សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចបង្ក្រាបទីតាំងល្បែងខុសច្បាប់ជាង៣ពាន់​កន្លែង និងឃាត់​ខ្លួន​មនុស្សជាង១ម៉ឺននាក់

ទីតាំងអគារអតីតកាស៊ីណូ Paradise Island ដែលលួចបើកលេងល្បែងអនឡាញខុសច្បាប់ ត្រូវសមត្ថកិច្ចចុះបង្ក្រាបកាលពីថ្ងៃទី៩ ខែមីនា ឆ្នាំ២០២៤។ (រូបភាពផ្តល់ឱ្យ)
ទីតាំងអគារអតីតកាស៊ីណូ Paradise Island ដែលលួចបើកលេងល្បែងអនឡាញខុសច្បាប់ ត្រូវសមត្ថកិច្ចចុះបង្ក្រាបកាលពីថ្ងៃទី៩ ខែមីនា ឆ្នាំ២០២៤។ (រូបភាពផ្តល់ឱ្យ)

ខេត្តព្រះសីហនុ៖ មន្ត្រីជាន់ខ្ពស់ក្រសួងមហាផ្ទៃបានអះអាងថា សមត្ថកិច្ចចុះបង្ក្រាប​ទីតាំង​បើក​ល្បែ​ងស៊ីសងខុសច្បាប់ជាង៣ពាន់កន្លែង និងឃាត់ខ្លួនមនុស្សទាំងជន​បរទេស និងខ្មែរជាង​១ម៉ឺន​នាក់ ​ក្នុងរយៈពេល៣ថ្ងៃនៅទូទាំងប្រទេសដើម្បីសាកសួរ និងបន្តនីតិវិធី​។

​រដ្ឋលេខាធិការក្រសួងមហាផ្ទៃ និងជាប្រធានគណៈកម្មការចំពោះកិច្ចដើម្បីស្រាវជ្រាវ និងស៊ើប​អង្កេត​គ្រប់ល្បែងស៊ីសងខុសច្បាប់ លោក សុខ ផល បានថ្លែងក្នុង​សន្និសីទកាសែត កាលពី​ល្ងាច​ថ្ងៃអាទិត្យ ទី​១០ ខែមីនា នៅខេត្តព្រះសីហនុ ថា គិត​ត្រឹមរយៈ​ពេលបី​ថ្ងៃ ក្នុង​សប្តាហ៍​កន្លង​មកនេះ សមត្ថកិច្ចជំនាញបានចុះ​បង្ក្រាប និងបិទទីតាំង​បើកលេងល្បែង​ស៊ី​សង​ខុស​ច្បាប់​​ នៅទូទាំងប្រទេសកម្ពុជា បានជាង​៣ពាន់​កន្លែង និងឃាត់ខ្លួនទាំង​ជនបរទេស និងខ្មែរ​បាន​ជាង១ម៉ឺននាក់ ដើម្បី​សាក​សួរ និងបន្តអនុវត្តតាមនីតិវិធី​ច្បាប់។

ការធ្វើសន្និសីទកាសែតនេះ បន្ទាប់​ពីកម្លាំង​សមត្ថកិច្ចចម្រុះ បានចុះបង្ក្រាបទីតាំង​បើកលេង​ល្បែង​ស៊ីសងខុសច្បាប់ចំនួន២កន្លែង ក្នុង​ខេត្ត​ព្រះសីហនុ ហើយឃាត់ខ្លួនមនុស្ស​ជាង​៤០០​នាក់​។

ទោះយ៉ាងណា លោក សុខ ផល មិនបានបញ្ជាក់ប្រាប់អ្នកសារព័ត៌មានលម្អិត​ថា ខេត្តណាខ្លះ ដែល​សមត្ថកិច្ច រកឃើញ​មានបើកលេងល្បែងស៊ីសងខុសច្បាប់ ហើយត្រូវសមត្ថកិច្ច​ចុះ​បង្ក្រាប មានចំនួនច្រើនជាងគេនោះទេ?។ ប៉ុន្តែលោក​បានព្រមានថា អ្នកជាប់ពាក់ព័ន្ធ​សកម្មភាព​​បើក​​ទីតាំងលេងល្បែងស៊ីសងខុសច្បាប់ទាំងអស់ នឹងត្រូវផ្តន្ទាទោសធ្ងន់ធ្ងរតាម​ច្បាប់កម្ពុជា និងអំពាវនាវឲ្យបញ្ឈប់សកម្មភាព របស់ខ្លួនជាបន្ទាន់។

​លោក សុខ ផល បានបន្តថា ត្រឹមតែ​រយៈពេលពីរថ្ងៃគត់ គឺថ្ងៃទី៩ និងទី១០ ខែមីនាប៉ុណ្ណោះ ​សមត្ថកិច្ចជំនាញពាក់ព័ន្ធក៏ដូចជា​កម្លាំងចម្រុះ នៃគណៈបញ្ជាការឯកភាព រដ្ឋបាលខេត្ត​ព្រះសីហនុ បានចុះ​បង្ក្រាបទីតាំង​ល្បែ​ង​អនឡាញខុសច្បាប់ចំនួន២កន្លែង និងឃាត់ខ្លួនទាំង​ជនបរទេស និង​ខ្មែរ​ចំនួនជាង៤០០នាក់។

ផ្តើមពីបញ្ហានេះ ​លោកបានអំពាវនាវដល់​ប្រជាពលរដ្ឋ ដែលមានការពាក់ព័ន្ធទៅ​នឹងល្បែង​ស៊ី​សង​​ខុសច្បាប់ ត្រូវដកខ្លួនជា​បន្ទាន់ បើពុំដូច្នេះទេ នឹងត្រូវប្រឈមមុខ​ការផ្តន្ទាទោសធ្ងន់ធ្ងរ តាម​​ច្បាប់​ជាក់ជាមិនខាន។

​ លោក សុខ ផល បានបញ្ជាក់ថា៖ «អ្នកជាប់ពាក់ព័ន្ធទាំងអស់ ពិសេសប្រជាពលរដ្ឋខ្មែរត្រូវ​បញ្ឈប់​ប្រកប ឬលេងល្បែងស៊ីសងខុសច្បាប់តទៅទៀត ទាំងអ្នករស់នៅខេត្តព្រះសីហនុ និងតាមបណ្តាខេត្តផ្សេងៗ ហើយងាកមក​ចាប់យកអាជីពស្របច្បាប់​ សម្រាប់ចិញ្ចឹម​ជីវិត ទើបមានសុវត្ថិភាព​យូរអង្វែង»

លោកបន្តថា៖«​អ្នកលេងល្បែង ឬក៏បើកទីតាំងលេងល្បែងស៊ីសងខុសច្បាប់ ដែលធ្វើ​សកម្មភាព នៅក្នុងមូលដ្ឋានខេត្តព្រះសីហនុ រាល់ថ្ងៃនេះ គឺភាគច្រើនជាជនបរទេស ឬមក​ពី​ក្រៅ​ប្រទេស។ ហើយចំពោះបទល្មើសល្បែងស៊ីសង នៅតាមបណ្តាខេត្តផ្សេងៗ ក៏ត្រូវ​សមត្ថកិច្ច​បង្ក្រាប និងនាំខ្លួនអ្នកជាប់ពាក់ព័ន្ធមកអនុវត្តតាមច្បាប់ដូចគ្នាដែរ។ ដូច្នេះត្រូវ​បញ្ឈប់​សកម្មភាពល្មើ​សទាំងនេះជាបន្ទាន់»

សកម្មភាពរបស់លោក សុខ ផល រដ្ឋលេខាធិការក្រសួងមហាផ្ទៃ និងលោក គួច ចំរើន អភិបាលខេត្តព្រះសីហនុ ចុះពិនិត្យទីតាំងអតីតកាស៊ីណូ Paradise Island លួច​បើក​លេង​​ល្បែងអនឡាញខុសច្បាប់ ក្រោយសមត្ថកិច្ចចុះបង្ក្រាប នៅរសៀលថ្ងៃទី១០ ខែមីនា ឆ្នាំ​២០២៤ នៅខេត្តព្រះសីហនុ។ (រូបភាពផ្តល់ឱ្យ)

នាឱកាសនោះដែរ លោក គួច ចំរើន អភិបាល​ខេត្ត​ព្រះសីហនុ ក៏បានលើកឡើងក្នុងសន្និសីទ​កាសែត​​ដែរថា ​ម្ចាស់ទីតាំងល្បែង​ស៊ីសង​ខុស​ច្បាប់​​ទាំងអស់ សូម​ដកខ្លួននៅឲ្យឆ្ងាយអំពី​បទ​ល្មើស​​​ទាំងនេះ ព្រោះល្បែងស៊ីសងបានធ្វើឲ្យ​ប៉ះពាល់ដល់​សង្គមជាតិធ្ងន់ធ្ងរ។ ដូចនេះដើម្បី​ជៀសផុតពីសំណាញ់ច្បាប់ គឺមានតែការដក​ខ្លួន​ចេញឲ្យឆ្ងាយពីអំពើល្មើសល្បែង​ស៊ីសង​ខុស​ច្បាប់​​ទាំងនេះ​ ព្រោះត្រូវប្រឈមនឹងការឃាត់ខ្លួន និងកសាងសំណុំរឿងបញ្ជូន​ទៅ​តុលាការ​ផ្តន្ទាទោស

ជាងនេះទៀត លោក គួច ចំរើន ក៏ស្នើដល់ប្រជាពលរដ្ឋទាំងអស់ ដែលមកធ្វើការនៅក្នុង​ក្រុង​ព្រះសីហនុ ពាក់ព័ន្ធទៅនឹងទីតាំងល្បែងកាស៊ីណូ៖ «មុននឹងចូលធ្វើការត្រូវសាកសួរព័ត៌មាន​ឲ្យបានច្បាស់ជាមុនសិន ថាតើទីតាំង​កាស៊ីណូទាំងនោះ មានច្បាប់ហើយឬ​នៅ?  ប្រយោជន៍​ដើម្បីជៀសវាង សមត្ថកិច្ច ចុះអនុវត្តនីតិវិធី អាចធ្វើឲ្យប៉ះពាល់ ឬបាត់បង់ការងារ​ និងកិត្តិយស​របស់ខ្លួន»។ លោកបន្តថា៖«ជាងនេះ ក៏សូមអំពាវនាវដល់​ប្រជាពលរដ្ឋទាំង​អស់ ដែលបាន​ដឹង ឬមានការ​សង្ស័យ​​អំពីទីតាំងណាមួយ ​មានជាប់​ពាក់ព័ន្ធអំពើល្មើសច្បាប់ សូម​ជួយ​រាយការណ៍​​​មកកាន់​សមត្ថកិច្ចគ្រប់ជាន់ថ្នាក់ ដើម្បីសមត្ថកិច្ចមានមូលដ្ឋានចុះស៊ើបអង្កេត និងស្រាវជ្រាវ ឈាន​ទៅ​បង្ក្រាបបទល្មើសទាំងនោះឲ្យមានប្រសិទ្ធភាព»​។​

តាមរបាយការណ៍​របស់រដ្ឋបាលខេត្តព្រះសីហនុ អំពីប្រតិបត្តិការបង្ក្រាបល្បែ​ងអនឡាញ​ខុ​ស​ច្បា​ប់រយៈពេលពីរថ្ងៃចាប់ពីថ្ងៃទី៩ដល់ថ្ងៃទី១០ ខែមីនា បង្ហាញថា អនុវត្តតាមសារាចរ​ណែនាំ​​របស់​លោក ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចុះថ្ងៃទី២៩ ខែកុម្ភៈ ឆ្នាំ​២០២៤ និងលិខិតបង្គាប់ការរបស់ក្រសួងមហាផ្ទៃ ក្រុមការងារបង្ក្រាបបទល្មើ​ស​ឆបោកតាម​​ប្រព័ន្ធអនឡាញ (Sca​mmed Online) ​បានចុះប្រតិបត្តិការនៅក្នុងមូលដ្ឋាន​ខេត្ត​ព្រះសីហនុ។

​នៅថ្ងៃទី៩ ខែមីនា ឆ្នាំ២០២៤ ​ចុះបង្ក្រាបទីតាំងទី១ ​គឺនៅអតីតកាស៊ីណូ ផារ៉ាដាយ អាយលែន (Paradise Island) មានទីតាំងនៅភូមិ៣​ សង្កាត់៤​ ក្រុង-ខេត្តព្រះសីហនុ​ រកឃើញជនបរទេស​ចំនួន១៧២នាក់ (ស្រី៤៣នាក់) មាន៤សញ្ជាតិ (វៀតណាម១០៩នាក់ ស្រី១៧នាក់) (ថៃ៥៤​នាក់ ស្រី២៤នាក់) (ចិនតៃវ៉ាន់៨នាក់ ស្រី២នាក់) និងចិន១នាក់។ អ្នកគ្រប់គ្រងចំនួន ៥នាក់ (ស្រី២នាក់) មាន២សញ្ជាតិ ចិនតៃវ៉ាន់៤រូប (ស្រី២នាក់) និងចិន១នាក់។

អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ មានប្រសាសន៍ថា ជនសង្ស័យ​ខាង​លើ​នេះ សមត្ថកិច្ចកំពុងបន្តនីតិវិធី ដើម្បីឈានទៅកសាងសុំណុំរឿង​បញ្ជូន​ទៅ​​កាន់សាលាដំបូង​ខេត្តព្រះសីហនុចាត់ការតាមនីតិនវិធីច្បាប់​។ សម្រាប់ជនបរទេសចំនួន ១៦៧​នាក់ (ស្រី៤១នាក់) មាន៣សញ្ជាតិ (វៀតណាម១០៩នាក់ ថៃ៥៤នាក់ ចិនតៃវ៉ាន់ ៤នាក់) ត្រូវ​​បញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធី​ត្រៀមបណ្តេញ​ចេញ​ពី​ប្រទេសកម្ពុជា។

នៅថ្ងៃទី១០ ខែមីនា ឆ្នាំ២០២៤ សមត្ថកិច្ច បានចុះបង្ក្រាបទីតាំងទី២​ មិនមានឈ្មោះ ស្ថិត​នៅ​ទល់​មុខផ្សារក្តាម ស្ថិត​ក្នុង​ភូមិ​២​ សង្កាត់៤​ ក្រុង-ខេត្តព្រះសីហនុ​ សមត្ថកិច្ចបានរកឃើញ​ជនជាតិខ្មែរ​​ចំនួន២៧៩នាក់ (ស្រី២២៧នាក់) និង​ជនបរទេសចំនួន២៨នាក់ (ស្រី៣នាក់) មាន២សញ្ជាតិ (ចិន២៧នាក់ មីយ៉ាន់ម៉ា១នាក់)។ សម្រាប់ជនបរទេសចំនួន២៨នាក់ (ស្រី៣នាក់) មាន២សញ្ជាតិ (ចិន២៧នាក់ មីយ៉ាន់ម៉ា១នាក់) បានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីបន្តនីតិវិធីត្រៀមបណ្តេញចេញពីប្រទេសកម្ពុជា។

ចំពោះគោលបំណង នៃប្រតិបត្តិការខាងលើនេះ លោក សុខ ផល បញ្ជាក់ថា ​ដើម្បីឈានទៅ​លុបបំបាត់ឲ្យ​អស់នូវទីតាំងដែលមានប​ទល្មើ​ស​ឆបោកតាមប្រព័ន្ធអនឡាញ (Sc​ammed Online) គ្រប់ប្រភេទនៅក្នុងភូមិសាស្ត្រខេត្តព្រះសីហនុ និងនៅតាមបណ្តាខេត្តផ្សេងៗទៀត នៅទូទាំងប្រទេសកម្ពុជា។

​ទាក់ទិន​យុទ្ធនាការ​ចុះបង្ក្រាបទីតាំងបើកល្បែងស៊ីសងខុសច្បាប់​នេះ ក៏ទទួលបានការសាទរពី មន្ត្រីសង្គមស៊ីវិល ក៏ដូចជា ប្រជាពលរដ្ឋ និងអាណាព្យាបាល​ភាគច្រើន ​មានលំនៅដ្ឋានរស់ នៅ​ក្នុង​​ខេត្តព្រះសីហនុ។

បុគ្គលិកប្រុសស្រីបម្រើការងារនៅក្នុងអគារអតីតកាស៊ីណូ Paradise Island ដែលលួច​បើក​លេង​ល្បែង​អនឡាញខុសច្បាប់ ហើយត្រូវសមត្ថកិច្ចចុះបង្ក្រាប កាលពីថ្ងៃទី៩ ខែមីនា ឆ្នាំ​២០២៤។​ (រូបភាពផ្តល់ឱ្យ)

លោក បួន រ៉ាស៊ី ជាអាណាព្យាលបាលម្នាក់ ក្នុងចំណោមប្រជាពលរដ្ឋច្រើនទៀត រស់នៅ​ក្រុងព្រះសីហនុ ​បានថ្លែងសរសើរចំពោះសកម្មភាពជាវិជ្ជមាន របស់កម្លាំង​សមត្ថកិច្ចជំនាញ ក្រសួងមហាផ្ទៃ ក៏ដូចជាកម្លាំងសមត្ថកិច្ច​ចម្រុះនៃរដ្ឋបាល​ខេត្តព្រះសីហនុ ដែលបានចុះ​បង្ក្រាប​និងបិទទីតាំងលួចបើកលេងល្បែងស៊ីសងខុសច្បាប់ជាបន្តបន្ទាប់ក្នុងមូលដ្ឋាននេះ។

អាណាព្យាបាលរូបនេះ បានចាត់ទុក ការចុះបង្ក្រាបទីតាំងបើកលេងល្បែងស៊ីសងខុសច្បាប់ នៅខេត្តព្រះសីហនុ​ថា៖ «នឹងអាចទប់ស្កាត់ នូវបទល្មើសផ្សេងៗ ដែលបានកើតមានគួរឲ្យ​ព្រួយ​បារម្ភ និងបង្កការភ័យខ្លាចដល់ប្រជាពលរដ្ឋ រស់នៅក្នុងក្រុងព្រះសីហនុ រួមមាន៖ បទល្មើស​ចាប់ជំរិតមនុស្សធ្វើទារុណកម្មជំរិតទារប្រាក់ បង្កដោយជនជាតិចិន បទល្មើស​ជួញដូរ​អាវុធ បទល្មើសជួញដូរគ្រឿងញៀន បទល្មើសចោរកម្ម លួច ឆក់ ប្លន់គ្រប់ប្រភេទ ដែលបានកើតមានជាបន្តបន្ទាប់ នៅក្នុងមូលដ្ឋានខេត្តជាប់ឆ្នេរសមុទ្រមួយនេះ ហើយដែល​កន្លង​មក សមត្ថកិច្ចជំនាញខេត្តនេះ បង្ក្រាបមិនទាន់មានប្រសិទ្ធភាព»

ងាកមក អ្នកស្រី មុំ ចំណាន ជាអាណាព្យាបាលម្នាក់ដែរ រស់នៅក្រុងព្រះសីហនុ អ្នកស្រី​គាំទ្រ ​ចំពោះយុទ្ធនាការរបស់កម្លាំងសមត្ថកិច្ចចម្រុះ ដែលបានចុះបង្ក្រាប និងបិទទីតាំងបើក​លេង​ល្បែង​​ស៊ីសងខុសច្បាប់ នៅក្នុងមូលដ្ឋានខេត្តទេសចរណ៍មួយនេះ។

ទន្ទឹមគ្នានេះ អ្នកស្រី ក៏បានសំណូមពរដល់លោកនាយករដ្ឋមន្ត្រី ក៏ដូចជា រដ្ឋមន្ត្រី​ក្រសួង​មហាផ្ទៃ ព្រមទាំង​កម្លាំង​ចម្រុះ​គ្រប់ប្រភេទ ឬសមត្ថកិច្ចជំនាញនៃរដ្ឋបាល​ខេត្ត​ព្រះសីហនុ ត្រូវបន្តអនុវត្ត​សកម្មភាព​ចុះបង្ក្រាបទីតាំងមានបើកលេងល្បែងស៊ីសង​ទាំងនេះ ឲ្យមាន​ប្រសិទ្ធភាព​យូរអង្វែង ត្បិតសង្កេត​ឃើញថា កន្លងមក សម្មភាពចុះបង្ក្រាបនេះ មិនមាន​ប្រសិទ្ធភាព​យូរអង្វែងទេ ឬអាចនិយាយបានថា៖ «ចុះបង្ក្រាប ឬបិទទីតាំងល្បែងស៊ីសងមួយ​ចំនួន​​ក្នុងមូលដ្ឋាននេះ បានត្រឹមមួយដង្ហើមចង្រិតតែប៉ុណ្ណោះ បន្ទាប់មក ក៏ស្រាប់តែឃើញ​ទីតាំង​ទាំងនោះ បានបើកដំណើរការឡើងវិញ​ស្ងាត់ៗ ​ដោយរលូន ហើយគ្មានសមត្ថកិច្ច មកហាមឃាត់​ទៀតទេ»។

ទាក់ទិនបញ្ហានេះដែរ លោក សុខ សុខុម ប្រធានអង្គការស្រឡាញ់ធនធានធម្មជាតិកម្ពុជា ឬ​ហៅ​កាត់ថា ស៊ី អ៊ិន រ៉ូ (CNRO) ដែលមាន​ទីស្នាក់ការ​​នៅក្នុងខេត្តព្រះសីហនុ ក៏​គាំទ្រចំពោះ​យុទ្ធនាការចុះបង្ក្រាបទីតាំង​ល្បែងខុសច្បាប់គ្រប់ប្រភេទដែលកំពុងធ្វើសកម្មភាពនៅក្នុង​មូលដ្ឋាន​ខេត្តព្រះសីហនុ​នេះ​ដែរ។

លោក សុខុម រំពឹងថា៖ «យុទ្ធនាការបង្ក្រាបនេះនឹងផ្តល់​សេចក្តីសុខ ឬសុវត្ថិភាពក្នុងការ​ប្រកប​របរទទួលទាន ក៏ដូចជាការរស់នៅរបស់​ប្រជាពលរដ្ឋ​នៅក្នុងមូលដ្ឋាននេះ កាន់តែ​ប្រសើរ​​​​​ថែម​ទៀត​​នាថ្ងៃអនាគត។ លោកសូមសំណូមពរដល់កម្លាំងសមត្ថមត្ថកិច្ចចម្រុះ​គ្រប់​ប្រភេទ ​ត្រូវរួម​សហការ​គ្នា ចុះបង្ក្រាបទីតាំងល្បែងស៊ីសងខុសច្បាប់ ដែលនៅសេសសល់​ក្នុង​មូលដ្ឋាន​នេះ ​ឲ្យមានសកម្មភាព ដូចភ្លៀងរលឹម ដើម្បីឲ្យប្រាកដថា ទីតាំងបទល្មើសល្បែង​ស៊ី​សង​គ្រប់​ប្រភេទ នឹង​មិន​កើតមានទៀតទេ នៅថ្ងៃខាងមុខ​»

នៅក្នុង​ពិធីបិទសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅ​ការងារឆ្នាំ​២០២៤ របស់ក្រសួងមហាផ្ទៃ ​កាលពីថ្ងៃទី២៩ ខែកុម្ភៈ ​ក្រោមអធិបតីភាព​ លោក​នាយករដ្ឋមន្ត្រី ហ៊ុន ម៉ាណែត បានថ្លែង​កោត​សរសើរ​ចំពោះកិច្ចខិតខំប្រឹងប្រែងរបស់​ថ្នាក់​ដឹកនាំ និងមន្ត្រីក្រោមឱវាទ​ក្រសួងមហាផ្ទៃ​គ្រប់លំដាប់ថ្នាក់ ​ដែលបានប្តេជ្ញាចិត្ត​ ​រួមគ្នា​បំពេញ​បេសកកម្មបម្រើបុព្វហេតុជាតិ និងប្រជាជន ក្នុងរយៈពេល១ឆ្នាំកន្លងទៅ​។

ក្នុងពិធីបិទសន្និបាតនោះដែរ លោក ហ៊ុន ម៉ាណែត ក៏បានដាក់ចេញនូវ​អនុសាសន៍​គន្លឹះ​មួយ​ចំនួនទៀត ជាពិសេសបន្ត​ជំរុញការ​អនុវត្ត​គោលនយោបាយ «ភូមិ-ឃុំ-សង្កាត់ មានសុវត្ថិភាព​» ឲ្យបានសកម្មថែមទៀត ​​រួមមាន៖

ត្រូវបន្តយកចិត្តទុកដាក់ក្នុងការងារប្រយុទ្ធប្រឆាំងគ្រឿងញៀនខុសច្បាប់ឲ្យបានកាន់តែ​សកម្ម​ផុលផុសនៅតាមមូលដ្ឋាន និងនៅតាមក្រសួង-ស្ថាប័​នរដ្ឋ។

ត្រូវបន្តពង្រឹងការអនុវត្តច្បាប់ចរាចរណ៍ផ្លូវគោក ឲ្យបានម៉ឺងម៉ាត់ សំដៅកាត់បន្ថយឲ្យ​បាន​ជា​អតិបរមានូវគ្រោះថ្នាក់ និងផលប៉ះពាល់ដល់អាយុជីវិត ទ្រព្យសម្បត្តិរបស់ប្រជាពលរដ្ឋ និង​បន្ទុក​​របស់សង្គម ដែលបង្កឡើងដោយគ្រោះថ្នាក់ចរាចរណ៍​។

ត្រូវបន្តគ្រប់គ្រង ត្រួតពិនិត្យ និងចាត់វិធានការបង្ក្រាបឲ្យ​បានហ្មត់ចត់ល្បែងស៊ីសងខុសច្បាប់​គ្រប់ប្រភេទនៅតាមមូលដ្ឋាន សំដៅថែរក្សាសន្តិសុខ និងសុវត្ថិភាព រួមចំណែកលើក កម្ពស់​ជីវភាព​រស់នៅ និងភាពសុខដុមរមនារបស់ប្រជាពលរដ្ឋ និងសង្គមជាតិ​៕

717 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម