សមាគមសម្ព័ន្ធអ្នកសារព័ត៌មានកម្ពុជា

មន្ត្រីយោធាកំពុងស៊ើបអង្កេតករណីផ្ទុះឃ្លាំងគ្រាប់ដែលបណ្តាល​ឱ្យយោធិន២០នាក់ស្លាប់ និងរងរបួសជាច្រើននាក់ទៀត

មន្ត្រី និងក្រុមគ្រួសារបានប្រារព្ធពិធីបុណ្យសពយោធិន២០នាក់ ដែលបានស្លាប់ក្នុងឧបទ្ទវហេតុផ្ទុះឃ្លាំងគ្រាប់នៅបញ្ជាការដ្ឋានយោធភូមិភាគទី៣ ក្នុងក្រុងច្បារមន ខេត្តកំពង់ស្ពឺ កាលពីថ្ងៃទី២៨ ខែមេសា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)
មន្ត្រី និងក្រុមគ្រួសារបានប្រារព្ធពិធីបុណ្យសពយោធិន២០នាក់ ដែលបានស្លាប់ក្នុងឧបទ្ទវហេតុផ្ទុះឃ្លាំងគ្រាប់នៅបញ្ជាការដ្ឋានយោធភូមិភាគទី៣ ក្នុងក្រុងច្បារមន ខេត្តកំពង់ស្ពឺ កាលពីថ្ងៃទី២៨ ខែមេសា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)

អ្នកស្រី ហ៊ិន សំអឿន អាយុ៥១ឆ្នាំ រស់នៅបុរីកម្មករ បាននិយាយថា ផ្ទះរបស់គាត់​ត្រូវបាន បំផ្លាញទាំងស្រុង នៅក្នុងឧបទ្ទវហេតុ​ផ្ទុះឃ្លាំង​គ្រាប់​កាលពីរសៀលថ្ងៃសៅរ៍ នៅបញ្ជាការដ្ឋាន​យោធភូមិភាគទី៣ ក្នុងក្រុងច្បារមន ខេត្តកំពង់ស្ពឺ។ អ្នកស្រី​​បាន​និយា​យ​ថា ​ការ​ខូច​ខាត​ប្រហែល​​ជា​ត្រូវ​ចំណាយ​អស់ ​៣០ ០០០​ដុល្លារ​ ឬ​៤០ ០០០​ដុល្លារ​ដើម្បី​ជួស​ជុល​។

ប៉ុន្តែ​នេះ​មិន​មែន​ជា​អ្វី​ដែល​ធ្វើ​ឱ្យ​អ្នក​ស្រី​​គេងមិន​លក់​កាល​ពី​យប់​ថ្ងៃ​សៅរ៍​នោះ​ទេ​។ រាល់ពេល​ដែលអ្នកស្រី​បិទភ្នែក អ្នក​ស្រី​បាននិយាយថា អ្នក​ស្រី​ឃើញជនរងគ្រោះ​នៃការផ្ទុះ​គ្រាប់​ដែល​ធ្វើ​​ឲ្យមន្ត្រីយោធាចំនួន២០​នាក់ពលីជីវិត​ និង​អ្នក​រងរបួស​ច្រើននាក់ផ្សេង​ទៀតដែលមិនទាន់​ប្រកាស​ជា​ផ្លូវ​ការ​។

អ្នក​ស្រី​បាន​និយាយ​ថា៖​ «ពេលណា​​ដែល​ខ្ញុំ​និយាយ​ពី​រឿង​នេះ ខ្ញុំ​យំ​។ ខ្ញុំបាត់បង់ផ្ទះរបស់ខ្ញុំ ហើយអ្វីៗនៅក្នុងផ្ទះរបស់ខ្ញុំ​​ខ្ទេច​អស់​​។ ខ្ញុំមិនអាចហៅថា ផ្ទះទៀត​ទេ​។ ខ្ញុំសង្ឃឹមថា សម្តេចនឹងផ្តល់សំណង»

មន្ត្រី និងក្រុមគ្រួសារបានប្រារព្ធពិធីបុណ្យសពយោធិន​២០នាក់ ដែលបាន​ស្លាប់​​ក្នុងឧបទ្ទវហេតុផ្ទុះឃ្លាំង​គ្រាប់​នៅបញ្ជាការដ្ឋានយោធភូមិភាគទី៣ ក្នុង​ក្រុងច្បារមន ខេត្តកំពង់ស្ពឺ កាលពីថ្ងៃទី២៨ ខែមេសា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)

យោធភូមិភាគទី៣ បានរៀប​ចំ​ពិធីបុណ្យសពពេញមួយថ្ងៃអាទិត្យ ខណៈក្រុម​មន្ត្រីព្យាយាម​រើស​​បំណែក​បាក់​បែក​ បន្ទាប់ពីការផ្ទុះដ៏ខ្លាំង​បានធ្វើ​ឲ្យ​យោធិន២០​នាក់ស្លាប់​ និងធ្វើ​ឲ្យ​រញ្ជួយ​សង្កាត់ច្បារមន ក្រុងច្បារមន កាលពីថ្ងៃសៅរ៍វេលាម៉ោងប្រហែល២និង២៥នាទីរសៀល។​​ ក្រុម​គ្រួសាររបស់យោធិន និងមន្ត្រីរដ្ឋាភិបាលបានមកចូលរួមរំលែកទុក្ខចំពោះយោធិន​ដែល​បាន​ពលី​ ប៉ុន្តែរដ្ឋាភិបាលមិនទាន់បង្ហាញពីមូលហេតុនៃការផ្ទុះគ្រាប់​ ឬទំហំនៃការខូច​ខាត​នៅឡើយទេ​។

លោក ថោង សូលីម៉ូ អ្នកនាំពាក្យអគ្គបញ្ជាការដ្ឋានកងយោធពលខេមរភូមិន្ទ បាន​ប្រាប់ ខេមបូចា​ ថា៖ «ថ្នាក់ដឹកនាំកំពុងប្រជុំ ដើម្បីរកមូលហេតុ» ហើយបានបង្វែរទៅ​របាយការណ៍​របស់កងយោធពលខេមរភូមិន្ទ ដែលបញ្ជាក់ថា នាយទាហាន២០នាក់បានពលី​ ក្នុងនោះ​មាននាយទាហាន១៥នាក់មកពីខេត្តកោះកុង ​និង​នាយទាហាន​៥​​នាក់​មក​ពី​យោធ​​ភូមិភាគទី​​៣។

របាយ​ការណ៍នេះ​បានបន្ថែមថា អគារចំនួន៤ ដែលបីខ្នង​ជា​ឃ្លាំង​អាវុធ​គ្រាប់​ និងមួយ​ខ្នង​​ជា​អាគារ​ស្នាក់​នៅរងការ​ខូច​ខាត ខណៈរថយន្តយោធាចំនួន៥គ្រឿង ដែល​ផ្ទុកដោយអាវុធពេញ​មក​ពីខេត្តកោះកុងរង​ការ​ខូចខាត ព្រមទាំងផ្ទះរបស់អ្នកភូមិចំនួន២៥ខ្នងផងដែរ។

លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) មាន​ប្រសាសន៍​ថា មន្ត្រីរបស់លោកបានចុះពិនិត្យទីតាំងផ្ទុះ​ ប៉ុន្តែការស៊ើបអង្កេតកំ​ពុងដំណើរការ ដូច្នេះលោកមិនអាចបង្ហាញព័ត៌មានបន្ថែមទៀត​បានទេ។

លោក​មាន​ប្រសាសន៍​ថា៖ «[យើង] កំពុងធ្វើការ ហើយខ្ញុំមិនមានព័ត៌មាន” អំពីមូល​ហេតុនៃ​ការ​ផ្ទុះនេះ​ទេ។ “យើង​នៅ​តែ​ពិភាក្សា​គ្នា ដូច្នេះ​​មិន​អាច​ផ្សព្វផ្សាយ​ជា​សាធារណៈ​បាន​នៅ​ឡើយ​​​ទេ»

ក្រុមការងារស៊ីម៉ាក​ (CMAC) បានចុះស្រាវជ្រាវ​ទីតាំងផ្ទុះគ្រាប់​ដែល​បណ្តាល​ឲ្យ​មាន​អ្នក​ស្លាប់​នៅបញ្ជាការដ្ឋានយោធភូមិភាគទី៣ ក្នុងខេត្តកំពង់ស្ពឺ នៅថ្ងៃទី២៨ ខែមេសា ឆ្នាំ២០២៤។ (ខេមបូចា/ ព្រីង សំរាំង)

ការ​ផ្ទុះ​នេះ​បាន​ធ្វើ​ឱ្យ​ផ្ទះ​យ៉ាង​ហោច​ណាស់​២៥​ខ្នង​នៅ​ភូមិ​បុរីកម្មករ​ជាប់​នឹង​ឃ្លាំង​គ្រាប់​​រងការ​ខូច​​ខាត​។ ជញ្ជាំង​​ប្រេះ​ស្រាំ​ កញ្ចក់​បែក ហើយ​ដំបូល​ប៉ើង​ពីលើ​ក្បាល​​អ្នក​ស្រុក។ ប្រជាពលរដ្ឋ​បាន​ឲ្យ​ដឹង​ថា ផ្ទះ​មួយ​ចំនួន​ត្រូវ​ភ្លើង​ឆាបឆេះ​ដោយ​សារ​កម្លាំង​ផ្ទុះ។

ប្រជាពលរដ្ឋនៅ​បុរីកម្មករបាននិយាយថា ពួកគាត់មានការតក់ស្លុត ដោយបន្ថែមថា ពួកគាត់​មិន​ដែលជួបប្រទះនូវឧបទ្ទ​វ​ហេតុបែបនេះពីមុនមកទេ ខណៈ​ពេលរស់​នៅក្បែរបន្ទាយ​កង​ទ័ព​។

ខណៈដែលប្រជាពលរដ្ឋប្រមូល​​ទ្រព្យសម្បត្តិពីផ្ទះដែលបាក់បែកនោះ មន្ត្រីស៊ីម៉ាក់​ និងក្រុម​គ្រូពេទ្យបានរើស​បំណែក​បាក់​បែក​ និងបំណែកនៃសាកសពរបស់​អ្នកដែលបានស្លាប់​នៅក្នុង​ឧបទ្ទវហេតុ​ផ្ទុះនេះ​។

បើតាមអ្នកភូមិ ពួកគាត់​មិនបានដឹងទេថា មាន​រថយន្ត​ដឹកគ្រាប់រំសេវមក​ឃ្លាំង​គ្រាប់​ មុន​ពេល​មាន​​ករណី​ផ្ទុះនេះ ហើយពួកគាត់​អះអាងថា នេះជាលើកទីមួយហើយដែល​មាន​សោកនាដកម្ម​បែបនេះ បានកើតឡើង។

ឧបទ្ទវហេតុ​​ផ្ទុះ​គ្រាប់​បាន​បណ្តាល​ឲ្យ​​ផ្ទះ​ប្រជាពលរដ្ឋ​បាក់​រលំ​ផ្នែកខ្លះ​ និងធ្វើ​ឲ្យ​​ខូចខាត​ផ្ទះ​ផ្សេង​ទៀត​នៅ​ខេត្ត​កំពង់ស្ពឺ កាល​ពី​ថ្ងៃ​ទី​២៨ ខែ​មេសា ឆ្នាំ​២០២៤។ (ខេមបូចា/ ព្រីង សំរាំង)

អ្នកស្រី សំ ណាវី អាយុ៥៧ឆ្នាំ រស់នៅចម្ងាយ៣០ម៉ែត្រពីឃ្លាំងគ្រាប់​ បានប្រាប់ ខេមបូចា​ថា ពេលគ្រាប់បែកផ្ទុះ អ្នកស្រី​បានរត់ទៅរកចៅស្រី និងកូនៗរបស់គាត់ ដែលកំពុងតែ​ដេកនៅ​ក្នុងផ្ទះ ដោយបារម្ភ​ពី​សុវត្ថិភាពរបស់​ពួកគេ​។ អ្នកស្រី​​បាន​រំឭក​ថា ការ​ផ្ទុះ​នេះកើត​ឡើង​​នៅ​ម៉ោង​ប្រហែល២រសៀល ដែល​អាកាសធាតុ​ក្ដៅ​ខ្លាំង។

អ្នកស្រី ណាវី និយាយថា៖ «ខ្ញុំ​ភ័យ​ពេក​ក៏​រត់​ទៅ​រក​ចៅ​និង​កូន​របស់​ខ្ញុំ​។ ខ្ញុំ​ដួល ហើយ​ខ្ញុំ​ស្រែក​ប្រាប់​ពួក​គេ ហើយ​រត់​ពី​ផ្ទះខ្ញុំ​ទៅ​ផ្ទះ​អ្នក​ភូមិ​ម្នាក់​​ទៀត។ កូន​ស្រី​ខ្ញុំ​សំណាង​ណាស់ ព្រោះ​បើ​នាង​នៅ​មុខ​ផ្ទះ ​នាង​នឹងមិន​រស់​​ទេ»

អ្នក​ស្រី ណាវី បានចំណាយពេលថ្ងៃអាទិត្យ ដើម្បីរើ​ទ្រព្យសម្បត្តិរបស់អ្នក​ស្រី​យក​ទៅទុក​នៅ​ទីធ្លាផ្ទះ​របស់អ្នកជិតខាង ដោយសារ​គ្រួសាររបស់អ្នក​ស្រី​មិនអាចស្នាក់នៅក្នុងផ្ទះ​របស់​ពួកគេ​បានទេ បន្ទាប់ពីរង​ការខូចខាត។

ឧបទ្ទវហេតុ​​ផ្ទុះ​គ្រាប់​បាន​បណ្តាល​ឲ្យ​​ផ្ទះ​ប្រជាពលរដ្ឋបាក់រលំ​​​ផ្នែកខ្លះ​ និង​ធ្វើ​ឲ្យ​ខូចខាត​ផ្ទះ​ផ្សេង​ទៀត​នៅ​ខេត្ត​កំពង់ស្ពឺ កាល​ពី​ថ្ងៃ​ទី​២៨ ខែ​មេសា ឆ្នាំ​២០២៤។ (ខេមបូចា/ ព្រីង សំរាំង)

លោកនាយករដ្ឋមន្ត្រី ហ៊ុន ម៉ាណែត បាន​ប្រកាសតាម​ហ្វេសប៊ុកថា លោក​នឹង​ឧបត្ថម្ភ​ថវិកា​គ្រួសារ​​យោធិន​ពលីចំនួន២ម៉ឺនដុល្លារ ប៉ុន្តែមកដល់ថ្ងៃអាទិត្យនេះ អ្នក​ស្រី ណាវី មិនដឹងថា តើ​អ្នក​ស្រី​នឹងទទួលបានសំណងសម្រាប់ការបាត់បង់ផ្ទះរបស់អ្នកស្រី ​ឬយ៉ាងណានោះទេ។ អ្នក​ស្រី​​​បាន​និយាយ​ថា អ្នក​ស្រី​​កំពុង​រង់ចាំ​ព័ត៌មាន​បន្ថែម ហើយ​អ្នកស្រី​មាន​ការ​តក់ស្លុត​ចំពោះ​សោកនាដកម្ម​​នេះ​។

អ្នក​ស្រី​​បាន​និយាយ​ថា៖​ «គ្មាន​អ្នក​នៅ​រស់​ទេ ហើយ​យើង​មិន​ដឹង​ថា ​ហេតុ​អ្វី​បានជា​​វា​ផ្ទុះ​នោះ​ទេ ព្រោះ​គ្រប់​​គ្នា​ដែល​នៅ​កន្លែង​កើត​ហេតុ​បាន​ស្លាប់​អស់​ហើយ”។ ឧប​ទ្ទ​វហេតុនេះសាហាវ​ណាស់ ហើយខ្ញុំមិនដែលជួប [រឿងបែបនេះ] ពីមុនមកទេ​»

ប្រជាពលរដ្ឋ​ម្នាក់​ទៀត​ឈ្មោះ កែវ សារ៉េត អាយុ៦២​ឆ្នាំ បាន​និយាយ​ថា សាក​សព​​ទាហាន​ទាំង​នោះ​បាន​ខ្ទេច​ទាំងស្រុង​។ លោក​បន្ថែម​ថា ឃ្លាំង​គ្រាប់​នេះ​នៅ​មាន​យុទ្ធ​ភណ្ឌ​​មិន​ទាន់​ផ្ទុះ ដែល​ត្រូវ​ការ​ឲ្យ​អ្នក​ជំនាញ​យក​ចេញ​។

លោក កែវ សារ៉េត និយាយ​ថា៖ «ទាហានបានប្រាប់ខ្ញុំថា មានគ្រាប់កាំភ្លើងច្រើន​គ្រាប់នៅខាង​ក្នុងអគារ ហើយមូលហេតុនៃការផ្ទុះអាចមកពីបញ្ហាបច្ចេកទេស ហើយទាល់តែអ្នកជំនាញទើប​អាច​ពន្យល់បាន»

លាជាលើ​ក​​ចុងក្រោយ

ជំនួស​ឱ្យ​ការឱប​​មនុស្ស​ជា​ទី​ស្រឡាញ់​របស់​ពួក​គេ ក្រុម​គ្រួសារ​នៃ​ទាហាន​ដែល​បាន​ពលី​​បាន​ឱប​មឈូស​ដែល​គ្របពីលើ​​ដោយ​ទង់ជាតិ​កម្ពុជា​នៅ​ក្នុង​ពិធី​គោរព​វិញ្ញាណក្ខន្ធ​កាលពី​ថ្ងៃ​អាទិត្យ។

ស្ត្រី​ម្នាក់​បាន​ឱប​កូន​ប្រុស​ពេញ​វ័យ​របស់​គាត់ ដែល​បាន​ដើរ​ចូល​ទៅ​ក្នុងរោង​​រំឭក​វិញ្ញាណក្ខន្ធ ដោយ​កាន់​ទៀន និង​ធូប សមាជិក​គ្រួសារ​ទាំង​ពីរនាក់​ស្រែក​​យំ។ ពេល​ដែល​ពួក​គាត់ដើរទ្រេត​ទ្រោត​​​ជាមួយ​គ្នា ស្ត្រីរូបនោះ​​បាន​ស្រែក​ថា ប្តី​របស់​គាត់​​បាន​សន្យា​ថា ​នឹង​ត្រឡប់​មក​វិញ​នៅ​យប់​នោះ បន្ទាប់​ពី​ធ្វើ​ការ​មួយ​ថ្ងៃ។

អ្នក​ស្រី​​និយាយ​ទាំង​ទឹក​ភ្នែក​ថា៖ «ខ្ញុំ​មក​យក​បងទៅ​ផ្ទះ​យើង​វិញ។ បងឯងប្រាប់ខ្ញុំថាមកធ្វើការ​តែមួយថ្ងៃប៉ុណ្ណោះ ហើយនឹងទៅផ្ទះវិញ ប៉ុន្តែឥឡូវនេះ ហេតុអ្វី [​កើត​រឿង​នេះ]!»

សមាជិក​គ្រួសារទាហានភាគច្រើនបានធ្វើដំណើរមកពីខេត្តកោះកុង ខណៈដែលទាហាន​១៥នាក់​​ក្នុងចំណោមទាហាន២០នាក់ដែលបានពលី​នោះ ដឹកជញ្ជូន​គ្រាប់​រំសេវពីខេត្ត​កោះកុង​មក​ខេត្តកំពង់ស្ពឺ​។

អ្នកស្រី អ៊ិន សុម៉ាលី បានប្រាប់ខេមបូចា​ថា អ្នកស្រី​បានធ្វើដំណើរមកពីខេត្តតាកែវ ដើម្បីយក​សពបងថ្លៃ​របស់គាត់​ ប៉ុន្តែពួកគាត់​បានយកដីចេញពីកន្លែងផ្ទុះជំនួសវិញ ដោយសាររក​មិន​ឃើញ​សាកសព។

គេ​ឮ​សូរ​អ្នក​ដែល​កំពុង​បន់ស្រន់​​និយាយលានិង​សុំជា​លើក​ចុង​ក្រោយ​ថា៖ «សូម​ឲ្យ​​ព្រលឹង​ឯងត្រឡប់​ទៅ​ផ្ទះ​យើង​វិញ ហើយ​សូម​កើត​ម្ដង​ទៀត​មាន​​អាយុ​វែង​…»

អ្នកស្រី សុម៉ាលី បានឱ្យដឹងបន្ថែមថា អ្នក​ស្រី​មិនអាចចែករំលែកព័ត៌មានបានច្រើនទេនៅ​ពេលនេះ​ ហើយបាននិយាយថា ពួកគាត់​នឹងរង់ចាំរហូតដល់ចប់ពិធីបុណ្យសព ដើម្បីស្វែងរក​ដំណោះ​ស្រាយ​សម្រាប់គ្រួសារជនរងគ្រោះ។

ក្រុមគ្រួសារសពមន្ត្រីយោធាដែល​បាន​ស្លាប់​យំសោកក្នុងពិធីបុណ្យ​សពនៅ​បញ្ជាការដ្ឋានយោធភូមិភាគទី​៣ ក្នុងខេត្តកំពង់ស្ពឺ កាល​ពី​ថ្ងៃទី២៨ ខែមេសា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)

លោកនាយករដ្ឋមន្ត្រី ហ៊ុន ម៉ាណែត បានបង្ហោះសារនៅលើទំព័រ​ហ្វេសប៊ុក​របស់លោក ចូលរួមរំលែកទុក្ខដល់ក្រុមគ្រួសារជនរងគ្រោះ។ ក្រៅ​ពី​ការ​ឧបត្ថម្ភ​ថវិកា​ចំនួន២​ម៉ឺន​ដុល្លារ​ដល់​គ្រួសារ​សព​ទាំង២០​នាក់ អ្នក​រង​របួស​នឹង​ទទួល​បាន​ថវិកា​២០​លាន​រៀល (ជិត៥​ពាន់​ដុល្លារ)។

សារ​របស់លោកនាយករដ្ឋមន្ត្រី​បានសរសេរថា៖ «ក្នុងនាមរាជរដ្ឋាភិបាល និងក្នុងនាមខ្លួន​ខ្ញុំ​ផ្ទាល់ ខ្ញុំសូមចូលរួមរំលែកមរណ​ទុក្ខយ៉ាងក្រៀមក្រំបំផុតចំពោះគ្រួសារយោធិនពលី​ និង​សម្តែង​នូវ​សមានទុក្ខ​សោក​ស្តាយ​ចំពោះ​អ្នក​រង​របួស​ក្នុងឧបទ្ទវហេតុដ៏សោកសង្រេង​នេះ»

លោក វ៉ី សំណាង អភិបាល​ខេត្ត​កំពង់ស្ពឺ មិន​អាច​ទាក់​ទង​សុំ​ការ​បំភ្លឺ​បាន​ទេ​កាល​ពី​ថ្ងៃ​អាទិត្យ ទោះ​បី​ជាយ៉ាងណា​​លោក​បាន​មាន​ប្រសាសន៍​កាល​ពី​ថ្ងៃ​សៅរ៍​ថា លោក​នឹង​មិន​ធ្វើ​អត្ថាធិប្បាយ​​ទេ ព្រោះ​ឧបទ្ទវហេតុ​នេះ​ គឺ​ជា​បញ្ហា​សន្តិសុខ​ជាតិ។ ចំណែក​លោក សម​ សាមួន ​​ស្នងការ​នគរបាល​ខេត្តកំពង់​ស្ពឺ​ បាន​បដិសេធ​មិន​ធ្វើ​អត្ថាធិប្បាយ​ទេ ហើយ​បាន​បង្វែរ​សំណួរ​ទៅ​កាន់​នាយកដ្ឋាន​កង​ទ័ព។

លោក ប៉ែន បូណា អ្នកនាំពាក្យរដ្ឋាភិបាល បានបង្វែរសំណួរទៅកាន់លោក ឈុំ សុជាតិ អ្នកនាំពាក្យក្រសួងការពារជាតិ ខណៈលោក ឈុំ សុជាតិ និងលោក ម៉ៅ ផល្លា អ្នកនាំពាក្យ​កងយោធពលខេមរភូមិន្ទ មិនអាចទាក់ទងសុំការអត្ថាធិប្បាយបានទេ។

លោក អ៊ិត សារ៉ាត់ មេបញ្ជាការរងកងយោធពលខេមរភូមិន្ទ និងជានាយ​សេនាធិការចម្រុះនៃ​កងយោធពលខេមរភូមិន្ទ បានបដិសេធមិនធ្វើអត្ថាធិប្បាយទេ ដោយនិយាយថា លោកជាប់​រវល់ប្រជុំ៕

អ្នកភូមិម្នាក់ពិនិត្យ​មើល​ការខូចខាតដោយសារការផ្ទុះគ្រាប់នៅ​បញ្ជាការដ្ឋាន​យោធភូមិភាគទី៣ ដែលបណ្តាល​ឲ្យ​យោធិន​២០នាក់ស្លាប់​ និងរបួសច្រើន​នាក់​ផ្សេងទៀត ខណៈធ្វើ​ឲ្យ​ខូចខាតផ្ទះជាង២០ខ្នង នៅខេត្តកំពង់ស្ពឺ កាល​ពី​ថ្ងៃទី២៨ ខែមេសា ឆ្នាំ២០២៤។ (ខេមបូចា/ ព្រីង សំរាំង)

ប្រែសម្រួលពីអត្ថបទភាសាអង់គ្លេស៖ Military Officials Are Investigating Munitions Warehouse Blast That Killed 20 Soldiers, Wounded Several Others

523 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម