តុលាការកំពូលប្រកាសសាលដីកានៅព្រឹកថ្ងៃទី១៩ ខែតុលា ឆ្នាំ២០២៦ តម្ដល់ការសម្រចរបស់តុលាការជាន់ទាបចំពោះសំណុំរឿងវិវាទដីធ្លីរបស់ជនជាតិដើមភាគតិចកួយពីរនាក់ប្តីប្រពន្ធនៅខេត្តព្រះវិហារ ដោយបង្គាប់ឱ្យពួកគេចាកចេញពីដី និងសងជំងឺចិត្តដើមបណ្ដឹង១លានរៀល។
ការសម្រេចនេះធ្វើឡើងបន្ទាប់ពីតុលាការកំពូលបានបើកសវនាការជំនុំជម្រះបណ្ដឹងសាទុក្ខរបស់ជនជាតិដើមភាគតិចទាំង២នាក់ កាលពីថ្ងៃទី៦ ខែតុលា ឆ្នាំ២០២៦។
សហមេធាវីការពារក្ដីឱ្យជនជាតិដើមភាគតិចកួយលោក បុណ្យ សុគុណ និងអ្នកស្រី សុខ មឿន គឺលោកមេធាវី លូត សាំង ប្រាប់សារព័ត៌មានខេមបូចានៅថ្ងៃទី១៩ ខែតុលាថា តុលាការកំពូលបានសម្រេចតម្កល់សាលដីកាសាលាឧទ្ធរណ៍ត្បូងឃ្មុំទុកជាបានការដដែលចំពោះសំណុំរឿងកូនក្ដីគាត់ ដោយបង្គាប់ឱ្យជនជាតិដើមភាគតិចទាំងពីររូបចុះចេញពីដី ព្រមទាំងសងជំងឺចិត្តដើមបណ្ដឹងចំនួន១លានរៀល។
លោកមេធាវី លូត សាំង មានប្រសាសន៍ថា៖ «ខ្ញុំគិតថាតុលាការកំពូលកាត់ក្ដីមិនផ្អែកទៅលើអង្គហេតុអង្គច្បាប់ទេ មានភាពលំអៀង។ ហេតុអីបានខ្ញុំហ៊ានថាអ៊ីចឹង? ព្រោះយើងមានភស្តុតាង មានឯកសារ មានអីគ្រប់គ្រាន់ មានសាក្សី»។
ជនជាតិដើមភាគតិចកួយអ្នកស្រី សុខ មឿន លើកឡើងថា ការដែលតុលាការកំពូលតម្ដល់ការសម្រចរបស់តុលាការជាន់ទាបចំពោះសំណុំរឿងរបស់អ្នកស្រី ដោយបង្គាប់ឱ្យអ្នកស្រី និងស្វាមីចាកចេញពីដី និងសងជំងឺចិត្តដើមបណ្ដឹង១លានរៀលនោះវាជារឿងអយុត្តិធម៌។
អ្នកស្រី សុខ មឿន វ័យ៤២ឆ្នាំបានលើកឡើងថា៖ «សម្រាប់ខ្ញុំវាអត់យុត្តិធម៌ទេលោកគ្រូ សម្រាប់សហគមន៍ជនជាតិដើមភាគតិចទទួលយកមិនបានទេ[…]គាត់ទើបតែមានប្លងរឹងឆ្នាំ២០១៣ ២០១៤ សម្រាប់សហគមន៍ជនជាតិដើមភាគតិចកួយអាស្រ័យផលតាំងពីឆ្នាំ២០០០រហូតដល់ពេលបច្ចុប្បន្ន»។
ស្ត្រីជនជាតិដើមភាគតិចកួយរូបនេះថា ការដែលតុលាការកំពូលសម្រេចដូច្នេះប៉ះពាល់ដល់ជីវភាពគាត់ព្រោះលែងមានដីអាស្រ័យផលដាំដំណាំចិញ្ជឹមជីវិត និងមិនមានដីសម្រាប់ចែកកូនចៅ។ ការណ៍នេះ អ្នកស្រី សុខ មឿន ប្រកាន់ជំហរថា៖ «ទោះបីដូចថាខាងដើមបណ្ដឹងមកបង្ខំនាងខ្ញុំចុះចេញពីដីហ្នឹង ក៏នាងខ្ញុំមិនចេញទេ នៅតែតស៊ូរស់ក្នុងដីហ្នឹង»។
អ្នកស្រី ម៉ៅ ធីតា អ្នកនាំពាក្យតុលាការកំពូលប្រាប់ថា អ្នកស្រីមិនបានដឹងព័ត៌មានទេ ពីព្រោះអ្នកស្រីជាប់រវល់នឹងភារកិច្ចនៅក្រៅកន្លែងធ្វើការនៅព្រឹកថ្ងៃទី១៩ ខែតុលានេះ។
អ្នកស្រី ម៉ៅ ធីតា មានប្រសាសន៍ថា៖ «ការឆ្លើយតបទៅហ្នឹង គឺខ្ញុំសុំពិភាក្សាជាមួយក្រុមរបស់ខ្ញុំដែលត្រូវឆ្លើយហ្នឹង ហើយនឹងជម្រាបជូនលោក ព្រោះអីខ្ញុំព្រឹកមិញខ្ញុំអត់បាននៅកន្លែងធ្វើការទេ»។
ជុំវិញករណីនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ បារម្ភថា ជនជាតិដើមភាគតិចទាំងពីររូបគ្មានដីរស់នៅ ព្រមទាំងបារម្ភពីការប៉ះពាល់វប្បធម៌ពួកគេ។
លោក អំ សំអាត មានប្រសាសន៍ថា៖ «ប្រសិនបើពួកគាត់មិនមានដីផ្សេងក្រៅពីដីដែលកំពុងតែសម្រេចដោយតុលាការកំពូលទេ គឺពួកគាត់មិនដឹងថាទៅរស់នៅកន្លែងណា ចំណុចនេះវាក្លាយជាបន្ទុករបស់អាជ្ញាធរដែនដីដែលត្រូវជួយរកដីសង្គមកិច្ចសម្រាប់ពួកគាត់រស់នៅ ហើយក៏អាចប៉ះពាល់ដល់អត្តសញ្ញាណ វប្បធម៌ និងប្រពៃណី របស់គាត់ជាជនជាតិដើមភាគតិចកួយ ប្រសិនបើគាត់ទៅរស់នៅកន្លែងផ្សេងដែលមិនមែនជាសហគមន៍ជនជាតិដើមភាគតិចកួយ»។
គួរជម្រាបជូនថា សាលាដំបូងខេត្តព្រះវិហារ កាលពីថ្ងៃទី១០ ខែកញ្ញា ឆ្នាំ២០២៤ បានចេញសាលក្រមបង្គាប់ឱ្យជនជាតិដើមភាគតិចកួយ ដែលជាចុងចម្លើយគឺលោក បុណ្យ សុគុណ និងអ្នកស្រី សុខ មឿន ចាកចេញពីដីនៅភូមិបុះធំ ឃុំប្រមេរ ស្រុកត្បែងមានជ័យ ខេត្តព្រះវិហារ ដែលមានផ្ទៃក្រឡាសរុប ២៤ ៨២០ម៉ែត្រការ៉េ និងត្រូវសងសំណងជំងឺចិត្តទៅដើមបណ្ដឹងគឺ លោក គីម ណុច ជាប្រាក់ចំនួន ១លានរៀល។ ហើយនៅថ្ងៃទី១០ ខែកញ្ញា ឆ្នាំ២០២៥ សាលាឧទ្ធរណ៍ត្បូងឃ្មុំ ក៏បានចេញសាលដីកាច្រានចោលបណ្ដឹងឧទ្ធរណ៍របស់ជនជាតិដើមភាគតិចកួយពីរនាក់ប្តីប្រពន្ធនេះ៕
