មន្ត្រីយោធាជាន់ខ្ពស់មួយរូបបានបញ្ជាក់ថា ឧបទ្ទវហេតុផ្ទុះគ្រាប់ដែលបណ្តាលឲ្យយោធិន២០នាក់ពលីជីវិត កើតឡើងដោយសារតែ «កំហុសបច្ចេកទេស» ខណៈពេលកំពុងរើគ្រាប់រំសេវចេញពីរថយន្តដាក់ក្នុងឃ្លាំងនៅបញ្ជាការដ្ឋានយោធភូមិភាគទី៣ ក្នុងខេត្តកំពង់ស្ពឺ កាលពីថ្ងៃទី២៧ ខែមេសា។
លោក ម៉ៅ ផល្លា អ្នកនាំពាក្យកងយោធពលខេមរភូមិន្ទបានប្រាប់ខេមបូចាថា គ្រាប់រំសេវត្រូវបានដឹកចេញពីបន្ទាយយោធាខេត្តកោះកុង។
លោកមានប្រសាសន៍ថា៖ «នៅពេលយើងកំពុងរើគ្រាប់ចុះ [ពីរថយន្ត] ដាក់ក្នុងឃ្លាំងទៅ វាបច្ចេកទេសខុស។ គ្រាប់មួយគ្រាប់បានផ្ទុះ ហើយវាបុកចូលឃ្លាំងស្តុកគ្រាប់»។
លោក ម៉ៅ ផល្លា បានបន្តថា៖ «ជាទូទៅ យើងផ្ទេររាល់ដងមិនដែលជួបបញ្ហាបែបនេះទេ [គ្រាប់រំសេវ] ប៉ុន្តែវាចម្លែក [វាកើតឡើង] ខណៈពេលយើងផ្ទេរពេលកំពុងក្តៅរើគ្រាប់ចុះ។ [អាកាសធាតុ] នៅពេលនោះក្តៅខ្លាំង»។
គ្រាប់រំសេវដែលត្រូវបានដឹកជញ្ជូនពីខេត្តកោះកុង ភាគច្រើនជា «គ្រាប់មីន និងគ្រាប់កាំភ្លើងត្បាល់» ដែលខ្លះលែងប្រើ ឬហួសកំណត់ ហើយត្រូវរក្សាទុកក្នុងឃ្លាំងធំៗ ដែលស្ថិតនៅក្នុងបន្ទាយយោធា។
លោក ផល្លា បានមានប្រសាសន៍ថា អ្នកភូមិ និងទាហានចំនួន១១ នាក់បានរងរបួសស្រាលដោយសារការផ្ទុះនោះ ហើយកំពុងសម្រាកព្យាបាលនៅមន្ទីរពេទ្យយោធភូមិភាគទី៣។
លោក ឈុំ សុជាតិ អ្នកនាំពាក្យក្រសួងការពារជាតិ ដែលបានចែករំលែកការយល់ឃើញស្រដៀងគ្នានេះ បានមានប្រសាសន៍ថា ឧបទ្ធវហេតុផ្ទុះនេះគឺជារឿង «ចៃដន្យ» ដែលបានកើតឡើងនៅពេលដែលគ្រាប់រំសេវត្រូវបានផ្ទេរចុះពីរថយន្តយកទៅរក្សាទុកនៅក្នុងឃ្លាំងកងទ័ព។ លោកបដិសេធមិនធ្វើអត្ថាធិប្បាយបន្ថែមទេ។
រដ្ឋាភិបាលនឹងផ្តល់ថវិកាចំនួន២ម៉ឺនដុល្លារដល់គ្រួសារជនរងគ្រោះម្នាក់ៗ ខណៈអតីតនាយករដ្ឋមន្ត្រី ហ៊ុន សែន ប្រកាសផ្តល់ជំនួយថវិកាសរុបចំនួន២០ម៉ឺនដុល្លារដល់គ្រួសារយោធិនពលីផងដែរ។
បើតាមលោក ផល្លា បានឲ្យដឹងថា ទាហានបីនាក់ត្រូវបានបូជា បន្ទាប់ពីក្រុមគ្រួសារធ្វើពិធីបុណ្យចុងក្រោយនៅបញ្ជាការដ្ឋានយោធភូមិភាគទី៣។ សពទាហានផ្សេងទៀតត្រូវបានដឹកយកទៅកាន់ស្រុកកំណើតរៀងៗខ្លួនទីដែលក្រុមគ្រួសាររបស់ពួកគេរៀបចំពិធីបុណ្យសព។
ការផ្ទុះគ្រាប់នេះក៏បានបណ្តាលឱ្យខូចខាតផ្ទះប្រជាពលរដ្ឋជាង២០ខ្នងដែលមានទីតាំងនៅជុំវិញបន្ទាយយោធានេះផងដែរ។ អាជ្ញាធរខេត្តកំពង់ស្ពឺមានភារកិច្ចជួយដោះស្រាយការទាមទាររបស់ម្ចាស់ផ្ទះ។
លោកស្រី បែន សុខុម អភិបាលរងក្រុងច្បារមន មានប្រសាសន៍ថា អាជ្ញាធរពាក់ព័ន្ធ និងកាកបាទក្រហមកម្ពុជាប្រចាំខេត្ត កំពុងសហការគ្នាដោះស្រាយផលប៉ះពាល់ដែលបណ្តាលមកពីឧបទ្ទវហេតុផ្ទុះគ្រាប់មកលើផ្ទះអ្នកភូមិ។ ប៉ុន្តែមិនទាន់មានព័ត៌មានលម្អិតនៅឡើយទេ។
លោក វ៉ី សំណាង អភិបាលខេត្តកំពង់ស្ពឺ មិនអាចទាក់ទងសុំការបំភ្លឺបានទេ៕
ប្រែសម្រួលពីអត្ថបទភាសាអង់គ្លេស៖ Explosion That Killed 20 Soldiers Due to “Technique Error” As Ammunition Was Unloaded, Army Says