សមាគមសម្ព័ន្ធអ្នកសារព័ត៌មានកម្ពុជា

ក្រសួងណែនាំឲ្យបង្កើនការប្រុងប្រយ័ត្ន ខណៈករណីជំងឺផ្ដាសាយបក្សីទីបួនត្រូវបានរកឃើញលើក្មេងប្រុសម្នាក់ទៀត

ក្រសួងសុខាភិបាល ក្នុងរាជធានីភ្នំពេញ ថ្ងៃទី២ ខែកុម្ភៈ ឆ្នាំ២០២៤។ (ខេមបូចា/ព្រីង សំរាំង)
ក្រសួងសុខាភិបាល ក្នុងរាជធានីភ្នំពេញ ថ្ងៃទី២ ខែកុម្ភៈ ឆ្នាំ២០២៤។ (ខេមបូចា/ព្រីង សំរាំង)

ក្មេង​ប្រុស​អាយុ​១៦​ឆ្នាំម្នាក់ទៀត មកពី​ខេត្ត​ក្រចេះ​ត្រូវបាន​បញ្ជាក់​ថា​​វិជ្ជមាន​វីរុស​ផ្ដាសាយ​បក្សី ។ ក្មេង​ប្រុស​ម្នាក់​នេះ​ជា​បង​របស់​ រឿន វីរុន អាយុ​៩ឆ្នាំ ដែល​បាន​ស្លាប់​ដោយ​ជំងឺ​ផ្ដាសាយ​បក្សី​កាលពីថ្ងៃទី​៨ ខែកុម្ភៈ ដែល​នាំ​ឲ្យចំនួន​អ្នក​ឆ្លង​ជំងឺ​ផ្ដាសាយ​បក្សីឡើង​ដល់​បួន​ករណី​ហើយ​ក្នុង​ឆ្នាំ​២០២៤។ នេះ​បើ​តាម​សេចក្ដី​ប្រកាសព័ត៌មាន​របស់​ក្រ​សួង​សុខាភិបាល​។​

កាល​ពី​ថ្ងៃ​អាទិត្យ មន្ទីរពិសោធន៍​របស់​វិទ្យាស្ថានជាតិ​សុខភាព​សាធារណៈ បានបង្ហាញ​លទ្ធផល​ថា​ក្មេង​ប្រុស​ឈ្មោះ រឿន វីរៈ វិជ្ជមាន​ជំងឺ​ផ្ដាសាយ​បក្សី ប៉ុន្តែ​មិន​មានចេញ​រោគសញ្ញានៅ​ឡើយទេ និង​មិន​ទាន់​មាន​បញ្ហា​ផ្លូវដង្ហើម​ផង​ដែរ​។​​

បើ​តាម​ក្រសួង​សុខាភិបាល មាន់​ចំនួន​ប្រាំក្បាល និង​ទាបី​ក្បាល​បាន​ងាប់​នៅ​ផ្ទះ​​របស់​ក្មេង​ប្រុស​រូប​នេះ។ មាន់​ទា​ទាំង​នេះ​ត្រូវបានក្រុមគ្រួសារយកទៅធ្វើជាម្ហូប​អាហារ​​សម្រាប់បរិភោគ។​

លោក ងី ប៊ុនឡែន ប្រធាន​មន្ទីរសុខាភិបាល​ខេត្ត​ក្រចេះ ប្រាប់ខេមបូចា​ថាមន្ត្រី​របស់​ខ្លួន និង​  មន្ត្រី​មន្ទីរ​កសិកម្ម​ខេត្ត​បាន​ចុះ​អប់​រំ​ប្រ​ជា​ពល​រដ្ឋ រួម​ទាំង​សិស្ស​នៅ​ក្នុង​សង្កាត់អូឫស្សី អំពីវីរុស និង​​របៀប​ការពារ​ខ្លួន​។ ក្រៅ​ពី​នេះ មន្ត្រី​សុខាភិបាល​ក៏​បាន​ធ្វើ​តេស្ត​លើ​អ្នក​ដែល​បាន​ពាក់​ព័ន្ធ​ជាមួយ​នឹង​​ក្មេង​ប្រុស​ឈ្មោះ​ វីរុន ផង​ដែរ។​

លោក​មាន​ប្រសាសន៍ថា៖ «យើង​បាន​បែង​ចែក​ការងារ​ជាមួយ​មន្ទីរ​កសិកម្ម​ដើម្បី​ប្រមូល និង​ដុត​​បំផ្លាញ​សត្វ​ដែល​ងាប់​ទាំង​នោះ។ ក្រុម​គ្រូពេទ្យ​បាន​ចុះ​ទៅ​ជួប​ប្រ​ជា​ពល​រដ្ឋ និង​ប្រមូល​សំណាក​ពី​អ្នក​ពាក់​ព័ន្ធ​ជា​មួយ​អ្នក​ជំងឺ​»។​

សំណាក​បាន​យក​ចេញពី​សមាជិក​គ្រួសារ​ទាំង​១៥​នាក់​របស់​ វីរុន កាលពី​ថ្ងៃទី​១០ ហើយនៅថ្ងៃទី​១១ ខែកុម្ភៈ វីរៈដែលជាបងរបស់វីរុនត្រូវបានរកឃើញថាឆ្លងជំងឺផ្ដាសាយបក្សីនេះ​ ​។ ពេល​នេះ វីរៈ កំពុង​សម្រាក​ព្យាបាល​នៅ​មន្ទីរ​ពេទ្យ​ខេត្ត​ក្រចេះ។​

លោក​បន្ត​ថា​ខាង​មន្ទីរ​នៅ​បន្ត​តាម​រក​អ្នក​​ផ្សេង​ទៀត ដែល​អាច​ពាក់ព័ន្ធ​ជាមួយ​អ្នក​ជំងឺ​។​​

បើ​តាម​ក្រ​សួង​សុខាភិបាល នេះជាករណី​ទី​បួន​ហើយ​នៃ​ជំងឺ​ផ្ដាសាយ​បក្សី​ក្នុង​ឆ្នាំ​២០២៤។ ករណី​ដំបូង​ក្រ​សួង​រក​ឃើញ​លើ​ក្មេង​ប្រុស​អាយុ​៣​ឆ្នាំ នៅ​ខេត្ត​ព្រៃវែង ក្រោយ​មក​រក​ឃើញ​លើ​បុរសវ័យ​៦៩​ឆ្នាំ និង​វីរុន​ក្នុង​ខេត្ត​ក្រចេះ​ ខណៈ​ដែល​វីរៈកំពុង​ទទួល​ការ​ព្យាបាល​។​

​គិត​ពី​ឆ្នាំ​២០២៣ មក​ក្រ​សួង​បាន​ឲ្យ​ដឹង​ថា​មាន​អ្នក​ស្លាប់​ដោយសារ​ជំងឺ​ផ្ដាសាយ​បក្សី​ចំនួន​៣​នាក់ មាន​ម្នាក់​ជា​ក្មេង​ស្រី​អាយុ​១១​ឆ្នាំ ក្នុង​ខេត្ត​កណ្ដាល និង​ក្មេង​ស្រី​អាយុ​២ឆ្នាំ ក្នុងខេត្តព្រៃវែង ជាមួយ​បុរសម្នាក់ទៀតវ័យ​៥០​ឆ្នាំ​។​

ក្រ​សួង​សុខាភិបាល ក្រ​សួង​កសិកម្ម និង​ក្រ​សួង​បរិស្ថាន​បាន​រួម​គ្នា​​ស្វែង​រក​ប្រភព​នៃ​ការ​កម្លង នេះ​ក៏​ដូច​ជា​ករណីសង្ស័យ​ផ្សេង​ទៀត​។​

ក្រ​សួង​សុខាភិបាល​រំឭក​ដល់​ប្រជា​ពល​រដ្ឋ​ឲ្យ​មាន​ការ​ប្រុង​ប្រយ័ត្ន​ចំពោះ​ជំងឺ​ផ្ដាសាយ​បក្សី ព្រោះ​ថា​ជំងឺ​នេះគំរាមកំហែង​ដល់​សុខ​ភាព​។ សម្រាប់​អ្នក​ដែល​មាន​ចេញ​រោគ​សញ្ញា​ដូច​ជា​ក្ដៅ​ខ្លួន ក្អក ហៀរសំបោរ ឬ​ពិបាក​ដក​ដង្ហើម និង​បាន​ពាក់​ព័ន្ធ​នឹង​កន្លែង​មាន់​ទា​ងាប់​រយៈ​ពេល​​១៤​ថ្ងៃ​​កន្លង​មក គួរ​ស្វែង​រក​ការ​ព្យាបាល​នៅ​មន្ទីរពេទ្យ​។​

វីរុស​ H5N1 ឬ​វីរុសបង្កជំងឺ​ផ្ដាសាយបក្សី ជា​ទូទៅ​ឆ្លង​លើ​សត្វ​បក្សី និង​ពេល​ខ្លះ​ក៏​អាច​ឆ្លង​ពី​បក្សី​មក​មនុស្ស​ដែរ ដូច​នេះហើយ​បាន​ជា​រដ្ឋាភិបាល​​ជំរុញ​សារអប់រំ​ទាក់​ទង​នឹង​ការ​លាង​សម្អាតដៃ​មុនពិសាអាហារ និង​មិន​ត្រូវ​បរិភោគ​សត្វ​បក្សី​ដែល​ងាប់​ដោយ​សារជំងឺ​។​

សាច់​មាន់ដាក់លក់​នៅ​ផ្សារ​មួយ​កន្លែង​ក្នុង​រាជធានីភ្នំពេញ កាលពីថ្ងៃទី​២៧​​ ខែធ្នូ ឆ្នាំ​២០២៣។ (ខេមបូចា/ព្រីង សំរាំង)

ក្រ​សួង​កសិកម្ម​បាន​សង្កេត​ឃើញ​ថា​ការ​ប្រែប្រួល​អាកាស​ធាតុ​លឿ​ន​ពី​ត្រជាក់ទៅ​ក្ដៅ​លាយ​ឡំគ្នា​បែបនេះ​ បាន​ធ្វើ​ឲ្យ​ប្រព័ន្ធការពារ​រាង​កាយ​សត្វ​ចុះខ្សោយ​ដែល​ងាយ​នឹង​ធ្វើ​ឲ្យ​សត្វ​ទាំង​នោះ​ឆ្លង​ជំងឺ ជាលទ្ធផល​អាច​រាល​ដាល​ជំងឺ​ឆ្លង​បាន​លឿន​ទៀត​ផង​។​

ដូច​នេះ ដើម្បី​បង្ការ​វីរុស​ឆ្លង​ពី​សត្វទៅ​សត្វ ពិសេស​ពី​សត្វ​ម​ក​មនុស្ស អគ្គនាយកដ្ឋានសុខភាពសត្វ និងផលិតកម្ម​បាន​ធ្វើ​ការណែ​នាំ​ជា​ច្រើន​ចំណុច​។​

ចំណុច​ទាំង​នោះ​រួម​មាន​ការតាម​ដាន​ការ​ដឹក​ជញ្ជូន​សត្វ និង​សាច់​សត្វ ដូច​ជាមាន់ និង​ជ្រូកដោយត្រូវឆ្លងកាត់ស្ដង់ដាបច្ចេកទេសត្រឹមត្រូវ បាញ់​ថ្នាំ​សម្លាប់​មេរោគ​នៅ​តាមកន្លែងនិងមធ្យោបាយ​ដឹក​ជញ្ជូន​សត្វ បង្កើន​ការ​អប់​រំ និង​ស្រាវជ្រាវ និង​ទប់​ស្កាត់​ការ​នាំ​ចូល និង​នាំ​ចេញ​ផលិត​ផល​សាច់​សត្វ។​

អ្នកនាំពាក្យ​ក្រ​សួង​សុខាភិបាល លោក លី សូវ៉ាន់ មិនបាន​ឆ្លើយ​តប​នឹង​សំណើ​សុំ​អត្ថាធិប្បាយ​នោះទេ ៕​

ប្រែសម្រួលពីអត្ថបទភាសាអង់គ្លេស៖ Brother of Deceased Bird Flu Victim Tests Positive, Fourth Case in 2024, Prompting Extra Caution

227 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម