រដ្ឋមន្ត្រីការបរទេសកម្ពុជាកាលពីថ្ងៃអង្គារបានទាមទារឱ្យថៃដកទ័ពរបស់ខ្លួនចេញពីទឹកដីរបស់កម្ពុជា ដោយលោកប្រមុខការទូតបញ្ជាក់ប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុងហ្សឺណែវ ថា វត្តមានកងទ័ពថៃលើទឹកដីកម្ពុជា បានបង្កជាឧបសគ្គដល់ការវិលត្រឡប់របស់ជនភៀសសឹកកម្ពុជាទៅកាន់លំនៅឋានវិញ។
សេចក្ដីថ្លែងការណ៍របស់រដ្ឋមន្ត្រីការបរទេស លោក ប្រាក់ សុខុន បានបញ្ជាក់បន្ថែមលើការលើកឡើងរបស់លោកនាយករដ្ឋមន្ត្រី ហ៊ុន ម៉ាណែត ដែលបានចោទប្រកាន់ភាគីថៃថា បានចូលកាន់កាប់ទឹកដីកម្ពុជាដោយខុសច្បាប់នៅតាមទីប្រជុំជនជាប់ព្រំដែន ក្រោយមានការប៉ះទង្គិចគ្នានៅតាមបន្ទាត់ព្រំដែនកាលពីឆ្នាំមុន។ ការលើកឡើងរបស់លោកនាយករដ្ឋមន្ត្រីបែបនេះ គឺធ្វើឡើងក្នុងអំឡុងពេលលោកធ្វើទស្សនកិច្ចនៅសហរដ្ឋអាមេរិក និងអ៊ឺរ៉ុបនៅខែកុម្ភៈ នេះ។
ក្នុងសេចក្ដីថ្លែងការណ៍ចេញផ្សាយកាលពីថ្ងៃព្រហសស្បតិ៍ លោក ប្រាក់ សុខុន ឡើកឡើងថា៖ «កម្ពុជាសូមអំពាវនាវឲ្យមានការគោរពឲ្យបានពេញលេញ និងអនុវត្តដោយស្មោះត្រង់នូវរាល់កិច្ចព្រមព្រៀងដែលមានស្រាប់ [និង] ដកកងកម្លាំងយោធាថៃចេញពីទឹកដីកម្ពុជា»។
កម្ពុជា-ថៃ បានប៉ះទង្គិចគ្នានៅតាមព្រំដែនចំនួនពីរលើកក្នុងឆ្នាំ២០២៥ គឺក្នុងខែកក្កដា និងខែធ្នូ ដែលបានបណ្ដាលឲ្យមានអ្នកស្លាប់ជាង១០០នាក់ និងមានជនភៀសសឹកជិត១លាននាក់ទាំងសងខាង មុនមានបទឈប់បាញ់។ រដ្ឋាភិបាលអះអាងថា ប្រជាពលរដ្ឋរាប់ម៉ឺននាក់នៅមិនទាន់អាចវិលទៅលំនៅឋានវិញបាន ដោយថាលំនៅឋានរបស់ប្រជាពលរដ្ឋទាំងនោះស្ថិតក្នុងតំបន់ជម្លោះរួមមានភូមិព្រៃចាន់ និងភូមិជោគជ័យ នៅក្នុងខេត្តបន្ទាយមានជ័យ។
រដ្ឋាភិបាលថៃបានបដិសេធថា ខ្លួនទន្ទ្រានចូលកាន់កាប់ទឹកដីកម្ពុជាតាំងពីមានបទឈប់បាញ់ ដោយថាទាហានរបស់ខ្លួនបានឈរជើងនៅទីតាំងដដែលបន្ទាប់ពីបទឈប់បាញ់ចូលជាធរមាន។ អាជ្ញាធរថៃនៅតែអះអាងថា ប្រជាពលរដ្ឋខ្មែរទៅវិញទេដែលបានចូលទន្រ្ទានកាន់កាប់ទឹកដីថៃ តាំងពីមានការភៀសខ្លួនក្នុងសម័យសង្គ្រាមស៊ីវិលនៅកម្ពុជាកាលពីច្រើនទសវត្សរ៍មុន។
លោក ប្រាក់ សុខុន បានបញ្ជាក់ប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិថា ការពន្យារពេលក្នុងការវិលត្រឡប់ទៅលំនៅឋានរបស់ជនភៀសសឹក គឺបង្កជាក្ដីបារម្ភយ៉ាងខ្លាំងលើការរំលោភច្បាប់ស្ដីពីសិទ្ធិមនុស្សអន្តរជាតិ ទាក់ទងនឹងសិទ្ធិរស់រានមានជីវិត សិទ្ធិសន្តិសុខបុគ្គល សេរីភាពក្នុងការធ្វើដំណើរ សិទ្ធិទទួលបានជម្រកសមរម្យ និងសេរីភាពទទួលបាននូវវប្បធម៌ និងសាសនា។
រដ្ឋមន្ត្រីការបរទេសថៃលោក Sihasak Phuangketkeow បានថ្លែងក្នុងកិច្ចប្រជុំជាមួយគ្នានោះដែរថា ជន្លោះព្រំដែនកាលពីឆ្នាំកន្លងទៅគឺកើតចេញពី «ការទន្ទ្រានដី និងការបង្កហេតុម្ដងហើយម្ដងទៀត» រួមទាំងថាកម្ពុជាបានជ្រៀតជ្រែកនយោបាយយផ្ទៃក្នុងរបស់ថៃ និងបានចោទថា ទាហានកម្ពុជាបានវាយប្រហារដោយមិនរើសមុខ ដែលបង្កឲ្យមានជនស៊ីវិលថៃស្លាប់ជាច្រើននាក់។
លោកបន្តថា ទាហានកម្ពុជាបានបន្តបង្កហេតុជាបន្តបន្ទាប់នៅតាមបន្ទាត់ព្រំដែន និងបានចោទថា កម្ពុជាបានយកប្រាសាទព្រះវិហារធ្វើជាទីតាំងឈរជើងរបស់យោធានៅអំឡុងពេលមានការប្រយុទ្ធគ្នានៅតាមព្រំដែន ដែលការលើកឡើងនេះត្រូវបានរដ្ឋាភិបាលកម្ពុជាច្រានចោល។ កម្ពុជាបានឈ្នះក្ដីជាមួយថៃលើប្រាសាទព្រះវិហារនៅតុលាការយុត្តិធម៌អន្តរជាតិកាលពីច្រើនទសវតស្សរ៍មុន។
កម្ពុជា-ថៃ គ្រោងបញ្ជូនក្រុមការងារវាស់វែងបន្ទាត់ព្រំដែនទៅកាន់តំបន់ជម្លោះនៅខែមីនា តាមរយៈគណៈកម្មការចម្រុះខណ្ឌសីមាព្រំដែនគោក។
លោក អៀ សុផល សាស្រ្តាចារ្យវិទ្យាសាស្រ្តនយោបាយនៅសាកលវិទ្យាល័យ Arizona State University មានប្រសាសន៍ថារដ្ឋាភិបាលក្រុងភ្នំពេញទំនងជាជ្រើសយកវេទិកាក្រុមប្រឹក្សាសិទ្ធិមនុស្សអង្គការសហប្រជាជាតិដើម្បីបំពងសំឡេងអំពីបញ្ហាជម្លោះព្រំដែនជាមួយថៃ ដោយថាវេទិកានោះអាចឲ្យអន្តរជាតិបានឃើញច្បាស់ និងអនុញ្ញាតឲ្យកម្ពុជាមិនត្រឹមតែអាចលើកពីបញ្ហាជម្លោះដែនដីនោះទេ តែអាចលើកពីផលប៉ះពាល់លើសិទ្ធិប្រជាពលរដ្ឋទៀតផង។
លោកបន្ថែមថា៖ «វាគឺជាមធ្យោបាយមួយដើម្បីធ្វើឲ្យអន្តរជាតិបានដឹងពីបញ្ហា និងដាក់សម្ពាធលើប្រទេសថៃ ដោយមិនចាំបាច់ត្រូវប្រើកម្លាំងឡើងវិញ។ តាមរយៈវេទិកានេះអាចថាមិនបានដោះស្រាយបញ្ហាដោយផ្ទាល់ ប៉ុន្តែវាអាចទាក់ទាញចំណាប់អារម្មណ៍ផ្នែកការទូតមកលើជំហររបស់កម្ពុជា»។
លោកបន្តថា ការដែលកម្ពុជាលើកយកបញ្ហាទៅកាន់វេទិកាអន្តរជាតិ ក៏ព្រោះកម្ពុជាមើលឃើញថាស្ថានភាពគឺមិនអាចទទួលយកបាន ហើយការស្វែងរកការគាំទ្រពីប្រទេសជាមិត្តគឺជារឿងសំខាន់។ លោកឲ្យដឹងទៀតថា យុទ្ធសាស្រ្តនេះជួយឲ្យកម្ពុជាមានតុល្យភាពជាមួយថៃដែលមានកម្លាំងយោធាខ្លាំង និងបង្កើនសម្ពាធការទូតទាក់ទងនឹងតំបន់ជម្លោះ៕
ប្រែសម្រួលពីអត្ថបទភាសាអង់គ្លេស៖ Cambodia Calls for Thai Troop Pullback at UN, Cites Displacement
