តុលាការកំពូលនៅថ្ងៃសុក្រនេះ បានសម្រេចតម្កល់ការផ្តន្ទាទោសពីបទសូកប៉ាន់កាលពីឆ្នាំ ២០១៨ លើអតីតមន្ត្រីនិងបុគ្គលិកបច្ចុប្បន្នទាំងប្រាំរូបរបស់សមាគមសិទ្ធិមនុស្សអាដហុក ដោយបញ្ចប់ទាំងស្រុងលើដំណើរការនៃបណ្តឹងសាទុក្ខក្នុងសំណុំរឿងព្រហ្មទណ្ឌ ដែលអ្នករិះគន់ថាមិនមានភស្តុតាងគ្រប់គ្រាន់ដើម្បីគាំទ្រការចោទប្រកាន់នេះ។
ប្រធានក្រុមប្រឹក្សាជំនុំជម្រះ និល ណុន បានប្រកាសនៅថ្ងៃសុក្រថា៖ «តុលាការកំពូលបានសម្រេចតម្កល់សាលក្រមរបស់សាលាឧទ្ធរណ៍» ដោយមិនបានផ្តល់ព័ត៌មានលម្អិតជុំវិញហេតុផលនៃសេចក្តីសម្រេចនេះទេ។
កាលពីដើមខែនេះ ក្រុមមេធាវីរបស់មន្ត្រីអាដហុកទាំងប្រាំបាននិយាយថា កូនក្តីរបស់ខ្លួនគួរតែរួចខ្លួនពីបទចោទ ដោយសារស្ត្រីដែលបានចោទប្រកាន់មកលើពួកគេពីបទសូកប៉ាន់នោះ មិនដែលបានផ្តល់សក្ខីកម្មនៅក្នុងតុលាការទេ។
ស្ត្រីឈ្មោះ ខុម ចាន់តារាទី តាមការចោទគឺជាស្រីកំណាន់របស់មេដឹកនាំបក្សប្រឆាំងលោក កឹម សុខា ហើយអ្នកទាំងពីរនេះគឺជាដើមហេតុដែលនាំឲ្យមានការកាត់ទោសនៅក្នុងសំណុំរឿងនេះ ប៉ុន្តែគ្មាននរណាម្នាក់ក្នុងចំណោមអ្នកទាំងពីរត្រូវបានសាកសួរក្នុងនាមជាសាក្សីឡើយ។
លោក នី សុខា លោក យី សុខសាន្ត និងលោកស្រី លឹម មុនី ដែលនៅបម្រើការងារជាមន្ត្រីជាន់ខ្ពស់សមាគមអាដហុក ចំណែកលោក ណៃ វ៉ង់ដា អតីតបុគ្គលិកអាដហុក ត្រូវបានតុលាការរកឃើញពិរុទ្ធភាពពីបទសូកប៉ាន់សាក្សីកាលពីឆ្នាំ ២០១៨។ លោក នី ចរិយា ជាអតីតបុគ្គលិកអាដហុកម្នាក់ទៀតដែលបម្រើការនៅគណៈកម្មាធិការជាតិរៀបចំការបោះឆ្នោតនៅពេលចាប់ខ្លួនកាលពីឆ្នាំ២០១៦ ត្រូវបានផ្តន្ទាទោសក្នុងនាមជាអ្នកសមគំនិតក្នុងអំពើសូកប៉ាន់។
អ្នកទាំងប្រាំនេះ ត្រូវបានឃុំខ្លួនក្នុងពន្ធនាគាររយៈពេល១៤ខែ មុនការផ្តន្ទាទោសកាលពីខែកញ្ញា ឆ្នាំ២០១៨ នៅពេលដែលសាលាដំបូងរាជធានីភ្នំពេញកាត់ទោសពួកគេឲ្យជាប់ពន្ធនាគាររយៈពេល៥ឆ្នាំ បូករួមទាំងការអនុវត្តទោសរយៈពេល១៤ខែកន្លងមកផងដែរ។
អំឡុងសវនាការ តំណាងអយ្យការ «ខកខានមិនបានបង្ហាញសាក្សីណាមួយដែលបានលើកឡើងក្នុងសំណុំរឿងនេះ ឬផ្តល់ភស្តុតាងដែលអាចជឿទុកចិត្តបាន ដើម្បីគាំទ្រការចោទប្រកាន់នេះទេ» នេះបើយោងតាមការលើកឡើងរបស់អង្គការឃ្លាំមើលសិទ្ធិមនុស្សកាលពីខែមិថុនា។
ចៅក្រម និល ណុន បានច្រានចោលសំណើរបស់អគ្គព្រះរាជអាជ្ញាសាលាឧទ្ធរណ៍ ដែលសុំលុបចោលការព្យួរទោសនិងឲ្យអនុវត្តរយៈពេល៣ឆ្នាំ ១០ខែ នៃទោស ដែលមិនបានអនុវត្ត។
មេធាវីការពារក្តីមិនមានវត្តមានក្នុងតុលាការនៅព្រឹកថ្ងៃសុក្រនេះទេ។ ក្នុងចំណោមជនជាប់ចោទទាំងប្រាំនាក់ មានតែលោក សុខសាន្ត មន្ត្រីស៊ើបអង្កេតជាន់ខ្ពស់នៃសមាគមអាដហុកម្នាក់ប៉ុណ្ណោះ ដែលបានចូលរួមស្តាប់ការប្រកាសសាលដីកានេះ។
លោក សុខសាន្ត បានប្រាប់អ្នកសារព័ត៌មាននៅខាងក្រៅតុលាការថា៖ «ថ្ងៃនេះ ខ្ញុំមានការសោកស្ដាយចំពោះសេចក្តីសម្រេចរបស់តុលាការកំពូល ខណៈដែលខ្ញុំគិតថា តុលាការកំពូលនឹងរកយុត្តិធម៌សម្រាប់ក្រុមការងារដែលបានធ្វើការងារដើម្បីលើកកម្ពស់សិទ្ធិមនុស្ស»។
លោកមានប្រសាសន៍បន្ថែមថា៖ «សេចក្តីសម្រេចរបស់តុលាការក្នុងការតម្កល់ការកាត់ទោសលើយើងខ្ញុំបង្ហាញថា តុលាការកំពូលគ្មានឆន្ទានុសិទ្ធិក្នុងការសម្រេច ដើម្បីស្វែងរកយុត្តិធម៌សម្រាប់ក្រុមសង្គមស៊ីវិលនោះទេ»។
លោក សំ ទិត្យសីហា មេធាវីការពារក្តីបានប្រាប់ខេមបូចា បន្ទាប់ពីសវនាការថា លោកមានការខកចិត្តចំពោះការសម្រេចរបស់តុលាការកំពូល។
ចាន់តារាទី មិនត្រូវបានកោះហៅក្នុងនាមជាសាក្សីក្នុងអំឡុងពេលដំណើរការជំនុំជម្រះនៅតុលាការថ្នាក់ក្រោមហើយលោកបានមានប្រសាសន៍ថា វាមិនមានធាតុផ្សំនៃការសូកប៉ាន់នោះទេ។ លោកបានបន្ថែមថា៖ «ការសម្រេចនេះមិនបានផ្តល់យុត្តិធម៌ដល់កូនក្តីរបស់ខ្ញុំទេ»៕
ប្រែសម្រួលពីអត្ថបទភាសាអង់គ្លេស៖ Supreme Court Upholds 2018 “Adhoc 5” Bribery Convictions