អគ្គិភ័យបានឆាបឆេះអគារឈើមួយខ្នងនៅក្នុងមន្ទីរពេទ្យបង្អែកស្រុកពួក ខេត្តសៀមរាប បណ្តាលឱ្យខូចខាតសម្ភារ និងបរិក្ខារពេទ្យមួយចំនួន ដែលមន្ទីរពេទ្យនេះប៉ាន់ស្មានថា អាចខូចខាតក្នុងទំហំទឹកប្រាក់ចន្លោះពី ២ ទៅ ៣ម៉ឺនដុល្លារ។
ប្រធានមន្ទីរពេទ្យបង្អែកស្រុកពួក លោក ម៉ង់ សម្បត្តិ ឱ្យដឹងថា នៅព្រឹកថ្ងៃទី៧ ខែសីហា អគារឈើមួយដែលជាកន្លែងទុកសម្ភារពេទ្យត្រូវបានឆេះ ដោយសារតែឆ្លងចរន្តអគ្គីសនី។ លោកឱ្យដឹងថា ហេតុការណ៍នេះមិនបានបង្កគ្រោះថ្នាក់ដល់មនុស្សទេ ប៉ុន្តែវាបានខូចខាតសម្ភារសំខាន់ៗមួយចំនួន ដូចជាគ្រែពេទ្យដែលមិនទាន់ប្រើប្រាស់ ៣៨គ្រែ ត្រូវឆេះសល់តែគ្រោងដែក។
មិនតែប៉ុណ្ណោះ លោកថាសម្ភារដែលនៅអាចប្រើបានមួយចំនួនក៏ត្រូវឆេះដែរ មានដូចជា ម៉ាស៊ីនស្គេនកាំរស្មី(X-Ray)មួយគ្រឿង ឧបករណ៍វាស់សម្ពាធឈាមអ្នកជំងឺពេលសង្គ្រោះបន្ទាន់ចំនួន ៦គ្រឿង រួមនិងបរិក្ខាពេទ្យមួយចំនួនទៀត។ លោកប៉ាន់ស្មានថា ឧបទ្ទវហេតុនេះអាចខូចខាតអស់ទំហំទឹកប្រាក់យ៉ាងហោច ២ម៉ឺនដុល្លារ។
លោក ម៉ង់ សម្បត្តិ ថ្លែងថា៖ «បើគិតជាលុយគឺរាប់ម៉ឺនដុល្លារ ព្រោះសម្ភារមួយៗថ្លៃរាប់ពាន់ដុល្លារដែរ។ ប្រហែលជាអាចចូលចន្លោះពី ២ ទៅ ៣ម៉ឺនដុល្លារ»។
លោកបន្ថែមថា អគ្គិភ័យនោះក៏បានឆេះឯកសារចាស់ៗពាក់ព័ន្ធនឹងអ្នកជំងឺ ឯកសារបណ្ណ ប.ស.ស. និងឯកសារផ្សេងៗទៀត។ ក្រៅពីសម្ភារដែលឆេះខ្ទេច លោកបានឱ្យដឹងទៀតថា បរិក្ខារពេទ្យមួយចំនួនទៀតដូចជា ម៉ាស៊ីនជំនួយដង្ហើមសម្រាប់អ្នកជំងឺកូវីដ-១៩ ក៏ត្រូវរោលដោយកម្តៅ និងផ្សែងភ្លើង ដែលក្រុមការងារនឹងពិនិត្យ និងតេស្តគុណភាពឡើងវិញ ដោយមិនទាន់អាចបញ្ជាក់ថាអាចប្រើប្រាស់បានទៀតឬយ៉ាងណានោះទេ។
លោកប្រធានមន្ទីរពេទ្យបានសម្តែងការសោកស្តាយយ៉ាងខ្លាំងចំពោះការបាត់បង់នេះ ដោយលោកបញ្ជាក់ថា អគារឈើនេះ ទោះបីជាសាងសង់យូរឆ្នាំហើយមែន តែវាទើបទទួលបានការជួយជ្រោមជ្រែងពីសប្បុរសជនក្នុងការជួសជុល រៀបចំពិដាន និងប្រព័ន្ធអគ្គិសនីឡើងវិញយ៉ាងល្អស្អាតនៅខាងក្នុង។
របាយកាណ៍របស់ស្នងការដ្ឋាននគរបាលខេត្តសៀមរាបបានបញ្ជាក់ភ្លាមៗដែរថា ករណីអគ្គិភ័យនេះបណ្តាលឱ្យខូចខាតអគារឈើមួយខ្នង ដែលមានទំហំបណ្តោយ ៣០ម៉ែត្រ និងទទឹង ៦ម៉ែត្រ រួមទាំងខូចខាត ឯកសារ ថ្នាំអំពូល ថ្នាំគ្រាប់ សេរ៉ូម និងសម្ភារប្រើប្រាស់មួយចំនួនផងដែរ។
ប្រភពបន្តថា អគ្គិភ័យនេះបានកើតឡើងនៅម៉ោង៨កន្លះព្រឹក និងត្រូវបានមន្ត្រីជំនាញពន្លត់ដោយជោគជ័យ ដោយប្រើពេលជិត២ម៉ោង និងប្រើអស់រថយន្តពន្លត់អគ្គិភ័យ៤គ្រឿង។
គួរបញ្ជាក់ថា អគារមួយនេះធ្លាប់ជាទីតាំងសម្រាប់ព្យាបាលអ្នកជំងឺឆ្លងដូចជាជំងឺរបេង និងជំងឺកូវីដ-១៩ ជាដើម។ ប៉ុន្តែមុនពេលកើតហេតុ វាត្រូវបានប្រើប្រាស់ជាឃ្លាំងស្តុកសម្ភារចាស់ថ្មី រួមទាំងជាកន្លែងរក្សាទុកឯកសារផ្សេងៗផង។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍនិងសន្តិភាព លោក យង់ គិមអេង យល់ថា នេះជាមេរៀនមួយសម្រាប់មន្ទីរពេទ្យផ្សេងៗទៀតឱ្យមានការប្រុងប្រយ័ត្នខ្ពស់ ដើម្បីបង្ការបញ្ហាអគ្គិភ័យកើតឡើង។ ទន្ទឹមនេះ លោកជំរុញឱ្យខាងអគ្គិសនីបង្កើនការប្រុងប្រយ័ត្ន និងរៀបចំបន្ទប់អគ្គិសនីនៅតាមមន្ទីរពេទ្យនានាឱ្យបានត្រឹមត្រូវ ព្រោះលោកថាទីនោះជាកន្លែងប្រឈមគ្រោះថ្នាក់ខ្លាំង បើអគ្គិភ័យកើតឡើង។
លោកថ្លែងថា៖«គួរតែមានការយកចិត្តទុកដាក់ខ្ពស់ ព្រោះមន្ទីរពេទ្យសុទ្ធតែមានអ្នកជំងឺច្រើន ហើយគ្នាមិនងាយនឹងរត់ឱ្យទាន់ ឬគេចខ្លួនទេ លុះត្រាតែមានអ្នកជួយ»។
ស្នងការនគរបាលខេត្តសៀមរាប លោក ហួត សុធី ថ្លែងថា ការឆ្លងចរន្តអគ្គិសនី ជាកត្តាចម្បងជាងគេដែលបណ្តាលឱ្យមានអគ្គិសភ័យកើតឡើងក្នុងខេត្តសៀមរាប។ លោកស្នងការបានបញ្ជាក់ថា ក្រុងសៀមរាបជាកន្លែងដែលកើតមានអគ្គិសភ័យច្រើនជាងគេ បើធៀបនិងបណ្តាស្រុកផ្សេងៗនៅក្នុងភូមិសាស្ត្រខេត្ត។
ទោះជាយ៉ាងណា លោកមិនទាន់អាចប្រាប់ពីតួលេខអគ្គិភ័យសរុបដែលកើតមាននៅខេត្តសៀមរាបក្នុងរយៈពេល៦ខែនៃឆ្នាំ២០២៦នេះនៅឡើយ ដោយណែនាំឱ្យសួរទៅមន្ត្រីជំនាញរបស់លោក។ អ្នកនាំពាក្យស្នងការដ្ឋានខេត្តសៀមរាប លោក ណុប សារ៉ាក់ មិនទាន់អាចសុំការឆ្លើយតបបាន ដោយទូរសព្ទចូលពុំមានអ្នកទទួល។
ដោយឡែក ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ លោក នេត វន្ថា ក៏មិនទាន់អាចបញ្ជាក់ពីតួលេខអគ្គិភ័យទូទាំងប្រទេសបាននៅឡើយ ដោយលោកថាមានភារកិច្ចនៅខាងក្រៅ មិនបានយករបាយការណ៍ទៅតាមខ្លួន។ យ៉ាងណាលោកថានឹងផ្ញើតាមជូនតាមក្រោយ។
លោក វន្ថា ណែនាំឱ្យពលរដ្ឋប្រុងប្រយ័ត្នខ្ពស់ចំពោះឧបករណ៍ដែលងាយឆេះ ហើយត្រូវមានបំពង់ពន្លត់អគ្គិភ័យបឋមនៅក្នុងផ្ទះ ឬអគារ ខណៈម្ចាស់អគារផ្សេងៗត្រូវបំពាក់ឧបករណ៍ប្រព័ន្ធសុវត្ថិភាពបច្ចេកទេសអគ្គិភ័យស្របតាមច្បាប់។
លោកមានប្រសាសន៍ថា៖ «សូមឱ្យប្រជាពលរដ្ឋមេត្តាយកចិត្តទុកដាក់ប្រុងប្រយ័ត្នអំពីចំណុចដែលងាយនឹងកើតភ្លើង ងាយឆេះ ដូចជា ប្រេងឥន្ធនៈ សាំង ហ្គាស សូមរក្សាទុកឱ្យមានសណ្តាប់ធ្នាប់ ហើយឆ្ងាយពីភ្លើង និងប្រភពកម្តៅ»។
របាយការណ៍អាជ្ញាធរពន្លត់អគ្គិភ័យបានបញ្ជាក់ថា គិតត្រឹមត្រីមាសទី១នៃឆ្នាំ២០២៦ អគ្គិភ័យនៅកម្ពុជាកើតឡើងសរុបចំនួន ២៤៧លើក ថយចុះ១៩លើក បើធៀបនឹងរយៈពេលដូចគ្នានៃឆ្នាំ២០២៥។ អគ្គិភ័យក្នុងត្រីមាសទី១ឆ្នាំ២០២៦ បង្កឱ្យមនុស្សស្លាប់ចំនួន ២នាក់ និងរបួស២៩នាក់ ព្រមទាំងបណ្តាលឱ្យខូចខាតទ្រព្យសម្បត្តិផ្សេងៗជាច្រើនទៀត៕
