រដ្ឋាភិបាលបានអនុម័តលើសេចក្តីព្រាងថវិកាជាតិឆ្នាំ២០២៧ ដែលការចំណាយនឹងកើនឡើង៣,២ភាគរយ ខណៈការព្យាករកំណើនសេដ្ឋកិច្ចថាកើនឡើងលឿនជាងអ្វីដែលស្ថាប័នមូលនិធិរូបិយវត្ថុអន្តរជាតិ និងធនាគារពិភពលោកបានរំពឹងទុក។
សេចក្ដីព្រាងថវិកាជាតិ ដែលរដ្ឋាភិបាលបានអនុម័តកាលពីថ្ងៃសុក្រ រដ្ឋាភិបាលគ្រោងចំណាយថវិកា៣៩,៧ទ្រីលានរៀល ឬប្រហែលនឹង៩,៨ពាន់លានដុល្លារ ដែលតួលេខនេះកើនពី៣៨,៥ទ្រីលានរៀល ឬ៩,៥ពាន់លានដុល្លារ សម្រាប់កញ្ចប់ថវិកាជាតិឆ្នាំ២០២៦។ នេះបើតាមសេចក្ដីថ្លែងការណ៍របស់រដ្ឋាភិបាល។ ចំណែកចំណូលវិញ រដ្ឋាភិបាលប៉ាន់ប្រមាណថានឹងរកបាន៣២,៣ទ្រីលានរៀល ឬប្រហែល៨ពាន់លានដុល្លារ កើនឡើង៦,៧ភាគរយ។
កាលពីឆ្នាំមុនរដ្ឋាភិបាលបានប្រកាសថា ថវិកាជាតិសម្រាប់ឆ្នាំ២០២៦ គឺ៤០,៩ទ្រីលានរៀល ឬប្រហែល១០,១ពាន់លានដុល្លារ ហើយតួលេខនេះគឺត្រូវបានផ្សព្វផ្សាយយ៉ាងទូលំទូលាយថាជាទំហំថវិកាជាតិ។ កញ្ចប់ថវិកានេះគឺគិតរួមទាំងការចំណាយនៅរដ្ឋបាលថ្នាក់ក្រោមជាតិ និងថ្នាក់ជាតិ។
រដ្ឋាភិបាលបានលើកឡើងថា អាទិភាពរបស់ថវិកាជាតិគឺដើម្បី «ការពារអធិបតេយ្យភាពជាតិ និងបូរណភាពជាតិ» ព្រមជាមួយការរក្សាស្ថិរភាពជាតិ និងជីវភាពរបស់ប្រជាពលរដ្ឋ ក្នុងពេលដែលពិភពលោកកំពុងស្ថិតក្នុងភាពមិនប្រាកដប្រជា។ យ៉ាងណាតួលេខរបស់ថវិកាជាតិនេះមិនទាន់បានបង្ហាញពីការបែងចែកកញ្ចប់ថវិកាទៅតាមវិស័យមួយៗនៅឡើយ។
រដ្ឋាភិបាលក៏បានព្យាករកំណើនសេដ្ឋកិច្ចជាតិសម្រាប់ឆ្នាំ២០២៧ ដោយថាមានកំណើន៤,៨ភាគរយ ខណៈឆ្នាំនេះព្យាករថាមានត្រឹម៤ភាគរយ។ នេះបើតាមសេចក្ដីថ្លែងការណ៍ដដែល។ ចំណែកមូលនិធិរូបិយវត្ថុអន្តរជាតិ និងធនាគារពិភពលោកបានព្យាករថា កំណើនសេដ្ឋកិច្ចកម្ពុជាមាន៤ភាគរយនៅឆ្នាំ២០២៧ និងរំពឹងថាកំណើននឹងចុះខ្សោយជាងអ្វីដែលរដ្ឋាភិបាលរំពឹងទុកសម្រាប់ឆ្នាំ២០២៦។ ធនាគារអភិវឌ្ឍន៍អាស៊ី កាលពីខែមុនបានបន្ថយការព្យាកររបស់ខ្លួនសម្រាប់ឆ្នាំ២០២៦មកនៅ៣,៩ភាគរយ និងរំពឹងថាសេដ្ឋកិច្ចនឹងកើនឡើង៤,៧ភាគរយនៅឆ្នាំ២០២៧។
ស្ថាប័នអន្តរជាតិទាំងនោះរំពឹងបែបនេះដោយផ្អែកលើតម្លៃថាមពលកើនឡើង ចំនួនភ្ញៀវទេសចរធ្លាក់ចុះ និងការមិនទាន់កម្រើកឡើងវិញនៃវិស័យអចលនទ្រព្យ។ មូលនិធិរូបិយវត្ថុអន្តរជាតិក៏បានគូសបញ្ជាក់ពីការធ្លាក់ចុះនៃចំនួនប្រាក់ផ្ញើពីបរទេសមកក្នុងស្រុក ក្រោយពលករកម្ពុជាជិត១លាននាក់បានត្រឡប់ពីថៃមកកម្ពុជាវិញ បន្ទាប់ពីមានជម្លោះព្រំដែន និងថាសកម្មភាពឆបោកតាមអនឡាញក៏ជាហានិភ័យមួយដែរ។
តួលេខចុងក្រោយដែលបានបញ្ចេញជាមួយនឹងសេចក្ដីព្រាងថវិកា បានបង្ហាញថា រដ្ឋាភិបាលរកចំណូលបាន៧ភាគរយច្រើនជាងផែនការដែលគ្រោងទុកកាលពីឆ្នាំ២០២៥ ប៉ុន្តែថាការចំណាយមានទាបជាងផែនការ៧ភាគរយដែរ។
អ្នកនាំពាក្យក្រសួងសេដ្ឋកិច្ចលោក មាស សុខសេនសាន បដិសេធអត្ថាធិប្បាយលើរឿងនេះ និងបានបង្វែរឲ្យអ្នកសារព័ត៌មានយោងតាមសេចក្ដីថ្លែងការណ៍របស់រដ្ឋាភិបាលវិញ។
លោក ម៉ារ សុផល លេខាធិការក្រុមការងារថវិការបស់អង្គការ NGO Forum មានប្រសាសន៍ថា លោកជឿថារដ្ឋាភិបាលបានកាត់ចំណាយខ្លះ រួមទាំងការវិនិយោគសាធារណៈ ដោយសារតែភាពមិនច្បាស់លាស់របស់ពិភពលោក។
លោកឲ្យដឹងថា៖ «រាជរដ្ឋាភិបាលបានកាត់បន្ថយការចំណាយ រួមទាំងការវិនិយោគសាធារណៈ»។ លោកបន្ថែមថា គម្រោងហេដ្ឋារចនាសម្ព័ន្ធមួយចំនួន «អាចត្រូវពន្យារពេល»។
សេចក្ដីព្រាងថវិកានេះនឹងត្រូវបញ្ជូនទៅសភាជាតិ និងក្រោយពីនេះនឹងត្រូវបញ្ជូនទៅព្រឹទ្ធសភា ដែលស្ថាប័នទាំងពីរគ្រប់គ្រងស្ទើរទាំងស្រុងដោយគណបក្សប្រជាជនកម្ពុជា។ ក្រោយទទួលបានការអនុម័តពីស្ថាប័នទាំងពីរ សេចក្ដីព្រាងថវិកានឹងត្រូវបញ្ជូនបន្តទៅថ្វាយព្រះមហាក្សត្រឡាយព្រះហត្ថលេខាជាចុងក្រោយ៕
ប្រែសម្រួលពីអត្ថបទភាសាអង់គ្លេស៖ Draft 2027 Budget Proposes $9.8 Billion National Spending, Up 3.2%
