កាលពីព្រឹកថ្ងៃអង្គារ សាលាឧទ្ធរណ៍រាជធានីភ្នំពេញ បានសម្រេចតម្កល់ការផ្តន្ទាទោសលើសកម្មជននយោបាយពីររូបមកពីគណបក្សកម្លាំងជាតិ (NPP) និងកម្មករដឹកសម្ភារៈសំណង់មួយរូប ដែលក្នុងនោះ អ្នកទាំងពីត្រូវបានកាត់ទោសឱ្យជាប់ពន្ធនាគាររយៈពេល១៨ខែ ពីបទញុះញង់ នេះបើយោងតាមអង្គការសិទ្ធិមនុស្ស លីកាដូ។
លោក ឌឹម គៀង ជាសមាជិកក្រុមការងារបណ្តោះអាសន្នរបស់គណបក្សកម្លាំងជាតិក្នុងខេត្តកំពង់ស្ពឺ និងលោក ឃូ ហាំមាង ជាអ្នកគាំទ្រគណបក្សកម្លាំងជាតិ ត្រូវបានចាប់ខ្លួនកាលពីខែមិថុនា ឆ្នាំ២០២៥ ខណៈលោក ឈឿន ឈាន កម្មករសំណង់ និងជាអ្នកប្រើប្រាស់បណ្តាញសង្គម ត្រូវបានចាប់ខ្លួនកាលពីខែកក្កដា ឆ្នាំមុន។
អង្គការលីកាដូ បានអះអាងថា បុរសទាំងបីនាក់នេះ ស្ថិតក្នុងចំណោម «អ្នកទោសមនសិការ» ចំនួន១០៩នាក់ ដែលត្រូវបានឃុំខ្លួនក្នុងពន្ធនាគារ ដោយសារតែសកម្មភាពតស៊ូមតិ ឬការអនុវត្តសេរីភាពនៃការបញ្ចេញមតិរបស់ពួកគេ។
អង្គការបានឱ្យដឹងទៀតថា លោក ឌឹម គៀង ត្រូវបានចាប់ខ្លួនដោយផ្អែកលើការសន្ទនាឯកជន និងត្រូវបានចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»និងបទ «ប្រមាថ» តាមមាត្រា៤៩៤ ៤៩៥និង៥០២ នៃក្រមព្រហ្មទណ្ឌ។
លោក ឃូ ហាំមាង ត្រូវបានចោទប្រកាន់ពីបទញុះញង់កាលពីខែធ្នូ ឆ្នាំមុន ដោយសារការបញ្ចេញមតិតាមបណ្តាញសង្គមអំពីរបៀបដែលរដ្ឋាភិបាលដោះស្រាយបញ្ហាព្រំដែនកម្ពុជា-ថៃ។
ទន្ទឹមនឹងនេះ លោក ឈឿន ឈាន ត្រូវបានចោទប្រកាន់ពីបទញុះញង់ឱ្យមានការរើសអើង បរិហារកេរ្តិ៍ជាសាធារណៈ និងបទជេរប្រមាថជាសាធារណៈ តាមមាត្រា៤៩៦ មាត្រា៣០៥ និងមាត្រា៣០៧ នៃក្រមព្រហ្មទណ្ឌ។
លោក អំ សំអាត នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ បានសម្តែងការសោកស្ដាយចំពោះសេចក្តីសម្រេចរបស់តុលាការ ដោយលោកកត់សម្គាល់ថា ការតម្កល់ការផ្តន្ទាទោសនេះ អាចបង្កឲ្យមានការរិះគន់បន្ថែមទៀតពីអង្គការសិទ្ធិមនុស្សជាតិ និងអន្តរជាតិទាក់ទងនឹងការរឹតត្បិតសេរីភាពក្នុងការបញ្ចេញមតិ។
លោកបានមានប្រសាសន៍ថា៖ «ការរក្សាសាលក្រមនេះ អាចនាំឱ្យមានការរិះគន់ជាបន្តទាក់ទងនឹងការរឹតត្បិតសេរីភាពនៃការបញ្ចេញមតិ»។
អ្នកស្រី ឡេង រ៉ានីត ភរិយារបស់លោក ឃូ ហាំមាង បាននិយាយថា ទោះបីជាស្វាមីរបស់អ្នកស្រីនៅសល់ពេលត្រឹមតែពីរខែទៀតប៉ុណ្ណោះ ក្នុងការអនុវត្តទោសរបស់គាត់ក៏ដោយ ក៏អ្នកស្រីនឹងបន្តដាក់ពាក្យបណ្តឹងឧទ្ធរណ៍ទៅតុលាការកំពូល ព្រោះអ្នកស្រីជឿថា តុលាការខ្វះភស្តុតាង ដើម្បីផ្តន្ទាទោសគាត់។
អ្នកស្រីនិយាយថា៖ «តាមអ្វីដែលខ្ញុំបានឮនៅក្នុងតុលាការ មិនមានភស្តុតាងគ្រប់គ្រាន់ ដើម្បីចោទប្រកាន់គាត់ពីបទញុះញង់ទេ។ វាមិនសមហេតុផលទេ។ ដូច្នេះ ជម្រើសតែមួយគត់ គឺត្រូវបន្តទៅតុលាការកំពូល»។
អ្នកស្រី រ៉ានីត បាននិយាយថា ដំណើរការជំនុំជម្រះរបស់តុលាការផ្តោតលើមតិយោបល់របស់គាត់តាមអនឡាញ និងការចែករំលែកព័ត៌មានទាក់ទងនឹងបញ្ហាព្រំដែន។ លោក ឃូ ហាំមាង ត្រូវបានចាប់ខ្លួននៅថ្ងៃទី១១ ខែមិថុនា ឆ្នាំ២០២៥ ហើយនឹងត្រូវអនុវត្តទោសរហូតដល់ថ្ងៃទី១៥ ខែធ្នូ ឆ្នាំ២០២៦។
អ្នកស្រី រ៉ានីត បានបន្តទៀតថា បច្ចុប្បន្ន គ្រួសាររបស់អ្នកស្រីកំពុងប្រឈមនឹងការលំបាក បន្ទាប់ពីស្វាមីរបស់អ្នកស្រីត្រូវបានឃុំខ្លួន។ អ្នកស្រីធ្វើការនៅរោងចក្រមួយ ហើយត្រូវចិញ្ចឹមកូនពីរនាក់តែម្នាក់ឯង ដែលកូនម្នាក់រៀនថ្នាក់ទី៧ និងកូនម្នាក់ទៀតរៀនថ្នាក់ទី៨។ ផ្ទះរបស់អ្នកស្រី ដែលបានទិញដោយប្រើប្រាក់កម្ចីទិញផ្ទះ ត្រូវបានប្រកាសដាក់លក់ ព្រោះអ្នកស្រីលែងមានលទ្ធភាពបង់រំលស់ប្រចាំខែទៀតហើយ។
លោក ឯម ចន្ថា ជាមេធាវីការពារក្តីឱ្យលោក ហាំមាង បានចាត់ទុកសេចក្តីសម្រេចរបស់សាលាឧទ្ធរណ៍ថា ជារឿងអយុត្តិធម៌ ដោយសំណុំរឿងនេះ កើតឡើងដោយសារតែការបញ្ចេញមតិតាមបណ្តាញសង្គមប៉ុណ្ណោះ។
លោក ឯម ចន្ថា បានមានប្រសាសន៍ថា៖ “សាលាឧទ្ធរណ៍មិនបានពិចារណាលើអំណះអំណាងដែលកូនក្តីខ្ញុំបានបង្ហាញនោះទេ ហើយគ្រាន់តែតម្កល់សេចក្តីសន្និដ្ឋានរបស់សាលាដំបូងប៉ុណ្ណោះ”។
លោក សុខ គឹមសេង អនុប្រធានគណបក្សកម្លាំងជាតិយល់ថា ការសម្រេចនេះមិនយុត្តិធម៌ទេ ដោយអះអាងថា សកម្មជននយោបាយទាំងពីរនាក់គួរតែទទួលបានសិទ្ធិស្មើគ្នានៅចំពោះមុខច្បាប់។
លោកមានប្រសាសន៍ថា៖ “គណបក្សកម្លាំងជាតិ អំពាវនាវជាបន្តបន្ទាប់ឱ្យតុលាការធានានូវយុត្តិធម៌សម្រាប់សកម្មជន និងមេដឹកនាំនយោបាយ ក៏ដូចជាសកម្មជនសិទ្ធិមនុស្ស និងសកម្មជនបរិស្ថានផងដែរ។ ទាក់ទងនឹងតួនាទី និងកាតព្វកិច្ចរបស់ពួកគេ ជាពលរដ្ឋខ្មែរ ដូចដែលបានចែងក្នុងរដ្ឋធម្មនុញ្ញ ពួកគេមិនបានប្រព្រឹត្តកំហុសអ្វីឡើយ”។
យោងតាមលោក គឹមសេង បានឱ្យដឹងថា បច្ចុប្បន្ន មានសកម្មជនរបស់គណបក្សកម្លាំងជាតិចំនួន១៨នាក់កំពុងជាប់ពន្ធនា ដែលតាមចោទថា ដោយសារសកម្មភាពនយោបាយ និងការអនុវត្តសិទ្ធិរបស់ពួកគេ៕
