សមាគមសម្ព័ន្ធអ្នកសារព័ត៌មានកម្ពុជា

ក្រសួងចំនួន​បី​សហការដោះស្រាយ​បញ្ហាទឹក​ និង​​​ទិន្នផល ខណៈ​​កសិករ​ស្នើ​​សុំ​ដំណោះស្រាយ​​​ទីផ្សារ

រដ្ឋមន្ត្រីក្រសួងទាំងបី និងមន្ត្រីជាន់ខ្ពស់បើកកិច្ចប្រជុំនៅថ្ងៃទី៦ ខែឧសភា ឆ្នាំ២០២៤។ (ហ្វេសប៊ុករបស់ក្រសួងកសិកម្ម)
រដ្ឋមន្ត្រីក្រសួងទាំងបី និងមន្ត្រីជាន់ខ្ពស់បើកកិច្ចប្រជុំនៅថ្ងៃទី៦ ខែឧសភា ឆ្នាំ២០២៤។ (ហ្វេសប៊ុករបស់ក្រសួងកសិកម្ម)

កិច្ចប្រជុំ​ត្រីភាគី​លើក​ទីមួយ ក្នុងចំណោមក្រសួងចំនួន​បី រួម​មាន ក្រសួងកសិកម្ម  ក្រសួងអភិវឌ្ឍន៍ជនបទ និងក្រសួងធនធាន​ទឹក  បាន​ធ្វើឡើងនៅដើមខែឧសភា ដើម្បីពិភាក្សាអំ​ពីបញ្ហា និងដំណោះស្រាយ ចំពេល​មាន​វិបត្តិ​ទឹក​។ យ៉ាង​​ណា​ក៏​ដោយ កសិករ​បាន​ស្នើ​ឲ្យ​​ក្រសួង​ពាណិជ្ជកម្ម ចូល​រួម​ការ​​ពិភាក្សា​​ផង​ដែរ ដើម្បី​ដោះស្រាយ​បញ្ហា​ទីផ្សារ​។

សម្រាប់ការ​ចាប់ផ្តើម ក្រសួងទាំង​បីនឹងបង្កើន​កិច្ចសហប្រតិបត្តិការ ដើម្បីជួយលើកកម្ពស់ជី​វភាពកសិករ និងធានាបាននូវអត្ថប្រយោជន៍ខ្ពស់ ដោយបាន​ឯកភាពលើចំណុចសំខាន់ៗ រួម​មាន​ការកំណត់គោលដៅ យុទ្ធ​សាស្ត្រ ការពិគ្រោះយោបល់ ការផ្សារ​ភ្ជាប់​គម្រោងរវាងក្រសួងទាំងបី និងការបង្កើតក្រុមការងារអន្តរក្រសួង​។

ក្នុង​សេចក្តី​ថ្លែង​ការណ៍​ដែលចេញផ្សាយដោយ​ក្រសួង​កសិកម្ម​ លោក ឌិត ទីណា រដ្ឋមន្ត្រីក្រសួងកសិកម្ម បាននិយាយ​ថា៖ «កិច្ចប្រជុំមានសារៈសំខាន់ណាស់ ដើម្បីឱ្យថ្នាក់ដឹកនាំ ក៏ដូចជាមន្ត្រីជំនាញនៃក្រសួង​ទាំងបី បាន​យល់​ពីយុទ្ធ​សាស្ត្រ និង​ការងារ​អាទិភាពរបស់ក្រសួងនីមួយៗ និងប្រមូលផ្តុំ​​ធនធាន និង​បច្ចេកទេស សម្រាប់អនុវត្តការងារ បម្រើប្រជាជនឱ្យ​បានលទ្ធផល​កាន់​តែ​ប្រសើរ»។

លោក ឃឹម ហ្វីណង់អ្នក​នាំពាក្យក្រសួងកសិកម្មបានប្រាប់​ខេមបូចា ថា កិច្ចសហការនេះ​ឆ្លុះបញ្ចាំងពីបណ្តុំ​​ធនធា​ន និ​ងអាទិភាព​ដែលត្រូវគ្នា​ដើម្បីបង្កើតជាមុំបីនៃវិស័យក​សិកម្មក្រោមប្រ​ព័ន្ធ «ប្រពន្ធ័តួ​អង្គ​តែមួយ» ជាក់​លាក់​​បន្ថែមទៀត ដើម្បីដោះស្រាយបញ្ហា​។ វា​នឹង​ជួយទម្លុះ​ភាព​រាំង​ស្ទះ​នៅថ្នាក់​មូលដ្ឋានឲ្យ​បានលឿនជាង​មុន។

ក្រសួងទាំងបីមានគម្រោងបន្តបន្ទាប់ទៀត ដូច​ជាផែន​ការអាទិភាពរួម ដែល​ជាការសម្រប​សម្រួល​ក្នុងចំណោមកម្មវិធីគោលនយោបាយសហគមន៍កសិកម្មទំនើបរបស់ក្រសួងកសិកម្ម ជាមួយសហគមន៍កសិករ​ទឹករបស់ក្រសួងធនធាន​ទឹក និងឧតុនិយម និងកម្មវិធីភូមិគំរូរបស់ក្រសួងអភិវឌ្ឍន៍​ជន​​បទ។

ទោះបីជាក្រសួងបាននិងកំពុងធ្វើការជាមួយគ្នាក៏ដោយ ក៏​កិច្ចប្រជុំត្រីភាគីនាពេលនេះ នឹង​បង្កើន​កិច្ចសហប្រតិបត្តិការដោយផ្ទាល់ និង​ជាប់​​លាប់​ជាងមុន។ លោក ហ្វីណង់បាន​និយាយ​ថា៖ «កិច្ច​សហ​ប្រតិបត្តិការនេះ​មិនមែន​ជារឿង​ថ្មី​ទេ គ្រាន់​​​តែ​ក្រសួង​​ទាំង​​បីនឹង​​បង្កើន​កិច្ចសហប្រតិបត្តិការ ជួបប្រជុំទល់​មុខគ្នា​ និងពិភាក្សាឱ្យបានញឹកញាប់ជាងមុន​ប៉ុណ្ណោះ​»។

តម្លៃទីផ្សារបន្ត​រង​ការ​​ប៉ះពាល់​

លោក អ៊ុំ សុភា ប្រធាន​សហគមន៍​កសិករ​សាមគ្គី​តំបែរ​ បាន​និយាយ​​ថា លោក​​មិន​ទាន់​​បាន​​ដឹង​​ពី​​កិច្ច​ស​ហប្រតិបត្តិការ​រវាង​ក្រសួង​ទាំង​​បីនេះក្នុងដោះស្រាយ​​បញ្ហា​កសិករ​នៅ​​ឡើយ​​ទេ​។

តែលោកជឿជាក់ថា កសិករប្រមាណជាង ៧០% នៅក្នុងសហគមន៍របស់លោកបាន​យល់​ដឹង​ពីបច្ចេកទេសដាំដុះ ដើម្បីបង្កើនទិន្នផលហើយ ប៉ុន្តែកង្វះទឹ​ក និងទីផ្សារ​នៅតែជា​បញ្ហា​​ដដែលសម្រាប់កសិករ​។

ឆ្នាំ​នេះ​ តម្លៃ​ស្វាយ​មានភាពប្រសើរបន្តិច ដោយទទួលបានតម្លៃចន្លោះពី​២០០​រៀល​ទៅ​៣០០​រៀល​ក្នុង​មួយ​គីឡូក្រាម បើ​​ធៀប​នឹង​១០០​រៀល​ទៅ​១៥០​រៀល​ក្នុង​១​គីឡូក្រាម​កាលពី​ឆ្នាំ​មុន ។ ប៉ុន្តែ​តម្លៃ​នៅ​ឆ្នាំ​នេះ​​នៅ​តែ​​ជាតម្លៃដែលទាប​​​បំផុត​។

លោក​ថា៖ «វានៅតែជាបញ្ហាសម្រាប់កសិករ។ តម្លៃ​ដែល​អាច​ទទួល​យក​បាន ​គឺ​ចន្លោះ​ពី ៨០០ រៀល ទៅ ១០០០ រៀល​​ក្នុង​​មួយ​​គីឡូ»។

លោកបានបន្តថា ចំពោះ​ស្រូវ​​​ប្រាំងនៅតែជួបប្រទះនឹងបញ្ហាខ្វះទឹក ជាពិសេស​នៅ​​តំបន់​របស់​លោក​​កំពុង​ប៉ះពាល់​ដល់​កសិ​ករ​។ ទោះបីកសិករ​បូមទឹកពីទន្លេមកដាក់ប្រឡាយ​​ក៏ដោយ ក៏វាមិនគ្រប់​គ្រាន់ដែរ ដោយ​សារមា​នម៉ាស៊ីនបូមទឹកពីទន្លេមកប្រឡាយមានតែ ២ គ្រឿងប៉ុណ្ណោះ ប៉ុន្តែកសិករ​ប្រមាណ ​៦០ នាក់បូមទឹកពីប្រឡាយចូល​​ស្រែ។​

លោក​បន្ថែម​​ថា ទោះ​បីវាជាការ​ល្អ​​សម្រាប់​កសិករ​​ក្នុង​ការ​បង្កើត​សហគមន៍​ក៏​ដោយ ក៏​​ពួក​គេ​មិន​អាច​ដោះស្រាយ​បញ្ហា​​ទីផ្សារ និង​កង្វះ​ទឹក​​បាន​​​ដែរ។ ប៉ុន្តែ​លោក​​ជឿជាក់​​ថា ប្រសិន​បើ​ក្រសួង​សហការ​ជាមួយ​ក្រសួង​ពាណិជ្ជ​កម្ម​ នោះ​វា​​កាន់តែ​​ប្រសើរ​​។

ស្វាយ​​ទុំ​​​​គរ​ទុក​​ចោល​​នៅ​ក្នុង​ចម្ការ​មួយ​​ក្នុង​ខេត្ត​កំពត ដោយសារ​តម្លៃ​ថោក។ រូបថតនៅ​ថ្ងៃទី១៨ ខែមីនា ឆ្នាំ២០២១។ (ខេមបូចា)

លោក សុភា​ បាននិយាយថា បច្ចុប្បន្ន​នេះ មន្ត្រីកសិកម្មបានចុះទៅតាមភូមិនានា​ ដើម្បីបង្រៀនកសិករអំពី​បច្ចេកទេសក្នុងការផ​លិត​កសិផល​ល្អ ប៉ុន្តែវា​មិនមានន័យ​ថា​មាន​កំណើន​​ប្រាក់ចំណូលទេ ព្រោះ​តែ​តម្លៃទីផ្សារ​មិន​​ល្អ។

លោក​​បាន​​បន្ត​ថា​៖ «​ខ្ញុំ​ស្នើ​ឲ្យ​ក្រសួង​​ពាណិជ្ជ​កម្ម​ចូលរួមក្នុង​​​កិច្ច​​សហ​ប្រតិបត្តិការ​​នេះ​ព្រោះ​​ក្រសួង​នេះ​ដើរ​​តួនាទី​​សំខាន់​​ក្នុង​តម្លៃ​សង្វាក់​​ផ្គត់ផ្គង់​ផលិត​ផល​​កសិករ​។ ប្រសិន​បើ​គាត់ (ក្រសួងពាណិជ្ជកម្ម) ​មិន​​ជួយរក​ទីផ្សារ​យ៉ាង​ផុសផុលទេ អ្វី​ដែល​យើង​ដាំ​នឹង​មាន​​តម្លៃ​​ថោក»

លោក ហ្វីណង់ អ្នក​នាំ​ពាក្យ​ក្រសួង​កសិកម្ម​មិន​បាន​ឆ្លើយ​តប​នឹង​សំណួរ​អំពី​ដំណោះ​ស្រាយ​ទីផ្សារ​សម្រាប់​កសិករ​ទេ។

ការ​ពិនិត្យមើល​ស្ថានភាព​ទូទៅ

រដ្ឋលេខាធិការក្រសួងពាណិជ្ជ​កម្ម​ លោក សុខ សុភ័ក្រ្ត បានប្រាប់​ខេមបូចា​ព័ត៌មាន​ ថា ក្រសួង​ទាំងបីកំពុងធ្វើការរួមគ្នាក្នុងដំណាក់កាល​ផលិតកម្ម ដែល​ពួកគេត្រូវផ្តល់ទឹក និងជំនួយបច្ចេកទេសដល់កសិករ។

លោកថា បញ្ហា​​រក​បាន​ទី​ផ្សារ​មិនមែនដោយសារក្រសួងរបស់លោកមិនបានចូ​លរួមកិច្ចប្រជុំនោះទេ ប៉ុន្តែដោយសារប្រទេសដែលកម្ពុជា​នាំចេញកសិផល គឺ​មាន​កំណត់ស្តង់​​ដារ ដែលធ្វើ​ឲ្យរាំងស្ទះដល់ការនាំចេញផលិតផលដូចជាស្វាយ ឬស្វាយចន្ទីជា​ដើម​។

លោកបាននិយាយ​ថា៖ «ប៉ុន្តែសម្រាប់ក្រសួង ទោះបីជា​យើងមិនបានចុះហត្ថលេខាលើកិច្ចព្រមព្រៀង ឬអនុស្សារណៈ​នៃ​ការ​យោគ​យល់​គ្នា​ណាមួយក៏ដោយ ក៏​យើងបាននឹងកំពុងនាំចូលទៅកាន់ប្រទេសចិន និងបណ្តាប្រទេស​ភាពជា​ដៃគូសេដ្ឋកិច្ចគ្រប់​ជ្រុង​ជ្រោយ​ក្នុងតំបន់​ដែរ​ ។ ដូច្នេះ​បញ្ហា​​នេះ​​មិន​ទាក់ទង​​នឹង​ការ​ស្វែង​​រក​ទីផ្សារ​ទេ គឺ​​ទាក់ទង​​នឹង​គុណភាព​ផលិតផល​​កសិកម្ម និង​តម្រូវការ​ទីផ្សារ​តែ​ប៉ុណ្ណោះ​»

បើចាំបាច់ លោកស្នើឲ្យបង្កើតសហគមន៍​អ្នកលក់​ផលិត​ផល​កសិកម្ម ដូច​ជាសមូហភាព​ ដោយអាស្រ័យលើផ​លិតផល ដូចជាស្វាយជាដើម។ សមូហ​ភាពអាច​ប្រមូល​ផលរបស់​កសិករ ដើម្បីលក់ទៅឱ្យឈ្មួញកណ្តាល។

ជាមួយគ្នានេះ លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានប្រាប់ខេមបូចា​ថា កិច្ចសហការត្រី​ភាគី គឺបង្កើត​ការងារថ្មី​។

លោក​ថា ​ដំបូង​ក្រសួង​នីមួយៗ​ធ្លាប់​ធ្វើ​ការ​ដោយ​​ឯក​រាជ្យ​។ យ៉ាង​ណា​​ក៏​ដោយ ឥឡូវ​នេះ​ក្រសួង​បាន​សហការ​គ្នា​ពិនិត្យ​មើល​ស្ថានភាព​រួម​ ​និង​កំណត់​​តំបន់​ដែល​ពួក​​គេ​អាច​ធ្វើ​ការ​ជាមួយ​គ្នា​បាន​។

លោក យុត្ថា បន្ត​ថា ក្រសួង​​នឹង​ប្រើប្រាស់​ធនធាន​បច្ចេកទេស និងរង់​ចាំ​​ការ​សម្រេច​ចិត្ត​​នយោបាយ​ដែល​ធ្វើ​ឡើង​ដោយ​រដ្ឋមន្ត្រី​ទាំង​​បី ខណៈ​​ដែល​ស្វែង​រក​​ថវិកា​​រួម​​​គ្នា​។ ក្រសួងអាចជ្រើសរើសអភិវឌ្ឍន៍តំបន់រួម​គ្នា និងប្រមូលធនធានមនុស្ស។ ​

លោក​​ថា៖ «ប្រសិន​បើ​យើង​អភិវឌ្ឍន៍​យ៉ាង​លឿន ជីវិត​ពល​រដ្ឋ​នឹង​ប្រសើរ​ឡើង។ យើង​អាច​អនុវត្ត​គោលនយោបាយ និង​អភិវឌ្ឍ​ទូទាំង​​ប្រទេស»

នៅពេលដែលខេមបូចាសួរថា តើក្រសួងទាំងបីមានបំណងក្នុងការដោះស្រាយបញ្ហាប្រព័ន្ធធារាសាស្ត្របែបណានោះ លោកមិនបានឆ្លើយតបដោយផ្ទាល់ទេ ប៉ុន្តែលោក​បានបង្ហាញ​អ្នក​យកព័ត៌មាន​ទៅលើ​សេចក្តីថ្លែងការណ៍​របស់លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ដែលថាការផ្គត់ផ្គង់ទឹកសម្រាប់កសិកម្ម គឺជាអាទិភាពរបស់ក្រសួង។

លោក​ ជេដ្ឋា​ ថ្លែងថា៖ «ក្រសួងធនធានទឹក និងឧតុនិយម នឹងធ្វើការជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីដោះស្រាយបញ្ហាទឹកដល់ប្រជាកសិករ តាមរយៈការអភិវឌ្ឍប្រព័ន្ធធារាសាស្ត្រនៅតាមភូមិសាស្រ្តដែលប្រឈមនឹងការខ្វះ​ទឹក​ និងរងគ្រោះដោយ​​ទឹក​ជំនន់ជាប់ជាប្រចាំ​​»។

ស្រែ​រីង​ស្ងួតទឹក​​

នៅដើមឆ្នាំនេះ កសិករជាច្រើនប្រឈមនឹងការខ្វះ​ទឹកសម្រាប់ធ្វើ​ស្រូវ​​ប្រាំង​។ យ៉ាងហោចណាស់ស្រូវប្រាំងចំនួន ៧៦០,០០០ ហិកតាដែលបានដាំនៅក្នុងខេត្តមួ​យចំនួនរងការប៉ះពាល់ដោយសារការខ្វះ​ទឹក។

លោក សែម ចំណាន កសិករ​ស្រែ​ប្រាំង​នៅ​ស្រុក​តំបែរ ខេត្ត​ត្បូងឃ្មុំ បាន​និយាយ​ថា ធាតុអាកាស​​ក្តៅ គួបផ្សំនឹងមិនមាន​ប្រព័ន្ធ​ធារាសាស្រ្ត​​​គ្រប់គ្រាន់​បាន​ធ្វើ​ឲ្យ​ស្រូវ​​ងាប់អស់​។

លោក​​​ថា​៖ «​​ខ្វះ​​ទឹក​​ខ្លាំង ហើយ​អណ្ដូង​​ក៏​រីង​​​អស់​មាន​​ប្រឡាយតែមួយ តែ​មាន​អ្នក​ប្រើ​ច្រើន ចឹងមិន​​​គ្រប់​​គ្រាន់​​ទេ​​»​

តាម​ធម្មតា​ បើ​មាន​ទឹក​គ្រប់គ្រាន់​សម្រាប់​ស្រោច​ស្រពលើ​​ផ្ទៃដី​ស្រែ​​មួយ​​ហិកតា កសិករ​នឹង​ទទួល​​បាន​ស្រូវ​​ជាង​បួន​​តោន ប៉ុន្តែ​បើ​មិន​មាន​ទឹក​គ្រប់គ្រាន់ទេ​ ជា​ឧទាហរណ៍​ ឆ្នាំ​នេះ​ទទួល​​បាន​តែ​ពីរ​តោន​​ប៉ុណ្ណោះ។

លោក​ថា៖ «វា​ប៉ះពាល់​ដល់​ជីវភាព​ប្រជាពលរដ្ឋ​ខ្លំាង ដោយសារ​​ត្រូវ​​ទិញ​ជី​ និង​ជួល​​គេ​​ឲ្យ​ភ្ជួរ​ស្រែ​។  អ៊ីចឹងនៅ​ពេល​​បានផលតិច ពួកគាត់ងាយ​នឹង​​ជំពាក់​​បំណុល​»

កសិករ​រៀប​​ម៉ាស៊ីន​​បូម​​ទឹក​​តាម​​ប្រឡាយ​​ដើម្បី​រង់​ចាំ​​ទឹក​​បង្ហូរ​​​ពី​​ខាង​​លើ ដើម្បី​​​​ស្រោច​ស្រព​ស្រូវ​​ប្រាំង​​នៅ​ខេត្ត​​ពោធិ៍​សាត់ នៅ​ខែ​មករា ឆ្នាំ​២០២៤។ (ខេមបូចា​/អ៊ួន ឈិន)

លោក​បន្ត​ថា ដោយសារ​គ្មាន​ប្រព័ន្ធ​ធារាសាស្ត្រ កសិករ​ក្នុង​សហគមន៍​របស់​លោក​ភាគ​ច្រើន​ជីក​អណ្តូង និង​ស្រះ​​សម្រាប់ធ្វើ​​ស្រូវ​​ប្រាំងដោយខ្លួនឯង។ ទោះ​ជា​យ៉ាង​ណា ​បើ​​មាន​​ប្រព័ន្ធ​ធារាសាស្ត្រគ្រប់​គ្រាន់​ វា​នឹង​ជួយ​​ពលរដ្ឋ​ធ្វើ​​ស្រូវ​ប្រាំង ប៉ុន្តែ​លោក​​មិន​​ដែល​​ឃើញ​​មន្ត្រី​ណា​ម្នាក់​​ចុះ​មក​​មើល​​ស្រែប្រាំង ឬ​ជជែក​ជាមួយ​​កសិករ​​ទេ។

កសិករ​រូប​នេះ​បន្ត​​ថា លោក​​នឹង​សប្បាយ​ចិត្ត ​ប្រសិន​​បើ​ក្រសួង​ទាំង​បី​​សហការ​​គ្នា​​ដោះស្រាយ​​បញ្ហា​​​ទឹក។

លោក​ថា៖ «​ប្រសិន​បើ​ពួកគាត់​អាច​ធ្វើ​ការ​ជាមួយ​គ្នា​ដូច​ដែល​ពួក​គាត់​បាន​និយាយនោះ​ វា​ជា​ការ​ល្អ​​សម្រាប់​កសិករ​»

ការ​គាំទ្រវិស័យ​ក្នុង​ស្រុក

លោក ពិត ករុណា​ អនុរដ្ឋលេខាធិការ និងជាអ្នកនាំពាក្យក្រសួងអភិវឌ្ឍន៍ជនបទ បានប្រាប់ខេមបូចា​​ថា ក្រសួងបានពិភាក្សាអំពីតួនាទីសក្តានុពលរបស់ខ្លួនក្នុងការបម្រើសហគមន៍ជនបទ ហើយបានបង្កើត​ក្រុមការងារអន្តរ​ក្រសួង​ដែលនឹងជួបគ្នា​រៀងរាល់​បីខែ​ម្តង។

លោក​​បន្ត​​ថា ក្រសួង​​បាន​ភ្ជាប់​គោលនយោបាយ​ទាក់ទង​នឹង​ការ​អភិវឌ្ឍ​ជនបទ ដូចជា​គម្រោង​ភូមិ​គំរូ​របស់​ក្រសួង​អភិវឌ្ឍន៍ជនបទ​ជាដើម។

គម្រោង​ភូមិ​គំរូនេះ មានគោលបំណងលើកកម្ពស់ជីវភាពប្រជាពលរដ្ឋ​តាមរយៈការ​ផ្តល់​​ការបណ្តុះបណ្តាលជំនាញបន្ថែមលើការធ្វើកសិកម្ម ដែលនឹងជួយបង្កើតកា​រងារបន្ថែមទៀត ដើម្បីឱ្យប្រជាពលរដ្ឋអាចបង្កើនប្រាក់​ចំណូល​។

គួរកត់​សម្គាល់​ដែរ​ថា មកទល់នឹងពេលនេះ ក្រសួងបានរៀបចំ​ភូមិគំរូ​ចំនួន ៣០ នៅខេត្តតាកែវ កំពង់ស្ពឺ និងត្បូងឃ្មុំ ដោយមានជំ​នួយ​ពីប្រទេសកូ​រ៉េខាងត្បូង​។ ក្នុង​ខេត្ត​នីមួយៗ​មាន​១០​ភូមិ។

ក្រសួង​កំពុង​វាយ​តម្លៃ​គម្រោង​ភូមិ​គំរូ​ក្នុង​ខេត្ត​ផ្សេង​ទៀត ដោយ​មាន​គម្រោង​អភិវឌ្ឍ​ភូមិ​គំរូ​ក្នុង​មួយ​ឆ្នាំ​ចន្លោះ​ពី ៣០ ទៅ ៥០ ភូមិ។

លោក ហ៊ុន សៀង​ហុន នាយក​ប្រតិបត្តិនៃសម្ព័ន្ធសហគមន៍កសិកម្មកម្ពុជា យល់ឃើញថា កិច្ចសហការនេះក៏ទាមទារឱ្យមានការចូលរួមពី​ក្រសួង​ពាណិជ្ជកម្ម​ ក្រសួងរ៉ែ និង​ថាមពល ក្រសួង​សេដ្ឋកិច្ច និងហិរញ្ញ​វត្ថុ​ និង​ក្រសួង​ពាក់​ព័ន្ធផ្សេងទៀត។

កសិករ​បាន​ប្រឈម​នឹង​បញ្ហា​ជាច្រើន​ដូចជា​ការខ្វះ​​ទឹក និង​ការ​ប្រែប្រួល​អាកាសធាតុ ហើយ​​ទីផ្សារក៏​នៅ​មាន​កម្រិតដែរ​។

លោកបានប្រាប់ខេមបូចា​ថា បន្ទាប់​ពីជំងឺ​រាត​ត្បាត​កូវីដ-១៩មក​ កសិករ​ជួបការ​លំបាកខ្លាំង​ ដោយពួ​កគេមួយចំនួនធំជំពាក់បំណុល​គេ ដែលធ្វើឲ្យពួក​គេ​ខូច​ឈ្មោះ​។

លោក​​ថា៖ «ភា​គីពាក់ព័ន្ធគួរតែគាំទ្រវិស័យកសិកម្ម។ ខ្ញុំ​មិន​ត្រឹម​តែ​​សំដៅ​លើ​​​ថ្នាក់​​ដឹក​នាំ​ប៉ុណ្ណោះ​ទេ ប៉ុន្តែ​​ក្រុមហ៊ុន និង​ប្រជាជន​គួរ​​ជួយ​ដ​ល់​វិស័យ​ក្នុង​ស្រុក​ផង​ដែរ ដើម្បី​ឲ្យ​អ្នក​ផលិត [កសិករ] មាន​កម្លាំង​ចិត្ត​​​ផលិត​»

ប្រែសម្រួលពីអត្ថបទភាសាអង់គ្លេស៖ Three Ministries To Solve Farmers’ Water, Yield Issues, As Farmers Hope For Market Resolution

245 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម