សមាគមសម្ព័ន្ធអ្នកសារព័ត៌មានកម្ពុជា

អង្គការឃ្លាំមើលសិទ្ធិមនុស្សអន្តរជាតិ និងមន្ត្រីជាន់ខ្ពស់បក្សប្រឆាំងស្នើឱ្យ​អាជ្ញាធរថៃ-កម្ពុជា រកយុត្តិធម៌ជូនសកម្មជនម្នាក់រងរបួសនៅប្រទេសថៃ

ស្លាកគណបក្សភ្លើងទៀន នៅទីស្នាក់ការកណ្តាលរបស់គណបក្សក្នុងរាជធានីភ្នំពេញ ថ្ងៃទី៤ ខែមេសា ឆ្នាំ២០២២។ (ខេមបូចា/ ព្រីង សំរាំង)
ស្លាកគណបក្សភ្លើងទៀន នៅទីស្នាក់ការកណ្តាលរបស់គណបក្សក្នុងរាជធានីភ្នំពេញ ថ្ងៃទី៤ ខែមេសា ឆ្នាំ២០២២។ (ខេមបូចា/ ព្រីង សំរាំង)

ករណីវាយប្រហារលើលោក ផន ផាន់ណា សកម្មជននយោបាយបក្សភ្លើងទៀន បណ្ដាលឲ្យមានរបួស​លើមុខ និងទ្រូង កាលពីថ្ងៃទី២២ ខែសីហា ថ្មីៗនេះ នាំឱ្យអង្គការ​ឃ្លាំ​មើល​សិទ្ធិ​មនុស្ស​អន្តរជាតិ និងមន្ត្រី​គណបក្ស​ភ្លើងទៀនថ្កោលទោស និងជំរុញឱ្យមានការស៊ើបអង្កេតលើជនដៃដល់ ខណៈរដ្ឋាភិបាលកម្ពុជា​បដិសេដនៅពីក្រោយរឿងនេះ។

លោក រ៉ុង ឈុន អនុប្រធានគណបក្សភ្លើងទៀន ជំរុញឱ្យអាជ្ញាធរថៃ និងកម្ពុជាមានការស៊ើបអង្កេត​ក្នុង​ករណី​នេះ ដោយយុត្តិធម៌ និងតម្លាភាព ដើម្បីវែកមុខជនដៃដល់ យកមកកាត់ទោសតាមផ្លូវច្បាប់។ ដោយ​ឡែក​លោក​ថាបើសិនបន្តឱ្យករណីនេះកើតឡើងជាដដែលៗ ដោយគ្មានការដោះស្រាយប្រកប​ដោយ​យុត្តិធម៌ បណ្តាល​​ឱ្យប្រជាពលរដ្ឋខ្មែរ ជាពិសេសជនភៀសខ្លួនក្នុងរឿងនយោបាយ កាន់តែច្រើនទៅៗ ទទួល​រងការ​វាយដំ និងប្រើអំពើហិង្សា ដោយគ្មានខ្លាចរអេង។

លោកបន្ថែមថា៖ «ភៀសខ្លួនទៅដល់ស្រុកគេហើយ នៅតែទទួលរងគ្រោះ យើងគិតថារាល់ទង្វើបែបហ្នឹង វាជារឿងមួយព្រៃផ្សៃមែនទែន ហើយវាមិនត្រូវគួរឱ្យកើតមានជុំវិញបញ្ហាទាំងអស់ហ្នឹង»

តាមអង្គការ​ឃ្លាំ​មើល​សិទ្ធិ​មនុស្ស​អន្តរជាតិ(HRW) ​បានចេញ​ផ្សាយអត្ថបទ​ព័ត៌មាន​មួយ កាលពី​ថ្ងៃ​ទី២៥​ខែសីហា​ឆ្នាំ២០២៣នេះ ជុំវិញបញ្ហាប្រើប្រាស់អំពើហិង្សាទៅលើលោក ផន ផាន់ណា។ បើតាមលិខិតនោះ បាន​លើក​សំណើ​ទៅ​អាជ្ញាធរ​ថៃ​ឲ្យ​បើក​ការ​ស៊ើប​អង្កេត​ជា​បន្ទាន់ ​និង​ដោយ​ឥត​លំអៀង​លើ​ករណី​វាយ​ប្រហារ​លើ​លោក ​ផន ផាន់ណា សកម្មជន​នយោបាយ​កម្ពុជា​មួយ​រូប​កាល​ពី​ថ្ងៃ​ទី២២​ខែ​សីហាថ្មីៗ នេះ ក្នុង​ខេត្តរ៉ាក់យ៉ង ប្រទេសថៃ។ យោងតាម(HRW) លោក ផន ផាន់ណា រងការវាយតប់ពីបុគ្គលនិយាយ​ភាសាខ្មែរ​ចំនួន៣នាក់ បណ្ដាលឲ្យមានរបួសលើមុខ​ និងទ្រូង។

លោកស្រី Elaine Pearson នាយកប្រចាំតំបន់អាស៊ីនៃHRWបានថ្លែងថា រដ្ឋាភិបាលថៃ មានកាតព្វកិច្ច ក្នុងការការពារសិទ្ធិគ្រប់បុគ្គលដែលជ្រកកោនក្នុងប្រទេសថៃ រួមទាំងជនភៀសខ្លួន។

លោកស្រីបន្ថែមថា៖​ «អាជ្ញាធរថៃ គួរបើកការស៊ើបអង្កេតជាបន្ទាន់ លើករណីវាយប្រហារលើលោក​ ផន ផាន់ណា និងចាត់រាល់វិធានការដើម្បីការពារសុវត្ថិភាពរបស់សកម្មជននយោបាយរូបនេះ»

សកម្មជននយោបាយលោក ផន ផាន់ណា បានប្រាប់ HRW ថា កន្លងមក ជនបង្កបានតាមឃ្លាំមើល​ និង​តាម​ដានលោកនៅក្បែរៗកន្លែងដែលលោកធ្វើការ ព្រមទាំងបានថតរូបលោកពីរថយន្តរបស់ពួកគេផងដែរ។ មិន​តែ​ប៉ុណ្ណោះ សកម្មភាពវាយតប់មកលើលោកនេះ ត្រូវបានថតបានដោយ​កាមេរ៉ាសុវត្ថិភាពរបស់​ហាង​ដែល​នៅ​ក្បែរកន្លែងកើតហេតុ និងមានសាក្សីប្រមាណ១០នាក់ បានឃើញហេតុការណ៍នេះផ្ទាល់។

យ៉ាងណាមិញមន្ត្រី​ផ្នែក​ការពារ​សិទ្ធិ​ពលករ​ចំណាក​ស្រុក នៃ​អង្គការ​សង់ត្រាល់ (CENTRAL) ប្រចាំ​នៅ​ប្រទេស​ថៃ លោក លឹង សុផុន លើកឡើងថា ករណីប្រើប្រាស់អំពើហិស្សា ទៅលើលោកផន​ ផាន់ណា កាល​ពី​ថ្ងៃ​អង្គារ ​ទី​២២​ ខែ​សីហានេះ វាជារឿងខុសឆ្គងអំពីច្បាប់មនុស្សហើយ ព្រោះមនុស្សម្នាក់ៗនៅ​អាចនិយាយ​គ្នា​បាន យើងអាចសម្រួលគ្នាបាន។ តាមការសង្កេតរបស់លោកសុផុន ប្រជាពលរដ្ឋខ្មែរ​ដែលទៅរស់នៅ​ប្រទេស​ថៃ​មានច្រើនដែរ ដែលហ៊ាននិយាយរិះគន់ពីសង្គម និងរដ្ឋាភិបាល ហើយក៏ទទួលរង​ប្រើប្រាស់​អំពើ​ហិង្សា​ជាញឹកញាប់ផងដែរ។

លោកបន្តថា៖ «គាត់(ផន ផាន់ណា)បច្ចុប្បន្ននេះកំពុងតែស្វែងរកជម្រក ដើម្បីស្នាក់នៅសុវត្ថិភាព សម្រាប់​ក្រុម​គ្រួសារគាត់ និងប្រពន្ធកូនគាត់»

មន្ត្រីផ្នែកការពារសិទ្ធិពលកររូបនេះយល់ឃើញថា ការកើតឡើងនូវអំពើហិង្សា ដោយការរឹតត្បិត មិនឱ្យ​ពលរដ្ឋ ឬពលករសម្តែងមតិជាសាធារណៈ ក្នុងន័យរិះគន់ទៅលើអ្វីដែលពួកគាត់មិនពេញចិត្ត វាក៏ជាហេតុ​ធ្វើឱ្យពួកគាត់ភ័យខ្លាច និងបិទសិទ្ធិសេរីភាពពួកគាត់ផងដែរ។ ហើយនេះមិនមែនជាសង្គមប្រជាធិបតេយ្យទេ ព្រោះសង្គមប្រជាធិបតេយ្យគេមិនធ្វើបាបដល់អ្នកបញ្ចេញមតិ ដល់អ្នកបង្ហាញទិដ្ឋភាពជាក់ស្តែងអំពីសង្គម និងរបៀបការរស់នៅរបស់ពលរដ្ឋ ដែលទទួលរងភាពអយុត្តិធម៌ទេ។

លោកបញ្ជាក់បន្ថែមថា៖ «មានការប្រើអំពើហិង្សា​ មានការតាមដាន មានការរឹតបន្តឹងអ៊ីចឹងទៅ។ អាហ្នឹង​បញ្ជាក់​ឱ្យឃើញថា វាមិនមែនជាសង្គមសេរីភាព មិនមែនជាសង្គមលទ្ធិប្រជាធិបតេយ្យ មិនមែន​ជា​សង្គម​ដែលបង្ហាញអំពីសុវត្ថិភាព សន្តិភាពទេ មានតែសង្គមបញ្ជាក់អំពីការយាយីគ្នា អំពីការហិង្សាជិះជាន់គ្នា»

ទោះបីយ៉ាងណា ប្រធាន​អង្គភាព​អ្នកនាំពាក្យ​រដ្ឋាភិបាល​ លោក ប៉ែន បូណា បដិសេធជុំវិញករណី​ប្រើ​អំពើ​ហិង្សា​លើលោក​ផន ផាន់ណា សកម្មជន​នយោបាយ ដែលកំពុងរស់នៅប្រទេសថៃ ដែលចោទថាបាន​ពាក់ព័ន្ធ ឬមានការបញ្ជាពីរដ្ឋាភិបាលកម្ពុជា គឺជារឿងមិនពិត។ ដែលលោកទាមទារឱ្យបង្ហាញភស្តុតាង ហើយលោកថាព័ត៌មានទាំងអស់នោះ ជាការប្រឌិតឡើងដើម្បីចោទប្រកាន់ និងដាក់បន្ទុកលើរដ្ឋាភិបាល។

លោកបន្ថែមថា៖ «គាត់ជាសកម្មជនបក្សប្រឆាំង គាត់រងអំពើហិង្សា ដឹងថារដ្ឋាភិបាលបញ្ជា អ៊ីចឹង​ម៉េច​ត្រូវ!»

ទន្ទឹងនឹងនេះលោកថានៅប្រទេសកម្ពុជាប្រជាពលរដ្ឋមានសិទ្ធិ និងសេរីភាពពេញលេញ​នៅក្នុង​ការបញ្ចេញ​មតិ ប៉ុន្តែបញ្ហានៅត្រង់ថាយើងអត់ចេះប្រើប្រាស់សេរីភាព ហើយប្រើប្រាស់រំលោភបំពាន និងប៉ះពាល់ដល់​សិទ្ធិ​អ្នកដទៃ។ ដូច្នេះលោកទាមទារឱ្យប្រជាពលរដ្ឋត្រូវបញ្ចេញមតិដោយគោរពគ្នាទៅវិញមក ដោយគោរព​ច្បាប់ ដោយគោរពសិទ្ធិបុគ្គលម្នាក់ៗ នោះគឺគ្មានមានបញ្ហាអ្វីទាំងអស់។

លោកអះអាងថា÷ «សិទ្ធិសេរីភាពបញ្ចេញមតិនៅស្រុកយើងនេះ វាពោលពេញ មានសេរីភាពពេញទី សំខាន់នៅត្រង់ថាតើយើងចេះប្រើប្រាស់សេរីភាពឬក៏អត់? នៅក្នុងបច្ចុប្បន្ននេះ»។

លោក ស៊ឹង សែនករុណា មន្រ្តី​ស៊ើបអង្កេត​ជាន់​ខ្ពស់​នៃ​សមា​គម​ការពារ​សិទ្ធិ​មនុស្ស​អាដហុក លើកឡើងថា សូមមិនគាំទ្រចំពោះការបញ្ចេញមតិណា ដែលនាំឱ្យមានអំពើហិង្សា ឬការជេរប្រមាទគ្នា ព្រោះវាមិននាំ​ផល​ប្រយោជន៍ដល់សង្គមជាតិឡើយ។ ប៉ុន្តែបើពាក់ព័ន្ធនឹងបញ្ហារឿងនយោបាយ រដ្ឋាភិបាលគួរតែ​បើក​ចិត្ត​ទូលាយ ទោះបីពាក្យរិះគន់ខ្លះវាអាក្រក់យ៉ាងណាក៏ដោយ ក៏គួរមានការវិនិច្ឆ័យពីសាធារណជន​ជាជាង​ធ្វើ​ទុក្ខបុកម្នេញ ដោយគ្រាន់តែឱ្យបុគ្គលនោះមកបំភ្លឺ និងការឆ្លើយតបណាមួយជាលក្ខណៈវិជ្ជាជីវៈ។

លោកបន្ថែមថា៖ «ទទូចឱ្យសមត្ថកិច្ចដែលពាក់ព័ន្ធទាំងអស់ហ្នឹង គាត់ធ្វើការស៊ើបអង្កេត ជាពិសេស​សមត្ថកិច្ច​នៅបាងកកហ្នឹង។{…}។ យើងកត់សម្គាល់ថាសកម្មជននយោបាយដែលហ៊ានរិះគន់ ហ៊ានលើក​ឡើងទាំងអស់ហ្នឹង ត្រូវបានក្រុមជនមិនស្គាល់មុខ ភាគច្រើនគឺប្រើប្រាស់អំពើហិង្សា ឬចាប់ខ្លួនជាបន្តបន្ទាប់ »

ដោយឡែកលោកមិនហ៊ានចោទប្រកាន់ថារឿងវាយប្រហារលើលោក ផន ផាន់ណា មានរដ្ឋាភិបាល​នៅពីក្រោយនោះទេ ប៉ុន្តែលោកជំរុញឱ្យរដ្ឋាភិបាលស៊ើបអង្កេត ដើម្បីទប់ស្កាត់បញ្ហានេះ ព្រោះចង់ ឬមិន​ចង់ក៏វាប៉ះពាល់ដល់តម្លៃ និងកិត្តិយសគណបក្សកាន់អំណាចដែរ។ ស្របគ្នានេះ​រដ្ឋាភិបាល​គួរ​បើក​លំហ​នៃការគោរពសិទ្ធិនយោបាយ គោរពសិទ្ធិមនុស្ស ឱ្យពួកគេអាចអនុវត្តសិទ្ធិរបស់ខ្លួនដោយសេរី ហើយ​រដ្ឋាភិបាល​នឹងទទួលបានការគាំទ្រកាន់តែច្រើន។

លោក សែនករុណា បញ្ជាក់ថា៖ «ជាប្រទេសដែលប្រជាធិបតេយ្យ តែអ្នកនយោបាយហ្នឹង មិនអាច​ប្រើប្រាស់សិទ្ធិ​របស់​ខ្លួនឱ្យបានពេញលេញបាន ដូច្នេះចង់ ឬមិនចង់គឺរងការរិះគន់បែបហ្នឹងហើយ​ រាល់សកម្មភាពកន្លងមក»។លោកបន្ថែមថា៖ «ចឹងគួរតែបញ្ឈប់រាល់អំពើទាំងឡាយរំលោភបំពាន គំរាមគំហែង ធ្វើទុក្ខបុកម្នេញ​រាល់​រូបភាព»

114 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម