សមាគមសម្ព័ន្ធអ្នកសារព័ត៌មានកម្ពុជា

ព្រះសពសម្ដេចព្រះមហាសង្ឃរាជត្រូវតម្កល់រយៈពេល១០០ថ្ងៃដើម្បី​ឱ្យពុទ្ធបរិស័ចូលគោរពព្រះវិញ្ញាណក្ខន្ធ

ព្រះសពសម្តេចព្រះអគ្គមហាសង្ឃរាជាធិបតី ទេព វង្ស ត្រូវបានតម្កល់រយៈ១០០ថ្ងៃ នៅវត្តឧណ្ណាលោម រាជធានីភ្នំពេញ ដើម្បីឱ្យពុទ្ធបរិស័ទ និងមហាជនទូទៅ ចូលគោរពព្រះវិញ្ញាណក្ខន្ធសម្តេច។ រូបថតនៅថ្ងៃទី២៧ ខែកុម្ភៈ ឆ្នាំ២០២៤។ (ខេមបូចា/ ព្រីង សំរាំង)
ព្រះសពសម្តេចព្រះអគ្គមហាសង្ឃរាជាធិបតី ទេព វង្ស ត្រូវបានតម្កល់រយៈ១០០ថ្ងៃ នៅវត្តឧណ្ណាលោម រាជធានីភ្នំពេញ ដើម្បីឱ្យពុទ្ធបរិស័ទ និងមហាជនទូទៅ ចូលគោរពព្រះវិញ្ញាណក្ខន្ធសម្តេច។ រូបថតនៅថ្ងៃទី២៧ ខែកុម្ភៈ ឆ្នាំ២០២៤។ (ខេមបូចា/ ព្រីង សំរាំង)

ព្រះសពសម្ដេចអគ្គមហាសង្ឃរាជាធិបតី ទេព វង្ស នឹងត្រូវតម្កល់រយ:ពេល១០០ថ្ងៃ​ដើម្បី​ឱ្យ​ពុទ្ធបរិស័ទបានចូលគោរពព្រះវិញ្ញាណក្ខន្ធ នេះបើតាមការបញ្ជាក់ពីព្រះសង្ឃដែលគង់​នៅវត្តឧណ្ណាលោម។

សម្ដេចព្រះមហាសង្ឃរាជ ទេព វង្ស ចូលព្រះទិវង្គតក្នុងព្រះជន្ម៩៣ព្រះវស្សា នៅវេលាម៉ោង​១៧៖៤០នាទី ល្ងាចថ្ងៃទី២៦ ខែកុម្ភៈ ឆ្នាំ២០២៤ នៅវត្តឧណ្ណាលោម រាជធានីភ្នំពេញ បន្ទាប់​ពី​សម្ដេច​បានសម្រាកព្យាបាលព្រះរោគនៅមន្ទីរពេទ្យកាល់ម៉ែត្រតាំងពីពាក់​កណ្ដាលឆ្នាំ២០២៣មក ។

គិតត្រឹមព្រឹកថ្ងៃទី២៧ ខែកុម្ភៈ មានព្រះសង្ឃនិងបណ្ដាជនខ្មែររាប់រយអង្គនាក់​ចូលរួមគោរព​ព្រះវិញ្ញាណក្ខន្ធសម្ដេចព្រះមហាសង្ឃរាជ ដោយផ្ទាល់នៅក្នុងបរិវេណវត្តឧណ្ណាលោម។

ព្រះតេជគុណ តាត វិបុល ជាព្រះសង្ឃគង់នៅវត្តឧណ្ណាលោមដែលនៅថែទាំសម្តេចផ្ទាល់​មាន​សង្ឃដីកាថា ពិធីបុណ្យថ្វាយព្រះសពសម្ដេចព្រះសង្ឃរាជ ទេព វង្ស ប្រព្រឹត្តទៅនៅ​វត្តឧណ្ណាលោម។ ព្រះអង្គបញ្ជាក់ថា ការតម្កល់ព្រះសពនេះគឺធ្វើឡើងដើម្បី​អនុញ្ញាត​ឱ្យ​មហាជន​ពីគ្រប់មជ្ឈដ្ឋានបានចូលគោរពព្រះវិញ្ញាណក្ខន្ធសម្ដេចព្រះសង្ឃរាជ។

ព្រះតេជគុណ តាត វិបុល៖ «ព្រះរាជសពនឹងត្រូវតម្កល់រយៈពេល១០០ថ្ងៃ ដើម្បី​អនុញ្ញាត​ឱ្យ​ពុទ្ធបរិស័ទចូលគោរពវិញ្ញាណក្ខន្ធ។ បន្ទាប់មកនឹងចាត់ចែងទៅតាមប្រពៃណីទៀត ប៉ុន្តែ​បើសិន​មាន​ការកែប្រែណាមួយនឹងជូនដំណឹងទៅកាន់សាធារណជនឱ្យបានជ្រាប»។

សារាចរណែនាំរបស់រាជរដ្ឋាភិបាលកម្ពុជា ស្ដីពីការចូលរួមគោរពព្រះវិញ្ញាណក្ខន្ធព្រះសព សម្ដេចព្រះសង្ឃរាជបានកំណត់យកថ្ងៃទី២៧ ខែកុម្ភៈ ជាថ្ងៃដែលប្រជាជាតិខ្មែរ​ទាំងមូល​ត្រូវ​កាន់​ទុក្ខ​ទូទាំងប្រទេស បន្ទាប់ពីសម្ដេចព្រះមហាសង្ឃរាជ ទេព វង្ស ចូលព្រះទិវង្គត នៅថ្ងៃទី​២៦ ខែកុម្ភៈ ឆ្នាំ២០២៤។  ​

តាមរយៈសារាចរណែនាំរបស់រាជរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន ម៉ាណែត លើកឡើងថា សម្ដេចអគ្គមហាសង្ឃរាជ ទេព វង្ស មានគុណបំណាច់យ៉ាងធំធេង​ចំពោះ​ ជាតិ សាសនា ព្រះមហាក្សត្រ និងបានធ្វើពលិកកម្មដ៏ខ្ពង់ខ្ពស់ទ្រទ្រង់ដើម្បីបុព្វហេតុ​ព្រះពុទ្ធ​សាសនា​​នៅកម្ពុជា។ ក្នុងនាមរាជរដ្ឋាភិបាលកម្ពុជា លោក ហ៊ុន ម៉ាណែត ណែនាំលើការងារ​បីចំណុចរួមមាន៖ ១. កំណត់យកថ្ងៃទី២៧ខែកុម្ភៈ ជាថ្ងៃកាន់ទុក្ខទូទាំងប្រទេស ២.គ្រប់ស្ថាប័ន​ជាតិទាំងអស់នៅទូទាំងប្រទេសត្រូវបង្ហូតទង់ជាតិត្រឹមពាក់កណ្ដាលដងទង់ជាតិ និង​៣.គ្រប់​ស្ថានីយ៍​វិទ្យុនិងទូរទស្សន៍ទាំងអស់ត្រូវផ្អាកសកម្មភាពផ្សព្វផ្សាយទស្សនីយភាព​ដែលមាន​លក្ខណៈ​សប្បាយគគ្រឹកគគ្រេង​នាថ្ងៃទី២៧ ខែកុម្ភៈ ដែលជាថ្ងៃកាន់ទុក្ខនេះ។

ព្រះសពសម្តេចព្រះអគ្គមហាសង្ឃរាជាធិបតី ទេព វង្ស ត្រូវបានតម្កល់រយៈ១០០ថ្ងៃ នៅ​វត្តឧណ្ណាលោម រាជធានី​ភ្នំពេញ ដើម្បីឱ្យពុទ្ធបរិស័ទ និងមហាជនទូទៅ ​ចូលគោរព​ព្រះវិញ្ញាណក្ខន្ធសម្តេច។ រូបថតនៅ​ថ្ងៃ​ទី២៧ ខែកុម្ភៈ ឆ្នាំ២០២៤។ (ខេមបូចា/ ព្រីង សំរាំង)

ស្ត្រីវ័យ៥០ឆ្នាំប្លាយអ្នកស្រី សុខ ម៉ាលី បាននាំកូនប្រុសស្រី មកគោរពព្រះវិញ្ញាណក្ខន្ធ​របស់​សម្ដេចព្រះសង្ឈរាជ។ អ្នកស្រីឱ្យដឹងថា កាលនៅមានព្រះជន្មព្រះអង្គមានអធ្យាស្រ័យខ្ពស់​ចំពោះ​ញាតិញោមពុទ្ធបរិស័ទចំណុះជើងវត្ត។ អ្នកស្រីបួងសួងសូមឱ្យព្រះវិញ្ញាណក្ខន្ធព្រះសព​ទៅកាន់សុគតិភព។

អ្នកស្រី ម៉ាលី បន្ថែមថា៖ «ស្រណោះព្រះអង្គដែរក្មួយ ព្រះអង្គមានទឹកព្រះទ័យល្អណាស់​សណ្ដោស​ញាតិញោមចំណុះជើងវត្តគ្រប់ៗគ្នា»

សកលវិទ្យាធិការសកលវិទ្យាល័យព្រះសីហនុរាជ និងជាលេខាផ្ទាល់សម្ដេច​អគ្គមហា​សង្ឃរាជ ទេព វង្ស សម្ដេចព្រះមហាអរិយវង្ស យ៉ន សេងយៀត មានសង្ឃដីកាថា ព្រះអង្គ​មាន​នាទីទទួលបន្ទុកជាអ្នកបកប្រែភាសា និងចូលរួមជួយសម្ដេចសង្ឃរាជ​លើកការងារ​ទំនាក់​ទំនង​កិច្ចការបរទេស។ ព្រះតេជគុណ យ៉ន សេងយៀត ជាលេខាផ្ទាល់របស់​សម្ដេច​សង្ឃរាជ ទេព វង្ស អស់រយៈពេលជិត២០ឆ្នាំមកហើយ។

ព្រះតេជគុណ បន្តថា៖ «សម្ដេច(ទេព វង្ស)ជាព្រះសង្ឃពុទ្ធសាសនាថេរវាទ​មួយព្រះអង្គ​ដែល​ទទួល​ការគោរពស្រឡាញ់ពីបណ្ដាមេដឹកនាំអ្នកកាន់ពុទ្ធសាសនាជាច្រើននៅលើពិភពលោក ទាំងថេរវាទ​ មហាយានទាំងអន្តរសាសនា»

ព្រះតេជគុណ យ៉ន សេងយៀត រំលឹកអនុស្សវរីយ៍ដែលមិនអាចបំភ្លេចបានជាមួយនឹង​សម្ដេច​អគ្គមហាសង្ឃរាជ ទេព វង្ស ក្នុងអំឡុងឆ្នាំ២០០៩ កាលគ្រាដែលគណៈប្រទិភូសង្ឃកម្ពុជា​ទៅ​បំពេញទស្សនកិច្ចផ្សព្វផ្សាយពីវប្បធម៌សន្តិភាពនៅប្រទេសស្រីលង្កាចំពេលដែលមានសង្គ្រាមរវាងកងកម្លាំងស្រីលង្កា និងក្រុមឧទ្ទាមតាមិល។

ព្រះតេជគុណបញ្ជាក់ថា៖ «យប់ហ្នឹងសង្គ្រាមផ្ទុះឡើង ហើយស្នូរកាំភ្លើងលឺពេញមួយយប់។ យើងធ្វើសន្និសីទស្អែកឡើងក៏នៅក្នុងសមរភូមិសង្គ្រាមដែរ។ កាលយប់ហ្នឹងព្រះអង្គ​(សម្ដេច ទេព វង្ស) បានលើកឡើងពីវិនាសកម្មនៃសង្គ្រាម និងការកសាងសន្តិភាព»

ព្រះសពសម្តេចព្រះអគ្គមហាសង្ឃរាជាធិបតី ទេព វង្ស ត្រូវបានតម្កល់រយៈ១០០ថ្ងៃ នៅ​វត្តឧណ្ណាលោម រាជធានី​ភ្នំពេញ ដើម្បីឱ្យពុទ្ធបរិស័ទ និងមហាជនទូទៅ ​ចូលគោរព​ព្រះវិញ្ញាណក្ខន្ធសម្តេច។ រូបថតនៅ​ថ្ងៃ​ទី២៧ ខែកុម្ភៈ ឆ្នាំ២០២៤។ (ខេមបូចា/ ព្រីង សំរាំង)

ទន្ទឹមនឹងនេះរាជរដ្ឋាភិបាលកម្ពុជា ក៏បានចេញសេចក្ដីសម្រេចស្ដីពីការបង្កើត​គណៈកម្មការរៀបចំពិធីបុណ្យថ្វាយព្រះសពអគ្គមហាសង្ឃរាជ ទេព វង្ស ដែល​មាន​សមាសភាពពីគ្រប់ស្ថាប័នពាក់ព័ន្ធក្នុងនោះ សម្ដេចព្រះមហាសុមេធាធិបតី នន្ទ ង៉ែត ជាព្រះប្រធានកិត្តិយស ខណៈដែលសម្ដេចព្រះពោធិវ័ង្ស អំ លឹមហេង ជាអនុប្រធានទី១ រួមនឹងមន្ត្រីពាក់ព័ន្ធអាជ្ញាធរជំនាញជាច្រើនទៀត។

ក្រៅពីនោះ ក្រសួងធម្មការ និងកិច្ចការសាសនា បានចេញសេចក្ដីសម្រេចមួយប្រគេន​ការងារ​ជូនមន្ត្រីសង្ឃជាន់ខ្ពស់ ដោយប្រគេនសម្ដេចព្រះមហាសុមេធាធិបតី នន្ទ ង៉ែត ជាសម្ដេច​សង្ឃរាជ​ស្តីទី ខណៈដែលសម្ដេចព្រះពោធិវ័ង្ស អំ លឹមហេង ជាសម្ដេចព្រះសង្ឃនាយកស្តីទី។

សម្ដេចអគ្គសង្ឃរាជ ទេព វង្ស ប្រសូតនៅឆ្នាំ ១៩៣២។ ព្រះអង្គបានបួសជាសាមណេរ​ក្នុង​ជន្មាយុ១៦វស្សា នៅវត្តរាជបូព៌ ក្នុងខេត្តសៀមរាប។ តាមព្រះជីវប្រវត្តិ ព្រះអង្គ​ត្រូវ​បាន​តែង​តាំង​​ជា​គ្រូសូត្រស្តាំ​នៅ​វត្ត​រាជ​បូព៌ខេត្តសៀមរាប កាលពីអំឡុងឆ្នាំ១៩៥៧។

ប៉ុន្តែក្នុងឆ្នាំ១៩៧៥ ជាពេលវេលាដែលកម្ពុជា បានធ្លាក់ចូលទៅក្នុងបនប្រល័យពូជសាសន៍​ខ្មែរក្រហម កំឡុងពេលនោះ សម្ដេច ទេព វង្ស ក៏ត្រូវបានរបបនេះបង្ខំឱ្យសឹក និង​ត្រូវបង្ខំ​ឱ្យ​ធ្វើការធ្ងន់ធ្ងរដូចប្រជាជនខ្មែរដទៃទៀតដែរ។

ព្រះអង្គ​ទទួល​ឧបសម្បទាជាភិក្ខុ​ជាថ្មីនៅឆ្នាំ១៩៧៩ និងត្រូវតែងតាំងជាព្រះប្រធាន​សង្ឃ​កម្ពុជា ជា​ព្រះ​ឧបជ្ឈាយ៍ និង​ជា​ព្រះ​វិន័យធរក្នុងប្រទេសក្រោយសម័យខ្មែរក្រហម។ ព្រះអង្គត្រូវបាន​ថ្វាយ​ងារ​ជាព្រះមហា​សុមេធាធិបតី និង​ជា​សង្ឃនាយកនៅឆ្នាំ១៩៩១។

នៅ​ថ្ងៃទី​២៩ ខែមេសា ឆ្នាំ​២០០៦ ព្រះមហាក្សត្រព្រះបាទសម្ដេចព្រះនរោត្ដម សីហមុនី សព្វព្រះរាជហរទ័យតែងតាំងសម្ដេច ទេព វង្ស​ ជាសម្ដេចព្រះ​អគ្គ​មហា​សង្ឃ​រាជាធិបតី សម្ដេច​មហា​សង្ឃរាជ​នៃ​ព្រះរាជាណាចក្រ​កម្ពុជា ​និងព្រះ​រាជានុញ្ញាតឱ្យប្រើ​ប្រាស់​​រាជ​ស័ព្ទ និង​ផ្លិត​យស​ពិសេស។

ព្រះតេជគុណ យ៉ន សេងយៀត មានសង្ឃដីកាថា៖​«ព្រះអង្គធ្វើកិច្ចការមនុស្សធម៌ជាច្រើន​ដើម្បី​បុព្វហេតុ​ពុទ្ធសាសនារស់ឡើងវិញ។អ្វីដែលយើងទាំងអស់គ្នា អាចរៀនពីព្រះអង្គបាន​គឺភាពអត់ធ្មត់​និងការលះបង់ព្រះកាយព្រះអង្គជូនបុព្វហេតុព្រះពុទ្ធសាសនា»៕

ព្រះសពសម្តេចព្រះអគ្គមហាសង្ឃរាជាធិបតី ទេព វង្ស ត្រូវបានតម្កល់រយៈ១០០ថ្ងៃ នៅ​វត្តឧណ្ណាលោម រាជធានី​ភ្នំពេញ ដើម្បីឱ្យពុទ្ធបរិស័ទ និងមហាជនទូទៅ ​ចូលគោរព​ព្រះវិញ្ញាណក្ខន្ធសម្តេច។ រូបថតនៅ​ថ្ងៃ​ទី២៧ ខែកុម្ភៈ ឆ្នាំ២០២៤។ (ខេមបូចា/ ព្រីង សំរាំង)
1,880 views

ព័ត៌មានថ្មីៗ

អត្ថបទពេញនិយម