យ៉ាងហោចណាស់កម្មការិនីមួយរូបបានស្លាប់ និងកម្មករចំនួន១១នាក់ទៀតរងរបួសស្រាលដោយសារតែអគ្គិភ័យឆេះរោងចក្រកាត់ដេរសម្លៀកបំពាក់មានឈ្មោះថា«យីដា»នៅព្រឹកថ្ងៃព្រហស្បតិ៍ ទី១៨ ខែមករានេះ ស្ថិតនៅភូមិឫស្សីស្រុក ឃុំឈើទាល ស្រុកកៀនស្វាយ ខេត្តកណ្ដាល។
មន្រ្តីរដ្ឋាភិបាលបានលើកឡើងថា រោងចក្រកាត់ដេរសម្លៀកបំពាក់ បោកគក់ ប៉ាក់ និងបោះពុម្ភ រងការលេបត្របាក់ដោយអគ្គិភ័យនេះមានស្តង់ដារសុវត្ថិភាពខ្ពស់ ប៉ុន្តែសហជីពការពារសិទ្ធិកម្មករបានអះអាងថា អាជ្ញាធរមិនបានចុះត្រួតពិនិត្យដិតដល់លើសុវត្ថិភាព និងសុខភាពរបស់កម្មករបម្រើការងារនៅរោងចក្រនេះនោះទេ។
ប្រធានមន្ទីរការងារខេត្តកណ្ដាល លោក ធុល នាង មានប្រសាសន៍ថា ជាបឋមក្នុងករណីអគ្គិភ័យនេះ មានកម្មការិនីម្នាក់បាត់បង់ជីវិតនិងកម្មករចំនួន១១នាក់បានរងរបួសស្រាលដោយមានអាការៈថប់ដង្ហើមហើយត្រូវបានបញ្ជូនទៅកាន់មណ្ឌលសុខភាពកៀនស្វាយ និងមណ្ឌលសុខភាពឈើទាលដែលនៅក្បែរនោះ។
លោកថ្លែងថា៖ «ជនរងគ្រោះមានម្នាក់ដែលស្លាប់ មានអ្នកថប់ដង្ហើម អត់មានអ្នករបួសបាក់ដៃបាក់ជើងជាន់គ្នាអីអត់មានទេ»។
លោកបន្តថា តាមការសន្និដ្ឋាន អគ្គិភ័យនេះបានកើតឡើងដោយសារទុស្សេខ្សែភ្លើង ក្នុងឃ្លាំងផ្ទុកសារធាតុគីមីរបស់រោងចក្រ ហើយឆេះទាំងសារធាតុគីមីដែលមាននៅក្នុងនោះ ទើបបណ្ដាលឱ្យកម្មការនីម្នាក់របួសធ្ងន់ រួចបានស្លាប់អំឡុងពេលព្យាបាលនៅមន្ទីរពេទ្យ។ បើតាមកម្មករ បានឱ្យដឹងថា ឃ្លាំងផ្ទុកសារធាតុគីមីដែលរងការឆាបឆេះនោះ គឺស្តុកថ្នាំគីមីសម្រាប់បោកគក់ខោខៅប៊យដើម្បីឱ្យចេញពណ៌។
បើតាមប្រធានមន្ទីររូបនេះ ឱ្យដឹងថា រោងចក្រនេះ មានកម្មករសរុប ៤ ៥២២នាក់ ហើយអគ្គិភ័យបានឆាបឆេះនៅវេលាម៉ោង៦:៤០នាទីព្រឹក និងរលត់ទៅវិញនៅម៉ោង ៩:២០នាទី ក្នុងថ្ងៃដដែល ដោយប្រើរថយន្តពន្លត់អគ្គិភ័យអស់ចំនួន១៩ឡានទឹក។
លោកបានបញ្ជាក់ថា រោងចក្រយីដានេះជាប្រភេទរោងចក្រកាត់ដេរសម្លៀកបំពាក់ ព្រមទាំងបោកគក់ខោខៅប៊យដោយខ្លួនឯង ហើយនាំចេញទៅកាន់ទីផ្សារអ៊ឺរ៉ុបនិងអាមេរិក។
លោកបន្តទៀតថា បច្ចុប្បន្ននេះ មន្ទីរការងារខេត្ត និងបសស កំពុងស្រាវជ្រាវរកអ្នករស់នៅក្នុងបន្ទុករបស់ជនរងគ្រោះដែលបានបាត់បង់ជីវិតដើម្បីផ្ដល់ជូនការធានារ៉ាប់រងផ្សេងៗ ខណៈ បសស បានប្រគល់ប្រាក់ចំនួន១០លានរៀលទៅកាន់គ្រួសារសពសម្រាប់ធ្វើពិធីបូជា។
បន្ថែមពីលើនេះ លោកអះអាងថា នៅព្រឹកស្អែក ក្រុមការងារ បសស និងមន្ទីរការងារខេត្តនឹងចុះជួបកម្មករបម្រើការងារនៅរោងចក្រខាងលើដើម្បីណែនាំអំពីអត្ថប្រយោជន៍ផ្សេងៗដែលកម្មករត្រូវទទួលបានអំឡុងពេលមានការឈប់សម្រាក បន្ទាប់ពីរោងចក្ររងនូវការឆាបឆេះ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ ឬC-CAWDU) លោក គង់ អាទិត្យ មានប្រសាសន៍ថា រោងចក្រកាត់ដេរសម្លៀកបំពាក់ម៉ាក Levi និង Old Navy ដែលជួបប្រទះអគ្គិភ័យខាងលើនេះ មិនមានមន្រ្តីពាក់ព័ន្ធ និងអ្នកជំនាញចុះអធិការកិច្ចជាប់លាប់ដើម្បីពិនិត្យមើលសុវត្ថិភាព និងសុខភាពរបស់កម្មករនិយោជិតនោះទេ។ លោក បានចាត់ទុក ភ្លើងឆាបឆេះដែលបានកើតឡើងនៅរោងចក្រយីដានេះ ដោយសារខ្វះការយកចិត្តទុកដាក់ពីអាជ្ញាធរចំពោះសុវត្ថិភាពកម្មករ។
លោកថ្លែងថា៖«រឿងខ្លះវាគ្រប់គ្រងបាន ប៉ុន្តែយើងប្រហែស ទាំងក្រសួងពាក់ព័ន្ធក៏មិនមានការធ្វើអធិការកិច្ចតឹងរឹងរឿងហ្នឹង។ យើងអត់មានគណៈកម្មការដែលមានជំនាញច្បាស់លាស់ដែលជាគណៈកម្មការដែលមានសហជីពចូលរួមហើយ និងនិយោជកដែលជាប្រចាំយើងឆែក(ត្រួតពិនិត្យ)រឿងហ្នឹងប្រចាំខែ ប្រចាំថ្ងៃ។ […] តែយើងរៀបចំ(ការចុះអធិការកិច្ច)អត់មានការឆន្ទៈខ្ពស់ទេ អានឹងហើយប្រហែស។ […] វា(រោងចក្រ យីដា ) ខ្វះអាហ្នឹង(ចុះអធិការកិច្ចដិតដល់)ហ្មង អត់មាននិយាយ(រោងចក្រ)ទូទៅទេ»។
ភ្លាមៗបន្ទាប់ពីទទួលបានដំណឹងមរណៈភាពរបស់កម្មការនីនៅរោងចក្រយីដា សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា បានចេញសេចក្ដីថ្លែងការណ៍ដោយសម្ដែងការសោកស្ដាយចំពោះអគ្គិភ័យដែលបានកើតឡើងនេះ ព្រមទាំងចូលរួមរំលែកទុក្ខដល់គ្រួសាររបស់ជនរងគ្រោះផងដែរ។ ទន្ទឹមនេះ សមាគមក៏បានក្រើនរំលឹកដល់បណ្ដារោងចក្រផ្សេងទៀត ឱ្យរឹតបន្តឹងផ្នែកសុវត្ថិភាពបន្ថែមទៀត ដើម្បីបញ្ចៀសឧបទ្ទវហេតុណាមួយដែលកើតឡើងនាពេលខាងមុខ។
កម្មករបម្រើការងារនៅរោងចក្រយីដាមួយរូប លោក សូត ធី វ័យ៤៣ឆ្នាំ និយាយថា មានកម្មករម្នាក់ទៀតបានរងរបួសសមល្មមដោយសារព្យាយាមជួយសង្រ្គោះប្រធានរបស់ខ្លួនដែលបានបាត់បង់ជីវិតនោះ។
លោកបន្ថែមថា កម្មការិនីដែលស្លាប់មានអាយុ២៥ឆ្នាំ ហើយលោកបន្តថា កម្មករចំនួន១១នាក់ដែលមានអាការៈថប់ដង្ហើមនោះ ដោយសារតែបានចូលទៅពន្លត់អគ្គិភ័យ។
លោកអះអាងថា ឃ្លាំងផ្ទុកសារធាតុគីមីនេះ មានកម្មករបម្រើការងារជាង៥០០នាក់ ខណៈរោងចក្របានរងការខូចខាតដោយសារអគ្គិភ័យតែឃ្លាំងផ្ទុកគីមីមួយនេះប៉ុណ្ណោះ។
លោកឱ្យដឹងថា៖ «ផ្ទុះចេញពីឃ្លាំងគីមីហ្មង អត់ដឹងមូលហេតុអ្វីទេ។
យោងតាមរបាយការណ៍របស់នាយកដ្ឋានបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ បានបង្ហាញថា កាលពីឆ្នាំ២០២៣ មានគ្រោះអគ្គិភ័យកើតឡើងសរុបចំនួន៧៦១លើក។ ក្នុងនោះបណ្តាលឱ្យជនរងគ្រោះចំនួន៥៤នាក់បានស្លាប់បាត់បង់ជីវិត និង៩៧នាក់ផ្សេងទៀតរងរបួស ហើយផ្ទះ៥៧៩ខ្នង និងតូបចំនួន៥៧ ត្រូវបានបំផ្លាញដោយសារអគ្គិភ័យ។
សមត្ថកិច្ច អះអាងថា កម្ពុជាអាចប្រឈមនឹងអគ្គិភ័យកាន់តែច្រើន ដោយសារអាគារខ្ពស់ៗកើនឡើង ប៉ុន្តែអ្នកជំនាញ និងសម្ភារៈជួយសង្រ្គោះនៅមានការខ្វះខាតនៅឡើយ៕