សមាគមសម្ព័ន្ធអ្នកសារព័ត៌មានកម្ពុជា

ក្រុម​យុវជន​ជិះកង់​១ ០០០​គីឡូម៉ែត្រ​ពី​ខេត្ត​រតនគិរីទៅ​ខេត្ត​កែប ដើម្បីចូលរួម​លើកកម្ពស់ការការពារបរិស្ថាន

យុវជនបរិស្ថានចាប់ផ្ដើមជិះកង់របស់ពួកគេក្នុងយុទ្ធនាការ១ ០០០គីឡូម៉ែត្រដើម្បីពង្រឹងការយល់ដឹងពីកិច្ចការពារបរិស្ថាន។ (រូបភាព៖ហ្វេសប៊ុកអង្គការបណ្ដាញយុវជនកម្ពុជា)
យុវជនបរិស្ថានចាប់ផ្ដើមជិះកង់របស់ពួកគេក្នុងយុទ្ធនាការ១ ០០០គីឡូម៉ែត្រដើម្បីពង្រឹងការយល់ដឹងពីកិច្ចការពារបរិស្ថាន។ (រូបភាព៖ហ្វេសប៊ុកអង្គការបណ្ដាញយុវជនកម្ពុជា)

យុវជន​ចំនូន​២៥​រូប​​ បាន​ចាប់​ផ្ដើម​ធ្វើយុទ្ធនាការ​របស់​ខ្លួន​ក្នុង​ការ​ជិះកង់​ចម្ងាយ​១ ០០០​គីឡូម៉ែត្រ ដើម្បី​ចូល​រួម​ក្នុង​ទិវា​បរិស្ថាន​ពិភព​លោក​ដែល​ត្រូវ​នឹង​ថ្ងៃទី​៥ ខែមិថុនា ក្នុង​ន័យ​លើក​កម្ពស់​ការ​យល់​ដឹង​ពី​ការ​ការពារ​ធនធានធម្មជាតិ និង​ការ​ពារ​ការ​កាប់​បំផ្លាញ​ព្រៃ​ឈើ​។​

យុទ្ធនាការ​ជិះ​កង់​នេះ​មាន​រយៈពេល​២០​ថ្ងៃ ដោយ​ចាប់​ផ្ដើម​ពី​ថ្ងៃទី​៦ ខែឧសភា និង​គ្រោងបញ្ចប់​នៅ​ថ្ងៃទី​២៤ ខែឧសភា។ យុទ្ធនាការ​នេះ ក្រុ​ម​យុវជន​​ផ្ដើមជិះកង់​​ចេញ​ពី​ខេត្ត​រតនគិរី និង​បញ្ចប់​នៅ​ខេត្ត​កែប ក្នុង​គោល​បំណង​ជំរុញ​ដល់​សាធារណជន​ឲ្យ​ចូល​រួម​សកម្ម​ថែម​ទៀត​ក្នុង​កិច្ច​ការ​ពារ​បរិស្ថាន និង​ការ​យល់​ដឹង​ពី​ការ​ប្រែ​ប្រួល​អាកាសធាតុ​។​

យុទ្ធនាការ​នេះ​នឹង​មាន​រៀប​ចំ​ជា​សកម្មភាព​មួយ​ចំនួន​ដូច​ជា​ការ​ដាំ​កូន​កោង​កាង​ ការ​ជួប​ជុំ​ជា​មួយ​សហគមន៍​នានា និង​ការ​រៀប​ចំ​វេទិកា​មួយ​​នៅ​ទី​ក្រុង​ភ្នំពេញ​​​។​ វេទិកាសាធារណៈនេះ​នឹង​រៀប​ចំ​នៅ​ទីលាន​ប្រជា​ធិបតេយ្យ ព្រមទាំងការ​ជិះ​រថយន្ត​ក្រុង​សាធារណៈ​ដើម្បី​បង្កើន​ការ​យល់​ដឹង​អំពី​បរិស្ថាន​ ហើយ​យុទ្ធនាការ​នេះ​នឹង​រៀប​ចំ​បន្ទាប់​ពី​យុទ្ធការជិះ​កង់​បន្ត​រហូត​ដល់​ថ្ងៃទី​៥ ខែមិថុនា​។​

អ្នក​ជិះ​កង់​បាន​ស្រែកសារ​មាន​ន័យ​អប់​រំ​រយៈពេល​ពី​ប្រាំទៅ​១០ននាទី​ដើម្បី​ដាស់​ស្មារតី​សាធារណជន​​អំពីកិច្ច​ការ​ពារ​ធនធាន​ធម្មជាតិ​ពេល​បាន​មក​ដល់​តំបន់​ប្រជុំជន​នានា​ក្នុង​ខេត្ត​រតនគិរី​។ ក្រុម​យុវជន​ទាំង​នោះ​ក៏​បាន​ចូល​ជួប​ជា​មួយ​សហគមន៍​មូលដ្ឋាន​ក្នុងស្រុក​សេសាន ​ខេត្ត​ស្ទឹង​ត្រែង ដែល​រង​ផល​ប៉ះពាល់​ពី​គម្រោង​វារីអគ្គិសនី​​ផង​ដែរ។​

ក្រុម​យុវជន​ក៏​បាន​ចំណាយ​ពេល​ពី​រថ្ងៃ​ក្នុង​តំបន់​ព្រៃ​ឡង់​ក្នុង​ខេត្ត​កំពង់ធំ ជា​កន្លែង​ដែល​អ្នក​ទាំង​នោះ​បាន​សង្កេត​ឃើញថា​នៅ​​បន្ត​មាន​ការ​កាប់​ឈើ និង​ការ​ឈូស​ឆាយ​ដីព្រៃ​ក្នុង​តំបន់​ការពារ​​។​

លោក ហេង គឹមហុង ប្រធាន​អង្គការ​បណ្ដាញ​យុវជន​កម្ពុជា និង​ជា​អ្ន​ក​ដឹកនាំ​យុទ្ធនាការ​នេះ​ មាន​ប្រសាសន៍​ថា៖ «​យេីងមាន​ការ​ព្រួយបារម្ភ​ខ្លាំង​ព្រោះ​នៅមានការកាប់បំផ្លាញក្នុងព្រៃឡង់​ និងបន្តការ​ទន្ទ្រាន​យ៉ាងសំណុំនៅតំបនភ្នំជី»។​

លោក​បន្ត​ថា លោក​នៅ​តែ​មាន​ការ​ព្រួយ​បារម្ភ​អំពី​សកម្មភាព​បំផ្លាញ​ធនធាន​ធម្មជាតិ​របស់​កម្ពុជា​ប្រចាំ​ថ្ងៃ និង​បទល្មើស​ព្រៃឈើ​ផ្សេ​ងទៀត​។ លោក​បន្ថែម​ថា​៖ «​យើង​បាន​ឃើញ​របាយការណ៍​ដែល​និយាយ​អំពី​បំផ្លាញព្រៃឈើ​ដោយ​ប្រើ​ប្រាស់​សារធាតុគីមី​ដើម្បី​ធ្វើ​អាជីវកម្ម[រ៉ែ​]»។​

លោក​កត់​សម្គាល់​ថា​អាជ្ញាធរ​បាន​តាម​ឃ្លាំមើលយុទ្ធនា​ការ​ជិះកង់​ក្នុង​ឆ្នាំ​នេះដែរ ដោយថា​មានការ​ថតរូប​ក្រុមយុវជន​ពេល​ដល់ទីតាំង​មួយៗ ប៉ុន្តែ​ថា​មិន​មានការ​រឹតត្បិត​​ដូច​កាល​យុទ្ធនាការ​ជិះកង់​កាលពី​ឆ្នាំ​២០២២​នោះទេ​។​

លោក​បន្តថា ក្រុម​យុវជនមាន​ការតាំង​ចិត្ត​ក្នុង​ការ​ការពារ​ធនធាន​ធម្មជាតិ បើទោះបីជា​ពួកគេ​ប្រឈម​ការ​លំបាក​មួយ​ចំនួន​ដូច​ជា​បញ្ហា​ហិរញ្ញវត្ថុ ឬ​ពេល​ប្រឈម​នឹង​ក្រុម​អ្នក​កាប់​ឈើ​ជា​ដើម​។​​

​យុវជន​ម្នាក់ ឈ្មោះ ចាន់ សារិន វ័យ២៧​ឆ្នាំ មក​ពី​ខេត្ត​ព្រះ​វិហារដែល​បាន​​ចូល​រួម​ក្នុង​យុទ្ធនាការ​នេះ បាន​និយាយ​ថា​ការ​កាប់​បំផ្លាញ​ព្រៃឈើ​ក្នុង​ដែន​ជម្រក​សត្វព្រៃ​ក្នុង​តំបន់​ព្រៃ​ឡង់​នៅ​តែ​មាន និង​ថា​អាជ្ញាធរ​មិន​បាន​បំពេញ​ភារកិច្ច​បានពេញ​លេញ​ក្នុង​ការ​ការពារ​បទល្មើសព្រៃឈើ​នោះទេ​។​

លោក​បន្ត​ថា៖ «​យើង​បាន​ឃើញ​ថា​អាជ្ញាធរ​មិន​ទាន់​បាន​​អនុវត្ត​ច្បាប់​ឲ្យ​មាន​ប្រសិទ្ធភាព​ចំពោះ​អ្នក​ដែល​កាប់​ឆ្ការដី​​ព្រៃ។ ការ​កាប់​ឈើ​ក្នុង​តំបន់ព្រៃឡង់​នៅ​តែ​បន្ត​មាន»។ លោក​​សង្ឃឹម​ថា​សាធារណជន​នឹង​រួម​កម្លាំង​គ្នា​ការពារព្រៃឈើ​។​​

យុវជនបរិស្ថាន​​ចាប់​ផ្ដើម​ជិះ​កង់​របស់ពួក​គេ​ក្នុង​យុទ្ធនាការ​១ ០០០គីឡូម៉ែត្រ​ដើម្បី​ពង្រឹង​ការ​យល់​ដឹង​ពី​កិច្ចការ​ពារ​បរិស្ថាន​។ (រូបភាព៖ហ្វេស​ប៊ុកអង្គការ​​បណ្ដាញ​យុវជន​កម្ពុជា)

កាលពី​ខែ​មេសា អង្គការ​ Mongabay បាន​បង្ហាញ​តួលេខ​ថ្មី​ដែល​បោះ​ពុម្ព​ដោយសាកលវិទ្យាល័យ​ Maryland ហើយរបាយការណ៍​នេះ​អាច​រក​បាន​នៅ​អង្គការឃ្លាំមើល​ព្រៃឈើ​ពិភព​លោក Global Forest Watch ។ តាមរយៈការ​ឃ្លាំមើល​តាម​រយៈ​ផ្កាយ​រណប គម្រប​ព្រៃ​ឈើ​នៅ​កម្ពុជា​បាន​បាត់​បង់​ប្រហែល​១២១ ០០០​ហិកតា ក្នុង​ឆ្នាំ​២០២៣​។​

​អ្នកនាំពាក្យ​ក្រសួង​បរិស្ថាន​លោក ខ្វៃ អាទិត្យា បាន​បដិសេធធ្វើអត្ថាធិប្បាយ​លើយុទ្ធនាការ​ជិះ​កង់​ដើម្បី​បរិស្ថាន​របស់​សកម្ម​ជន ប៉ុន្តែ​លោក​មាន​ប្រសាសន៍​ថា​យុទ្ធនាការ​ដាំដើម​ឈើ​មួយ​លាន​ដើម​ដែល​បាន​ប្រកាស​កាល​ពីថ្ងៃទី​១០ ​ខែ​តុលា ឆ្នាំ២០២៣ គឺ​ក្នុង​ន័យ​បង្កើន​គម្រប​ព្រៃ​ឈើ​ឡើងវិញ​។​

លោក​បន្តថា៖ «​ការ​លើក​កម្ពស់​ការ​ដាំ​ព្រៃ​ឈើនេះ គឺ​មាន​ន័យ​ថា​ដាំ​ដើម​ឈើ​ឲ្យ​បាន​ច្រើន​ជាង​ការ​កាប់​ឈើ ដើម្បីបង្កើន​គម្រប​ព្រៃ​ឈើ​ឱ្យ​បាន៦០​ភាគ​រយ​នៅ​ឆ្នាំ​២០៥០​»។​

លោក​ឲ្យ​ដឹង​ទៀត​ថា កាលពី​ខែ​មេសា ឆ្នាំ​២០២៤ ក្រសួង​បរិស្ថាន​បាន​ចែក​ពូជ​កូន​ឈើ​៨៧៨ ១១០ ដើម​ទៅ​ដល់​កសិករ​ចំនួន​២០៥ ៨៤៣​នាក់។ លោក​បន្ថែម​ថា​ក្រសួង​ក៏​នឹង​រៀប​ចំ​ការ​តាំង​ពិពណ៌​ដើម្បី​ជំរុញ​ និង​ចែក​កូន​ឈើ​ក្រោម​ប្រធាន​បទ «ពន្លកបៃតង» ដែល​នឹង​ចាប់​ផ្ដើម​ពីថ្ងៃទី​១០ ខែ​កក្កដា ឆ្នាំ២០២៤ នៅ​មុខ​អគារ​ក្រសួង​ក្នុងទីក្រុង​ភ្នំពេញ​។​

បន្ថែម​ពី​នេះ ក្រសួង​បាន​ដាក់​ចេញ​នូវ​វិធានការ​ជាក់​លាក់​មួយ​ចំនួន​ដើម្បី​ការពារ​ការ​កាប់​បំផ្លាញ​ព្រៃឈើ និង​ពង្រឹងការ​អនុវត្ត​ច្បាប់ «ដែល​ត្រូវ​បញ្ចប់​វប្បធម៌​នៃការចុះកិច្ចសន្យា និងការដោះ​លែង​ជនប្រព្រឹត្ត​ល្មើស» ពង្រឹង​កិច្ច​សហការ​ជាមួយ​កងរាជអាវុធហត្ថ និង​ស្ថាប័ន​ផ្សេង​ទៀត​ ដើម្បីការពារ​ធនធាន​ធម្មជាតិ​កុំ​ឲ្យ​បាត់​បង់​ ៕

ប្រែសម្រួលពីអត្ថបទភាសាអង់គ្លេស៖ Youths Cycle 1,000km To Promote Environmental Protection From Ratanakiri to Kep

502 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម