រដ្ឋាភិបាលបង្កើតអង្គភាពសម្របសម្រួលសហគ្រាសធុនតូច និងមធ្យម(SME)ដែលនឹងត្រូវដើរតួជាច្រកចេញចូលតែមួយ ក្នុងការដោះស្រាយបញ្ហានានាដែលវិស័យនេះកំពុងជួបប្រទះ និងជួយពង្រឹងដល់វិស័យមួយនេះបន្ថែមទៀត បន្ទាប់ពីប្រជាពលរដ្ឋកម្ពុជាជាច្រើនបានពហិការទំនិញថៃក្រោយប្រទេសទាំងពីរមានជម្លោះព្រំដែននឹងគ្នា។
លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី៤ ខែតុលា បានចុះពិនិត្យវឌ្ឍនភាពនៃការងាររៀបចំអង្គភាពសម្របសម្រួលសហគ្រាសធុនតូច និងមធ្យម(SME) ហៅកាត់ថា អ.ស.ម.ត. ដែលនឹងត្រូវសម្របសម្រួលផ្ដល់សេវាការស្នើចុះបញ្ជី ការផ្ដល់ ឬការបន្តអាជ្ញាបណ្ណ និងឬលិខិតអនុញ្ញាតផ្សេងៗរបស់សហគ្រាសធុនតូចនិងមធ្យម ព្រមទាំងតាមដានការអនុវត្តការលើកទឹកចិត្តដែលឆ្លងកាត់តាមអង្គភាពសម្របសម្រួលនេះ។ សេវាកម្មនេះនឹងអាចធ្វើទៅបានទាំងនៅការិយាល័យផ្ទាល់ និងតាមប្រព័ន្ធអនឡាញ។
ការវិវឌ្ឍនេះកើតចេញពីសន្ទុះនៃយុទ្ធនាការពិហិកាផលិតផលថៃ ក្រោយប្រទេសទាំងពីរមានជម្លោះព្រំដែនកាលពីឆ្នាំមុនទាក់ទងនឹងដែនដីត្រូវគ្រប់គ្រង។ មុនមានការប៉ះទង្គិចគ្នានៅតាមព្រំដែនប្រទេសទាំងពីរក៏បានដាក់ចេញនូវវិធានការរឹតត្បិតលើពាណិជ្ជកម្មឆ្លងដែនផងដែរ។
លោក ហ៊ុន ម៉ាណែត បានហៅកំណែទម្រង់នេះថា ជាការសម្រួលដល់ការចុះបញ្ជី និងផ្ដល់អាជ្ញាបណ្ណដល់ពាណិជ្ជករដែលចង់បង្កើតសហគ្រាស ដោយបានដកចេញនូវរបាំងនានារាំងស្ទះដល់ផលិតផលក្នុងស្រុក និងកាត់បន្ថយការពឹងផ្អែកលើទំនិញនាំចូល។
លោកសរសេរលើទំព័រហ្វេសប៊ុកថា៖ «អង្គភាពសម្របសម្រួលសហគ្រាសធុនតូចនិងមធ្យមនឹងដើរតួជាអ្នកសម្របសម្រួលជាមួយគ្រប់ក្រសួង-ស្ថាប័នពាក់ព័ន្ធទាំងអស់តាំងពីដើមដល់ចប់ ដែលវិធានការនេះនឹងជួយកាត់បន្ថយភាពស្មុគស្មាញ ពេលវេលា និងការចំណាយនានាសម្រាប់សហគ្រាសធុនតូច និងមធ្យម។
លោកបន្ថែមថា ការបង្កើតអង្គភាពនេះគឺជាវិធានការជាក់លាក់ថ្មីមួយ ក្នុងចំណោមវិធានការនិងការលើកទឹកចិត្តថ្មីៗមួយចំនួនដែលរាជរដ្ឋាភិបាលបាននិងកំពុងរៀបចំ ហើយត្រូវដាក់ចេញក្នុងពេលឆាប់ៗខាងមុខ ក្នុងគោលបំណងជំរុញបន្ថែមការអភិវឌ្ឍសហគ្រាសធុនតូចនិងមធ្យមនៅកម្ពុជា។
កាលពីពាក់កណ្ដាលខែកញ្ញា រដ្ឋាភិបាលបានបង្កើតគណៈកម្មការមួយដើម្បីអនុវត្តផែនការយុទ្ធសាស្រ្តជាតិឆ្នាំ២០២៦-២០៣០ សម្រាប់សហគ្រាសធុនតូច និងមធ្យម ដោយមានភារកិច្ចសម្របសម្រួលគោលនយោបាយ និងដោះស្រាយបញ្ហាអន្តរក្រសួង។
បើតាមតួលេខរបស់រដ្ឋាភិបាលសហគ្រាសធុនតូច និងមធ្យម និងសិប្បកម្មប្រហែល ៤៥ ០០០ បានចុះបញ្ជី និងបានរួមចំណែកដល់ផលិតផលជាតិសរុប៥៨ភាគរយក្នុងឆ្នាំ២០២៥។
អ្នកស្រី នុត សម្ផស្ស ជាស្ថាបនិកក្រុមហ៊ុន អិលអេសវី អ៊ិនដាស្ទ្រី (LSV Industry) មានទីតាំងនៅភ្នំពេញ ដែលជាក្រុមហ៊ុនផលិតសាប៊ូ និងទឹកលាងដៃសម្លាប់មេរោគជាដើម។ អ្នកស្រីសាទរចំពោះវិធានការនេះ ដោយថាអង្គភាពនេះនឹងជួយសន្សំពេលវេលារបស់ម្ចាស់សហគ្រាសក្នុងការចុះបញ្ជី និងនីតិវិធីផ្សេងៗទៀត។ អ្នកស្រីបន្តថាវិធានការនេះក៏នឹងជួយលើកទឹកចិត្តដល់សហគ្រាសក្នុងការពង្រីកខ្លួនផងដែរ។
អ្នកស្រីបន្ថែមថា៖ «ខ្ញុំជឿថាវិធានការនេះនឹងផ្ដល់នូវការគាំទ្រដ៏មានសារសំខាន់ចំពោះសគ្រាសធុនតូច និងមធ្យមដែលមានស្រាប់»។ អ្នកស្រីបន្តថា វិធានការនេះក៏នឹងសម្រួលដល់ការទទួលបានការគាំទ្របច្ចេកទេស ការកសាងសមត្ថភាព និងសេវាផ្សេងៗ។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានប្រាប់សារព័ត៌មានខេមបូចាថា សហគ្រាសធុនតូច និងមធ្យមត្រូវការជាចាំបាច់នូវយន្តការបែបនេះ ដោយសារថាកន្លងមកពាណិជ្ជករទាំងនោះត្រូវចំណាយពេលច្រើនក្នុងការស្នើសុំចុះបញ្ជី និងការរៀបចំឯកសារផ្លូវច្បាប់នានា។
លោកឲ្យដឹងថា៖ «ពេលយើងចាប់ផ្ដើមធ្វើយុទ្ធនាការពហិការផលិតផល[ថៃ]ទាំងនោះ យើងត្រូវតែជំរុញផលិតផលក្នុងស្រុកឲ្យខ្លាំង។ ប៉ុន្តែកាលពីមុន ឯកសារផ្លូវច្បាប់នានាសម្រាប់ [SME] គឺមានភាពយឺតយាវ និងពាក់ព័ន្ធជាមួយក្រសួងច្រើន»។
លោកបន្ថែមថា យន្តការថ្មីនេះនឹងអាចជួយជំរុញកំណើនសហគ្រាសធុនតូច និងមធ្យមច្រើន ដែលអាចនាំឲ្យមានការផ្គត់ផ្គង់ទំនិញបានច្រើនសម្រាប់ទីផ្សារក្នុងស្រុក និងត្រៀមនាំចេញទៅបរទេស។
មុនមានជម្លោះព្រំដែនជាមួយថៃ ផលិតផលក្នុងស្រុករបស់កម្ពុជាមានទំហំតូចនៅលើទីផ្សារ ប៉ុន្តែក្រោយមានយុទ្ធនាការពហិការទំនិញថៃ ធ្វើឲ្យផលិតផលក្នុងស្រុកកើនឡើងក្នុងចំណែកទីផ្សារប្រហែល៣០ភាគរយ។
លោកក៏បានចង្អុលបង្ហាញដែរថា បញ្ហាប្រឈមបន្ទាប់គឺការកាត់បន្ថយថ្លៃដើម បង្កើនល្បឿនផលិត និងធានាថាផលិតផលមានគុណភាពតាមស្ដង់ដារ។
បន្ថែមពីនេះ សហគ្រាសធុនតូច និងមធ្យម ក៏ប្រឈមនឹងការទទួលបានទុនវិនិយោគ និងកម្ចីពីធនាគារ បញ្ហារដ្ឋបាលស្មុគស្មាញ និងមានការលំបាកក្នុងការប្រកួតប្រជែងជាមួយក្រុមហ៊ុនបរទេស។
លោក តែ តាំងប៉ មានប្រសាសន៍ទៀតថា បញ្ហាដើមទុននៅតែជាកង្វល់ដ៏ធំមួយ ហេតុនេះទើបសម្ព័ន្ធសមាគមសហគ្រាសធុនតូច និងមធ្យមកម្ពុជា មានផែនការរៀបចំចុះអនុសារណៈយោគយល់ជាមួយធនាគារអភិវឌ្ឍន៍ជនបទ និងកសិកម្ម ដែលមានកិច្ចសហការជាមួយធនាគារសហគ្រាសធុនតូច និងមធ្យម។ មូលនិធិសម្រាប់ផ្ដល់កម្ចីសម្រាប់សហគ្រាសទាំងនោះមានប្រហែល១ពាន់លានដុល្លារ។
លោកឲ្យដឹងទៀតថា អត្រាការប្រាក់អាចចរចាគ្នាបាន ប៉ុន្តែលោកក៏ជំរុញឲ្យសហគ្រាសទាំងឡាយឲ្យពិចារណាក្នុងការខ្ចីដោយយកចិត្តទុកដាក់ និងធានាថាកម្ចីទាំងនោះនឹងត្រូវប្រើប្រាស់ឲ្យចំគោលដៅ៕
ប្រែសម្រួលពីអត្ថបទភាសាអង់គ្លេស៖ New SME Unit to Cut Red Tape, Support Local Businesses
