សាលាឧទ្ធរណ៍ភ្នំពេញ សម្រេចតម្កល់សាលក្រមរបស់តុលាការជាន់ទាបទុកជាបានការដដែល ក្នុងសំណុំរឿងបរិហារកេរ្តិ៍ ដែលបង្គាប់ឱ្យលោក ទាវ វណ្ណុល ប្រធានបក្សភ្លើងទៀន បង់ប្រាក់សំណងជំងឺចិត្តដល់រាជរដ្ឋាភិបាល ចំនួន៦ពាន់លានរៀល ឬប្រហែល ១,៥លានដុល្លារអាមេរិក។
នៅរសៀលថ្ងៃទី១៦ ខែកញ្ញា ឆ្នាំ២០២៦ សាលាឧទ្ធរណ៍ភ្នំពេញ បើកសវនាការជំនុំជម្រះលើកដំបូង និងប្រកាសសាលដីកាលើសំណុំរឿងបរិហារកេរ្តិ៍ជាសាធារណៈរបស់លោក ទាវ វណ្ណុល ទាក់ទិននឹងការផ្ដល់បទសម្ភាសន៍ឱ្យសារព័ត៌មានបរទេស ដែលលោកលើកឡើងថា ស្ថានភាពប្រជាធិបតេយ្យនៅកម្ពុជាដើរថយក្រោយ ក្រោមការដឹកនាំរបស់លោក ហ៊ុន ម៉ាណែត។
នៅរសៀលនេះដែរ មានសមាជិក និងអ្នកគាំទ្ររបស់គណបក្សភ្លើងទៀន និងគណបក្សឆន្ទៈខ្មែរប្រមាណ១០០នាក់ បានឡើងមកគាំទ្រ រួមទាំងសមាជិកព្រឹទ្ធសភាកូតាបក្សឆន្ទៈខ្មែរលោក គង់ មុនីកា និងលោក សេង ម៉ារឌី ដោយឈរនៅបរិវេណខាងក្រៅនៃសាលាឧទ្ធរណ៍ភ្នំពេញ។
បន្ទាប់ពីសវនាការបានបិទបញ្ចប់ មេធាវីការពារក្ដីឱ្យលោកទាវ វណ្ណុល គឺលោក អែម ចន្ថា មានប្រសាសន៍ថា ចៅក្រមសម្រេចតម្កល់ទុកសាលាក្រមរបស់សាលាដំបូងរាជធានីភ្នំពេញជាបានការដដែល ដោយលើកឡើងពីសំអាងហេតុ ដូចការចោទពីតុលាការជាន់ទាបថា មានតម្រុយ និងពិរុទ្ធ។
យ៉ាងណាក៏ដោយមេធាវីរូបនេះ ចាត់ទុកសេចក្ដីសម្រេចរបស់សាលាឧទ្ធរណ៍ជារឿងអយុត្តិធម៌ សម្រាប់កូនក្ដីរបស់លោក ដោយលើកឡើងថា ចៅក្រម ហាក់មិនពិចារណាលើសេចក្ដីសន្និដ្ឋានការពាររបស់មេធាវីចុងចោទ។
លោកលើកឡើងថា៖ «ខ្ញុំយល់ថា មិនបានផ្ដល់យុត្តិធម៌ទេ ព្រោះអីតុលាការហាក់បីដូចជាមិនបានបញ្ចូល និងពិនិត្យមើលសេចក្ដីសន្និដ្ឋានការពាររបស់មេធាវីការពារកូនក្ដី។ តុលាការថយទៅពិចារណារយៈពេលប្រហែល១០នាទី ប៉ុន្តែត្រឡប់មកវិញ អាននូវសេចក្ដីសម្រេចដែលមានសំអាងហេតុយ៉ាងវែង។ ដូច្នេះ ខ្ញុំគិតថា ហាក់ដូចជាមានការរៀបចំ គិតទុកជាមុន ថារឿងហ្នឹងវាត្រូវទៅចឹង»។
ប្រធានគណបក្សភ្លើងទៀន លោក ទាវ វណ្ណុល មានប្រសាសន៍ប្រាប់អ្នកសារព័ត៌មាន ក្រោយចាកចេញពីសាលាឧទ្ធរណ៍ ថា លោកមិនអាចទទួលយកបាននោះទេ ចំពោះការផ្ដន្ទាទោសបែបនេះ ហើយលោកនឹងប្ដឹងសាទុក្ខទៅតុលាការកំពូលឆាប់ៗនេះ។
លោក វណ្ណុល បន្តថា អំឡុងពេលជំនុំជម្រះលោកពុំបានផ្ដល់សក្ខីកម្មណាមួយចំពោះមុខចៅក្រមឡើយ ដោយទុកឱ្យមេធាវីអត្ថាធិប្បាយជំនួស ក៏ព្រោះលោកបានបំភ្លឺចប់សព្វគ្រប់នៅឯសវនាការនៅតុលាការជាន់ទាប។
លោក ចាត់ទុកថា ការអត្ថាធិប្បាយរបស់លោកទាក់ទិននឹងប្រជាធិបតេយ្យថយចុះ និងការដាក់កាមេរ៉ាឃ្លាំមើលថ្នាក់ដឹកនាំបក្សភ្លើងទៀនដែលជាអង្គហេតុនៃសំណុំរឿង គឺជាផ្នែកមួយនៃសេរីភាពបញ្ចេញមតិ។
លោកថ្លែងថា៖ «ខ្ញុំមិនអាចទទួលយកបានទេ។ អ្វីដែលខ្ញុំធ្វើគឺជាសិទ្ធិរបស់អ្នកនយោបាយ អ្នកប្រជាធិបតេយ្យនៅក្នុងប្រទេសកម្ពុជាយើង»។
ចំណែកសមាជិកព្រឹទ្ធសភាកូតាបក្សឆន្ទៈខ្មែរលោក សេង ម៉ារឌី ដែលឡើងមកគាំទ្រផងដែរ ថ្លែងថា លោកពិបាកទទួលយកចំពោះប្រាក់បង់សងជំងឺចិត្តដ៏ច្រើនសន្ធឹកសន្ធាប់នេះ ហើយលោកយល់ថា លោក វណ្ណុល មិនបានប្រព្រឹត្តកំហុសឆ្គងអ្វីឡើយ។
លោកបន្ថែមថា៖ «វាហួសហេតុពេក ព្រោះវាពិបាកទទួលមែនទែន»។
កាលពីចុងខែកក្កដា ឆ្នាំ២០២៤ សាលាដំបូងរាជធានីភ្នំពេញ បានសម្រេចឱ្យប្រធានគណបក្សភ្លើងទៀនលោក ទាវ វណ្ណុល ចាញ់ក្ដីរាជរដ្ឋាភិបាល ដោយកាត់ទោសពីបទបរិហារកេរ្តិ៍ជាសាធារណៈ និងពិន័យជាប្រាក់១០លានរៀល និងបានបង្គាប់ឲ្យផ្ដល់សំណងទៅរាជរដ្ឋាភិបាលចំនួន៦ពាន់លានរៀល ឬប្រហែលនឹង១,៥លានដុល្លារអាមេរិក។
ការប្ដឹងផ្ដល់នេះកើតឡើងក្រោយលោក វណ្ណុល ផ្ដល់បទសម្ភាសន៍ឲ្យសារព័ត៌មានបរទេស ដែលលោកលើកឡើងថា ស្ថានភាពប្រជាធិបតេយ្យនៅកម្ពុជា «ដើរថយក្រោយ» ចាប់តាំងពីលោកនាយករដ្ឋមន្ត្រី ហ៊ុន ម៉ាណែត ឡើងកាន់អំណាច។ បន្ថែមពីនេះ លោកលើកឡើងថា រដ្ឋាភិបាលបានដំឡើងកាមេរ៉ាដើម្បីតាមដានសកម្មភាពមេដឹកនាំគណបក្សភ្លើងទៀនផងដែរ ប៉ុន្តែតុលាការអះអាងថា កាមេរ៉ាសុវត្ថិភាពទាំងនោះដំឡើងនៅតាមដងផ្លូវក្នុងន័យរក្សាសណ្ដាប់ធ្នាប់សាធារណៈ។
នាយកទទួលបន្ទុកកិច្ចការទូទៅនៃអង្គការ លីកាដូ លោក អំ សំអាត មានប្រសាសន៍ថា ក្នុងនាមអង្គការការពារសិទ្ធិមនុស្ស លោកសង្ឃឹមថា អ្នកនយោបាយគ្រប់និន្នាការបន្តវប្បធម៌សន្ទនា ដើម្បីបរិយាកាសនយោបាយមុនការបោះឆ្នោតខាងមុខមានភាពល្អប្រសើរ ចៀសវាងរងការរិះគន់នានាអំពីលំហនយោបាយមានការរឹតត្បិតជាដើម។
លោកថ្លែងថា៖ «យើងជាអង្គការសង្គមស៊ីវិល យើងចង់ឃើញអ្នកនយោបាយទាំងអស់គឺបន្តនូវវប្បធម៌សន្ទនា ដើម្បីធ្វើយ៉ាងម៉េចកែលម្អធ្វើឱ្យបរិយាកាសនយោបាយ ដែលការបោះឆ្នោតក្រុមប្រឹក្សាឃុំ សង្កាត់ និងការបោះឆ្នោតជាតិ ឆ្នាំ២០២៧–២០២៨ ជិតចូលមកដល់នេះ មានបរិយាកាសល្អប្រសើរ។ ការបោះឆ្នោតកុំឱ្យមានការរិះគន់ ទៅលើបញ្ហាលំហសេរីភាពនយោបាយ អីជាដើម»៕
