កញ្ញា ភឹង សោភា គឺជាសកម្មជនធ្វើការផ្សព្វផ្សាយកិច្ចព្រមព្រៀងក្រុងប៉ារីសម្នាក់ ក្នុងចំណោមពលរដ្ឋរាប់សិបនាក់ផ្សេងទៀត ដែលត្រូវបានកាត់ទោសឱ្យជាប់ពន្ធនាគារ ដោយសារតែការរិះគន់គម្រោងអភិវឌ្ឍន៍កម្ពុជា ឡាវ វៀតណា(CLV-DTA) កាលពីឆ្នាំ២០២៤។
បើទោះបីជានៅពេលនេះកញ្ញាបានអនុវត្តទោសក្នុងពន្ធនាគារគ្រប់ចំនួន២ឆ្នាំ និងទើបត្រូវបានដោះលែងវិញក្តី ក៏កញ្ញានិងអ្នកជាប់ឃុំផ្សេងទៀត ចាត់ទុកការសម្រេចផ្តន្ទាទោស និងឃុំខ្លួនក្នុងពន្ធនាគារនៃសំណុំរឿងនេះថា ជារឿង«អយុត្តិធម៌» និងជាការរឹតត្បិតសិទ្ធិសេរីភាពបញ្ចេញមតិ។ អ្នកជំនាញសិទ្ធិមនុស្សយល់ស្របចំពោះការលើកឡើងនេះ។
ប៉ុន្តែ អ្នកនាំពាក្យក្រសួងយុត្តិធម៌លើកឡើងថា យុត្តិធម៌ មិនមែនសំដៅលើអ្វីដែលទាល់តែភាគីណាមួយយល់ឃើញថាខ្លួនត្រឹមត្រូវនោះទេ ប៉ុន្តែវាអាស្រ័យទៅលើអង្គហេតុ អង្គច្បាប់ និងភស្តុតាង។
កញ្ញា ភឹង សោភា និងលោក សាន សិទ្ធ គឺជាសកម្មជនដែលធ្វើការផ្សព្វផ្សាយពីឯកសារកិច្ចព្រមព្រៀងសន្តិភាពទីក្រុងប៉ារីស ត្រូវបានតុលាការដោះលែងឱ្យមានសេរីភាពវិញកាលពីថ្ងៃទី២៤ ខែកក្កដា ឆ្នាំ២០២៦ ក្រោយពីបានអនុវត្តទោសក្នុងពន្ធនាគារគ្រប់ចំនួនរយៈពេល ២ឆ្នាំ។
សូមបញ្ជាក់ថា កញ្ញា ភឹង សោភា លោក ស្រ៊ុន ស្រ៊ន និងលោក សាន សិទ្ធ ដែលជាសកម្មជនកិច្ចព្រមព្រៀងសន្តិភាពទីក្រុងប៉ារីសត្រូវបានកម្លាំងនគរបាលចាប់ខ្លួននៅខេត្តសៀមរាប នៅថ្ងៃទី២៣ ខែកក្កដា ឆ្នាំ២០២៤។ ជាមួយគ្នានេះពលរដ្ឋជាង១០០នាក់ផ្សេងទៀតដែលបញ្ចេញមតិរិះគន់គម្រោងអភិវឌ្ឍន៍ CLV-DTA ដូចគ្នានេះក៏ត្រូវបានចាប់ខ្លួនជាបន្តបន្ទាប់ផងដែរ។
ពួកគេទាំងបីនាក់ ត្រូវសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ ២ឆ្នាំ និងពិន័យជាប្រាក់ ៤លានរៀល ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ពាក់ព័ន្ធការបញ្ចេញមតិអំពីគម្រោងតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA)។
នៅពេលនេះលោក ស្រ៊ុន ស្រ៊ន មិនទាន់ត្រូវបានដោះលែងនៅឡើយទេ ដោយសារកាលពីថ្ងៃទី២២ ខែមិថុនា ឆ្នាំ២០២៦ សាលាឧទ្ធរណ៍ បានសម្រេចតម្កល់សាលក្រមកំបាំងមុខមួយផ្សេងទៀតរបស់សាលាដំបូង ដែលផ្តន្ទាទោសលោក ឱ្យជាប់ពន្ធនាគារ ២ឆ្នាំ និងពិន័យជាប្រាក់ ៤លានរៀល ក្នុងសំណុំរឿង «ញុះញង់» មួយទៀត ពាក់ព័ន្ធការបង្ហោះវីដេអូរិះគន់ការតែងតាំងប្រធានស្តីទីតុលាការកំពូលកាលពីឆ្នាំ២០២៣។
សម្រាប់កញ្ញាសោភា ក្រោយចេញពីពន្ធនាគារត្រូវការប្រើពេលវេលាបន្សាំខ្លួនទៅនឹងស្ថានភាព និងបរិយាកាសរស់នៅខាងក្រៅឡើងវិញ។ កញ្ញាក៏ត្រូវរៀនសូត្រ និងតាមដានពីអ្វីៗដែលបានប្រែប្រួលក្នុងសង្គម ក្នុងអំឡុងពេលអវត្តមានរបស់កញ្ញារយៈពេល២ឆ្នាំកន្លងមកនេះ។
នារីវ័យ៣៥ឆ្នាំរូបនេះបន្ថែមថា៖ «បន្ថែមពីនេះខ្ញុំត្រូវស្តារសុខភាពផ្លូវកាយ និងផ្លូវចិត្តឡើងវិញ ព្រមទាំងចំណាយពេលជួបជុំ និងផ្តល់កម្លាំងចិត្តដល់គ្រួសារ និងជនរួមភាសាដែលជាអ្នករៀនច្បាប់ ជាពិសេសកិច្ចព្រមព្រមព្រៀងសន្តិភាពទីក្រុងប៉ារីស២៣តុលា១៩៩១។ ខ្ញុំក៏នឹងរៀបចំផែនការការងារឡើងវិញដើម្បីបន្តបេសកកម្មជាចំណែកនៃជាតិមាតុភូមិផងដែរ»។
សោភា បានប្រាប់សារព័ត៌មានខេមបូចាកាលពីថ្ងៃទី១៦ ខែសីហាដោយបានរំលឹកពីការឈឺចាប់ និងការលំបាកយ៉ាងខ្លាំងនៅពេលកញ្ញាត្រូវបានឃុំខ្លួនរយៈពេល៤៨ម៉ោងដំបូង និងបន្ត១៤ថ្ងៃបន្ថែមទៀត នៅបន្ទប់ពន្ធនាគារព្រៃស «ម២» ដោយមិនមានការជូនដំណឹង ទៅកាន់ក្រុមគ្រួសារ និងមិនត្រូវបានគេអនុញ្ញាតឱ្យជួបសួរសុខទុក្ខពីក្រុមគ្រួសារឡើយក្នុងអំឡុងពេលនោះ ដែលជាសម្ពាធធ្វើឱ្យកញ្ញាជួបទុក្ខលំបាកទាំងផ្លូវកាយ និងផ្លូវចិត្តយ៉ាងខ្លាំង ។
កូនអ្នកខេត្តបន្ទាយមានជ័យ បច្ចុប្បន្នឪពុកជាមន្ត្រីចូលនិវត្តន៍ ម្តាយជាកសិករនិងមានបងប្អូន៤នាក់រូបនេះថ្លែងថា៖ «ខ្ញុំត្រូវបានចោទបទល្មើសញុះញង់ បទល្មើសនយោបាយ ខ្ញុំគេមិនសូវឲ្យទៅបរិវេណទីធ្លាខាងក្រៅ និយាយជាមួយអ្នកដទៃនោះទេ។ ពេលនោះពិបាកពិសេសខែក្ដៅហប់ ស្អុះស្អាប់ ហើយពន្ធនាគារបើកអគ្គិសនីតែពេលដាក់ពួកយើងចូលបន្ទប់ប៉ុណ្ណោះ»។
ឆ្មាំពន្ធនាគារបានធ្វើការត្រួតពិនិត្យ និងតាមដានម៉ត់ចត់ណាស់លើ សោភា ចាប់តាំងពីការយកសៀវភៅចូលអាន និងយកសៀវភៅចេញក្រៅ រួមទាំងម្ហូបអាហារចូលក្នុងពន្ធនាគារ។ ប៉ុន្តែ ក្រោយៗមកទៀត មិនសូវជាលំបាកពេកទេ ដោយសារកញ្ញាអាចស៊ាំ និងសង្រួមចិត្តជាមួយអ្នកជាប់ឃុំជាង១០នាក់នៅក្នុងបន្ទប់តែមួយ រហូតដល់កញ្ញាអាចធ្វើសកម្មភាពប្រចាំថ្ងៃបានខ្លះៗដូចជាអានសៀវភៅ ការចែករំលែកចំណេះដឹងពីកិច្ចព្រមព្រៀងក្រុងប៉ារីសដល់អ្នករួមបន្ទប់ ការហាត់ប្រាណ និងហ្វឹកហាត់ចិត្តខ្លួនឲ្យបានល្អនៅទីនោះ។
កញ្ញានិយាយថា៖ «ការជាប់ឃុំឃាំងបានធ្វើឱ្យខ្ញុំបាត់បង់សេរីភាពក្នុងការចូលរួមធ្វើការងារសង្គមផ្សេងៗ ជាពិសេសការងារបំរើជាតិ និងការចុះជួយដល់កសិករក្រីក្រ ដែលកត្តានេះបានធ្វើឱ្យខ្ញុំគិតច្រើនខ្លាំងណាស់នៅអំឡុងពេលដំបូងៗ»។
កញ្ញា ភឹង សោភា និងលោក ស្រ៊ុន ស្រ៊ន រួមទាំងលោក សាន សិទ្ធ តែងតែផ្តល់ការអប់រំ ផ្សព្វផ្សាយ បណ្ដុះបណ្ដាលច្បាប់ជាតិ ច្បាប់អន្តរជាតិ ច្បាប់សិទ្ធិមនុស្ស និងលិខិតបទដ្ឋានគតិយុត្តិពាក់ព័ន្ធដទៃទៀតដើម្បីចូលរួមចំណែកជួយពលរដ្ឋ និងយុវជនខ្មែរឱ្យក្លាយជាពលរដ្ឋ និងយុវជនសកម្មក្នុងការជួយជាតិ។ លើសពីនេះក៏ចូលរួមលើកកម្ពស់ការអនុវត្ត សីល សមាធិ បញ្ញា និងផ្តល់ការអប់រំដើម្បីកាត់បន្ថយការជំពាក់បំណុលគេ និងការចំណាកស្រុកផងដែរ។
កញ្ញាបញ្ជាក់ថា៖ «ដូចនេះខ្ញុំយល់ថា សកម្មភាពទាំងអស់នេះ សុទ្ធតែជួយជាចំណែកដល់ជាតិ មិនមែនជាទោសដូចការចោទប្រកាន់ទេ។ ដូច្នេះ ខ្ញុំមិនតក់ស្លុតអ្វីទេ ព្រោះខ្ញុំធ្វើមានចេតនាល្អចំពោះជាតិ ការឈឺឆ្អាល និងការបារម្ភដោយស្មោះស្ម័គ្រចំពោះទឹកដី និងជោគវាសនាប្រទេសជាតិមិនគួរណាត្រូវទទួលរងនូវការចោទប្រកាន់និងផ្តន្ទាទោសដាក់ពន្ធនាគារទេ»។
បើតាម សោភា បើពិនិត្យលើករណីចោទប្រកាន់ពាក់ព័ន្ធនឹងគម្រោងអភិវឌ្ឍន៍ CLV នៅក្នុងវីដេអូរយៈពេល ១១នាទី ២២វិនាទីដែលតុលាការយកមកធ្វើជាភស្តុតាងដាក់បន្ទុកចោទប្រកាន់ កញ្ញាមិនបាននិយាយ ឬពាក់ព័ន្ធសោះឡើយ ហើយលោក ស៊្រុន ស្រ៊ន ទៀតសោត ក៏គ្រាន់តែលើកឡើងពីចំណុចល្អ ចំណុចមិនល្អ និងដំណោះស្រាយដោយផ្អែកលើច្បាប់ទាំងស្រុង គឺគ្មានមូលដ្ឋានធាតុផ្សំគ្រប់គ្រាន់ (អង្គចេតនា) ថាជាការបំភ្លៃ ឬញុះញង់ឱ្យមានភាពវឹកវរក្នុងសង្គម ដូចបទល្មើសដែលបានចោទប្រកាន់នោះទេ។
ប៉ុន្តែ យ៉ាងណាក្តី លោក ឯម ច័ន្ទមករា អ្នកនាំពាក្យក្រសួងយុត្តិធម៌ បានប្រាប់សារព័ត៌មានខេមបូចានៅថ្ងៃទី១៦ ខែសីហាថា យុត្តិធម៌ មិនមែនសំដៅលើអ្វីដែលទាល់តែភាគីណាមួយយល់ឃើញថា ខ្លួនត្រឹមត្រូវនោះទេ ប៉ុន្តែវាអាស្រ័យទៅលើអង្គហេតុ អង្គច្បាប់ និងភស្តុតាង។
លោកលើកឡើងថា ទោះបីជារដ្ឋធម្មនុញ្ញធានានូវសិទ្ធិសេរីភាពខាងការបញ្ចេញមតិក៏ដោយ ប៉ុន្តែសិទ្ធិនេះមិនមែនជាសេរីភាពគ្មានដែនកំណត់ឡើយ។ ការសម្តែងមតិដែលនាំឱ្យឈានដល់ការញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម គឺជាបទល្មើសព្រហ្មទណ្ឌដែលត្រូវទទួលខុសត្រូវតាមច្បាប់។
លោកបញ្ជាក់ថា៖ «ដូច្នេះ ការចាត់វិធានការផ្លូវច្បាប់របស់ស្ថាប័នតុលាការ ក្នុងការផ្តន្ទាទោសមិនមែនជាការរឹតត្បិតសិទ្ធិដោយគ្មានមូលដ្ឋានឡើយ គឺធ្វើឡើងស្របតាមអង្គហេតុ អង្គច្បាប់ និងភស្តុតាងជាក់ស្តែងក្នុងសំណុំរឿងព្រហ្មទណ្ឌ»។
ចំពោះការដោះលែងអ្នកជាប់ឃុំជាបន្តបន្ទាប់ អ្នកនាំពាក្យក្រសួងយុត្តិធម៌បញ្ជាក់ថា គឺធ្វើឡើងតាមនីតិវិធីច្បាប់ នៅពេលដែលពួកគេបានអនុវត្តទោសគ្រប់ចំនួនកំណត់។ ការអនុវត្តច្បាប់ត្រូវតែស្មើភាពគ្នាចំពោះមុខច្បាប់ដោយមិនលើកលែងឱ្យនរណាម្នាក់ឡើយ។
ប៉ុន្តែ អ្នកស្រី សែម សុផល ជាសកម្មជនគណបក្សប្រជាធិបតេយ្យមូលដ្ឋាន នៅភូមិពោធិ៍អណ្តែត សង្កាត់ព្រែកស្តី ក្រុងសំពៅពូន ខេត្តកណ្តាល ដែលទើបតែត្រូវបានដោះលែងពីពន្ធនាគារក្នុងសំណុំរឿងការបញ្ចេញមតិពីបញ្ហាតំបន់អភិវឌ្ឍន៍ CLV-DTAនេះដែរ បានប្រាប់សារព័ត៌មានខេមបូចាកាលពីថ្ងៃទី១៦ ខែសីហាថា អ្នកស្រីត្រូវបានសមត្ថកិច្ចមកនាំខ្លួនចេញពីផ្ទះទាំងគ្មានដីកា និងមិនបានប្រាប់ថា អ្នកស្រីបានធ្វើអ្វីខុសឱ្យពិតប្រាកដនោះឡើយ។
ស្ត្រីវ័យ៥៩ឆ្នាំ ដែលមានប្តីជាកសិករធ្វើស្រែធ្វើចម្ការ និងមានកូន៤នាក់រូបនេះបានបញ្ជាក់ថា៖ «គេចោទខ្ញុំពីបទញុះញង់ហើយគេបានកាត់ទោសខ្ញុំដាក់ពន្ធនាគារ២២ខែ និង១ថ្ងៃដោយសារគេឆែកឃើញក្នុងទូរសព្ទខ្ញុំមានរឿង CLV បើទោះបីជាខ្ញុំប្រាប់ថា ខ្ញុំមិនចេះប្រើទូរសព្ទខ្ញុំទុកទូរសព្ទចោលនៅផ្ទះ ហើយទៅចម្ការក៏គេនៅតែដាក់ទោសខ្ញុំ។ វាអយុត្តិធម៌ណាស់សម្រាប់ខ្ញុំពីព្រោះខ្ញុំមិនដែលធ្វើអ្វីខុសច្បាប់និងមិនដែលធ្វើអំពើអាក្រក់ទៅលើអ្នកណាឡើយ»។
ក្រៅពីធ្វើស្រែធ្វើចម្ការ អ្នកស្រី សុផល ក៏ជាអ្នកប្រមូលទិញបន្លែ ពីកសិករក្នុងភូមិ យកទៅលក់ផងដែរនិងតែងតែហៅអ្នកភូមិឱ្យមកចូលរួមនៅក្នុងវគ្គបណ្តុះបណ្តាលស្តីពីការដាំបន្លែឱ្យបានផលច្រើនល្អ។ ស្ត្រីរូបនេះលើកឡើងថា អ្នកស្រីតែងតែធ្វើបុណ្យធ្វើទាន និងជួយដល់អ្នកភូមិ មិនដែលធ្វើអ្វីខុសច្បាប់នោះទេ ប៉ុន្តែបែរជាមកជាប់ពន្ធនាគារទាំង«អយុត្តិធម៌»ទាំងដែលខ្លួនមិនបានធ្វើអ្វីខុស។ យ៉ាងណាក្តី អ្នកស្រីមិនតក់ស្លុតនិងមិនមានការភ័យខ្លាចនោះទេ ហើយនៅតែបន្តធ្វើកិច្ចការងារជួយអ្នកភូមិទៅតាមអ្វីដែលអ្នកស្រីអាចធ្វើបាន។
លោក អំ សំអាត នាយកទទួលបន្ទុកកិច្ចការទូទៅនៃអង្គការ លីកាដូ បានប្រាប់សារព័ត៌មានខេមបូចាកាលពីថ្ងៃ១៥ ខែសីហាថា កាលពីអំឡុងឆ្នាំ២០២៤ មានមនុស្សជាង១០០នាក់ត្រូវបានចាប់ឃាត់ខ្លួននិងឃុំខ្លួនក្រោមការចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខជាតិពាក់ព័ន្ធនឹងការបញ្ចេញមតិ និងការប្រមូលផ្តុំរិះគន់ទៅលើគម្រោង CLV-DTA។
ក្នុងកំឡុងពេលនោះមនុស្សមួយចំនួនត្រូវបានអាជ្ញាធរដោះលែងវិញក្រោយពេលឃាត់ខ្លួននៅប៉ុស្តិ៍ប៉ូលិសប្រមាណមួយថ្ងៃពីរថ្ងៃក្រោយ និងក្រោយមកក៏មានការដោះលែងជាបន្តបន្ទាប់ទៀត បន្ទាប់ពីមានការសុំទោស។
លោកបានលើកឡើងថា៖«ក៏ប៉ុន្តែក៏នៅមានមនុស្សមួយចំនួនគឺនៅបន្តជាប់ឃុំរហូតដល់មានការកាត់ទោសពីបទញុះញង់ អ្នកខ្លះត្រូវកាត់ឱ្យជាប់ពន្ធនាគារ១ឆ្នាំ៨ខែ អ្នកខ្លះ២ឆ្នាំហើយអ្នកខ្លះទៀតក៏អាចជាង២ឆ្នាំទៅតាមបទល្មើស។ មកដល់ពេលនេះគឺនៅមានមនុស្សមួយចំនួន អត់ទាន់បានអនុវត្តទោសចប់ គឺនៅបន្តជាប់ឃុំក្នុងពន្ធនាគារនៅឡើយ ទាក់ទងនឹងCLV-DTAនេះ»។
បើតាមលោក សំអាត កិច្ចព្រមព្រៀងគម្រោងអភិវឌ្ឍន៍តំបន់ព្រំដែនកម្ពុជា ឡាវ វៀតណាម CLV-DTAនេះ បន្ទាប់ពីមានការរិះគន់ច្រើនមក រដ្ឋសភា ក៏ដូចជារដ្ឋាភិបាលបានសម្រេចដកខ្លួនចេញពីកិច្ចព្រមព្រៀងនេះរួចទៅហើយ ហេតុដូច្នេះអ្នកដែលជាប់ពន្ធនាគារដោយសារការរិះគន់កិច្ចព្រមព្រៀងនេះ គួរតែត្រូវបានដោះលែង មិនគួរធ្វើការផ្តន្ទាទោសហើយនៅតែបន្តធ្វើការឃុំខ្លួនរហូតមកដល់ពេលនេះនោះទេ។
អ្នកជំនាញសិទ្ធិមនុស្សរូបនេះបញ្ជាក់ថា ករណីនេះបានធ្វើឱ្យមានការរិះគន់ជាច្រើនចំពោះការរឹតត្បិតសិទ្ធិសេរីភាពបញ្ចេញមតិ និងរំលោភសិទ្ធិជាមូលដ្ឋានរបស់មនុស្សដែលមានចែងនៅក្នុងបទដ្ឋានអន្តរជាតិស្តីពីសិទ្ធិមនុស្សជាពិសេសកត្តិការសញ្ញាអន្តរជាតិស្តីពីសិទ្ធិពលរដ្ឋសិទ្ធនយោបាយ និងសេចក្តីថ្លែងការណ៍ជាសកលដែលកម្ពុជាបានទទួលស្គាល់និងផ្តល់សច្ចាបណ្ណថែមទាំងមានចែងនៅក្នុងរដ្ឋធម្មនុញ្ញទៅទៀត។
លោកបញ្ជាក់ថា៖ «អ៊ីចឹងការបន្តឃុំខ្លួនពួកគាត់បន្តទៅទៀតអត់មានផលចំណេញអ្វីទេមានតែការរិះគន់ដែលធ្វើឱ្យប៉ះពាល់ដល់សេរីភាពនៃការបញ្ចេញមតិនិងការរំលោភសិទ្ធិសេរីភាពជាមូលដ្ឋានរបស់ពួកគាត់»។
ក្រៅពីទាក់ទងនឹងសំណុំរឿង CLVនេះ លោក អំ សំអាត បានកត់សម្គាល់ថា ក្រោយមកទៀតក៏មានមនុស្សជាច្រើនត្រូវបានចាប់ខ្លួនដោយសារការប្រើប្រាស់សិទ្ធិនៅក្នុងការបញ្ចេញមតិ ឬក៏បង្ហោះសារចែករំលែកព័ត៌មានតាមបណ្តាញសង្គមនានាទាក់ទងនឹងការរិះគន់ទៅលើជម្លោះព្រំដែនក៏ដូចជាបញ្ហាសង្គម ឬរិះគន់ទៅលើថ្នាក់ដឹកនាំរដ្ឋាភិបាល ធ្វើឱ្យចំនួនមនុស្សជាប់ឃុំមានការកើតឡើងដល់ជាង១០០នាក់ក្នុងនោះក៏មានទាំងអ្នកសារព័ត៌មានផងដែរ។
លោកលើកឡើងថា ថ្មីៗនេះអ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុស្សប្រចាំកម្ពុជាលោក ថម អេនឌ្រូ ក៏បានលើកឡើងពីការព្រួយបារម្ភដោយសារមើលឃើញអំពីការរឹតត្បិតសេរីភាពក្នុងការបញ្ចេញមតិ លំហរសេរីភាពសារព័ត៌មាន និងលំហរសេរីភាពនយោបាយជាដើម ធ្វើឱ្យប៉ះពាល់ទៅដល់ការអនុវត្តសេរីភាពជាមូលដ្ឋានរបស់មនុស្ស។
អ្នករាយការណ៍ពិសេសក៏លើកឡើងដែរថា «ការអនុវត្តសិទ្ធិជាមូលដ្ឋានរបស់មនុស្សមិនមែនជាគោលដៅនៃការចាប់ខ្លួន ឃុំខ្លួនការផ្តន្ទាទោសនិងការដាក់ពន្ធនាគារនោះទេ»។
សម្រាប់ ភឹង សោភា ការជាប់ឃុំឃាំង២ឆ្នាំនេះ មិនបានធ្វើឱ្យឆន្ទៈស្រឡាញ់ជាតិ និងការជួយសង្គមរបស់កញ្ញាថយចុះនោះទេ ប៉ុន្តែវាថែមទាំងជួយជំរុញ និងពង្រឹងស្មារតីកញ្ញាឱ្យកាន់តែរឹងមាំ និងមានភាពចាស់ទុំជាងមុនថែមទៀត។
សោភាថ្លែងថា ៖«ទោះបីជាស្ថិតនៅទីកន្លែងណាក៏ដោយ ខ្ញុំនៅតែរក្សាជំហរ និងឆន្ទៈដើមដដែលគឺបន្តធ្វើសកម្មភាពសង្គម បម្រើផលប្រយោជន៍ពលរដ្ឋ និងការពារដែនអធិបតេយ្យជាតិ ដូចអ្វីដែលខ្ញុំធ្លាប់បានធ្វើពីមុនមក ដោយយកច្បាប់អន្តរជាតិ ច្បាប់ជាតិ ច្បាប់ពុទ្ធចក្រ ក្នុងនាមពលរដ្ឋមួយរូប»។
អ្វីដែល សោភា នឹងបន្តធ្វើជាបន្តទៀតគឺផ្តល់ការអប់រំ និងផ្សព្វផ្សាយ «កិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១» រដ្ឋធម្មនុញ្ញ សិទ្ធិមនុស្ស និងច្បាប់អន្តរជាតិដទៃទៀតដែលពាក់ព័ន្ធ ជូនដល់ពលរដ្ឋ តាមរយៈវិធីសាស្ត្រសន្តិវិធី និងស្របតាមនីតិវិធីច្បាប់។
សោភា បានបញ្ចប់បរិញ្ញាបត្រផ្នែកបរិស្ថាន ឆ្នាំ២០០៩-២០១៣ នៅសកលវិទ្យាល័យភូមិន្ទភ្នំពេញ។ កញ្ញាបានចូលបម្រើការងារសង្គមតាំងពីឆ្នាំ២០១០ នៅពេលដែលកញ្ញារៀននៅសកលវិទ្យាល័យឆ្នាំទី២ ពេលនោះកញ្ញាមានអាយុ១៩ឆ្នាំ។
ការងារដែល សោភា បានធ្វើកន្លងមក គឺធ្វើការលើយុត្តិធម៌សង្គម សិទ្ធិមនុស្ស និងការការតស៊ូមតិជាមួយក្រុមមនុស្សដែលមានសំឡេងភាគតិច និងងាយរងគ្រោះ(ជនជាតិដើមភាគតិច អ្នកស្រលាញ់ភេទដូចគ្នា អ្នកមានពិការភាព) នៅខេមអាស៊ាន(CamASEAN Youth’s Future)។ ឆ្នាំ២០១៥ កញ្ញាធ្វើអ្នកប្រឹក្សាឯករាជ្យ នៅ ILGA Asia និងកាន់គម្រោងប្រឹក្សាច្បាប់លើការរំលូតកូនជាមួយស្រ្តីខ្មែរនៅប្រទេសថៃ៕
