មនុស្សជាង៥០នាក់បានស្លាប់ និងជិត១០០នាក់ផ្សេងទៀតរងរបួសដោយសារគ្រោះអគ្គីភ័យនៅកម្ពុជាក្នុងឆ្នាំ២០២៣ ដែលតួលេខនេះមានការកើនឡើងខ្លាំងបើធៀបនឹងឆ្នាំ២០២២ ខណៈសមត្ថកិច្ចជំនាញអះអាងថា កម្ពុជាអាចប្រឈមអគ្គីភ័យកាន់តែច្រើន ដោយសារអាគារខ្ពស់ៗកើនឡើង ប៉ុន្តែអ្នកជំនាញ និងសម្ភារៈជួយសង្រ្គោះនៅមានកង្វះខាត។
របាយការណ៍ប្រៀបធៀបរបស់នាយកដ្ឋានបង្ការ ពន្លត់អគ្គីភ័យ និងសង្គ្រោះនៃអគ្គស្នងការដ្ឋាននគរបាលជាតិ បានបង្ហាញថា ក្នុងឆ្នាំ២០២៣មានគ្រោះអគ្គីភ័យកើតឡើងសរុបចំនួន៧៦១លើក កើនឡើងលើសឆ្នាំ២០២២ចំនួន១៤៣លើក។ ក្នុងនោះបណ្តាលឱ្យជនរងគ្រោះចំនួន៥៤នាក់បានស្លាប់បាត់បង់ជីវិត និង៩៧នាក់ផ្សេងទៀតរងរបួស ហើយផ្ទះ៥៧៩ខ្នង និងតូបចំនួន៥៧ ត្រូវបានបំផ្លាញដោយសារអគ្គីភ័យ។
ប្រធាននាយកដ្ឋានបង្ការ ពន្លត់អគ្គីភ័យ និងសង្គ្រោះនៃអគ្គស្នងការដ្ឋាននគរបាលជាតិ លោក នេត្រ វន្ថា បានឱ្យដឹងថា ចំនួនអ្នកស្លាប់ និងរងរបួសដោយសារគ្រោះអគ្គីភ័យក្នុងឆ្នាំ២០២៣នេះកើនឡើងជាង២៣ភាគរយ បើធៀបនឹងតួលេខនៅឆ្នាំ២០២២។ ដោយនៅឆ្នាំ២០២២ គ្រោះអគ្គីភ័យបានបណ្តាលឱ្យមនុស្ស១៧នាក់ស្លាប់ និង២៤នាក់ផ្សេងទៀតរងរបួស ក្នុងចំណោមអគ្គីភ័យសរុប៦១៨លើក។
បើតាម លោក វន្ថា បានបញ្ជាក់ថា ជនរងគ្រោះដែលស្លាប់ និងរងរបួសភាគច្រើនកើតលើអ្នកគេងលក់ អ្នកប្រើប្រាស់គ្រឿងស្រវឹង និងអ្នកនៅក្នុងទីតាំងផ្តល់សេវាកម្សាន្ត ដែលភាគច្រើនបណ្តាលមកពីទុស្សេចរន្តអគ្គិសនី។ លោកបន្តថាការហក់ឡើងនៃចំនួនគ្រោះអគ្គីភ័យនៅក្នុងឆ្នាំ២០២៣ ដោយសារតែ ប្រជាពលរដ្ឋចេញទៅបំពេញការងារក្រៅផ្ទះច្រើនជាងឆ្នាំ២០២២ ដែលជាស្ថានភាពរីករាលដាលនៃជំងឺកូវីដ-១៩។ ការណ៍នេះលោកថាធ្វើឱ្យប្រជាពលរដ្ឋមានការធ្វេសប្រហែស មិនអាចមើលការខុសត្រូវផ្ទះរបស់ខ្លួនបាន។
លោកអះអាងថា កម្ពុជាអាចប្រឈមនឹងការកើនឡើងករណីគ្រោះអគ្គីភ័យនេះ ដោយសារតែតម្រូវការអន្តរាគមន៍កើនឡើង តែខ្វះខាតអ្នកជំនាញ ហើយពលរដ្ឋក៏នៅពុំទាន់យល់ដឹងពីការទប់ស្កាត់បញ្ហាអគ្គីភ័យនេះនៅឡើយ។
លោកថ្លែងថា៖ «ពីបច្ចុប្បន្នទៅអនាគតគឺថាមើលឃើញកំណើនសំណង់ ក៏ដូចជាអាគារ ហើយនិងការវិនិយោគមានការងើបឡើងវិញ អ៊ឹចឹងយើងអាចនឹងប្រឈមពាក់ព័ន្ធនឹងការងារនេះ។ អ៊ឹចឹងវាតុល្យភាពកម្លាំងមិនសូវមាន ហើយ(មន្ត្រីជំនាញ)ចាស់ៗអស់ផង វាក៏ជួបបញ្ហាដែរ។ ទី១ កម្លាំងវាមានបញ្ហាប្រឈម ដោយសារកម្លាំងចាស់ ហើយទី២ គឺការចូលរួមពីប្រជាពលរដ្ឋអត់ទាន់មានកម្រិត។ អ៊ឹចឹងការយល់ដឹងរបស់គាត់នៅមានកម្រិតទាប»។
មិនតែប៉ុណ្ណោះលោកបញ្ជាក់ថា កម្ពុជាក៏នៅខ្វះខាតសម្ភារៈជួយសង្គ្រោះប្រជាពលរដ្ឋដែលរងគ្រោះដោយសារអគ្គីភ័យឱ្យទាន់ពេលវេលានៅឡើយ ប៉ុន្តែលោកថាកំពុងស្វែងរកដៃគូដើម្បីផ្គត់ផ្គង់សម្ភារៈបច្ចេកទេស និងបណ្តុះបណ្តាលមន្ត្រីជំនាញ។
លោកមានប្រសាសន៍ថា៖«ទៅមុខគ្រាន់តែយើងប្រឈមដូចជាសម្ភារៈសង្គ្រោះ យើងអត់ទាន់មានលទ្ធភាព មានសង្គ្រោះដូចជាមនុស្សជាប់ក្នុងអគារទម្លុះទម្លាយ ឬកាំម៉េរាត្រួតពិនិត្យដង្ហើមមនុស្សអីជាដើម។ យើងត្រូវការអាហ្នឹងដើម្បីចូលរួមជួយសង្គ្រោះប្រជាពលរដ្ឋឱ្យទាន់ពេលវេលា»។
លោកឱ្យដឹងថា មានតែរាជធានីភ្នំពេញទេ ដែលមានរថយន្តជណ្តើរពន្លត់អគ្គីភ័យកម្ពស់៥៤ម៉ែត្រ ប៉ុន្តែនៅតាមបណ្តាខេត្តមួយចំនួនដូចជា ស្វាយរៀង ខេត្តបន្ទាយមានជ័យ ខេត្តសៀមរាប និងខេត្តព្រះសីហនុ មានតែរថយន្តជណ្តើរកម្ពស់២៥ ទៅ៣០ម៉ែត្រប៉ុណ្ណោះ ដូច្នេះតម្រូវឱ្យចល័តរថយន្តពីក្រសួងមហាផ្ទៃទៅជួយ នៅពេលមានករណីគ្រោះអគ្គីភ័យនៅតាមបណ្តាអគារខ្ពស់ៗ។
នាយករងការិយាល័យពន្លត់អគ្គីភ័យរាជធានីភ្នំពេញ លោក អ៊ុំ ប៊ុនធឿន បានឱ្យដឹងថា នៅរដូវប្រាំងនេះករណីអគ្គីភ័យក្នុងរាជធានីភ្នំពេញបានកើតឡើងយ៉ាងហោចណាស់៣ ទៅ៤ករណីក្នុងមួយថ្ងៃ ដោយភាគច្រើននៅតាមកន្លែងផ្តល់សេវាកម្សាន្ត និងឃ្លាំងស្តុកអីវ៉ាន់ ដែលតម្រូវឱ្យសមត្ថកិច្ចជំនាញត្រៀមខ្លួនជានិច្ចក្នុងការចេញអន្តរាគមន៍។
យ៉ាងណាលោកឱ្យដឹងថា សមត្ថកិច្ចជំនាញក្នុងកិច្ចការអន្តរាគមន៍លើករណីគ្រោះអគ្គីភ័យនៅរាជធានីភ្នំពេញបានថយចុះដោយសារកត្តាសុខភាព និងចូលនិវត្តន៍។ លោកបន្តថា ពីមុនរថយន្តពន្លត់អគ្គីភ័យមួយគ្រឿងធ្លាប់មានមន្ត្រីជំនាញ៦នាក់ ហើយតិចបំផុតត្រឹម៤នាក់ ប៉ុន្តែបច្ចុប្បន្នមានមន្ត្រីចន្លោះពី១នាក់ទៅ៣នាក់ប៉ុណ្ណោះសម្រាប់រថយន្តមួយគ្រឿង។ បន្ថែមលើនេះលោកថា សម្ភារៈបច្ចេកទេសក៏មិនទាន់ឆ្លើយតបតម្រូវការដែរ ដោយថាទុយោពន្លត់អគ្គីភ័យខ្លះមានសភាពចាស់ខូចគុណភាព ខណៈឧបករណ៍ជំនួយខ្យល់អុកស៊ីសែនសម្រាប់មន្ត្រីជំនាញចូលទៅក្នុងទីតាំងអគ្គីភ័យមានរយៈពេលតែ១៥នាទីប៉ុណ្ណោះ ដែលលោកថាតម្រូវការចាំបាច់យ៉ាងហោចណាស់៣០នាទី។
លោកថ្លែងថា៖ «កាលណាសម្ភារៈគ្រប់គ្រាន់យើងងាកទៅឃើញយើងប្រើបាន វាជំនួយដល់ការសង្គ្រោះយើង វាលឿន វាទាន់ពេលវេលា។ ហើយបើងាកទៅនេះអត់ ខើចនេះខើចនោះ ច្នៃប្រឌិតចេះតែនេះទៅ វាប៉ះពាល់ដល់ការងារហ្នឹង»។
លោកបន្តថា៖ «យើងទៅដល់កន្លែងចំណុចកើតហេតុ ទៅដល់កន្លែងភ្លើងបាន ទៅដល់ខាងក្នុងបានទាល់តែកម្លាំងយើងមានសមត្ថភាព បានន័យថាយើងមានឧបករណ៍ដូចជា SCBA(ឧបករណ៍ជំនួយដង្ហើម)ដកដង្ហើមដែលយើងអាចចូលដល់ខាងក្នុងបានដោយយើងការពារផ្សែង ការពារផ្លូវដង្ហើមបាន យើងចូលធ្វើការខាងក្នុងបាន អាហ្នឹងវាឆាប់បានជោគជ័យ វាមានប្រសិទ្ធភាព។ ហើយបើថាយើងចូលអត់ទៅដល់ទេ យើងបាញ់ទឹកចោលនៅខាងក្រៅហ្នឹង វាជះៗវាអត់ទៅដល់»។
ជាក់ស្តែងលោកថា ករណីគ្រោះអគ្គីភ័យនៅក្នុងអគារ Sky City ដែលនៅចំកណ្តាលរាជធានីភ្នំពេញកាលពីថ្ងៃទី២០ ខែធ្នូ ឆ្នាំ២០២៣ បានចំណាយពេលពន្លត់អស់៤យប់៥ថ្ងៃ ដោយសារតែអគារនោះមានទំហំធំ ហើយសមត្ថកិច្ចជំនាញមិនអាចចូលទៅដល់បាន ព្រោះខ្វះខាតឧបករណ៍ជំនួយដង្ហើម។
ទោះជាបែបនេះក្តី ប៉ុន្តែលោកសង្កត់ធ្ងន់ថា មន្ត្រីជំនាញបានខិតខំទាំងយប់ទាំងថ្ងៃដោយដាក់វេនគ្នា ដើម្បីបំពេញភារកិច្ចនេះនៅតាមគោលដៅរៀងៗខ្លួន ហើយបើករណីអគ្គីភ័យកើតឡើងធំ នោះនឹងមានការរកជំនួយពីគោលដៅផ្សេងបន្ថែម។
លោកបញ្ជាក់ថា៖ «កម្លាំងយើងអត់មានឱ្យមានបញ្ហាអគ្គីភ័យកើតឡើងហើយ យើងអត់មានឱ្យការងារមិនដំណើរការ ឱ្យមានការរាំងស្ទះគឺអត់ទេ យើងប្រឹងប្រែងអស់សមត្ថភាពរបស់យើងគឺយើងទទួលភារកិច្ចហ្នឹង ឱ្យតែមានព័ត៌មានច្បាស់លាស់ថាមានអគ្គីភ័យកើតឡើងនៅគោលដៅណា គឺគោលដៅហ្នឹងគាត់ចេញទៅមុនហើយ»។
កាលពីម៉ោង៥ទាបភ្លឺថ្ងៃទី២៧ ខែធ្នូ ឆ្នាំ២០២៣កន្លងទៅ ស្ត្រីមានផ្ទៃពោះ២ខែម្នាក់ និងកូនប្រុសអាយុ៤ឆ្នាំម្នាក់ទៀត បានស្លាប់ដោយសារការឆាបឆេះតូបលក់ដូរចំនួន៤តូប និងផ្ទះ១ខ្នង ស្ថិតក្នុងសង្កាត់ស្វាយដង្គំ ក្រុងសៀមរាប ស្របពេលដែលបុរសជាប្តីបានចាក់សោរតូបពីខាងក្រៅ ដើម្បីចេញទៅទិញបន្លែយកមកលក់បន្ត។
ស្នងការរងនគរបាលខេត្តសៀមរាបទទួលបន្ទុកការងារគ្រប់គ្រងអាវុធគ្រឿងផ្ទុះ និងអគ្គីភ័យ លោក ឌុត ខុន បានបញ្ជាក់ថា ករណីខាងលើមិនមែនជាករណីឃាតកម្មដែលបង្កឡើងដោយបុរសជាប្តីនោះឡើយ ប៉ុន្តែវាបណ្តាលមកពីការទុស្សេខ្សែភ្លើង ។
លោកបញ្ជាក់ថា៖ «ទម្លាប់ប្តីគាត់ តែម៉ោង៤កន្លះ ឬម៉ោង៥(ព្រឹក) គាត់ចាក់សោរខាងក្រៅ គាត់ទៅយកឥវ៉ាន់។ ដល់អ៊ីចឹងទុកប្រពន្ធគាត់(និងកូនប្រុសអាយុ៤ឆ្នាំ)នៅក្នុងតូបតែ២នាក់ហ្នឹងទៅ ដល់ពេលទុស្សេចេញពីតូបគេជិតខាងមក រាលដាលដល់គាត់»។
យ៉ាងណាលោកអះអាងថា សមត្ថកិច្ចបានខិតខំអន្តរាគមន៍លើករណីនេះទាន់ពេលវេលាដែរ ដោយថាបានពន្លត់ភ្លើងនោះឱ្យបាត់ទៅវិញ ប៉ុន្តែមិននឹកស្មានថាមានមនុស្សនៅក្នុងតូបនោះ ដោយមើលឃើញថាមានចាក់សោរពីខាងក្រៅទៅហើយ។
លោកថ្លែងថា៖ «តូបអ្នកលក់ឥវ៉ាន់ហ្នឹងវាឆេះលឿនពេក ដោយសារមានឥវ៉ាន់សុទ្ធតែគ្រឿងឆេះ វាលឿនពេក។ អ៊ីចឹងយើងទៅដល់យើងបានពន្លត់ហើយ យើងអត់បានចាប់អារម្មណ៍ថាមានមនុស្សនៅក្នុងហ្នឹងផង ឃើញតែតូបមួយៗតាមផ្សារហ្នឹងយើងចាប់អារម្មណ៍ថា តែឃើញចាក់សោរក្រៅហើយ បានន័យថាអត់មានអ្នកនៅទេ មានតែឥវ៉ាន់ទេ»។
ដោយឡែក កាលពីយប់ថ្ងៃទី២៨ ខែធ្នូ ឆ្នាំ២០២២កន្លងទៅ អគ្គីភ័យបានឆេះសណ្ឋាគារ និងកាស៊ីណូ Grand Diamond City ដែលមានកម្ពស់១៧ជាន់ ស្ថិតក្នុងក្រុងប៉ោយប៉ែត ខេត្តបន្ទាយមានជ័យ បណ្តាលឱ្យមនុស្សយ៉ាងហោចណាស់២៧នាក់បានស្លាប់ក្នុងហេតុការណ៍នោះ។
នាយកអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា ករណីគ្រោះអគ្គីភ័យភាគច្រើនកើតឡើងដោយសារការទុស្សេខ្សែភ្លើងដែលធ្វើឱ្យមនុស្សងាយរងគ្រោះ ហើយពិបាកនឹងស្វែងរកអ្នកទទួលខុសត្រូវ។ ជាមួយគ្នានេះ លោកកត់សម្គាល់ថា បច្ចេកទេសបង្ការ និងពន្លត់អគ្គីភ័យនៅកម្ពុជានៅពុំទាន់បានឆ្លើយតបនឹងតម្រូវការនៅឡើយ ដោយសារផ្លូវមួយចំនួនតូចចង្អៀតមិនអាចចូលអន្តរាគមន៍បានទាន់ពេល និងអាគារខ្លះមានកម្ពស់ខ្ពស់ មិនអាចបាញ់ទឹកដល់។
លោកថ្លែងថា៖ «វិធានការក្នុងការបង្ការ ឬក៏ការអន្តរាគមន៍ភ្លាមៗនេះ នៅកម្ពុជាហាក់បីដូចជាខ្វះនូវមធ្យោបាយទាំងសហគមន៍ និងអាជ្ញាធរពន្លត់អគ្គីភ័យដែរ[..]ព្រោះអីយើងឃើញហើយកន្លែងខ្វះពេលដែលឆេះម្តងៗ ពិបាកនឹងចូលអន្តរាគមន៍ ដោយសារផ្លូវចង្អៀត ដោយសារការសាងសង់ខ្លះបំពានទៅលើផ្លូវដែលគេទុកប្រើសម្រាប់រត់ទុយោរបាញ់ទឹកជាដើម»។
បន្ថែមលើនេះ លោកជំរុញឱ្យស្ថាប័នពាក់ព័ន្ធបង្កើនសមត្ថភាពក្នុងកិច្ចអន្តរាគមន៍ដូចជាបន្ថែមនៅបច្ចេកទេសជួយពន្លត់ថ្មីឱ្យឆ្លើយតបនឹងតម្រូវការបច្ចុប្បន្ន និងធានាការសង្រ្គោះជនរងគ្រោះបានទាន់ពេលវេលា។ មួយវិញទៀត លោកក៏ស្នើឱ្យអាជ្ញាធរមូលដ្ឋានពិនិត្យលើការសាង់សំណង់អាគារ ដែលបំពានផ្លូវរថយន្តបាញ់ទឹក ដែលអាចបង្កហានិភ័យពេលមានគ្រោះអគ្គីភ័យ។
បើតាមរបាយការណ៍របស់នាយកដ្ឋានបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិបានបង្ហាញថា រាជធានីភ្នំពេញគឺជាក្រុងមួយដែលមានគ្រោះអគ្គីភ័យច្រើនជាងគេក្នុងឆ្នាំ២០២៣ ខណៈដែលខេត្តកណ្តាល ខេត្តកំពត ខេត្តសៀមរាប និងខេត្តប៉ៃលិន នៅចំណាត់ថ្នាក់បន្ទាប់។ ក្នុងនោះអគ្គិភ័យបណ្ដាលមកពីទុស្សេចរន្តអគ្គិសនីជាង៤០ភាគរយ ការចម្អិនដោយប្រើឈើ ធ្យូង និងហ្គាស មានជាង៤០ភាគរយ និងជាង១៨ ភាគរយទៀតមិនអាចក្តាប់ទិន្នន័យបាន៕