កម្មករនិយោជិតមួយចំនួនធំនៃរោងចក្រនៅក្រុងប៉ោយប៉ែត ខេត្តបន្ទាយមានជ័យ ចំណោមកម្មករសរុបប្រមាណជាង ៤០០០នាក់ ដែលរងផលប៉ះពាល់ដោយសាររោងចក្រពួកគេបិទដំណើរការនោះ ខ្លះសម្រេចចិត្តធ្វើការនៅរោងចក្រថ្មីតាមខេត្តក្រុងនានា ឯខ្លះសម្រេចប្ដូររបរចិញ្ចឹមជីវិត ស្របពេលកម្មករមួយចំនួនទៀតកំពុងបង្ហើយការងារនៅរោងចក្រចាស់មុនបិទទ្វារ។
ចាប់តាំងពីចុងខែមេសា ឆ្នាំ២០២៦មក រោងចក្រចំនួន៣ នៅក្រុងប៉ោយប៉ែត ខេត្តបន្ទាយមានជ័យ បានប្រកាសបិទដំណើរការ រួមមានរោងចក្រកាត់ដេរសម្លៀកបំពាក់ អិមអិល អ៊ិនធីមេត អឹភែរឹល (ML Intimate Apparel) បិទទ្វារចាប់ពីថ្ងៃទី២៧ ខែមេសា ឆ្នាំ២០២៦ រោងចក្រកាត់ដេរសម្លៀកបំពាក់ ហាយ-ថេក អឹភែរឹល (ខេមបូឌា) នឹងបិទចាប់ពីថ្ងៃទី៣១ ខែសីហា ឆ្នាំ២០២៦ និងរោងចក្របង្គំគ្រឿងបន្លាស់ នីឌិច ដាយខាសធីង (ខេមបូឌា) (NIDEC Die-casting (Cambodia) គ្រោងបិទពីថ្ងៃទី២២ ខែតុលា ឆ្នាំ២០២៦។
តាមរយៈទំព័រហ្វេសប៊ុករបស់អង្គការសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់(CENTRAL) ដែលផ្សាយនៅរសៀលថ្ងៃទី១៧ ខែសីហា ឆ្នាំ២០២៦ បានកត់ត្រាថា៖ «មានកម្មករប្រមាណជាង ៤ ០០០នាក់ បានរងផលប៉ះពាល់រួចហើយពីការបិទរោងចក្រយ៉ាងហោចណាស់ចំនួន២ ដែលពាក់ព័ន្ធនឹងការរំខាននៅតំបន់ព្រំដែន។ រោងចក្រមួយក្នុងចំណោមរោងចក្រដែលរងផលប៉ះពាល់ គឺជាសហគ្រាសដែលមានម្ចាស់ជាជនជាតិថៃ និងស្ថិតនៅក្នុងតំបន់ព្រំដែន»។
អង្គការសង់ត្រាល់ បានបន្តថា៖ «នៅក្នុងសហគមន៍តំបន់ព្រំដែន ផលប៉ះពាល់ទាំងនេះអាចបង្កើតជាឥទ្ធិពលជាបន្តបន្ទាប់ ដែលនាំឱ្យមានការថយចុះនៃប្រាក់ចំណូលគ្រួសារ ការកើនឡើងនៃបំណុល និងការលំបាកផ្នែកសេដ្ឋកិច្ចកាន់តែធ្ងន់ធ្ងរសម្រាប់គ្រួសាររាប់ពាន់គ្រួសារប្រសិនបើស្ថានភាពនេះនៅតែបន្តអូសបន្លាយ»។
កម្មកររោងចក្រ ហាយ-ថេក អឹភែរឹល (ខេមបូឌា) នៅសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ប្រមាណ ៣៥០នាក់បន្ថែមទៀត នាថ្ងៃទី១៧ ខែសីហា ឆ្នាំ២០២៦ បានចាកចេញទៅរកការងារនៅរោងចក្រថ្មីក្នុងរាជធានីភ្នំពេញ និងខេត្តកំពង់ឆ្នាំង ខណៈរោងចក្រចាស់របស់ពួកគេនឹងបិទដំណើរការទាំងស្រុងនៅចុងខែសីហា ឆ្នាំ២០២៦។ នេះបើតាមទំព័រហ្វេសប៊ុករបស់សង់ត្រាល់(CENTRAL) ដែលផ្សាយនៅព្រឹកថ្ងៃទី១៧ ខែសីហា ឆ្នាំ២០២៦។
ការដែលកម្មករនិយោជិតនៃរោងចក្រ ហាយ-ថេក អឹភែរឹល (ខេមបូឌា)ចាកចេញទៅរកការងារថ្មីជាបន្តបន្តាប់នេះ ធ្វើឡើងបន្ទាប់ពីរោងចក្រកាត់ដេរសម្លៀកបំពាក់នេះបានចេញសេចក្ដីជូនដំណឹងកាលពីថ្ងៃទី២១ ខែកក្កដា ឆ្នាំ២០២៦ ជូនដល់កម្មករនិយោជិតពីការផ្អាកដំណើរការផលិតកម្មទាំងស្រុងរបស់ក្រុមហ៊ុននៅថ្ងៃទី៣១ ខែសីហា ឆ្នាំ២០២៦។
សេចក្ដីជូនដំណឹងរោងចក្រ ហាយ-ថេក អឹភែរឹល (ខេមបូឌា)បន្តថា៖ «១. កញ្ចប់ប្រាក់ទូទាត់បញ្ចប់កិច្ចសន្យាការងាររួមមាន ៤ ចំណុច៖ ប្រាក់ឈ្នួលចុងក្រោយ ប្រាក់បំណាច់ជួសការឈប់សម្រាកប្រចាំឆ្នាំដែលនៅសល់ ប្រាក់បំណាច់ជួសការជូនដំណឹងមុន (គិតផ្អែកតាមអតីតភាពការងារ) ប្រាក់បំណាច់អតីតភាពការងារ ឆមាសទី២នៃឆ្នាំ២០២៦ ចំនួន ៧,៥ថ្ងៃ។ ២. អត្ថប្រយោជន៍បន្ថែមសម្រាប់កម្មការិនីកំពុងមានផ្ទៃពោះ៖ ក្រុមហ៊ុននឹងបន្តបង់ភាគទាន ប.ស.ស. ជូនរហូតដល់ថ្ងៃសម្រាល និងផ្តល់ប្រាក់ឈ្នួលចំនួន ៥០ភាគរយ សម្រាប់រយៈពេល ៩០ថ្ងៃ។ កម្មការិនីមានកូនតូច៖ ផ្តល់ប្រាក់ឧបត្ថម្ភចំនួន ៥ដុល្លារអាមេរិកសម្រាប់កូនម្នាក់ ក្នុងមួយខែ សម្រាប់កូនដែលមានអាយុពី ១៨ខែ ដល់ ៣៦ខែ។
ប្រធានសហជីពការពារសិទ្ធិកម្មករ នៅរោងចក្រ ហាយ-ថេក អឹភែរឹល (ខេមបូឌា) លោក កេត ជីវ័្មន ប្រាប់សារព័ត៌មានខេមបូចាថា ត្រឹមថ្ងៃទី១៧ ខែសីហា ឆ្នាំ២០២៦ កម្មករនៅរោងនេះបានចេញទៅរកការងារអស់ប្រមាណជាង ២ ០០០នាក់ ហើយ ដោយពួកគេទៅខេត្តកំពង់ឆ្នាំង កំពង់ស្ពឺ ខេត្តកណ្ដាល និងរាជធានីភ្នំពេញ ខណៈកម្មករនៅសេសសល់គឺជាង៥០០នាក់។
លោក កេត ជីវ័្មន វ័យ២៨ឆ្នាំ មានប្រសាសន៍ថា៖ «មូលហេតុគឺនៅពែលដែលក្រុមហ៊ុនប្រកាសបិទ គឺក្រុមហ៊ុនចាប់ផ្ដើមបិទថែមម៉ោង អត់មានឱ្យថែមម៉ោងទៀតទេរយៈពេលចាប់ផ្ដើមប្រកាសបិទរយៈពេល ៣ខែ។ អ៊ីចឹងកម្មករបើសិនជាគាត់អត់មានការថែមម៉ោង(OT)ហ្នឹងទេ ចំណូលគាត់បានទាប អ៊ីចឹងពួកគាត់ក៏សម្រេចចិត្តទៅរកក្រុមហ៊ុនថ្មី រោងចក្រថ្មីដែលមានការថែមម៉ោង»។
កម្មការិនីនៅរោងចក្រ ហាយ-ថេក អឹភែរឹល (ខេមបូឌា) អ្នកស្រី ឌី នី ប្រាប់ថា អ្នកស្រីបានឈប់ពីរោងចក្រគាត់កាលពីថ្ងៃទី១០ ខែសីហា ហើយចាប់ផ្ដើមការងារនៅរោងចក្រថ្មីឯខេត្តកំពង់ស្ពឺនៅថ្ងៃទី២០ ខែសីហានេះ។
ស្ត្រីវ័យ ៣០ឆ្នាំរូបនេះ ឱ្យដឹងថា នៅឯរោងចក្រ ហាយថេក ក៏ផ្ដល់ឱ្យកាសការងារជូនអ្នកស្រីដែរ គឺមានជម្រើសការងារនៅរោងចក្រខេត្តកណ្ដាល ឬខេត្តកំពង់ឆ្នាំង ព្រមទាំងមានឡានមកដឹកកម្មករទៀតផង។ ក៏ប៉ុន្តែអ្នកស្រី ឌី នី បានសម្រេចជ្រើសយករោងចក្រផ្សេង។
អ្នកស្រី ឌី នី ដែលធ្វើការផ្នែកដេរសម្លៀកបំពាក់ជាង ៨ឆ្នាំនៅរោងចក្រ ហាយ-ថេក អឹភែរឹល បានប្រាប់ថា៖ «ចែគាត់នៅខាងកំពង់ស្ពឺហ្នឹងគាត់ប្រាប់ទៅ គាត់ថានៅខាងហ្នឹងស្រួល មានសាលារៀនឱ្យកូនរៀនជិតៗ។ នៅខាងកំពង់ឆ្នាំងក៏ជិតដែរ តែខ្ញុំអត់ចង់ទៅខាងហ្នឹងព្រោះ បន្ទប់វារាងឆ្ងាយបន្ទាប់ជួលដែលគេFree(ផ្ដល់ជូនឥតគិតថ្លៃ)ឱ្យយើងវារាងឆ្ងាយ»។ អ្នកស្រីបានបន្តថា៖ «បារម្ភតើខ្លាចទៅហ្នឹងទៅវាអត់បានដូចយើងគិត។ ទៅៗហ្នឹងវាឆ្ងាយ ខ្លាចយើងទៅៗធ្វើវាអត់ស្រួលដូចនៅហាយថេក។ ការងារអីពិបាកអីស៊ូបាន តែកុំឱ្យតែគេជេរខុសរឿង»។
ក្រៅពីបារម្ភបញ្ហាបរិយាកាសការងារនៅរោងចក្រថ្មី អ្នកស្រី ឌី នី ក៏បារម្ភពីការសិក្សារៀនសូត្ររបស់កូនស្រីអាយុ១១ឆ្នាំ របស់គាត់ដែលនឹងចូលរៀនថ្នាក់ទី៦ នៅឆ្នាំសិក្សាថ្មី។
ជំនួយការប្រធានរដ្ឋបាលនៃរោងចក្រ ហាយ-ថេក អឹភែរឹល (ខេមបូឌា) លោក សេង ចាន់រ៉ា ប្រាប់ថា រោងចក្របញ្ចប់កិច្ចសន្យារបស់កម្មករនិយោជិតជាដំណាក់ៗ ហើយទូទាត់សំណងជូនកម្មករទៅតាមអ្វីដែលភាគីទាំងពីរបានព្រមព្រៀងគ្នា។ ទន្ទឹមនឹងនេះ លោកថា មានរោងចក្រពីខេត្តក្រុងផ្សេងៗរួមមានរោងចក្រពីខេត្តកំពង់ឆ្នាំង កណ្ដាល និងរាជធានីភ្នំពេញចាំទទួលកម្មករចូលធ្វើការ។
លោក ចាន់រ៉ា បានបន្តថា៖ «ពាក់ព័ន្ធនឹងការសម្របសម្រួលកម្មករ គឺយើងមានរោងចក្រផ្សេងៗដែលគាត់ទំនាក់ទំនងមកក្នុងការជួយផ្ទេរកម្មករទៅរោងចក្ររបស់គាត់»។លោកបន្តថា៖ «បុគ្គលិកដែលគាត់គ្មានការងារហ្នឹងគឺយើងបញ្ចប់ទៅតាមក្រុមទៅតាមថ្ងៃ[…]ជាដំណាក់កាលរហូតទៅដល់ថ្ងៃចុងក្រោយ[…]បច្ចុប្បន្ននេះគឺនៅសល់តែខ្ទង់ប្រហែលជា ៥១០នាក់ទេ ជាមួយនិងចំនួនសរុប ២៥៣២នាក់»។
ចំណែក រោងចក្របង្គំគ្រឿងបន្លាស់ នីឌិច ដាយខាសធីង (ខេមបូឌា) (NIDEC Die-casting (Cambodia) វិញ លោក អ៊ី រ៉ង់ បានធ្វើការនៅរោងចក្រនេះតាំងពីឆ្នាំ២០១៧មកម៉្លេះ តាំងពីលោកបានប្រាក់ខែខ្ទង់រយ រហូតដល់ពេលនេះ ទាំងប្រាក់ខែគោល និងប្រាក់ថែមម៉ោង លោកអាចរកបានចំណូលខ្ទង់ជាងមួយពាន់ដុល្លារអាមេរិកប្រចាំខែ។
បុរសវ័យ៣០ឆ្នាំរូបនេះ បន្តថា នៅពេលរោងចក្របិទដំណើរការនាខែតុលា ឆ្នាំ២០២៦ ខាងមុខនេះ លោកនិងកម្មករឯទៀតអាចជួបបញ្ហាជាច្រើនរួមមាន ពិបាករកការងារដែលមានប្រាក់ខែដូចនៅរោងចក្រចាស់ ពិបាកផ្លាស់ទីទៅធ្វើការនៅខេត្តក្រុងផ្សេងដែលឆ្ងាយពីលំនៅឋាន និងសាលាដែលកូនៗពួកគេកំពុងសិក្សារៀនសូត្រ និងបញ្ហាពិបាករកការងារធ្វើចំពោះអ្នកដែលមានអាយុលើសពី៣៥ឆ្នាំជាដើម។
លោក អ៊ី រ៉ង់ បានលើកឡើងតាមខ្សែទូរសព្ទថា៖ «ដូចខាងក្រសួងគាត់ប្រកាស គាត់ថាមិនបារម្ភទេ ព្រោះមានការងារច្រើនកន្លែងទៀតដើម្បីរង់ចាំគាត់។ វាជារឿងត្រឹមត្រូវ ដោយសារមានការងារច្រើនកន្លែងទៀត ក៏ប៉ុន្តែមិនប្រាកដថាពួកគាត់ទាំងអស់ហ្នឹង សុទ្ធតែទទួលបានការងារទាំងអស់គ្នានូវអ្វីដែលគាត់សមស្របចង់បានទេបង ដោយសារអ្នកខ្លះគាត់ក៏មានប្រាក់ខែខ្ពស់ហើយ ធនាគាររបស់គាត់ក៏ត្រូវបង់ខ្ពស់ដែរ»។
លោកបានរៀបរាប់ពីការលំបាករបស់លោកថា សម្រាប់លោក បញ្ហាគឺលោកមិនអាចចេញពីក្រុងប៉ោយប៉ែតបាន ដោយសារកូនលោកក៏រៀននៅទីនោះ ប្រពន្ធគាត់ក៏ធ្វើការនៅទីនោះ។ នៅពេលដែលលោកឆ្ងាយពីប្រពន្ធកូន ហើយលោកក៏មិនប្រាកដថា ប្រាក់ខែថ្មីដែលរកបាននោះ វាអាចស្មើ ឬអាចទប់ទល់នឹងប្រាក់សងធនាគារលោករួចអត់ ឬយ៉ាងណានោះទេ។
លោកបន្តទៀថា៖ «ហើយបញ្ហារបស់បុគ្គលិកផ្សេងៗដែលខ្ញុំចង់លើកហ្នឹង គឺអ្នកខ្លះអាយុច្រើនបង! អាយុច្រើន[…]តាមគោលការណ៍រោងចក្រខ្លះ ពី ១៨ ដល់ ៣៥ ឆ្នាំអ៊ីចឹងទៅ អ្នកខ្លះគាត់ចាស់ហើយ គាត់ពិបាកក្នុងការរកការងារថ្មីដូចគ្នា»។
ចំពោះជំហានបន្ទាប់របស់លោក អ៊ី រ៉ង គឺលោកគ្រោងរកការងារនៅក្នុងក្រុងប៉ោយប៉ែតឱ្យអស់លទ្ធភាពសិន មិនថាជាការងារផ្នែកទីផ្សារ អចលនទ្រព្យ ឬអ្វីផ្សេងដែលជ្រើសរើសលោកឱ្យចូលធ្វើការ។ លោកបញ្ជាក់ទៀតថា ទំនងជាមិនមានរោងចក្រណានៅក្រុងប៉ោយប៉ែតអាចទទួលកម្មករចូលធ្វើការទេ ពីព្រោះរោងចក្រនៅទីនោះសុទ្ធតែប៉ះពាល់ពីការបិទព្រំដែនកម្ពុជា-ថៃដូចគ្នា។ លោក អ៊ី រ៉ង ថាលោកក៏មិនអាចធ្វើអាជីវកម្មនៅតំបន់លោកបានដែរ ព្រោះលោកសង្កេតឃើញស្ថានភាពនៅក្រុងប៉ោយប៉ែតបច្ចុប្បន្នមានសភាពស្ងាត់។
អតីតតំណាងកម្មកររោងចក្រកាត់ដេរសម្លៀកបំពាក់ អិមអិល អ៊ិនធីមេត អឹភែរឹល (ML Intimate Apparel) ដែលស្ថិតនៅតំបន់សេដ្ឋកិច្ចពិសេសប៉ោយប៉ែត «អូរនាង» ក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ លោក គឹម តូនិច ឱ្យដឹងថា កម្មករនៅរោងចក្រលោកភាគច្រើន គឺប្រហែល ៧០ ឬ ៨០ភាគរយនៃកម្មករសរុបជាង ៦០០នាក់ ទទួលបានការងារធ្វើនៅតាមខេត្តផ្សេងៗ រួមមាន ខេត្តកំពង់ស្ពឺ កំពង់ឆ្នាំង និងរាជធានីភ្នំពេញ ឯកម្មករមួយចំនួនតូច ដែលរួមទាំងលោកផងសម្រេចចិត្តមិនទៅធ្វើការនៅរោងចក្រថ្មី ដោយសាររោងចក្រឆ្ងាយពីផ្ទះពួកគេ។ លោកបានដឹងពីស្ថានភាពអតីតកម្មកររោងចក្រ អិមអិល ដោយសារលោករក្សាទំនាក់ទំនងជាមួយក្រុមកម្មករ។
លោក តូនិច ឱ្យដឹងថា ដោយសារកូនៗរបស់លោក២នាក់ជាប់សិក្សារៀនសូត្រ ម្នាក់នៅថ្នាក់បឋមសិក្សា និងម្នាក់ទៀតកំពុងរៀនថ្នាក់វិទ្យាល័យ ធ្វើឱ្យលោកសម្រេចមិនទៅធ្វើការនៅរោងចក្រឯខេត្តកំពង់ស្ពឺទេ ដែលរោងចក្រនោះឆ្ងាយពីលំនៅឋានលោកផង។ អតីតកម្មកររូបនេះក៏សម្រេចចិត្តទៅរៀនជំនាញបច្ចេកទេស ឬហៅថា TVET បន្ទាប់ពីលោកទទួលដំណឹងពីការសិក្សានេះពីអង្គការក្រៅរដ្ឋាភិបាលមួយ។
លោក គឹម តូនិច ដែលធ្វើការនៅរោងចក្រ អិមអិល ប្រមាណ៨ឆ្នាំនោះបានបន្ថែមថា៖ «ខ្ញុំអត់បានទៅទេ(លោកអត់បានទៅធ្វើការនៅរោងចក្រឯខេត្តកំពង់ស្ពឺ) ខ្ញុំមករៀនជំនាញនៅបន្ទាយមានជ័យឯនេះវិញ ជំនាញខាងជាងម៉ូតូ[…]ពីមុនមកខ្ញុំធ្លាប់រៀនមួយសារហើយ តែខ្ញុំខានធ្វើយូរទៅ ខ្ញុំចេះតែស៊េរីចាស់ ដល់ពេលនេះខ្ញុំមករៀនសារថ្មីដើម្បីឱ្យចេះស៊េរីថ្មីផង»។
ប្រធានកម្មវិធីនៃអង្គការសង់ត្រាល់ លោក ឃុន ថារ៉ូ ប្រាប់សារព័ត៌មានខេមបូចាថា កត្តាចម្បងដែលប៉ះពាល់ដល់ប្រតិបត្តិការរោងចក្រទាំងនោះ គឺការចំណាយថ្លៃដើមខ្ពស់ ក្នុងនោះរួមមានការចំណាយពេលវេលាយូរក្នុងការដឹកជញ្ជូន ទាំងការនាំចូលវត្ថុធាតុដើម ទាំងការនាំចេញទំនិញជាដើម។ លោកបន្តថា បញ្ហារោងចក្របិទទ្វារនេះ មិនត្រឹមតែប៉ះពាល់កម្មករនិយោជិតទេ ថែមទាំងប៉ះពាល់ដល់គ្រួសារពួកគេ អ្នកប្រកបរបរសេដ្ឋកិច្ចក្រៅប្រព័ន្ធ ព្រមទាំងម្ចាស់ផ្ទះជួលផង។
ប្រធានកម្មវិធីនៃសង់ត្រាល់រូបនេះមានប្រសាសន៍ថា៖ «ប្រសិនជាបញ្ហាបិទព្រំដែននេះវាកាន់តែយូរ ខ្ញុំអាចមើលឃើញសញ្ញាណមួយមិនល្អសម្រាប់ក្រុមហ៊ុនវិនិយោគទុន ជាពិសេសក្រុមហ៊ុនរបស់ជប៉ុននៅតាមជួរច្រករបៀងអីជាដើម ពីព្រោះយើងត្រូវយល់ពីហេដ្ឋារចនាសម្ព័ន្ធ ការវិនិយោគនៅតំបន់ទាំងអស់នោះកន្លងមក គឺវាកើតចេញពីអនុសារណៈរវាងប្រទេសទាំងពីរ ដើម្បីពង្រីកច្រករបៀង ហើយនិងផ្គត់ផ្គង់ខ្សែសង្វាក់ផលិតកម្ម ហើយនិងការបង្កើតការងារ»។
ជុំវិញបញ្ហានេះ លោក ថារ៉ូ ចង់ឱ្យរដ្ឋាភិបាល និងភាគីពាក់ព័ន្ធផ្ដល់កិច្ចអន្តរាគមន៍ណាមួយដល់កម្មករនិយោជិតដែលកំពុងរកការងារធ្វើ តួយ៉ាងដូចជាការឱ្យកម្មករអាចប្រើសេវាបេឡាជាតិរបបសន្តិសុខសង្គម (ប.ស.ស)។
លោក ថារ៉ូ ថ្លែងថា៖ «ការស្ដារឡើងវិញនៃសេដ្ឋកិច្ចសម្រាប់សហគមន៍ ប្រជាពលរដ្ឋ កម្មករនិយោជិតហ្នឹងគឺសំខាន់ ការសម្របសម្រួលឱ្យមានការងារធ្វើក្នុងស្រុកគឺជារឿងមួយ ក៏ប៉ុន្តែអ្វីដែលសំខាន់នោះគឺការឆ្លើយតបទៅនឹងវិធានការចាំបាច់ដើម្បីធានាថា អំឡុងពេលដែលពួកគាត់រកការងារធ្វើ ការបានចំណូល និងដោះស្រាយបញ្ហាសេដ្ឋកិច្ច ដោយឡែកគឺគួរតែមាននូវកិច្ចអន្តរាគមន៍ជាក់លាក់សម្រាប់ឱ្យកម្មករនិយោជិត គាត់អាចមានលទ្ធភាពនៅក្នុងការប្រើប្រាស់សេវា ដូចជា ប.ស.ស ជាដើម»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានបញ្ជាក់តាមទំព័រហ្វេសប៊ុករបស់លោកកាលពីថ្ងៃទី១៧ ខែសីហា ឆ្នាំ២០២៦ ថា ក្រសួងធានាការគាំពារសិទ្ធិ និងអត្ថប្រយោជន៍ជូនកម្មករនិយោជិតនៃរោងចក្រ សហគ្រាសទាំង ៣ នៅខេត្តបន្ទាយមានជ័យដែលរងផលប៉ះពាល់ពីជម្លោះរវាងកម្ពុជា និងថៃ។
លោកបន្តថា នៅក្រុមហ៊ុន អិមអិល អ៊ីនធីមេត អឹភែរឹល (ខេមបូឌា) ដែលមានកម្មករ ៦៨៣នាក់ និងក្រុមហ៊ុន ហាយធិច មានកម្មករ ២ ៥៣២នាក់ នោះកម្មករត្រូវបានទូទាត់ប្រាក់ឈ្នួល និងប្រាក់បំណាច់ផ្សេងៗស្របតាមច្បាប់។ ចំពោះក្រុមហ៊ុន នី ឌិច ដាយ ខាសធីង (ខេមបូឌា) វិញដែលមានកម្មករ ៧២៤នាក់ ហើយដែលគ្រោងបិទដំណើរការនៅខែតុលា ឆ្នាំ២០២៦ នោះ លោក ស៊ុន មេសា បញ្ជាក់ថា ក្រសួងការងារនឹងបន្តតាមដាន ដើម្បីធានាការទូទាត់ សិទ្ធិ និងអត្ថប្រយោជន៍ជូនកម្មករតាមច្បាប់។
លោក ស៊ុន មេសា បានប្រាប់សារព័ត៌មានខេមបូចានៅថ្ងៃទី១៨ ខែសីហា ថា៖ «នៅរោងចក្រ អិមអិល ជាង៩០ភាគរយគាត់ទទួលបានឱកាសការងារហើយ ក្នុងខណៈពេលដែលរោងចក្រ ហាយថេក ក៏មានរាប់ពាន់នាក់ផ្សេងទៀតទទួលបានការងារផងដែរ តាមរយៈការទៅចុះផ្ទាល់ផ្ដល់ការងារជូនបងប្អូននៅទីតាំងរោងចក្រផ្ទាល់ ក៏ដូចជាការដែលយើងទៅដឹកជញ្ជូនបងប្អូនទៅកាន់រោងចក្រថ្មីដែលមានតម្រូវការ»។
លោកបានបន្តថា៖ «យើងផ្ដល់ជូនពួកគាត់ទាំងឱកាសការងារ យើងផ្ដល់ជូនពួកគាត់ទាំងឱកាសនៃការបណ្ដុះបណ្ដាលជំនាញបច្ចេកទេសវិជ្ជាជីវៈ ដែលយើងចុះទៅដល់ផ្ទាល់នៅរោងចក្រសហគ្រាសផ្ទាល់តែម្ដង ហើយយើងបន្តនៅគៀកគិតជាមួយបងប្អូនកម្មករកម្មការិនីជានិច្ច»។
អ្នកនាំពាក្យក្រសួងការងារបានបន្ថែមថា ទន្ទឹមនឹងការរងផលប៉ះពាល់ដល់រោងចក្រមួយចំនួននោះ ជារួម ស្ថានភាពការងារតាមសហគ្រាស និងរោងចក្រនៅកម្ពុជានៅតែបន្តកើនឡើង ជាក់ស្ដែងក្នុងឆ្នាំ២០២៥ កម្ពុជាមានរោងចក្រ សហគ្រាសកើនថ្មីប្រមាណ ២ ០០០ រោងចក្រ សហគ្រាស ហើយក្នុងរយៈពេល ៦ខែដើមឆ្នាំ២០២៦ មានការកើនរោងចក្រ សហគ្រាស ថ្មីចំនួន ៨៤៥។ ក្នុងចំណោមឱកាសការងារប្រមាណ ៩ម៉ឺនកន្លែងដែលមាននៅកម្ពុជាបច្ចុប្បន្ននេះ ប្រមាណ ៧ម៉ឺនជាការងារក្នុងវិស័យកាត់ដេរ និងឱកាសការងារជាច្រើនកន្លែងទៀតស្ថិតក្នុងវិស័យផ្គុំគ្រឿងបន្លាស់អេឡិចត្រូនិច៕
