លោកនាយករដ្ឋមន្ត្រី ហ៊ុន ម៉ាណែត បានថ្លែងនាថ្ងៃទី២៣ ខែកញ្ញាថា ការប្រយុទ្ធប្រឆាំងនឹងអំពើឧក្រិដ្ឋកម្មឆ្លងដែន តម្រូវឱ្យមាន «ការទទួលស្គាល់ចំណុចខ្សោយជាប្រព័ន្ធ» ខណៈកម្ពុជាបានបើកសន្និសីទអន្តរជាតិមួយស្តីពីការប្រយុទ្ធប្រឆាំងការឆបោក ដើម្បីបង្ហាញពីការបង្ក្រាបរបស់ខ្លួនលើឧស្សាហកម្មដែលមានទំហំទឹកប្រាក់រាប់ពាន់លានដុល្លារនេះ និងដែលកម្ពុជាបានក្លាយជាមជ្ឈមណ្ឌលមួយ សម្រាប់ឧស្សាហកម្មនេះ។
សន្និសីទនេះធ្វើឡើង ខណៈប្រធានគណៈកម្មាធិការពីររូបនៃសភាតំណាងរាស្ត្រសហរដ្ឋអាមេរិក កំពុងជំរុញឱ្យមានការស៊ើបអង្កេតថា តើមន្ត្រីជាន់ខ្ពស់កម្ពុជាមួយចំនួនដោយក្នុងនោះមានវាគ្មិនពីររូបនៃសន្និសីទថ្ងៃនេះដែរគួរត្រូវបានដាក់ទណ្ឌកម្មជុំវិញការចោទប្រកាន់ថាមានទំនាក់ទំនងជាមួយប្រតិបត្តិការឆបោកដែរឬទេ។
លោក ហ៊ុន ម៉ាណែត បានថ្លែងថា៖ «ភាពជាអ្នកដឹកនាំពិតប្រាកដ និងអភិបាលកិច្ចប្រកបដោយប្រសិទ្ធភាព ទាមទារឱ្យយើងប្រឈមមុខនឹងបញ្ហាប្រឈមបន្ទាន់នានាដោយប្រកបដោយភាពច្បាស់លាស់ និងការប្តេជ្ញាខ្ពស់»។ លោកបន្តថា៖ «ការប្រឈមមុខនឹងអំពើឧក្រិដ្ឋកម្មឆ្លងដែនដែលកំពុងលេចឡើងថ្មីនេះ ទាមទារឱ្យមានភាពក្លាហានក្នុងការទទួលយកការពិតដ៏លំបាកដោយផ្ទាល់»។
លោកបានរំលឹកឡើងវិញនូវការអះអាងរបស់រដ្ឋាភិបាលកាលពីខែមុនថា បណ្តុំទីតាំងឆបោក ទ្រង់ទ្រាយធំទាំងអស់នៅក្នុងប្រទេស ត្រូវបានកម្ទេច ហើយលោកបានលើកឡើងថា អាជ្ញាធរនៅតែមានការប្រុងប្រយ័ត្ន ខណៈបណ្តាញអំពើឧក្រិដ្ឋជនកំពុងបែកខ្ញែកទៅជាក្រុមតូចៗ និងមានលក្ខណៈវិមជ្ឈការ។
នាយករដ្ឋមន្ត្រីកម្ពុជា ក៏បានអំពាវនាវឱ្យពង្រឹងកិច្ចសហប្រតិបត្តិការរវាងស្ថាប័នអនុវត្តច្បាប់អន្តរជាតិ និងឱ្យក្រុមហ៊ុនបច្ចេកវិទ្យាមានការត្រួតពិនិត្យកាន់តែខ្លាំង។ លោកបានបន្តថា ឧស្សាហកម្មនេះ «មិនបានចាប់ផ្តើមនៅកម្ពុជាទេ» ប៉ុន្តែវាមានទំនាក់ទំនងនឹងការរីកចម្រើននៃល្បែងតាមអនឡាញ និង «អាជីវកម្មពាក់ព័ន្ធនឹងកាស៊ីណូ» នៅក្នុងប្រទេស។
ប្រតិភូមកពីជាងដប់ប្រទេស រួមមានសហរដ្ឋអាមេរិក និងចិន ផងដែរកំពុងចូលរួមក្នុងសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ICCOS) ដែលមានរយៈពេលពីរថ្ងៃនៅរាជធានីភ្នំពេញ។ ព្រឹត្តិការណ៍នេះធ្វើឡើងបន្ទាប់ពីអាជ្ញាធរបានបង្ក្រាបឧស្សាហកម្មមួយនេះអស់រយៈពេលជាងមួយឆ្នាំ ដែលត្រូវបានគេប៉ាន់ប្រមាណថាបង្កើតប្រាក់រាប់សិបពាន់លានដុល្លារក្នុងមួយឆ្នាំ ហើយអង្គការសហប្រជាជាតិបានប៉ាន់ប្រមាណកាលពីឆ្នាំ២០២៣ថា គ្រាន់តែប្រទេសកម្ពុជាមួយឧស្សាហកម្មនេះពឹងផ្អែកលើពលកម្មដោយបង្ខំពីជនបរទេសរហូតដល់ ១០ម៉ឺននាក់។
កាលពីថ្ងៃចន្ទ និងថ្ងៃអង្គារ អ្នកសារព័ត៌មានត្រូវបានអាជ្ញាធរនាំទៅមើលបណ្តុំទីតាំងធំៗ ដែលអាជ្ញាធរអះអាងថា ធ្លាប់ជាកន្លែងប្រតិបត្តិការឆបោក និងធ្លាប់មានកម្មកររហូតដល់ ២ម៉ឺននាក់។ អាជ្ញាធរក៏បានបង្ហាញសម្ភារៈដែលនគរបាលរឹបអូសបាន រួមមានស្លាកសម្គាល់ក្លែងក្លាយរបស់ FBI និងនគរបាលចិន ដែលត្រូវបានចោទប្រកាន់ថាប្រើប្រាស់ក្នុងការឆបោកតាមរយៈការក្លែងបន្លំអត្តសញ្ញាណ។
អ្នកវិភាគមួយចំនួននៅតែមានមន្ទិលចំពោះការបង្ក្រាបនេះ ដោយនិយាយថាការបង្រ្កាបហាក់មិនបានប៉ះពាល់ដល់មន្ត្រី ឬបុគ្គលដែលមានអំណាចធំៗមួយចំនួនឡើយរួមទាំងមនុស្សមួយចំនួនដែលត្រូវបានសហរដ្ឋអាមេរិកដាក់ទណ្ឌកម្ម ជុំវិញការចោទប្រកាន់ថាមានជាប់ពាក់ព័ន្ធនឹងប្រតិបត្តិការឆបោកនេះ។
លោកស្រី Delphine Schantz តំណាងប្រចាំតំបន់អាស៊ីអាគ្នេយ៍ និងប៉ាស៊ីហ្វិករបស់ការិយាល័យអង្គការសហប្រជាជាតិស្តីពីគ្រឿងញៀន និងឧក្រិដ្ឋកម្ម (UNODC) បាននិយាយថា សន្និសីទនេះបង្ហាញពីការប្តេជ្ញាចិត្តរបស់កម្ពុជាចំពោះកិច្ចសហប្រតិបត្តិការអន្តរជាតិប្រឆាំងការឆបោកតាមប្រព័ន្ធបច្ចេកវិទ្យា។ ប៉ុន្តែលោកស្រីបានលើកឡើងថា ភាគីពាក់ព័ន្ធត្រូវការធ្វើបន្ថែមទៀតនៅថ្នាក់ជាតិ តំបន់ និងអន្តរជាតិ ដើម្បីស្វែងយល់ពីការវិវត្តនៃអំពើឧក្រិដ្ឋកម្មនេះ ការពារជនរងគ្រោះ និងទស្សន៍ទាយនិន្នាការថ្មីៗ។
លោកស្រី Schantz បានបន្តថា ឧស្សាហកម្មឆបោកនៅក្នុងតំបន់កំពុងផ្លាស់ប្តូរទៅរកគំរូមួយដែល «មានលក្ខណៈដូចការធ្វើអាជីវកម្មតាមប្រព័ន្ធសិទ្ធិអាជីវកម្ម ដោយមានផ្នែកឯកទេសសម្រាប់ការលាងលុយ ការជួញដូរមនុស្ស ការរត់ពន្ធជនចំណាកស្រុក និងការប្រមូលទិន្នន័យ»។
លោកស្រីបានបន្ថែមថា៖ «រឿងនេះធ្វើឱ្យការងាររបស់ស្ថាប័នអនុវត្តច្បាប់ក្នុងការបែងចែកជនរងគ្រោះចេញពីជនល្មើស ពិបាក ឬកាន់តែពិបាកជាងមុន»។
លោក Nicholas Court ប្រធាននាយកដ្ឋានសម្របសម្រួលក្រុមការងាររបស់ INTERPOL បានថ្លែងថា សេចក្តីជូនដំណឹងពាក់ព័ន្ធនឹងការឆបោកដែលអង្គការនេះទទួលបាន បានកើនឡើងជាង ៥០ភាគរយក្នុងរយៈពេលពីរឆ្នាំចុងក្រោយ ហើយការឆបោកនៅតែជាបទល្មើសដែលកើតមានច្រើនបំផុតនៅលើពិភពលោក។ ដោយយោងតាមទិន្នន័យរបស់ Global Anti-Scam Alliance លោកបានបន្តថា ការឆបោកបណ្តាលឱ្យបាត់បង់ប្រាក់ច្រើនជាង១ទ្រីលានដុល្លារក្នុងមួយឆ្នាំ។
លោក Court បានបន្ថែមថា៖ «យើងដឹងថាចំនួនការចាប់ខ្លួនក៏មានការកើនឡើង ហើយចំនួនជនរងគ្រោះក៏កំពុងកើនឡើងគួរឱ្យសោកស្តាយ ហើយទំហំការខាតបង់ក៏កំពុងកើនឡើងដែរ។ ប៉ុន្តែការឆបោកមិនមែនគ្រាន់តែជាបញ្ហានៃតួលេខនោះទេ»។
លោក Stephen Flores មន្ត្រីជាន់ខ្ពស់របស់ FBI បានលើកឡើងថា ការឆបោកតាមប្រព័ន្ធបច្ចេកវិទ្យា «មិនគោរពព្រំដែនប្រទេសទេ» ហើយបានសង្កត់ធ្ងន់លើតម្រូវការឱ្យរដ្ឋាភិបាលនានាសហការគ្នា។ លោក Yang Weilin អនុរដ្ឋមន្ត្រីក្រសួងសន្តិសុខសាធារណៈចិន បានថ្លែងថា ប្រទេសចិនត្រៀមខ្លួនរួចជាស្រេចដើម្បីធ្វើការជាមួយប្រទេសផ្សេងៗក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា រួមទាំងតាមរយៈការចែករំលែកព័ត៌មានផងដែរ។
ខណៈសន្និសីទឈានចូលវគ្គពិភាក្សាជាក្រុម មុនពេលបិទបញ្ចប់នៅថ្ងៃព្រហស្បតិ៍ វាគ្មិនកម្ពុជា មួយចំនួនដែលចូលរួមក្នុងសន្និសីទនេះ នៅតែស្ថិតក្នុងការតាមដានរបស់ក្រុងវ៉ាស៊ីនតោន។ កាលពីសប្តាហ៍មុន ប្រធានគណៈកម្មាធិការពីររូបរបស់សភាតំណាងរាស្ត្រអាមេរិក បានអំពាវនាវឱ្យមានការស៊ើបអង្កេតថា តើបុគ្គលចំនួន ២៦នាក់ និងអង្គភាពចំនួនពីរ គួរត្រូវបានដាក់ទណ្ឌកម្ម ដោយសារការចោទប្រកាន់ថាមានជាប់ពាក់ព័ន្ធនឹងប្រតិបត្តិការឆបោកឬយ៉ាងណា។
ក្នុងចំណោមអ្នកដែលត្រូវបានអាមេរិកដាក់ចូលក្នុងបញ្ជី មានរដ្ឋមន្ត្រីក្រសួងមហាផ្ទៃ លោក ស សុខា និងឧបនាយករដ្ឋមន្ត្រី លោក នេត សាវឿន ដែលគ្រោងនឹងថ្លែងសុន្ទរកថាបិទសន្និសីទនេះ។
លោក ស សុខា បានប្រាប់អង្គសន្និសីទថា ចាប់ពីខែកក្កដា ឆ្នាំ២០២៥ ដល់ខែមិថុនា ឆ្នាំ២០២៦ អាជ្ញាធរបានបង្ក្រាបទីតាំងឆបោកចំនួន ៦៦៥កន្លែង និងបញ្ជូនជនសង្ស័យជិត ២ ៨០០នាក់ទៅតុលាការ ក្នុងនោះ ២ ២០០នាក់ត្រូវបានឃុំខ្លួន។ លោកបានបន្តថា ក្នុងរយៈពេលដូចគ្នា ជនបរទេសជាង ២១ ០០០នាក់ត្រូវបានបណ្តេញចេញពីប្រទេស។
លោកបានបញ្ជាក់ថា កម្ពុជាបានប្រើប្រាស់ «គ្រប់មធ្យោបាយ និងវិធានការគ្រប់ជ្រុងជ្រោយ» ដើម្បី ប្រយុទ្ធប្រឆាំងការឆបោក ហើយថាខណៈការបង្ក្រាបបានធ្វើឱ្យបណ្តាញឧក្រិដ្ឋជនចុះខ្សោយ ក្រុមទាំងនោះបានបែកខ្ញែកទៅជាក្រុមតូចៗ ដែលប្រតិបត្តិការដោយសម្ងាត់នៅក្នុងសហគមន៍។
លោក ស សុខា មិនបានលើកឡើងអំពីការអំពាវនាវរបស់សមាជិកសភាអាមេរិកឱ្យមានការស៊ើបអង្កេតនោះទេនៅក្នុងសុន្ទរកថារបស់លោក។ លោកបានបដិសេធថាមិនបានប្រព្រឹត្តខុសអ្វីឡើយ៕
(រាយការណ៍បន្ថែមដោយ ឃួន ណារីម)
