អតិថិជនប្រមាណ ៤០នាក់របស់ធនាគារ អេភីឌី បានប្រមូលផ្តុំគ្នានៅទីស្នាក់ការកណ្តាល របស់ធនាគារនេះក្នុងតំបន់បឹងកក់ រាជធានីភ្នំពេញ កាលពីថ្ងៃចន្ទ ដើម្បីទាមទារដំណោះស្រាយចំពោះការរឹតត្បិតការដកប្រាក់ដែលបានកើតឡើងតាំងពីខែមីនា ខណៈធនាគារត្រៀមបិទសាខាចំនួនបីចាប់ពីថ្ងៃទី១ ខែវិច្ឆិកាតទៅ ដោយមិនបានផ្តល់មូលហេតុច្បាស់លាស់ណាមួយឡើយ។
យោងតាមសេចក្តីជូនដំណឹងដែលធនាគារបានផ្ញើជូនអតិថិជនកាលពីពេលថ្មីៗនេះ សាខាដែលត្រូវបិទរួមមានសាខានៅមហាវិថីព្រះនរោត្តម មហាវិថីម៉ៅសេទុង និងអូឡាំព្យ៉ា។
អតិថិជនធនាគារ អេភីឌី បានប្រាប់សារព័ត៌មានខេមបូចាថា ពួកគេចង់បានចម្លើយច្បាស់លាស់ពីធនាគារ និងធនាគារជាតិនៃកម្ពុជា (NBC) ដោយព្រមាន ថា ភាពមិនច្បាស់លាស់អូសបន្លាយពេលយូរជុំវិញលទ្ធភាពក្នុងការដកប្រាក់បញ្ញើរបស់ពួកគេ កំពុងធ្វើឱ្យពួកគេបាត់បង់ទំនុកចិត្តលើធនាគារនេះ និងវិស័យធនាគារទាំងមូល។
ស្ត្រីម្នាក់ វ័យជាង ៤០ឆ្នាំ ដែលសុំមិនបញ្ចេញឈ្មោះដោយសារហេតុផលសុវត្ថិភាព បាននិយាយថា នាងមានប្រាក់បញ្ញើប្រមាណ ៤០ម៉ឺនដុល្លារនៅធនាគារ អេភីឌី ហើយបានជួបការលំបាកក្នុងការដកប្រាក់របស់ខ្លួនអស់រយៈពេលប្រហែលប្រាំមួយខែមកហើយ។
ស្រ្តីដដែលបានបន្តថា នៅពេលបញ្ហាចាប់ផ្តើមកើតឡើងដំបូងធនាគារអនុញ្ញាតឱ្យអតិថិជនដកប្រាក់បានរហូតដល់ ៥០០ដុល្លារក្នុងមួយថ្ងៃ។ ប្រហែលពីរខែក្រោយមក ការដកប្រាក់ និងការផ្ទេរប្រាក់ត្រូវបានផ្អាក។
នាងបានប្រាប់ថា៖ «ធនាគារបានបង្កកគណនីរបស់យើង ហើយមិនអនុញ្ញាតឱ្យយើងដកប្រាក់របស់យើងទេ»។
ប្រភពដដែលបានបន្តថា៖ «អតិថិជនខំប្រឹងធ្វើការហូរញើស ហូរឈាម ទាំងទឹកភ្នែកដើម្បីបានប្រាក់មកដាក់នៅធនាគារ។ យើងគិតថា យើងអាចទទួលបានការប្រាក់បន្តិចបន្តួច និងសន្សំប្រាក់ទុកសម្រាប់ការសិក្សារបស់កូនៗ។ ប៉ុន្តែឥឡូវនេះ ធនាគារបានបង្កកប្រាក់ទាំងអស់។ យើងអាចមើលឃើញតែចំនួនក្នុងទូរសព្ទប៉ុណ្ណោះ»។
នាងបានរំឭកថា ធនាគារធ្លាប់ផ្តល់អត្រាការប្រាក់ ៧% ក្នុងមួយឆ្នាំ ដែលខ្ពស់ជាងអត្រាការប្រាក់ដែលធនាគារផ្សេងទៀតផ្តល់ជូន។
កាលពីខែមីនា ធនាគារបានផ្អាកសេវាកម្មមួយរយៈពេលខ្លី និងកំណត់ការផ្ទេរប្រាក់ប្រចាំថ្ងៃត្រឹម ៣០០ដុល្លារ ដែលបណ្តាលឱ្យអតិថិជននាំគ្នាតម្រង់ជួរនៅទីស្នាក់ការកណ្តាលរបស់ធនាគារ ដើម្បីដកប្រាក់របស់ខ្លួន។ នៅខែកក្កដា ធនាគារបានដកចេញនូវការកំណត់ការផ្ទេរប្រាក់ប្រចាំថ្ងៃត្រឹម ៥០០ដុល្លារ តាមរយៈ Bakong KHQR និងការកំណត់ការដកប្រាក់ត្រឹម ១០ ០០០ដុល្លារពីប្រាក់បញ្ញើមានកាលកំណត់ដែលបានដល់កំណត់។ ការផ្លាស់ប្តូរនេះអនុញ្ញាតឱ្យម្ចាស់គណនីគោលម្នាក់អាចដកប្រាក់បានរហូតដល់ ២០ ០០០ដុល្លារ ដោយផ្អែកលើសមតុល្យសរុបនៃគណនីទាំងអស់របស់ពួកគេ។
ស្ត្រីរូបនេះបានទៅធនាគារជាច្រើនលើក ដើម្បីស្វែងរកការបំភ្លឺ ប៉ុន្តែមិនទទួលបានចម្លើយជាក់លាក់ឡើយ។ បុគ្គលិកបានប្រាប់គាត់ថា ពួកគេគ្រាន់តែអនុវត្តតាមការណែនាំពីថ្នាក់លើគេប៉ុណ្ណោះ ប៉ុន្តែមិនបានបញ្ជាក់ថា នរណាជាអ្នកចេញការណែនាំនោះទេ។
ការត្រៀមបិទសាខាចំនួនបីបានធ្វើឱ្យការព្រួយបារម្ភរបស់ស្រ្តីរូបនេះកាន់តែកើនឡើងខ្លាំងថែមទៀត។ នាងបានលើកឡើងថា៖ «ខ្ញុំមានការព្រួយបារម្ភខ្លាំងណាស់ ហើយខ្ញុំលែងមានកម្លាំងចិត្តក្នុងការបន្តអាជីវកម្មរបស់ខ្ញុំទៀតហើយ»។
នាងបានអំពាវនាវឱ្យធនាគារជាតិ នៃកម្ពុជា ពន្យល់អំពីស្ថានភាពនេះ និងជំរុញឱ្យធនាគារ អេភីឌី បញ្ជាក់ថា តើធនាគាររំពឹងថានឹងអាចបញ្ចេញប្រាក់សងអតិថិជនបានចំនួនប៉ុន្មានក្នុងរយៈពេលមួយឆ្នាំខាងមុខ។ នាងបាននិយាយថា ការផ្តល់ព័ត៌មានឱ្យកាន់តែច្បាស់លាស់នឹងជួយកាត់បន្ថយការព្រួយបារម្ភរបស់អតិថិជន។
នាងបានលើកឡើងថា៖ «ចាប់តាំងពីធនាគារ ព្រីនស៍ និងធនាគារមួយចំនួនទៀតបានបិទ ខ្ញុំចាប់ផ្តើមមានការភ័យខ្លាច។ ខ្ញុំមានអារម្មណ៍បាក់ទឹកចិត្តយ៉ាងខ្លាំង ហើយលែងចង់ដាក់ប្រាក់នៅធនាគារទៀតហើយ។ ខ្ញុំបានបាត់បង់ទំនុកចិត្ត [លើធនាគារ]»។
អតិថិជនម្នាក់ទៀត ដែលបានប្រាប់ថា លោកបានប្រើប្រាស់សេវាធនាគារ អេភីឌី អស់រយៈពេលបួនឆ្នាំមកហើយ និងមានប្រាក់បញ្ញើប្រមាណ ៥០ម៉ឺនដុល្លារ បានសង្កត់ធ្ងន់ថា ធនាគារ និងស្ថាប័ននិយ័តករគួរតែផ្តល់ចម្លើយដល់អតិថិជន ជាជាងទុកឱ្យពួកគេស្ថិតក្នុងភាពមិនច្បាស់លាស់។
លោកបាននិយាយថា៖ «[ពួកគេ] បន្តសន្យាហើយសន្យាទៀត ប៉ុន្តែសុទ្ធតែជាការសន្យាខ្យល់។ ពួកគេនិយាយថា មានផែនការជាច្រើនដើម្បីដោះស្រាយបញ្ហា ប៉ុន្តែរហូតមកដល់ពេលនេះ មិនទាន់មានដំណោះស្រាយជាក់លាក់ណាមួយឡើយ»។
លោកបានបន្តថា កាលពីខែកញ្ញា ធនាគារបានបង្ហាញផែនការសងប្រាក់ចំនួនពីរជម្រើសដល់អតិថិជន ដោយផ្អែកលើចំនួនប្រាក់បញ្ញើរបស់ពួកគេ។
សម្រាប់អតិថិជនដែលមានប្រាក់បញ្ញើក្រោម ៥០ម៉ឺនដុល្លារ ផែនការដែលបានស្នើឡើង គឺអនុញ្ញាតឱ្យពួកគេដកប្រាក់ ១៥ភាគរយ ក្នុងដំណាក់កាលដំបូង ដកប្រាក់ ១៥ភាគរយ ទៀតក្រោយរយៈពេលពីប្រាំមួយខែដល់មួយឆ្នាំ និងដកប្រាក់ ៧០ភាគរយ ដែលនៅសល់ក្នុងរយៈពេលពីរឆ្នាំ។
ចំណែកអតិថិជនដែលមានប្រាក់បញ្ញើលើសពី ៥០ម៉ឺនដុល្លារ ធនាគារបានស្នើផ្តល់បន្ទប់ខុនដូមួយយូនីត អនុញ្ញាតឱ្យពួកគេដកប្រាក់បញ្ញើបាន ២០ភាគរយ និងប្រាក់ ៦០ភាគរយដែលនៅសល់ក្នុងរយៈពេលពីរឆ្នាំ។ នេះបើតាមការបញ្ជាក់របស់អតិថិជនរូបនេះ។
ប៉ុន្តែចាប់តាំងពីពេលនោះមក អតិថិជនមិនទទួលបានព័ត៌មានថ្មីណាមួយទៀតពីសំណើទាំងនេះឡើយ។
បុរសរូបនេះក៏បានបង្ហាញការព្រួយបារម្ភផងដែរថា ការមិនអាចប្រើប្រាស់ប្រាក់បញ្ញើអាចប៉ះពាល់ដល់អាជីវកម្មរបស់គាត់ ដោយសារប្រាក់មួយចំនួនត្រូវបានប្រើជាទុនបង្វិលសម្រាប់ដំណើរការអាជីវកម្ម។
ធនាគារ អេភីឌី ធនាគារជាតិ នៃកម្ពុជា និងសមាគមធនាគារនៅកម្ពុជា មិនបានឆ្លើយតបនឹងសំណើសុំការអត្ថាធិប្បាយឡើយ។
លោក ង៉ែត ជូ សេដ្ឋកិច្ចវិទូ និងអ្នកជំនាញវិនិយោគនៅក្រុមហ៊ុន F.I. Vision Capital បានប្រាប់សារព័ត៌មានខេមបូចាថា ធនាគារជាតិ នៃកម្ពុជា គួរតែបញ្ជាក់អំពីស្ថានភាពហិរញ្ញវត្ថុរបស់ធនាគារ អេភីឌី ជាពិសេសជុំវិញលទ្ធភាពរបស់ធនាគារក្នុងការមានសាច់ប្រាក់គ្រប់គ្រាន់ និងបំពេញតម្រូវការដកប្រាក់របស់អតិថិជន។
យោងតាមរបាយការណ៍ប្រចាំឆ្នាំ២០២៤ ធនាគារ អេភីឌី មានប្រាក់បញ្ញើសរុបលើសពី ១ពាន់លានដុល្លារ។ ប្រធានក្រុមប្រឹក្សាភិបាលរបស់ធនាគារ លោក Wang Dong ដែលបានទទួលសញ្ជាតិខ្មែរក្នុងឆ្នាំ២០១៥ និងប្តូរឈ្មោះជា វង់ ពេជ្រ កាន់កាប់ភាគហ៊ុនចំនួន ៩៩ភាគរយ នៅក្នុងធនាគារ។ អ្នកជំនាញក្នុងវិស័យធនាគារបានពិពណ៌នារចនាសម្ព័ន្ធកម្មសិទ្ធិបែបនេះថា «មិនប្រក្រតី»។
បញ្ហាសេវាកម្មរបស់ធនាគារបានធ្វើឱ្យមានការលើកឡើងនូវមន្ទិលសង្ស័យផ្សេងៗខណៈអាជ្ញាធរកំពុងបង្ក្រាបលើស្ថាប័នហិរញ្ញវត្ថុដែលត្រូវបានចោទប្រកាន់ថាមានទំនាក់ទំនងជាមួយបណ្តាញឆបោក។ សហរដ្ឋអាមេរិក និងអាជ្ញាធរនៃប្រទេសផ្សេងទៀតបានចាត់វិធានការលើក្រុមហ៊ុនមួយចំនួន រួមមាន ធនាគារ ព្រីនស៍ និង Huione Pay ដែលបច្ចុប្បន្នមានឈ្មោះថា H-Pay។ ក្រុមហ៊ុនទាំងនេះ និងក្រុមហ៊ុនមេរបស់ពួកគេបានបដិសេធថា ខ្លួនមិនមានជាប់ពាក់ព័ន្ធនឹងការឆបោក ឬការលាងលុយកខ្វក់ឡើយ។
ស្ថាប័នហិរញ្ញវត្ថុផ្សេងទៀតនៅកម្ពុជា រួមមាន ធនាគារ Panda Bank និង ធនាគារ CCU Bank, HH Bank និង Heng Feng Bank ក៏បានប្រឈមនឹងការរំលាយផងដែរ។
កម្ពុជានៅតែជាប្រទេសមួយក្នុងចំណោមប្រទេសសមាជិកអាស៊ានមួយចំនួនតូចដែលមិនទាន់មានប្រព័ន្ធធានារ៉ាប់រងប្រាក់បញ្ញើថ្នាក់ជាតិ ដើម្បីការពារអ្នកដាក់ប្រាក់ ប្រសិនបើស្ថាប័នហិរញ្ញវត្ថុណាមួយដួលរលំ។ ទោះជាស្ថាប័នហិរញ្ញវត្ថុអន្តរជាតិ និងធនាគារជាតិ នៃកម្ពុជា បានពិភាក្សាគ្នាអំពីការបង្កើតប្រព័ន្ធធានារ៉ាប់រងប្រាក់បញ្ញើនេះអស់រយៈពេលជាង១០ឆ្នាំមកហើយក៏ដោយ ក៏កម្ពុជានៅមិនទាន់មានប្រព័ន្ធនេះនៅឡើយដែរ៕
ប្រែសម្រួលពីអត្ថបទភាសាអង់គ្លេស៖ APD Bank Customers Demand Answers as Three Branches Set to Close
