សហព័ន្ធសហជីពកម្ពុជា ហៅកាត់ CATU បានទាមទារឱ្យសាលាដំបូងខេត្តកំពង់ស្ពឺទម្លាក់បទចោទប្រកាន់ប្រឆាំងនឹងលោក ជា ចាន់ ប្រធានសហជីពនៅរោងចក្រ វីងស្តារស៊ូ (Wing Star Shoes) និងដោះលែងរូបលោកឱ្យមានសេរីភាពវិញ ។ CATU បានអះអាងថា ការចាប់ខ្លួនលោក ជា ចាន់ ជាប់ពាក់ព័ន្ធនឹងការរំលោភបំពានអំណាចរបស់ប្រព័ន្ធតុលាការ ដើម្បីរឹតត្បិតទៅលើសេរីភាពក្នុងការបង្កើតសហជីពរបស់លោក ។
សំណុំរឿងរបស់លោក ចាន់ គ្រោងនឹងត្រូវបើកសវនាការនៅថ្ងៃទី២៩ ខែមេសា ប៉ុន្តែ ត្រូវបានលើកពេលទៅក្នុងខែឧសភា និងមិនទាន់មានការកំណត់កាលបរិច្ឆេទនៅឡើយ ។ ការពន្យាពេលដោយសារ សាក្សីខាងអយ្យការមិនបង្ហាញខ្លួននៅចំពោះមុខតុលាការទេ ។
ប៉ុន្តែ អ្នកនាំពាក្យសាលាដំបូងខេត្តកំពង់ស្ពឺ លោក ផេង ស៊ីភ័ណ បានប្រាប់ ខេមបូចា ថា មេធាវីរបស់លោក ចាន់ បានស្នើសុំឱ្យលើកពេលសវនាការ ប៉ុន្តែទោះយ៉ាងណា ចៅក្រមពុំទាន់បានកំណត់កាលបរិច្ឆេទថ្មីនៅឡើយទេ សម្រាប់ខែឧសភានេះ ។
លោក ចាន់ បានត្រូវចោទប្រកាន់ពីបទសមគំនិតក្នុងអំពើលួច បន្ទាប់ពីលោកត្រូវបានកម្មករនិយោជិតបោះឆ្នោតជាឯកច្ឆន្ទជ្រើសរើសជាប្រធានសហជីពប្រចាំរោងចក្រ វីងស្តារស៊ូ ប៉ុន្តែ បន្ទាប់ពីបំពេញការងារបានប៉ុន្មានសប្ដាហ៍ក្រោយមក លោកត្រូវបាននគរបាលខេត្តកំពង់ស្ពឺចាប់ឃុំខ្លួន ។ មានការអះអាងថា អាជ្ញាធរពុំបានបង្ហាញដីកា ឬភ័ស្តុតាងណាមួយដើម្បីគាំទ្រការចាប់ខ្លួននេះឡើយ ។
នៅថ្ងៃចន្ទដើមសប្ដាហ៍នេះ សមាជិកសហជីពប្រមាណ ៤០នាក់ ប្រដាប់ដោយបដា បានប្រមូលផ្ដុំគ្នានៅមុខសាលាដំបូងខេត្តកំពង់ស្ពឺ ដើម្បីចូលរួមសវនការ ។ បដាមួយបានសរសេរថា «ជា ចាន់ គ្មានកំហុសដូចការចោទប្រកាន់របស់ក្រុមហ៊ុនទេ ។ ចូរបញ្ឈប់ការចាប់ខ្លួននិងឃុំខ្លួនតាមអំពើចិត្ត»។
ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ បានចោទប្រកាន់ថា សំណុំរឿងព្រហ្មទណ្ឌប្រឆាំងនឹងលោក ចាន់ អាចជា«ការរៀបចំទុកជាមុន រវាងនិយោជកនិងអាជ្ញាធរ» ដើម្បីដកសហជីពមូលដ្ឋានរបស់ CATU ពីរោងចក្រ ។
អ្នកស្រីបាននិយាយថា នៅមុនពេលក្រុមហ៊ុនដាក់ពាក្យបណ្ដឹង អ្នកស្រីនិងលោក ចាន់ បានទទួលការគំរាមកំហែងតាមទូរសព្ទពីបុគ្គលដែលមិនស្គាល់អត្តសញ្ញាណ ដែលព្រមានពួកគេ«មិនឱ្យបង្កើតសហជីពនៅក្នុងរោងចក្រ ។» អ្នកស្រី សុភ័ណ្ឌ ចាត់ទុកការគំរាមកំហែងទាំងនេះថាជាការបំភិតបំភ័យនិងការរើសអើងប្រឆាំងសហជីព CATU និងជាទម្រង់មួយនៃការបៀតបៀន ដែលជាការរំលោភធ្ងន់ធ្ងរទៅលើសិទ្ធិការងាររបស់ពួកគេនៅក្រោមច្បាប់ជាតិនិងអន្តរជាតិ ។
អ្នកស្រីបានមានប្រសាសន៍ថា៖ «កម្មករនិយោជិតមានសិទ្ធិបង្កើតសហជីព ប៉ុន្តែ នៅពេលកម្មករនិយោជិតអនុវត្តសិទ្ធិរបស់ខ្លួនដើម្បីបង្កើតសហជីព គឺតែងតែមានចលនានៃការរើសអើង»។ អ្នកស្រីបានបន្ថែមថា៖ «សេរីភាពជាមូលដ្ឋានរបស់កម្មករនិយោជិតត្រូវបានរឹតត្បិតយ៉ាងធ្ងន់ធ្ងរ ។ច្បាប់របស់យើងល្អ ប៉ុន្តែ ការអនុវត្តបែរជាផ្ទុយពីច្បាប់របស់យើងទៅវិញ»។
អ្នកស្រី សុភ័ណ្ឌ ក៏បានសម្ដែងការសោកស្ដាយចំពោះការលើកពេលសវនាការលើសំណុំរឿងនេះ ។ «ខ្ញុំគិតថា តុលាការមានសិទ្ធិបន្តបើកសវនាការដោយសារតែការលើកពេលនឹងនាំឱ្យជនរងគ្រោះកាន់តែរងគ្រោះថែមទៀត» ។
គិតមកដល់ឥឡូវនេះ គឺ ៥៥ថ្ងៃហើយ ដែលលោក ជា ចាន់ ត្រូវបានចាប់ខ្លួននិងឃុំខ្លួន ។ ភរិយារបស់លោក ឈ្មោះ ឆែ ចាន់រ៉ា អាយុ ៣៥ឆ្នាំ បានទទូចសុំឱ្យតុលាការផ្ដល់យុត្តិធម៌ ដោយទម្លាក់ការចោទប្រកាន់ប្រឆាំងនឹងស្វាមីរបស់អ្នកស្រី៖ «ប្ដីខ្ញុំមិនបានប្រព្រឹត្តបទឧក្រិដ្ឋអ្វីទេ»។
អ្នកស្រី ចាន់រ៉ា ក៏ព្រួយបារម្ភអំពីសុខភាពរបស់ប្ដីអ្នកស្រីផងដែរ ដោយសារលោកមានជំងឺប្រចាំកាយ និងមានអាការៈកាន់តែស្គមស្គាំង ។ អ្នកស្រី ចាន់រ៉ា បាននិយាយយ៉ាងដូច្នេះថា៖ «ខ្ញុំបានស្នើសុំឱ្យតុលាការដោះលែងរូបគាត់ដើម្បីគាត់អាចមករួមរស់ជួបជុំជាមួយយើងវិញ ។ ប្ដីរបស់ខ្ញុំពុំមានកំហុសទេ [ប៉ុន្តែ] គាត់ត្រូវគេបានគេចាប់ខ្លួនទាំងបំពាន»។
អ្នកស្រីបានប្រាប់ ខេមបូចា ថា អ្នកស្រីបានលក់រថយន្តរបស់អ្នកស្រី ដោយសារតែគ្មានចំណូល បន្ទាប់ពីលោក ចាន់ ត្រូវបានចាប់ខ្លួន ។ លោកគឺជាមេគ្រួសារតែម្នាក់គត់ ។ លុយដែលបានពីការលក់រថយន្តត្រូវបានប្រើដើម្បីយកទៅសងបំណុលធនាគារ និងរ៉ាប់រងចំណាយប្រចាំថ្ងៃ ជាពិសេស ចំណាយក្នុងការធ្វើដំណើរទៅមកជាប្រចាំទៅកាន់ពន្ធនាគារ ។
អ្នកស្រីបាននិយាយថា៖ «មានការចំណាយច្រើនណាស់នៅក្នុងពន្ធនាគារ ដោយសារតែទំនិញថ្លៃជាងនៅខាងក្រៅ។ ស្វាមីរបស់ខ្ញុំចំណាយប្រហែល ១សែនរៀល (ប្រមាណ ២៥ដុល្លារ)ក្នុងមួយសប្ដាហ៍ ។ ប្រសិនបើគាត់ទិញអាហារ គាត់ត្រូវចាយ ២៥ម៉ឺនរៀល (ប្រហែល ៦២ដុល្លារ) ក្នុងមួយខែ និងខ្ញុំចាយអស់ ៧ម៉ឺនរៀលរាល់លើកដែលខ្ញុំទៅសួរសុខទុក្ខគាត់នៅពន្ធនាគារ»។
សមាជិកសហជីព CATU លោក ម៉េត សម្ផស្ស អាយុ ៤០ឆ្នាំ បាននិយាយថា លោកបានធ្វើដំណើរការមកតុលាការដើម្បីគាំទ្រលោក ចាន់ និងតាមដានសវនាការលើរូបលោក ដោយសង្កត់ធ្ងន់ថា ករណីនេះគឺជាការរំលោភលើសិទ្ធិការងារ និងថារោងចក្រមានការរើសអើងចំពោះសហជីពឯករាជ្យ ។
លោក សម្ផស្ស បានស្នើសុំឱ្យក្រសួងការងារនិងបណ្ដុះបណ្ដាលវិជ្ជាជីវៈ ចាត់វិធានការប្រឆាំងនឹងរោងចក្រនានាដែលរំលោភសិទ្ធិជាមូលដ្ឋានរបស់សហជីព ។
លោកបាននិយាយយ៉ាងដូច្នេះថា៖ «យើងមានច្បាប់ដែលអនុញ្ញាត[ឱ្យបង្កើត]សហជីពស្របទៅតាមរដ្ឋធម្មនុញ្ញ ប៉ុន្តែ ក្រុមហ៊ុនមានលេស[ដើម្បីបន្ទច់បង្អាក់រឿងនេះ] ហើយក្រសួងនិងមន្ទីរការងារមិនខ្វល់អំពីរឿងនេះឡើយ»។ ដោយលោកបានបន្ថែថា៖ «ដូច្នេះ ខ្ញុំស្នើសុំឱ្យក្រសួងការងារសូមផ្ដល់ការយកចិត្តទុកដាក់លើរឿងនេះផង ។ ប្រសិនបើវាបន្តយ៉ាងដូច្នេះ កម្មករនិយោជិតនឹងបាត់បង់សិទ្ធិរបស់ពួកគេ»។
អ្នកនាំពាក្យក្រសួងការងារ លោក កត្តា អ៊ន បានអះអាងថា ករណីរបស់លោក ចាន់ គឺជា«ករណីព្រហ្មទណ្ឌ» និងថា វាហួសពី«ដែនសមត្ថកិច្ចរបស់នគរបាល»។
លោកបាននិយាយថា៖ «វាមិនស្ថិតក្រោមសិទ្ធិអំណាចរបស់អាជ្ញាធរទេ ប៉ុន្តែ ក្នុងករណីដែលសហជីពត្រូវការមេធាវី ក្រសួងអាចជួយបាន» ៕
ប្រែសម្រួលពីអត្ថបទភាសាអង់គ្លេស៖ “Release Wing Star Shoes Union Leader Chea Chan”, CATU Pleads With Kampong Speu Court
