ប្រជាពលរដ្ឋខេត្តពោធិ៍សាត់ចំនួនជាង៧ពាន់គ្រួសារ តំណាងឱ្យជាង១ម៉ឺនគ្រួសារ បានទទួលពូជស្រូវពីរដ្ឋាភិបាលកាលពីថ្ងៃទី៥ ខែវិច្ឆិកា ឆ្នាំ២០២៦ បន្ទាប់ពីរងផលប៉ះពាល់ដោយគ្រោះទឹកជំនន់។
នេះជាលើកទី២ហើយដែលរដ្ឋាភិបាលបានចែកពូជស្រូវ និងស្បៀងដល់ប្រជាពលរដ្ឋ ដែលលើកទី១ បានធ្វើឡើងជូនប្រជាពលរដ្ឋដែលរងផលប៉ះពាល់ដោយទឹកជំនន់ជាង១ម៉ឺនគ្រួសារក្នុងខេត្តបាត់ដំបង។ តែយ៉ាងណាមិញ មានខេត្តចំនួន៧បានរងការប៉ះពាល់ពីគ្រោះធម្មជាតិទឹកជំនន់។
លោកនាយករដ្ឋមន្រ្តីបានថ្លែងក្នុងកម្មវិធីចែកពូជស្រូវដល់ប្រជាពលរដ្ឋក្នុងខេត្តពោធិ៍សាត់នៅថ្ងៃទី៥ ខែវិច្ឆិកាថា៖ «យើងមាន៧ ខេត្ត ដែលប៉ះពាល់នូវទឹកជំនន់ ១៣ម៉ឺនគ្រួសារ ជួបផ្ទាល់ ជាងមួយមុឺនគ្រួសារ នៅសល់ជាង១០មុឺនទៀតត្រូវជួយពួកគាត់ ជាពិសេស ការដាំដុះឡើងវិញ ក្រសួងកសិកម្មត្រូវចុះជួយ ព្រោះ ឥឡូវយើងព្យាករ និងកាត់បន្ថយហានិភ័យ អ៊ែលនីញ៉ូ (El Niño )»។
ខេត្តពោធិ៍សាត់ ជាខេត្តមួយក្នុងចំណោមខេត្តទាំង៧ទៀត ដែលរងផលប៉ះពាល់ពីគ្រោះរាំងស្ងួត និង គ្រោះទឹកជំនន់កន្លងមកនេះ។
ស្របពេលជាមួយគ្នានេះ អភិបាលខេត្តពោធិ៍សាត់ លោក ខូយ រីដា បានរាយការណ៏ថា ផ្ទៃដីប៉ះពាល់សរុបមាន ៧៣ ៣៨៧ ហិកតា។ លោកបន្តថា មន្ទីរជំនាញសង្គ្រោះបានទាន់ពេលវេលាចំនួន ៥០ ៧៦៨ ហិកតា ខូចខាតដំណាំស្រូវលើផ្ទៃដី ២២ ៩១៦ ហិកតា និងផ្ទៃដីត្រូវស្តារឡើងវិញចំនួន ៣ ៣៧៧ ហិកតា។
បន្ទាប់ពីគ្រោះរាំងស្ងួត ធ្វើឱ្យខូចខាតដំណាំស្រូវនិងដំណាំផ្សេងៗ លោកបន្តថា ខេត្តពោធិ៍សាត់ក៏ទទួលរងនូវឥទ្ធិពលភ្លៀងធ្លាក់ជាបន្តបន្ទាប់ ដែលនាំឱ្យមានទឹកជំនន់ដល់តំបន់មួយចំនួន ហើយប៉ះពាល់ដល់ការរស់នៅ និងប្រកបរបរចិញ្ចឹមជីវិត ព្រមទាំងផលិតកម្មនិងកសិកម្មរបស់ប្រជាពលរដ្ឋ ។
ក្នុងនោះ មានកម្មវិធីចែកពូជស្រូវ និងស្បៀង មានពលរដ្ឋចំនួន ១ ៥៧៩ គ្រួសារ ទទួលស្រូវពូជ ដើម្បីជួយសម្រួលដល់ការស្តារផលិតកម្មស្រូវឡើងវិញ និង៩ ៤២១គ្រួសារទទួលស្បៀង ដើម្បីជួយបំពេញតម្រូវការចាំបាច់ក្នុងជីវភាពប្រចាំថ្ងៃ។
យោងតាមក្រសួងធនធានទឹក និងឧតុនិយមបានឱ្យដឹងថា រដូវវស្សាត្រូវបានបញ្ចប់នៅសប្តាហ៍ទីបីនៃខែតុលា ហើយបានព្យាករណ៍ថា លទ្ធភាព ១០០% ដែលបាតុភូត El Niño នឹងបន្តកើតមានរហូតដល់ខែកុម្ភៈ ឆ្នាំ ២០២៧។
តែយ៉ាងណាក៏ដោយ លោកនាយករដ្ឋមន្រ្តី ហ៊ុន ម៉ាណែត បានលើកឡើងថា ការចែកពូជស្រូវជូនកសិករនៅខេត្តពោធិ៍សាត់នេះ មិនទាន់អាចដោះស្រាយបញ្ហា ការប្រឈមរបស់កសិករក្នុងខេត្តនេះបាននៅឡើយទេ ដោយសារក្រៅតែពីបញ្ហាគ្រោះធម្មជាតិ កសិករក៏រងគ្រោះពីរការបិទព្រំដែន។
ចំពោះផលប៉ះពាល់ជាក់ស្តែងនៅតាមសហគមន៍ លោក វ៉ាន់ សារ៉ាន់ ដែលជាកសិកររស់នៅក្នុងឃុំស្វាយអាត់ ខេត្តពោធិ៍សាត់ បានឱ្យដឹងថា ផ្ទៃដីស្រែក្នុងឃុំរបស់លោកប្រមាណ ៤០០ទៅ៥០០ហិកតា បានរងការខូចខាត ដោយសារគ្រោះរាំងស្ងួត និងទឹកជំនន់ជាបន្តបន្ទាប់។
ក្នុងនោះ ដីស្រែដែលលោកធ្វើមានទំហំ១ហិកតា ក៏រងផលប៉ះពាល់ផងដែរ ក្នុងអឡុងពេលមានគ្រោះទឹកជំនន់។ លោកបានខាតបង់ទឹកប្រាក់ប្រមាណ ៨០ម៉ឺនរៀលពីការខូតខាតស្រូវនេះ។ លោកមិនមានផែនការក្នុងការធ្វើស្រែនារដូវប្រាំងឡើយ ដោយបារម្ភពីបញ្ហាគ្រោះរាំងស្ងួត។
លោកបាននិយាយថា៖ «ខ្ញុំខាត៨០មុឺន[រៀល] ហើយបើធ្វើស្រែប្រាំងទៀត បើអត់មានទឹកបូមទៀត ខ្លាចខាតកាន់តែខ្លាំង។»
តែយ៉ាងណាមិញ លោកសារ៉ាន់ មិនទាន់ទទួលបាន ស្បៀង ឬស្រូវពូជនៅឡើយទេ តែលោកបានសម្តែងការសប្បាយចិត្តដែលរដ្ឋាភិបាលបានចែកស្រូវពូជជូនពលរដ្ឋរងគ្រោះ។
អ្នកស្រី ច្រឹក សុភា អ្នកសម្របសម្រួលអង្គការសកម្មភាពសង្គមដើម្បីសហគមន៍ និងការអភិវឌ្ឍន៍ បានបង្ហាញការស្វាមគមន៍ចំពោះចំណាត់ការរបស់រដ្ឋាភិបាល ដោយលើកឡើងថា ការផ្តល់ពូជ ដល់កសិករដែលរងគ្រោះដោយគ្រោះមហន្តរាយ គឺជាការឆ្លើយតបដ៏ចាំបាច់មួយ ដើម្បីជួយស្តារផលិតកម្មស្បៀង និងធានាសន្តិសុខស្បៀង។
តែយ៉ាងណាមិញ អ្នកស្រីក៏សង្កត់ធ្ងន់លើសារសំខាន់នៃការជ្រើសរើសពូជដែលសមស្របនឺងសណ្ឋានដី។
អ្នកស្រីនិយាយថា៖ «វាកាន់តែចាំបាច់ ក្នុងការផ្តល់ឱ្យពួកគាត់ [កសិករ] នូវគ្រាប់ពូជ ដែលអាចដាំដុះសមស្របសណ្ឋានដី និងអាកាសធាតុនៅមូលដ្ឋាន។ ចំណុចសំខាន់មួយទៀត ប្រសិនបើពូជនោះ ជាពូជក្នុងស្រុកដែលមិនត្រូវការធាតុចូលកសិកម្ម ដូចជាជី ថ្នាំច្រើនលើសលុប។»
អ្នកស្រីបន្តថា ការលើកកម្ពស់ពូជក្នុងស្រុកពូជបុរាណជាការចាំបាច់ ព្រោះវាជាការជម្រុញរក្សាការពារ និងស្ដារអធិបតេយ្យអត្តសញ្ញាណរបសពួកកសិករខ្មែរ ព្រមទាំងជួយកាត់បន្ថយការពឹងផ្អែកលើពូជទីផ្សារ ដែលតម្រូវឱ្យមានការចំណាយប្រាក់ក្នុងទិញ ខណៈពូជមួយចំនួនធំមិនអាចរក្សាទុកសម្រាប់ដាំដុះនៅរដូវបន្ទាប់បានឡើយ។
អ្នកស្រីបានបន្ថែមថា អ្នកស្រីជំរុញឱ្យរដ្ឋាភិបាលគាំទ្រដល់កសិករខ្នាតតូច តាមរយៈការធានាលំនឹងតម្លៃកសិផលនៅពេលប្រមូលផល និងពិចារណាដោះស្រាយបំណុលកសិករដែលអ្នកស្រីចាត់ទុកថា ជាបញ្ហាធ្ងន់ធ្ងរក្នុងជីវភាពរបស់ពួកគេ។
