ខេត្តព្រះសីហនុ៖ ថ្នាក់ដឹកនាំក្រុមការងារពិសេសដោះស្រាយអគារជាប់គាំង ឬក្រុមការងារជំរុញការវិនិយោគ ក្នុងខេត្តព្រះសីហនុ ឆ្នាំ២០២៤ បានបញ្ជាក់ថា គិតចាប់ពីខែកុម្ភៈដល់ថ្ងៃទី១ ខែឧសភា ឆ្នាំ២០២៤ ក្រុមការងារទទួលបានពាក្យបណ្តឹង និងការដោះស្រាយវិវាទគម្រោង ជូនវិស័យឯកជនបានចំនួន៤៤គម្រោង ក្នុងចំណោមគម្រោង និងសំណង់អគារ សរុបចំនួន៩៥៤គម្រោង។
លោក ឡុង ឌីម៉ង់ អភិបាលរងខេត្តព្រះសីហនុ និងជាសមាជិកម្នាក់នៃក្រុមការងារពិសេស ជំរុញការវិនិយោគ ក្នុងខេត្តព្រះសីហនុ មានប្រសាសន៍នៅដើមខែឧសភានេះថា ក្រុមការងារនេះ កំពុងយកចិត្តទុកដាក់ជួយសម្រួលដល់វិស័យឯកជន ទាំងក្នុង និងក្រៅស្រុក ដែលគម្រោងវិនិយោគអគាររបស់ពួកគេបានជាប់គាំង និងមានវិវាទផ្សេងៗ ដើម្បីបន្តការងារសាងសង់បញ្ចប់គម្រោង ឈានទៅបើកធ្វើអាជីវកម្មឱ្យបានឆាប់បំផុត។
មន្ត្រីរូបនេះ នៅតែទទូចប្រជាពលរដ្ឋ ក៏ដូចជា អ្នកវិនិយោគទុន ជាតិ-អន្តរជាតិ ដែលពាក់ព័ន្ធនឹងគម្រោងខាងលើ ត្រូវប្រញាប់ដាក់ពាក្យស្នើសុំមកក្រុមការងារ ដើម្បីទទួលបានកញ្ចប់អនុគ្រោះពិសេសឆ្នាំ២០២៤ របស់រាជរដ្ឋាភិបាល ឈានដល់បន្តអាជីវកម្មរៀងៗខ្លួនឱ្យបានឆាប់។ ត្បិតក្រុមការងារពិសេសជំរុញការវិនិយោគក្នុងខេត្តព្រះសីហនុ កំពុងផ្តោតការយកចិត្តទុកដាក់ ទៅលើការងារសម្របសម្រួលទាក់ទិនអគារជាប់គាំងនេះ ដោយយកចិត្តទុកដាក់។
លោក ឡុង ឌីម៉ង បញ្ជាក់ថា ចាប់ពីខែកុម្ភៈមកដល់ថ្ងៃទី១ ខែមេសា ឆ្នាំ២០២៤ សំណើដែលក្រុមការងារកម្មវិធីពិសេស ជំរុញការវិនិយោគ ក្នុងខេត្តព្រះសីហនុ ឆ្នាំ២០២៤ ទទួលបានសរុបមាន៤៤គម្រោង។ ក្នុងនោះរួមមាន៖ គម្រោងដែលទទួលបាន«លិខិតឆ្លើយតបជាផ្លូវការ» មានចំនួន១៣គម្រោង។ គម្រោងដែលបានឆ្លងកាត់ការប្រជុំពិភាក្សា កាលពីថ្ងៃទី២៩ ខែមេសា ឆ្នាំ២០២៤ និងទទួលបាន «ការឯកភាពជាគោលការណ៍» មានចំនួន១៤គម្រោង។ គម្រោងដែលបានដាក់ពាក្យស្នើសុំតែមិនទទួលបានការឯកភាពចំនួន១គម្រោង និងគម្រោងដែលនឹងត្រូវចុះពិនិត្យមានចំនួន១៦គម្រោង ដែលក្នុងនោះ៣គម្រោងបានពិនិត្យម្តងហើយ ប៉ុន្តែក្រុមការងារនឹងត្រូវចុះពិនិត្យ និងវាយតម្លៃម្តងទៀតនៅពេលក្រោយ។
សូមបញ្ជាក់ថា កាលពីថ្ងៃទី២៩ ខែមេសា ឆ្នាំ២០២៤ នាទីស្តីការក្រសួងសេដ្ឋកិច្ច និងហិរញ្ញវត្ថុ លោក ហ៊ាន សាហ៊ីប ប្រធានក្រុមការងារជំរុញ ការវិនិយោគក្នុងខេត្តព្រះសីហនុ បានដឹកនាំកិច្ចប្រជុំក្រុមការងារពិសេស ដើម្បីពិនិត្យលើការស្នើ របស់វិនិយោគិន និងធុរជន ក្នុងខេត្តព្រះសីហនុ ដោយសម្រេចជាគោលការណ៍ផ្តល់ការលើកទឹកចិត្ត ការអនុគ្រោះ ការសម្រួលនីតិវិធី និង ការដោះស្រាយវិវាទ ដោយជោគជ័យបានចំនួន ១៤គម្រោងទៀត។ ហើយបើគិតចាប់ពីខែកុម្ភៈ មកដល់បច្ចុប្បន្ននេះ គឺក្រុមការងារនេះ បានដោះស្រាយវិវាទជូនអ្នកវិនិយោគិន ឬវិស័យឯកជន ដោយជោគជ័យសរុបបានចំនួន ២៧គម្រោង។
លោក ហ៊ាន សាហ៊ីប ដែលជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ផងនោះ បានបញ្ជាក់ថា គម្រោងទាំង១៤ ដែលទើបសម្របសម្រួលដោះស្រាយបញ្ចប់នេះ រួមមាន៖ គម្រោងពាក់ព័ន្ធនឹងអគារជាប់គាំងចំនួន១០គម្រោង និងគម្រោងពុំពាក់ព័ន្ធនឹងអគារជាប់គាំងចំនួន៤ ដែលដំណើរការបានភ្លាមក្នុងឆ្នាំ២០២៤ ជាអាទិ៍៖ គម្រោងសណ្ឋាគារផ្កាយ៥ និងកាស៊ីណូ, គម្រោងរមណីយដ្ឋាន, អគារស្នាក់នៅរួម, អគារពហុមុខងារសម្រាប់ការិយាល័យ និងស្នាក់នៅរួម គម្រោងរោងចក្រលាយបេតុង រោងចក្រផលិតក្រដាសកេសកាតុង និង គម្រោងសេវាកម្មតុបតែងលម្អស្ថាបត្យកម្ម ដែលមានទំហំទុនវិនិយោគសរុបប៉ាន់ប្រមាណ ២១៣លានដុល្លារអាមេរិក។ ហើយគម្រោងទាំងនេះ ជាគម្រោងចម្រុះដែលមានម្ចាស់ជាជនជាតិខ្មែរ និងបរទេស ដោយមានទំហំតូច មធ្យម និងធំ។
ចំពោះសមាសភាពនៃអ្នកចូលរួមកិច្ចប្រជុំ កាលពីថ្ងៃទី២៩ ខែមេសា គឺមានឋានៈចាប់ពី រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង និង មន្ត្រីជំនាញ ដែលជាសមាជិកក្រុមការងារ តំណាងក្រសួងស្ថាប័នពាក់ព័ន្ធ រួមមាន៖ ក្រសួងយុត្តិធម៌, ក្រសួងបរិស្ថាន, ក្រសួងទេសចរណ៍, ក្រសួងសាធារណការ និងដឹកជញ្ជូន, ក្រសួងរៀបចំដែនដី នគរូបនីយកម្ម និងសំណង់, ក្រុមប្រឹក្សាអភិវឌ្ឍន៍កម្ពុជា, រដ្ឋបាលខេត្តព្រះសីហនុ, អគ្គនាយកដ្ឋានពន្ធដារ, និង អគ្គនាយកដ្ឋានគយ និងរដ្ឋាករកម្ពុជា ព្រមទាំងមន្ត្រី និង បុគ្គលិកជំនាញពាក់ព័ន្ធ។
លោក ហ៊ាន សាហ៊ីប បន្តថា កិច្ចប្រជុំនេះ គឺធ្វើឡើងតាមកម្មវិធីពិសេស ជំរុញការវិនិយោគក្នុងខេត្តព្រះសីហនុ ឆ្នាំ២០២៤ ដែលលោក ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសដាក់ឱ្យអនុវត្តជាផ្លូវការ កាលពីថ្ងៃទី៣១ ខែមករា ឆ្នាំ២០២៤។ លោកបន្តថា តាមរយៈកិច្ចប្រជុំជាបន្តបន្ទាប់មកនេះ គឺគិតចាប់ពីខែកុម្ភៈ មកដល់បច្ចុប្បន្ន, ក្រុមការងារបានសម្រេចជាគោលការណ៍ ក្នុងការផ្តល់អត្ថប្រយោជន៍ពិសេស ដល់គម្រោងវិនិយោគ និងធុរកិច្ចបានចំនួន ២៧គម្រោង។ ហើយក្នុងពេលដ៏ខ្លីខាងមុខនេះ, ក្រុមការងារនឹងធ្វើការពិនិត្យលើការស្នើការលើកទឹកចិត្តពិសេស របស់គម្រោងវិនិយោគ និងធុរកិច្ចមានចំនួនជាងដប់គម្រោងទៀត។
មន្ត្រីដដែលបន្តថា ក្រុមការងារនេះ ក៏បានសម្របសម្រួលឱ្យមានកិច្ចព្រមព្រៀងបញ្ចប់វិវាទ របស់គូភាគីចំនួន១ករណី ក្នុងខេត្តព្រះសីហនុ ដើម្បីជំរុញការដោះស្រាយគម្រោងសាងសង់អគារជាប់គាំង ឱ្យបានរលូន និងឈានទៅបើកធ្វើអាជីវកម្មឆាប់ៗនេះផងដែរ។
ជាងនេះទៀត ក្រុមការងារ ក៏កំពុងអនុវត្តវិធានការនានា ដើម្បីជំរុញសកម្មភាពវិនិយោគក្នុងខេត្ត ដូចជា៖ ការសិក្សាកំណត់តំបន់អភិវឌ្ឍន៍, ការរៀបចំសេចក្តីព្រាងអនុក្រឹត្យស្តីពីទិដ្ឋាការពិសេសរយៈពេលវែង សម្រាប់ការវិនិយោគ ក្នុងខេត្តព្រះសីហនុ និងការសិក្សារៀបចំ ព្រមទាំងពង្រឹងតំបន់ឧស្សាហកម្ម ឬតំបន់សេដ្ឋកិច្ចពិសេសដែលមានស្រាប់។
លោក ហ៊ាន សាហ៊ីប ក៏បានឱ្យដឹងផងដែរថា បច្ចុប្បន្ននេះ ក្រុមការងារ ក៏បានសម្របសម្រួលដោះស្រាយវិវាទ តាមរយៈកិច្ចព្រមព្រៀងបញ្ចប់វិវាទរបស់គូភាគី ដែលមានការពាក់ព័ន្ធនឹងអគារជាប់គាំង ក្នុងខេត្តព្រះសីហនុ ដែលមានទុនវិនិយោគ ១០០លានដុល្លារអាមេរិកផងដែរ។
លោកបន្តថា ការផ្តល់ការលើកទឹកចិត្តពិសេស មានវិសាលភាពគ្របដណ្តប់ សម្រាប់គម្រោងដែលស្នើសុំ និងអនុវត្តក្នុងខេត្តព្រះសីហនុ ក្នុងឆ្នាំ២០២៤ មានគម្រោងធំៗចំនួន ៣ប្រភេទ មានដូចជា៖
១) គម្រោងពាក់ព័ន្ធនឹងអគារជាប់គាំង, ២) គម្រោងពុំពាក់ព័ន្ធនឹងអគារជាប់គាំង ដែលអាចដាក់ដំណើរការបានក្នុងឆ្នាំ២០២៤ និង ៣) ការពង្រីកគម្រោង និងសកម្មភាពធុរកិច្ច។ លើសពីនេះ ក៏មានការលើកទឹកចិត្ត និងការអនុគ្រោះនានា ក៏ផ្តល់ជូនសហគ្រាសមីក្រូ តូច និង មធ្យម។ ដោយឡែក ចំពោះសហគ្រាស ឬគម្រោងដែលមានស្រាប់ ក៏ទទួលបានការអនុគ្រោះ និងសម្រួលនីតិវិធីលើលិខិតអនុញ្ញាត អាជ្ញាបណ្ណ និង ការតភ្ជាប់ទៅហេដ្ឋារចនាសម្ព័ន្ធរបស់រដ្ឋ ជាអាទិ៍: ទឹក ភ្លើង ផ្លូវ ជាដើម តាមលក្ខណៈភូមិសាស្ត្រ និងលទ្ធភាពរបស់រដ្ឋ និងវិស័យឯកជន។
បន្ថែមលើនេះ លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ ក៏បានអំពាវនាវ និងលើកទឹកចិត្តឱ្យធុរជន ឬវិនិយោគិន ដែលមានបំណងទទួលបាននូវ «អត្ថប្រយោជន៍ពិសេស» សូមអញ្ជើញដាក់ពាក្យ ឬស្នើមកក្រុមការងារជំរុញការវិនិយោគ ក្នុងខេត្តព្រះសីហនុ ដែលមានអាស័យដ្ឋាន៖ ផ្លូវជាតិលេខ៤ ភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ឬនៅអគារមជ្ឈមណ្ឌលអភិវឌ្ឍធុរកិច្ច ជាន់ទី២១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ និងតាមរយៈលេខទូរសព្ទ ឬតេឡេក្រាម: ០១២ ៩០២ ២០០, ០៨៩ ៧២៦ ០២៨, និង ០១៦ ៣២១ ០១០។
ទាក់ទិនការបង្កើតឲ្យមាន ក្រុមការងារពិសេសជំរុញការវិនិយោគ ក្នុងខេត្តព្រះសីហនុ របស់លោកនាយករដ្ឋមន្ត្រី ហ៊ុន ម៉ាណែត ខាងលើនេះ គឺទទួលបានការគាំទ្រពី អ្នកវិនិយោគទុនទាំងតូចទាំងធំ ដែលគម្រោងវិនិយោគអគារសំណង់ របស់ពួកគេ កំពុងជាប់គាំង និងមានបញ្ហាផ្លូវច្បាប់ជាមួយដៃគូវិនិយោគ ពិបាកក្នុងការរកដំណោះស្រាយ ដើម្បីបើកផ្លូវឈានទៅបញ្ចប់គម្រោងសាងសង់សំណង់អគារ របស់ខ្លួនឡើងវិញ។
លោក គាំ សារី ជាពលរដ្ឋម្នាក់ក្នុងចំណោម អាជីវករច្រើនទៀត រស់នៅក្រុងព្រះសីហនុ ដែលមានអគារជាប់គាំង និងមានវិវាទជាមួយដៃគូវិនិយោគរបស់ខ្លួន បានឱ្យដឹងថា រូបលោកនឹងត្រៀមរៀបចំឯកសារពាក់ព័ន្ធ ដាក់ជូនក្រុមការងារដោះស្រាយវិវាទនេះ ក្នុងពេលដ៏ឆាប់។ ខណៈកន្លងមក រូបគាត់ហាក់មិនសូវមានជំនឿទៅលើក្រុមការងារដោះស្រាយវិវាទ នៃ «កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤» របស់រាជរដ្ឋាភិបាល ខាងលើនេះទេ។
លោកបន្តថា សំណង់អគារមានកម្ពស់ជាង១០ជាន់របស់គាត់ ដែលបានចុះកុងត្រាជាមួយដៃគូវិនិយោគជនជាតិចិនកន្លងមក គឺត្រូវជាប់គាំង តាំងពីឆ្នាំ២០២០មកម៉្លេះ ដោយសារតែជនជាតិចិនទាំងនោះ បានចាកចេញពីប្រទេសកម្ពុជាអស់គ្មានសល់។ លោករំពឹងថា បញ្ហា ឬកង្វល់របស់លោកនឹងត្រូវដោះស្រាយរួច ក្រោយរូបលោកដាក់ឯកសារជូន ក្រុមការងារពិសេសជំរុញការវិនិយោគ ក្នុងខេត្តព្រះសីហនុ ឱ្យជួយរកដំណោះស្រាយ នៅពេលខាងមុខ។
លោក គាំ សារី បញ្ជាក់បន្ថែមថា«ពេលនេះ ខ្ញុំមានបំណងស្វែងរកដៃគូវិនិយោគថ្មី ដែលមានលុយ មកសហការបញ្ចប់គម្រោងសំណង់របស់ខ្ញុំ ដែលជាប់គាំងសង់មិនទាន់រួចនោះ ដើម្បីប្រកបអាជីវកម្មឱ្យបានឆាប់ ប៉ុន្តែបច្ចុប្បន្នេះ នៅមានបញ្ហាផ្លូវច្បាប់ជាប់កុងត្រា ជាមួយដៃគូវិនិយោគចាស់ មិនទាន់បានដោះស្រាយនៅឡើយ»។
សម្រាប់ស្ត្រីសហគ្រិនវ័យក្មេងម្នាក់ផ្សេងទៀត គឺអ្នកស្រី ឌួង និមល ជាអ្នកវិនិយោគទុនផ្នែកសំណង់សណ្ឋាគារម្នាក់ដែរ ក្នុងក្រុងព្រះសីហនុ ក៏គាំទ្រដល់រដ្ឋាភិបាល ដែលបានដាក់ចេញ នូវ«កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤» ដើម្បីជួយសម្របសម្រួលដល់វិស័យឯកជន ជាពិសេសវិស័យសំណង់ អគារ ដែលបច្ចុប្បន្ន កំពុងជាប់គាំងមិនអាចបន្តសកម្មភាពសាងសង់ ដោយសារតែមានវិវាទផ្លូវច្បាប់មិនទាន់ដោះស្រាយចប់ជាមួយដៃគូវិនិយោគជនជាតិចិន ហើយពេលនេះ ពួកគេ បានចាកចេញពីកម្ពុជាអស់ មិនវិលត្រឡប់មកវិញទេ។
អ្នកស្រីបន្តថា «ពេលនេះរូបខ្ញុំ ក៏មានគម្រោងរៀបចំឯកសារ ដាក់ជូនក្រុមការងារដោះស្រាយវិវាទអគារជាប់គាំងរបស់រដ្ឋាភិបាលដែរ ដើម្បីស្នើឱ្យជួយសម្របសម្រួលបញ្ចប់កុងត្រាជាមួយដៃគូវិនិយោគចាស់ ដែលជាជនជាតិចិន ហើយពេលនេះ ជនជាតិចិនទាំងនោះ កំពុងរស់នៅឯប្រទេសចិន មិនវិលចូលមកកម្ពុជា ដើម្បីបន្តសកម្មភាពសង់សំណង់អគារ ដែលបានព្រមព្រៀងគ្នាកន្លងមកទៀតទេ»។
តាមការបញ្ជាក់ របស់ប្រជាពលរដ្ឋខ្មែរមួយចំនួន រស់នៅក្រុងព្រះសីហនុ ឱ្យដឹងថា ចាប់តាំងពីឆ្នាំ២០២០មក គឺការងារវិនិយោគលើវិស័យសំណង់ភាគច្រើន របស់គាត់ ជាមួយដៃគូវិនិយោគជនជាតិចិន ដែលទាក់ទង សង់សំណង់សណ្ឋាគារ និងអគារខុដូ មានកម្ពស់ចាប់ពីជាង ១០ជាន់ទៅ គឺដោយពួកគាត់ជាអ្នកផ្តល់ទីតាំង ឬដី ដើម្បីសហការវិនិយោគជាមួយអ្នកវិនិយោគបរទេស ដោយអ្នកវិនិយោគជនជាតិចិន ជាអ្នកចំណាយលុយទៅលើការងារសាងសង់ និងបំពាក់គ្រឿងសង្ហារឹមផ្សេងៗ និងមានចុះកុងត្រា និងកិច្ចព្រមព្រៀងជាមួយគ្នាស្របតាមច្បាប់។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ បានលើកឡើងថា ចំពោះដី និងអគារសង់មិនទាន់រួច ដែលអ្នកវិនិយោគទុនចិន បានចុះកុងត្រាជាមួយពលរដ្ឋខ្មែរជាម្ចាស់ដី គឺនៅពេលអ្នកវិនិយោគទុនចិនទាំងនោះ ចាក់ចេញពីក្រុងព្រះសីហនុ អស់ បានបន្សល់ទុកនូវអគារខ្មោចសង់មិនទាន់រួចរាប់រយអគារនៅលើដីដែលពលរដ្ឋខ្មែរបានជួលទៅឱ្យពួកគេ។ ហើយពលរដ្ឋខ្មែរទាំងនោះ មិនអាចប្រើប្រាស់ ឬយកដីទាំងនោះទៅធ្វើអាជីវកម្ម ឬក៏វិនិយោគសាងសង់សំណង់អ្វីទៀតបានទេ។
លោកបន្តថា៖ «នាថ្ងៃអនាគត ចំពោះសំណង់អគារ ឬខ្មោចអគារដែលសង់មិនទាន់រួច នឹងអាចធ្វើឱ្យប៉ះពាល់ដល់សុវត្ថិភាពរបស់ពលរដ្ឋរស់នៅជុំវិញអគារទាំងនោះថែមទៀតផង ព្រោះម្ចាស់ដី គាត់គ្មានលទ្ធភាព ទៅរុះរើអគារទាំងនោះចេញពីលើដីរបស់គាត់ទេ»។
លោក សន ជ័យ បង្ហាញការគាំទ្រ ចំពោះយន្តការដោះស្រាយវិវាទសំណង់អគារជាប់គាំង ឬសង់មិនទាន់រួចរាល់ ក្នុងខេត្តព្រះសីហនុ របស់រដ្ឋាភិបាល ដែលមានវិធានការដោះស្រាយ ជួយដល់ប្រជាពលរដ្ឋ តាមរយៈគ្រប់មធ្យោបាយផ្សេងៗដូចបានអនុវត្តខាងលើនេះ។ លោកបន្តថា សកម្មភាពវិនិយោគរបស់ជនជាតិចិនទៅលើវិស័យសំណង់ជាប់គាំង ក្នុងក្រុងព្រះសីហនុ ក៏អាចនាំឱ្យខូចមុខមាត់ដល់អ្នកវិនិយោគទុនចិន ដទៃទៀតនាថ្ងៃខាងមុខ ព្រោះអាចត្រូវប្រជាពលរដ្ឋខ្មែរបាត់បង់ជំនឿ។
លោក សន ជ័យ សង្កត់ធ្ងន់ថា៖ «មេរៀនពីអគារខ្មោច ឬអគារសង់មិនរួច របស់អ្នកវិនិយោគទុនចិន នៅក្នុងក្រុងព្រះសីហនុនេះ គឺជាមេរៀនមួយ ដែលរដ្ឋាភិបាល ត្រូវគិតគូរឱ្យបានច្បាស់ ចំពោះលំហូរវិនិយោគវិស័យសំណង់យ៉ាងគំហុកបែបនេះ។ តើរដ្ឋាភិបាលគួរមានវិធានការអ្វីទៅលើក្រុមអ្នកវិនិយោគទុនទាំងនោះរបៀបណា ដើម្បីកុំឱ្យរឿងដដែលកើតមាននៅលើទឹកដីខេត្តព្រះសីហនុ នាថ្ងៃអនាគតទៀត»។
លោក ឡុង ឌីម៉ង់ មានប្រសាសន៍ថា ចំពោះគម្រោងវិនិយោគអគារជាប់គាំង ឬអគារសង់មិនទាន់ចប់ និងអគារសង់រួច ប៉ុន្តែមិនទាន់ដំណើរការ នៅក្នុងក្រុងព្រះសីហនុ ភាគច្រើន គឺម្ចាស់ដីជាជនជាតិខ្មែរ រីឯម្ចាស់អគារ ឬម្ចាស់វិនិយោគវិសំណង់ គឺជាជនបរទេស (ជនជាតិចិន)។
យោងតាមរបាយការណ៍ របស់រដ្ឋបាលខេត្តព្រះសីហនុ បានបង្ហាញតារាងប៉ាន់ស្មានទុនវិនិយោគគម្រោង និងសំណង់អគារ ក្នុងខេត្តព្រះសីហនុ ឆ្នាំ២០២៤ បញ្ជាក់ថា គម្រោងវិនិយោគ និងអគារ ដែលបានសាងសង់រួច និងកំពុងជាប់គាំង នៅក្នុងខេត្តព្រះសីហនុ រួមមាន៖ គម្រោងផ្អាកការសាងសង់មានចំនួន ៣៣៩គម្រោង ឬស្មើ ៣៦២អគារ។ គម្រោងកំពុងដំណើរការសាងសង់មានចំនួន ២៩គម្រោង ឬស្មើ៥៣អគារ។ គម្រោងសាងសង់រួច និងពុំទាន់ដំណើរការប្រើប្រាស់ មានចំនួន ១៦០គម្រោង ឬស្មើ១៧៦អគារ។
គម្រោងសាងសង់រួច និងកំពុងប្រកបអាជីវកម្មមានចំនួន ៤២៦គម្រោង ឬស្មើ ៤៦៩អគារ។ សរុបគម្រោង និងសំណង់អគារទាំងអស់មានចំនួន៩៥៤គម្រោង ឬស្មើ ១ ០៦០អគារ និងមានផ្ទៃក្រឡាសំណង់សរុប ៨ ៩៥៦ ៨០២។ សរុបទុនវិនិយោគ ចំណាយលើការសាងសង់អគារមានចំនួន ៤ ២១៣ ០៥៩ ១៣២ដុល្លារអាមេរិក និងតម្រូវការទុនវិនិយោគបន្ថែមលើគម្រោងសាងសង់អគារបន្តសរុបចំនួន ១ ១៦១ ០២២ ២៩៨ដុល្លារអាមេរិក៕
