សមាគមសម្ព័ន្ធអ្នកសារព័ត៌មានកម្ពុជា

អង្គការមិនមែនរដ្ឋាភិបាលនិងសកម្មជន​អំពាវនាវឱ្យស៊ើបអង្កេតឡើងវិញលើ​ករណី​ឃាតកម្មលើអ្នកប្រយុទ្ធប្រឆាំងការកាប់បំផ្លាញព្រៃឈើ ឈុត វុទ្ធី

ព្រះសង្ឃ និងសកម្មជនបរិស្ថានដាក់ញត្តិជូនក្រសួងយុត្តិធម៌ស្ដីពីករណី ឈុត វុទ្ធី នៅរាជធានីភ្នំពេញ នាថ្ងៃទី២៦ ខែមេសា ឆ្នាំ២០២៤ ។ (ខេមបូចា / ព្រីង សំរាំង)
ព្រះសង្ឃ និងសកម្មជនបរិស្ថានដាក់ញត្តិជូនក្រសួងយុត្តិធម៌ស្ដីពីករណី ឈុត វុទ្ធី នៅរាជធានីភ្នំពេញ នាថ្ងៃទី២៦ ខែមេសា ឆ្នាំ២០២៤ ។ (ខេមបូចា / ព្រីង សំរាំង)

អង្គការមិនមែនរដ្ឋាភិបាល និងសកម្មជន​បានអំពាវនាវ​ឱ្យរដ្ឋាភិបាល​បើកការស៊ើប​អង្កេត​​​ឡើង​វិញ​ទៅលើសំណុំ​រឿង​របស់​សកម្មជនប្រឆាំងការកាប់បំផ្លាញព្រៃឈើ លោក ឈុត វុទ្ធី ដែលត្រូវបានគេបាញ់ស្លាប់​កាលពីថ្ងៃទី២៦ ខែ​មេសា ឆ្នាំ២០១២។

សកម្មជនប្រមាណ២០នាក់ បានដើរក្បួន​ពី​ទីតាំង​ផ្សារ​រាត្រីក្បែរវត្តភ្នំ ទៅកាន់ក្រសួង​យុត្តិធម៌ ដើម្បីប្រគល់ញត្តិមួយ​ដែលអំពាវនាវឱ្យ​មានការស៊ើបអង្កេត​ឯករាជ្យ​មួយ​ទៅ​លើ​​ឃាតកម្ម​លើ​រូប​លោក វុទ្ធី ស្របពេលនឹង​ការប្រារព្ធខួប​លើកទី១២​នៃមរណភាព​របស់​​លោក។ ពិធី​បែប​ព្រះ​ពុទ្ធសាសនាមួយ​បានរៀបចំឡើង​ដោយអង្គការ CCHR ដែល​​អង្គការនេះបានចេញ​លិខិត​ចំហ​មួយ​ដើម្បីអំពាវនាវ​ឱ្យមានការស៊ើបអង្កេត​ឡើង​វិញ។ សកម្មជនទាំងនេះ​ជំរុញ​ឱ្យរដ្ឋាភិបាល​វែកមុខ​«អ្នកញុះញង់» និងជនផ្សេងទៀត​ដែលពាក់ព័ន្ធ ។

យោងតាមរបាយការណ៍ លោក វុទ្ធី បាននិងកំពុងធ្វើដំណើរជាមួយ​អ្នកសារព័ត៌មាន​មក​ពី​​​អតីត​កាសែត​ ឌឹ ខេមបូឌា ដេលី នៅក្នុងតំបន់ជួរភ្នំក្រវាញ នៅខេត្តកោះកុង ដើម្បី​ស៊ើបអង្កេត​ការកាប់បំផ្លាញព្រៃឈើ​ដោយខុសច្បាប់​នៅក្នុងតំបន់នោះ នៅគ្រាដែល​លោក​ត្រូវបាន​កម្លាំង​រាជ​អាវុធហត្ថមួយរូបបាញ់​ឱ្យ​ស្លាប់កាលពីឆ្នាំ២០១២

ការបាញ់សម្លាប់នោះ​បាន​កើតឡើង​បន្ទាប់ពី​ឆ្មាំ​សន្តិសុខ​មួយរូប​នៅ​ក្រុមហ៊ុន​កាប់ឈើ​ ឈ្មោះ Timber Green ដែល​អមដោយ​កម្លាំង​កងរាជអាវុធហត្ថ និង​ទាហាន បានរឹប​អូស​​ម៉ាស៊ីន​កាមេរ៉ា​របស់​ទាំង​លោក វុទ្ធី និងទាំង​អ្នកសារព័ត៌មាន ។

ការស៊ើបអង្កេត​ផ្លូវការទៅលើ​ការស្លាប់របស់​លោកត្រូវបានបិទបញ្ចប់​ក្នុងពេល​មិនដល់​ពីរសប្ដាហ៍ផង​ទេ ហើយ​៦ខែក្រោយមកទៀត បុគ្គលឈ្មោះ រ៉ាន់ បូរ័ត្ន ដែល​ជា​បុគ្គលិក​សន្តិសុខឯកជន​សម្រាប់​ក្រុមហ៊ុនកាប់ឈើ ត្រូវបានតុលាការកាត់ទោស​ពីបទមាន​តួនាទី​​ពាក់ព័ន្ធនៅក្នុង​ការស្លាប់របស់​លោក វុទ្ធី ។ ប៉ុន្តែ ទោស​ជាប់ពន្ធនាគារ​ពីរឆ្នាំរបស់​បុគ្គលិក​សន្តិសុខរូបនេះត្រូវបានព្យួរ។

រដ្ឋាភិបាល​បានអះអាងថា លោក វុទ្ធី ត្រូវបាន​បាញ់​ស្លាប់​ដោយអចេតនា​ដោយ​មន្ត្រីកង​រាជអាវុធ​ហត្ថមួយ​រូប ឈ្មោះ អ៊ិន រតនា ដែល​បានបាញ់ខ្លួនឯងស្លាប់​នៅក្នុងអំឡុង​ពេល​​ប្រទាញប្រទង់ដណ្ដើម​អាវុធ​ដែលពាក់ព័ន្ធ​នឹង​ឃាតកម្មជាមួយនឹង​ បូរ័ត្ន ។

សកម្មជនបរិស្ថាន អ្នកនាង មាន លីហ្សា បាននិយាយថា ពេលវេលា​កន្លង​ទៅ​ជាង​មួយទសវត្សរ៍​ហើយ ប៉ុន្តែ ក្រសួងពុំទាន់បាន​រក​យុត្តិធម៌​ឱ្យ​លោក វុទ្ធី នៅឡើយទេ ដែល​លោកត្រូវបាន​គេធ្វើ​ឃាត​នៅក្នុង​ព្រៃ។ អ្នកនាង​បាន​និយាយថា គោល​បំណង​នៃញត្តិរបស់ពួកគេ គឺ​ដើម្បី​រក​យុត្តិធម៌​ជូន​លោក វុទ្ធី ដែលពួកគេចាត់ទុកជា​វីរបុរស ។

អ្នកនាង លីហ្សា បាននិយាយថា៖ «យើងចង់ដឹងថាហេតុអ្វីពួកគេសម្លាប់គាត់។ តើអ្នក​ណា​នៅពីក្រោយការបាញ់សម្លាប់នោះ?»។ អ្នកនាងបាននិយាយថា យុវជនបរិស្ថាន​នឹង​ប្រារព្ធ​ពិធីរំឭក​ខួប​មរណភាព​របស់​លោក វុទ្ធី ជារៀងរាល់ឆ្នាំ ដើម្បីជាការរំឭក​ទៅ​កាន់​​ប្រជាជន​ខ្មែរ និង​អ្នកផ្សេងទៀតថា កម្ពុជា​«ពុំមាន​សន្តិភាពពិតប្រាកដទេ»

សកម្មជន​បរិស្ថាន​ដាក់ញត្តិ​ជូន​ក្រសួង​យុត្តិធម៌ជុំវិញករណីស្លាប់របស់លោក ឈុត វុទ្ធី នៅ​រាជធានីភ្នំពេញ នាថ្ងៃទី២៦ ខែមេសា ឆ្នាំ២០២៤។ (ខេមបូចា / ព្រីង សំរាំង)

សកម្មជនមួយរូបទៀត ឈ្មោះ នុត ធិ បាននិយាយថា សកម្មជនបរិស្ថាន​ជំនាន់​ក្រោយៗ​​នឹង​បន្ត​ដំណើររបស់​លោក ឈុត វុទ្ធី ដើម្បីការពារធនធានជាតិ​និងព្រៃឈើ ។

អ្នកនាងនិយាយ​យ៉ាង​ដូច្នេះថា៖ «ច៎ាស ពិតណាស់ គ្រប់គ្នាខ្លាច ប៉ុន្តែ ប្រសិនបើ​យើង​មិន​​បន្ត​ដំណើរនេះ​ទៅមុខ​ទៀត​ទេ តើនឹងមានអ្វីកើតឡើងចំពោះ​ព្រៃឈើរបស់យើង»

កញ្ញា ធី បាននិយាយថា៖ «ឥឡូវនេះ យើងកំពុងតែនិយាយ យើងកំពុងតែស្រែករក​យុត្តិធម៌​ សេរីភាពរបស់​យើង​ត្រូវបានរឹតត្បិត។ ប្រសិនបើ​យើង​បញ្ឈប់ការ​បញ្ចេញមតិ​របស់​យើង តើ​សិទ្ធិ​សេរីភាព​[នៃការបញ្ចេញមតិ]របស់​យើង​ធ្លាក់កម្រិត​ណា?»

នៅក្នុងការឆ្លើយតបមួយមកកាន់ ខេមបូចា ព័ត៌មាន តាមរយៈ​បណ្ដាញសង្គម កូនប្រុស​​របស់​លោក វុទ្ធី លោក ឆឺយ ឧត្ដមរស្មី បាននិយាយថា ១២ឆ្នាំកន្លងផុតទៅ គ្រួសាររបស់​លោក​នៅពុំ​ទាន់​ទទួលបានយុត្តិធម៌នៅឡើយ ដោយ​លោក​កត់សម្គាល់ថា ប្រជាជន​កម្ពុជា​តែងតែគោរព​លោក​ ឈុត វុទ្ធី ជាអ្នកការពារព្រៃឈើ​មួយរូប ។

លោក ឧត្ដមរស្មី និយាយពី​សហរដ្ឋ​អាមេរិកមកថា៖ «ខ្ញុំគិតថា អ្នកដែលបញ្ជា​ឱ្យសម្លាប់​ឪពុករបស់ខ្ញុំ​គឺជា​[មន្ត្រី]ជាន់ខ្ពស់នៅក្នុងរដ្ឋាភិបាល។ ខ្ញុំ​គ្មានសង្ឃឹមទេថា តុលាការ​កម្ពុជា​នឹងរក​យុត្តិធម៌​ឱ្យ​គាត់»។ លោក​​ចោទប្រកាន់ថា៖ «តុលាការ​ស្ថិតក្រោម​ឥទ្ធិពល​របស់​រដ្ឋាភិបាល»

លោកបានបន្ថែម​យ៉ាងដូច្នេះថា៖ «[រតនា]គ្រាន់តែជា​មន្ត្រីកងរាជអាវុធហត្ថ​មួយរូប។ គាត់​គ្មាន​សិទ្ធិ​សម្រេចចិត្ត​សម្លាប់ឪពុករបស់ខ្ញុំ​ទេ។ ខ្ញុំជឿជាក់ថា គេមានគម្រោង​ផែនការ​សម្លាប់​គាត់ [លោក វុទ្ធី]»

អ្នកនាំពាក្យ​ក្រសួងយុត្តិធម៌ លោក ជិន ម៉ាលីន បានមានប្រសាសន៍ថា ជា​គោលការណ៍ សំណុំរឿង​នេះ​បានបិទបញ្ចប់​រួចហើយ ដោយសារតែជនល្មើស​បានត្រូវ​កាត់ទោស​រួចហើយ ។

លោកបាថ្លែងថា៖ «ចំពោះភាគីណាដែលយល់ថា នៅតែគ្មាន​យុត្តិធម៌ ឬមួយក៏ជនដៃ​ដល់​អ្នកពាក់ព័ន្ធពិតរប្រាកដមិនទាន់ត្រូវបានកាត់ទោស​ សូម​សហការ​[ជាមួយក្រសួង] ដើម្បី​ផ្ដល់​ភ័ស្តុតាង​រឹងមាំ​ ឬ​សក្ខីកម្មថ្មី​ ដើម្បីឈាន​[បើក]ការស៊ើបអង្កេត»

លោក ម៉ាលីន បានបន្ថែមថា៖ «ប៉ុន្តែគ្រាន់តែចេញញត្តិមួយ ការរិះគន់ និងការបញ្ចេញ​មតិ​ដែលគ្មានមូលដ្ឋានច្បាស់លាស់ គឺវាមិនអាចជាមូលដ្ឋាន​ឱ្យមានការស៊ើបអង្កេត​ដោយ​នគរបាល​ទេ […] ករណីនេះ​បាន​បិទបញ្ចប់រួច​ទៅហើយតាមផ្លូវច្បាប់»

លោក នី សុខា ប្រធាន​អង្គការសិទ្ធិមនុស្ស អាដហុក បាននិយាយថា សាធារណជន​មានមន្ទិលសង្ស័យ​ជុំវិញ​ការស៊ើបអង្កេត​ទៅលើ​ការស្លាប់របស់​លោក ឈុត វុទ្ធី ។

លោកបានលើកឡើងថា៖ «ប្រសិនបើគ្មានការស៊ើបអង្កេត​ច្បាស់លាស់ និង​គ្មាន​តម្លាភាព​ទេ ហើយ[រដ្ឋាភិបាល]ជៀសវាង​ការរិះគន់ [វាបង្ហាញថា] ប្រព័ន្ធ​យុត្តិធម៌យើង​មិន​ឯករាជ្យ​ទេ»

លោក សុខា ថ្លែងយ៉ាងដូច្នេះថា៖ «សាធារណជន​មានមន្ទិលសង្ស័យ[យូរហើយ]ថា ពុំ​មែន​មានតែជនប៉ុណ្ណឹងទេ [មន្ត្រីកងរាជអាវុធហត្ថ និង​បុគ្គលិកសន្តិសុខ]ទេ ដែល​ជាប់​ពាក់​ព័ន្ធនៅក្នុងរឿងហ្នឹង។ អាច​នឹង​មាន​មនុស្សផ្សេងទៀត​នៅ​ពីក្រោយ​ករណី​​​នេះ ដែល​​មូលហេតុនេះ​ហើយ ទើប​បានជាយើង​ស្នើសុំ​ឱ្យមានការស៊ើបអង្កេតជាថ្មី​ម្ដង​ទៀត​»

ប្រែសម្រួលពីអត្ថបទភាសាអង់គ្លេស៖ No Closure Yet for Slain Anti-Logging Fighter Chut Wutty After 12 Years, Activists Call For Reinvestigation

374 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម