សមាគមសម្ព័ន្ធអ្នកសារព័ត៌មានកម្ពុជា

ប្រជា​ពល​រដ្ឋ​ចំនួន​៣០​ភូមិ​​ក្នុង​ខេត្ត​កំពង់ស្ពឺ ខ្វះ​ទឹក​ស្អាតប្រើប្រាស់​ បន្ទាប់​ពី​ទឹកស្ទឹង​​​រីង​​ស្ងួត

រូបថតបង្ហាញពីសភាពរីងស្ងួតនៃប្រភពទឹករបស់ស្ថានីយ៍ទឹកស្អាតវាលពង់ ខែឧសភា ឆ្នាំ២០២៤។
រូបថតបង្ហាញពីសភាពរីងស្ងួតនៃប្រភពទឹករបស់ស្ថានីយ៍ទឹកស្អាតវាលពង់ ខែឧសភា ឆ្នាំ២០២៤។

ការផ្គត់ផ្គង់ទឹកស្អាតដោយស្ថានីយ៍ទឹកស្អាត​វាលពង់ត្រូវបាន​អាក់ខាន ខណៈទឹកស្ទឹង​នៅភូមិស្នាមពុក ឃុំវាលពង់ ស្រុកឧដុង្គ ខេត្តកំពង់ស្ពឺ បានរីងស្ងួតជាលើកដំ​បូងចាប់តាំងពីស្ថានីយ៍ទឹកស្អាតនេះ​ដំណើរ​ការ​បាន​រយៈ​ពេល​បួនឆ្នាំ​។ 

ស្ថានីយ៍ទឹកស្អាត​នេះបានបង្ហោះសារ​តាមរយៈហ្វេសប៊ុកកាល​ពី​ថ្ងៃទី២ ខែឧសភា ឆ្នាំ២០២៤ ដើម្បីជូនដំណឹងដល់អតិថិជនអំពីស្ថានភាពទឹកស្ទឹង​ និងថា មិនមានទឹកគ្រប់គ្រាន់សម្រាប់ការ​ផ្គត់ផ្គង់ដូចធម្មតាទេ។ ទឹកស្ទឹង​នេះ​ផ្គត់​ផ្គង់​ទឹកដល់ឃុំចំ​នួនពីរ គឺឃុំវាលពង់ និងឃុំព្រះស្រែ ដែលមាន៣០ភូមិ។

 ស្ថានីយ៍ទឹកស្អាត​នេះ​មិនបានបញ្ជាក់​ពី​ពេលវេលាជាក់​លាក់​ថា ពេលណា​ការផ្គត់ផ្គង់ទឹកនឹងត្រលប់មកធម្មតាវិញនោះទេ។ ទោះ​បី​ជា​យ៉ាង​ណា ​ស្ថានីយ៍​ទឹកស្អាត​បាន​លើក​ឡើង​​ថា ​នៅ​ពេល​រក​បាន​​​ប្រភព​ទឹកដែលអាចផ្គត់​ផ្គង់​គ្រប់​គ្រាន់​​​ឬ​​មាន​ភ្លៀងធ្លាក់​មាន​ទឹក​គ្រប់​គ្រាន់​​​ ស្ថានីយ៍នឹង​ធ្វើ​ការ​ផ្គត់​ផ្គង់​តាម​ធម្មតាវិញ​។ 

លោក ប៉ែន ចន្ថា តំណាងក្រុមហ៊ុន​ផ្គត់ផ្គង់ទឹកស្អាតវាលពង់ មានប្រសាសន៍ថា ស្ថានីយ៍​កំពុងជួបការលំបាក ព្រោះនេះជាលើកទីមួយហើយដែលស្ថានីយ៍នេះជួបប្រទះនឹង​កង្វះ​​ទឹកផ្គត់​ផ្គង់​។ លោក​ជឿ​ថា បញ្ហា​នេះ​បណ្តាល​មក​ពី​ការ​ប្រែប្រួល​​អាកាសធាតុ និង​ការ​ធ្វើ​ស្រែ​ប្រាំង​នៅ​តំបន់​នោះ។

 លោកបាននិយាយថា៖ «ក្នុងនាមស្ថានីយ៍ផ្គត់ផ្គង់ទឹកស្អាត ក្រុមការងាររបស់ខ្ញុំកំពុងប្រឈមមុខនឹង​បញ្ហា ព្រោះនេះជាលើកទីមួយហើយដែលយើងខ្វះទឹក។ យើង​នឹង​ព្យាយាម​ឱ្យ​អស់​ពី​សមត្ថភាព​ ដើម្បី​រក​ដំណោះស្រាយ​ជូន​អតិថិជន»។ 

លោក ចន្ថា បាននិយាយថា អង្គភាព​រដ្ឋ​ករ​ទឹកខេត្តបានអនុញ្ញាតឱ្យស្ថានីយ៍​ប្រើប្រាស់​ប្រភព​ទឹកផ្សេងៗ ប៉ុន្តែវានៅឆ្ងាយពីស្ថានីយ៍ទឹកស្អាតវាលពង់។ លោក​បន្ត​ថា​៖ «វា​ចំ​ណាយ​ពេល​ពី៣ ទៅ៧ថ្ងៃ​ ដើម្បី​ធ្វើ​ឲ្យ​​ការ​ផ្គត់ផ្គង់​ទឹក​ត្រឡប់​មក​ធម្មតា​វិញ ប្រសិន​បើ​យើង​បូម​ទឹក​ពី​តំបន់​នោះ។ យើង​ក៏​ត្រូវ​ការ​ជំនួយ​ផ្នែក​ហិរញ្ញវត្ថុ និង​​កិច្ច​សហការ​ពី​អាជ្ញាធរ​ពាក់ព័ន្ធផងដែរ»។ 

ប្រជាពលរដ្ឋម្នាក់​ឈ្មោះ​ វ៉ន សាវី បានប្រាប់ខេមបូចា​នៅថ្ងៃទី០៣ ខែឧសភា ថា ការ​ផ្គត់ផ្គង់ទឹកមិនមានស្ថិ​រភាពរយៈពេលមួយសប្តាហ៍មកហើយ​ ដែលកត្តានេះធ្វើឲ្យកាន់​តែ​មាន​សភាព​ធ្ងន់ធ្ងរដោយសារអាកាសធាតុក្តៅ។ អ្នកស្រី សាវី បាននិយាយថា៖ «វាពិតជាពិបាកសម្រាប់​ខ្ញុំ និងអ្នកស្រុកផ្សេងទៀត ដោយសារយើងកំពុងជួបប្រ​ទះ​អា​កាសធាតុក្តៅ ជាពិសេសឆ្នាំនេះ វាក្តៅខ្លាំងណាស់។ ទន្ទឹមនឹងនេះ យើងមិន​មានទឹកស្អាត​គ្រប់គ្រាន់សម្រាប់ប្រើប្រាស់ក្នុងរដូវប្រាំង។ វាប៉ះពាល់ដល់ការ​ងារ និងជីវភាពរបស់ខ្ញុំ។ ពេល​ខ្លះ​ ខ្ញុំ​ត្រូវ​ចាំ​ដល់​យប់​ទើប​មាន​ទឹកប្រើ​» ។

 ការផ្គត់ផ្គង់ទឹកមិនគ្រប់​គ្រាន់​មិនត្រឹមតែប៉ះពាល់ដល់មនុស្សចាស់ក្នុងរដូវក្ដៅប៉ុណ្ណោះទេ ប៉ុន្តែ​រួម​​ទាំងក្មេងផងដែរ​។ «សូម្បី​តែ​មនុស្ស​ចាស់​ក៏​គិត​ថា ​ក្តៅ​ហើយ​ពិបាក​ទ្រាំ​ដែរ។ ចុះក្មេងៗវិញ? ពួក​គេ​ក៏​ត្រូវ​ការ​ទឹក​សម្រាប់​ប្រើប្រាស់​ប្រចាំ​ថ្ងៃ និង​ពេល​ទៅ​សាលា» អ្នកស្រីបានបន្ថែម។  

លើស​ពី​នេះ​ទៀត ប្រាក់​ចំណូល​របស់អ្នក​ស្រី សាវី និងប្រាក់​ចំណូល​​​ម្ដាយ​របស់​អ្នកស្រី​ក៏​​​ប៉ះ​ពាល់ដែរ ​ដោយ​សារ​ពួក​គាត់​​ត្រូវ​ការ​ទឹក​សម្រាប់​ធ្វើ​អាជីវកម្ម។ អ្នកស្រី​ សាវី និយាយថា៖ «ម្តាយ​របស់ខ្ញុំជាអ្នកបោកខោអាវ ហើយខ្ញុំបើកហាងផាត់​មុខ​​។ ខ្ញុំ​ត្រូវ​ប្រាប់​អតិថិជន​របស់​ខ្ញុំ​ថា យើង​គ្មាន​ទឹកប្រើទេ​ ហើយ​បញ្ហា​នេះ​​ប៉ះពាល់​ដល់​ប្រាក់​ចំណូល​របស់​ខ្ញុំ​» ដោយ​អ្នកស្រី​ទទូច​​ឱ្យ​ភាគី​ពាក់ព័ន្ធ និង​អាជ្ញាធរ​ដោះស្រាយ​បញ្ហា​ទឹក​ឱ្យ​បាន​ឆាប់​តាម​ដែល​អាច​ធ្វើ​ទៅ​បាន។ 

លោក វ៉ី សំណាង អភិបាល​ខេត្ត​កំពង់ស្ពឺ មិន​អាច​ទាក់​ទង​សុំការ​អត្ថាធិប្បាយ​បាន​​ទេ។ 

អ្នកស្រី តាន់ សុនត្រា មេភូមិដំណាក់ស្មាច់ ឃុំវាលពង់ មានប្រសាសន៍ថា អ្នក​ស្រី​បានដឹងពីបញ្ហាទឹកដែលប៉ះពាល់ដល់ប្រជាពលរដ្ឋជាលើកដំបូង ដោយសារការ​ផ្គត់ផ្គង់ទឹកគ្រប់គ្រាន់សម្រាប់​ពួកគាត់​ក្នុងរយៈពេលប៉ុន្មានឆ្នាំកន្លងមកនេះ។

 មេភូមិ​​វ័យ​៦៤​ឆ្នាំ​រូប​នេះ​បាន​សង្កេត​ឃើញ​ថា៖​ «ខ្ញុំ​គិត​ថា ​អាកាសធាតុ​ក្ដៅ​ខ្លាំង​នៅ​​ឆ្នាំ​នេះ​ ដោយ​សារ​គ្រោះ​រាំង​ស្ងួត និង​ការ​ប្រែប្រួល​អាកាស​ធាតុ ហេតុ​នេះ​ហើយ​បាន​ជា​យើង​មិន​មាន​ទឹក​ប្រើប្រាស់​គ្រប់​គ្រាន់។ យើង​ត្រូវ​តែ​ទទួល​យក​រឿង​នេះ​ព្រោះ​ការ​ប្រែប្រួល​អាកាសធាតុ​ជា​វិបត្តិ​ពិភពលោក​ មិន​មែនមាន​​តែ​នៅក្នុង​ប្រទេស​កម្ពុជា​ប៉ុណ្ណោះ​ទេ»។

អ្នកស្រី សុ​នត្រា បានមាន​ប្រសាសន៍​ថា ក្នុងនាមអាជ្ញាធរមូលដ្ឋាន អ្នកស្រី​ដឹងថា អ្នកស្រុកកំពុងប្រឈមមុខនឹងបញ្ហាជីវភាព។ «ពួកគាត់​ត្រូវចំណាយប្រាក់ដើម្បីទិញទឹកសម្រាប់ប្រើប្រាស់។ ទោះ​វា​ថ្លៃ​ក៏​ត្រូវ​ទិញ​ដែរ ព្រោះពួកគាត់​​គ្មាន​ជម្រើស។ ជាធម្មតា យើងប្រើប្រាស់ទឹកសម្រាប់ងូត ចម្អិនអាហារ និងបោកគក់។ ពួកគាត់​​ប្រើប្រាស់​ទឹក​ស្អាត​ពី​ស្ថានីយ៍ ហើយ​ជួនកាល​ ប្រើប្រាស់​ទឹក​​ពី​ប្រឡាយ អាស្រ័យ​លើ​ស្ថានភាព​សេដ្ឋកិច្ច​គ្រួសារ​របស់​ពួកគាត់​» អ្នកស្រីបានបន្ថែម។

 លោក យ៉ង់ គឹមអេង ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព​បាន​មាន​ប្រសាសន៍​​ថា ចំណូល​របស់​ប្រជាពលរដ្ឋ និង​សុខភាព​សាធារណៈ​រង​ផល​​​ប៉ះពាល់​ដោយ​សារ​ការ​ខ្វះ​ទឹកប្រើប្រាស់​ ជាពិសេស​​អំឡុង​រដូវ​ក្តៅ។

 លោកបានមានប្រសាសន៍ថា៖​ «​បញ្ហានេះនឹងប៉ះពាល់ដល់ជីវភាពរស់នៅ សុខុមាលភាព និងសុខភាពសាធារណៈរបស់​ពួកគាត់​ ដោយសារមនុស្សត្រូវការទឹកសម្រាប់ប្រើប្រាស់ប្រចាំថ្ងៃ ដាំដំ​ណាំ និងដើម្បី​រស់​រាន» ។ 

លោក​បាន​ទទូច​​ឲ្យ​អាជ្ញាធរ និង​ក្រសួង​ពាក់ព័ន្ធជួ​យ​​ដោះស្រាយ​ឲ្យ​បាន​ឆាប់​ដល់​ប្រជាពលរដ្ឋ។ «ជាពិសេស កសិករត្រូវការទឹកសម្រាប់ធ្វើកសិកម្ម»

ប្រែសម្រួលពីអត្ថបទភាសាអង់គ្លេស៖​ Thirty Villages in Kampong Speu Lack Clean Water After Stream Dries Up

1,868 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម