាទិភាពសកល ហើយទីភ្នាក់ងារជំនួយអាមេរិក USAID មានមោទកភាព​ក្នុង​ការគាំទ្រដល់ការប្តេជ្ញាចិត្តរបស់ក្រសួង សុខាភិបាល ដើម្បីបញ្ចប់ជំងឺរបេងនៅ​កម្ពុជាឱ្យ​បាន​ត្រឹមឆ្នាំ២០៣០។

លោកស្រី បន្ថែមថា ទីភ្នាក់ងារ USAID បានផ្តល់ប្រាក់ជាង ១៦លានដុល្លារ សម្រាប់គាំទ្រដល់​ការឆ្លើយតបនឹងជំងឺរាតត្បាតនៃជំងឺរបេងនៅកម្ពុជា ហើយសកម្មភាពនេះនៅដំណើរ​ការរហូត​ដល់សព្វថ្ងៃ។ ជាងនេះទៅទៀតការគាំទ្ររបស់USAID ដល់ NTP មានគោលបំណង នាំយក ការធ្វើរោគវិនិច្ឆ័យកាន់តែលឿន និងត្រឹមត្រូវទៅជិតសហគមន៍ ដែលនឹងរួមចំណែក​ក្នុងការ​ស្វែង​​រកករណីបាត់ដាន ដើម្បីបញ្ចប់ជំងឺរបេង និងលើកកំពស់សុខមាលភាពប្រជាជនកម្ពុជា។

លោកស្រីមានប្រសាសន៍ថា៖ «ម៉ាស៊ីនកាំរស្មីអ៊ិច ដែលប្រគល់ជូនថ្ងៃនេះ នឹងជួយកម្មវិធី​ជាតិ​ក្នុងការស្វែងរកអ្នកសង្ស័យជំងឺរបេងដែលបាត់ដាននៅក្នុងសហគមន៍ និងជួយធ្វើឱ្យសុខភាព​របស់ប្រជាជនកម្ពុជាដែលងាយរងគ្រោះដោយសារជំងឺនេះមានភាពប្រសើរឡើង»

លោកស្រីក៏បានពន្យល់លក្ខណៈសម្បត្តិរបស់ ម៉ាស៊ីន X-ray ចំនួន៦ខាងលើថា នឹងបំពេញ​បន្ថែមការធ្វើតេស្ត ភី ស៊ី អ ដើម្បីពិនិត្យ និងធ្វើរោគវិនិច្ឆ័យ អ្នកជំងឺរបេង​សង្ស័យ។ លក្ខណៈ​ពិសេសរបស់ម៉ាស៊ីនទាំងនេះ នឹងត្រូវបានដំឡើងជាមួយកម្មវិធីបញ្ញាសិប្បនិមិត្ត ដើម្បីរកមើល ជំងឺរបេងជាលក្ខណៈឌីជីថល ដោយហេតុនេះវា កាត់បន្ថយបន្ទុកការងារ​សម្រាប់​អ្នក​បច្ចេកទេស​កាំរស្មីអ៊ិច និងធ្វើរោគវិនិច្ឆ័យតាមរយៈការថតកាន់តែមានភាពសុក្រិត។

ម៉ាស៊ីនថតសួតបែបឌីជីថល(Delft Light & FDR Xair) ត្រូវបានប្រគល់ជូនទៅ មជ្ឈមណ្ឌលជាតិកំចាត់រោគរបេង និងហង់សិន ដោយទីភ្នាក់ងារសហរដ្ឋអាមេរិកដើម្បី អភិវឌ្ឍន៏អន្តរជាតិ (USAID) នៅរាជធានីភ្នំពេញ។ រូបថតថ្ងៃទី២៧ ខែមិថុនា ឆ្នាំ២០២២។ ខេមបូចា/ ព្រីង សំរាំង

នាយិកាបេសកម្មស្ដីទីរូបនេះ បញ្ជាក់ថា ម៉ាស៊ីនទាំងនេះ នឹងត្រូវដាក់នៅក្នុងមន្ទីរពេទ្យបង្អែក​សាធារណៈ ហើយនឹងត្រូវបានប្រើសម្រាប់សកម្មភាពស្វែងរកករណីជំងឺរបេងសកម្ម នៅ សហគមន៍​​ក្នុងស្រុកប្រតិបត្តិចំនួន១០។ លើសពីនេះ ម៉ាស៊ីនទាំងនេះដើរតួរយ៉ាងសំខាន់ នៅ​ក្នុងការសិក្សាអត្រាប្រេវ៉ាឡង់ជំងឺរបេងថ្នាក់ជាតិលើកទីបី ដែលនឹងប្រព្រឹត្ត​ទៅនៅចុង​ឆ្នាំ​នេះ។

លោក ហ៊ុយ សិរីវឌ្ឍនៈ អគ្គនាយករងបច្ចេកទេសសុខាភិបាល បានថ្លែងថា ការទទួល​បាន​ជំនួយម៉ាស៊ីនថតសួតបែបឌីជីថល ចំនួន៦គ្រឿង គឺជាការរួមចំណែកមួយយ៉ាងសំខាន់ក្នុង​ការ​ជួយពន្លឿនការឆ្លើយតបជំងឺរបេងនៅក្នុងប្រទេសកម្ពុជា ដែលជាពិសេសនោះ លើការ​ស្រាវ​ជ្រាវករណីរបេងនៅតាមមូលដ្ឋានសុខាភិបាល ទាំងក្នុងថ្នាក់ខេត្ត និងថ្នាក់ស្រុក ដើម្បី​ធានា​ថា​អ្នកដែលសង្ស័យថាមានជំងឺរបេង ឬផ្ទុក និងឆ្លងរបេងបានទទួលសេវាធ្វើរោគវិនិឆ្ឆ័យ សេវា​ព្យាបាល និងថែទាំបានឆាប់រហ័ស។

លោកមានប្រសាសន៍ថា៖ «ការប្រើប្រាស់ឧបករណ៍ទំនើប និងបែបឌីជីថលទាំងនេះ ពិតជា​បង្កើននូវលទ្ធភាព និងសមត្ថភាពរបស់អ្នកផ្ដល់សេវារបេង ជាមួយនឹងលទ្ធផល​កាន់តែ​ជឿ​ទុកចិត្ត ឆាប់រហ័ស និងសុក្រិតភាពជាងមុន»។

លោកបន្ថែមថា អង្គការKhana រួមជាមួយអង្គការដៃគូអនុវត្តចំនួន៣ផ្សេងទៀត ក៏បានផ្ដល់​នូវឧបករណ៍ទំនើបៗ ក្នុងការគំាទ្រដល់សកម្មភាពការងាររបស់មជ្ឃមណ្ឌលជាតិកំចាត់របេង និងហង់សិនផងដែរ ក្នុងនោះរួមមាន ម៉ាស៊ីនថតសួតរហ័សចំនួន៩គ្រឿង និងម៉ាស៊ីនធ្វើ​រោគ​វិនិច្ឆ័យTruenat ចំនួន១៥គ្រឿង ដែលជាឧបករណ៍ទំនើបៗសម្រាប់ការចូលរួមការស្រាវជ្រាវ​ករណី​របេង​ឱ្យកាន់តែរហ័ស និងមានប្រសិទ្ធភាពខ្ពស់ ជាមួយលទ្ធផលប្រសើរជាងមុន។

រ៉ឺម៉កកង់បីមួយគ្រឿងបើកកាត់មុខមជ្ឈមណ្ឌលជាតិកំចាត់រោគរបេង និងហង់សិន នៅរាជធានីភ្នំពេញ។ រូបថតថ្ងៃទី២៧ ខែមិថុនា ឆ្នាំ២០២២។ ខេមបូចា/ ព្រីង សំរាំង

ប្រធានមជ្ឈមណ្ឌលជាតិកំចាត់រោគរបេង និងហង់សិន លោក ហួត ចាន់យុដា បានលើក​ឡើង​ថាកម្ពុជានៅតែជាប្រទេសមួយ ដែលមានបន្ទុកជំងឺរបេងខ្ពស់នៅឡើយ បើទោះជាកម្ពុជា បាន​ចាក​ចេញពីបញ្ចីប្រទេសមួយក្នុងចំណោមប្រទេស៣០ ដែលនៅមានបន្ទុកជំងឺរបេងខ្ពស់​នៅ​លើ​ពិភពលោក និងបើទោះជាក្នុងរយៈកាលកន្លងទៅ កម្ពុជាបានខិតខំ និងទទួល​បាន​នូវ​ជោគជ័យក្នុងការកាត់បន្ថយអត្រាឈឺ និងអត្រាស្លាប់ ក្នុងកម្រិតមួយល្អប្រសើរក៏ដោយ។

លោកបានថ្លែងយ៉ាងដូច្នេះថា៖ «កង្វះខាតធនធានសម្ភារៈ ឧបករណ៍ធ្វើរោគវិនិច្ឆ័យទំនើប នៅតាមមូលដ្ឋាន សុខាភិបាល ជាមួយធនធានហិរញ្ញវត្ថុ ដែលមានតិចតួច គឺជាមូលហេតុ​ចម្បង ដែលធ្វើឱ្យការស្រាវជ្រាវករណី ជំងឺរបេង ការធ្វើរោគវិនិច្ឆ័យ និងការព្យាបាល នៅក្នុង​ប្រទេសកម្ពុជា នៅមានភាពយឺតយ៉ាវនៅឡើយ»

បើតាមរបាយការណ៍ស្តីពីជំងឺរបេងសាកល របស់អង្គការសុខភាពពិភពលោកឆ្នាំ២០២១ កម្ពុជាមានមនុស្សប្រមាណមួយភាគបី ដែលកំពុងឈឺដោយសារជំងឺរបេង នៅមិនទទួល​បាន​ការថែទាំ ការធ្វើរោគវិនិច្ឆ័យ និងការព្យាបាលទាន់ពេល ដែលនេះគឺជា​ហានិភ័យ​លើ​ការ​បន្ត​ការចម្លង និងការឆ្លងដែលធ្វើឱ្យមានផលប៉ះពាល់ដល់សុខភាពសាធារណៈ និងការអភិវឌ្ឍ​សេដ្ឋកិច្ចគ្រួសារ សហគមន៍ និងប្រទេសជាតិ។

របាយការណ៍ដដែល បន្តថា កម្ពុជានៅមានចំនួនអ្នកឈឺដោយសារជំងឺរបេងប្រមាណ​២៧៤ នាក់ ក្នុងចំណោមប្រជាជនមួយសែននាក់ និងមានអ្នកស្លាប់ចំនួន២០នាក់ ក្នុងចំណោម​ប្រជាពលរដ្ឋមួយសែននាក់ ដែលតួលេខនេះ មានការថយចុះ បើធៀបទៅនឹងឆ្នាំ២០២០ បើទោះជាមានការកើនឡើងនៃអ្នកស្លាប់។

គួរជម្រាបជូនថា  ជារៀងរាល់ឆ្នាំ មជ្ឈមណ្ឌលជាតិ កំចាត់រោគរបេង និងហង់សិន បានធ្វើ​ការស្រាវជ្រាវ និងបានផ្តល់ការថែទាំ ការធ្វើរោគវិនិច្ឆ័យ និងការព្យាបាល ដល់អ្នកជំងឺ​របេង​ប្រមាណជាង៣ម៉ឺននាក់។

យ៉ាងណាមិញ លោក ចាន់យុដា បន្ថែមថា ការប្រគល់ និងទទួលជំនួយម៉ាស៊ីនថតសួត​បែប​ឌីជីថល ចំនួន៦គ្រឿង បានរួមចំណែកក្នុងការលើកកម្ពស់ នូវសុខមាលភាព និងសុខភាព របស់​ប្រជាជនកម្ពុជា ឆ្ពោះទៅរកការចូលរួមចំណែកជាមួយពិភពលោកធ្វើការបញ្ចប់ការរាត​ត្បាត​ជំងឺរបេងនៅឆ្នាំ២០៣០។ ហើយវានឹងធ្វើការឆ្លើយតបទៅនឹងជំងឺរបេងនៅក្នុង​ស្រុក​ប្រតិបត្តិទាំង១០ ដែលស្ថិត ក្នុងរាជធានីភ្នំពេញ ខេត្តកណ្តាល ខេត្តកំពង់ចាម និងខេត្ត​ត្បូងឃ្មុំ៕

266 views

ព័ត៌មានថ្មីៗ

អត្ថបទពេញនិយម