ខ្មែរថាវរៈ ដែលដំណើរការដោយក្រុមយុវជនមួយក្រុម ជាក្រុមដ៏សំខាន់មួយដែលលើកឡើងពីបញ្ហាសិទ្ធិមនុស្សនៅក្នុងប្រទេសកម្ពុជា និងបរិស្ថាន ។ កាលពីពេលថ្មីៗនេះ ពួកគេបានចុះបញ្ជីជាអង្គការមិនរកប្រាក់ចំណេញមួយ ជាមួយនឹងក្រសួងមហាផ្ទៃ ដើម្បីអភិវឌ្ឍន៍សហគមន៍ឱ្យល្អប្រសើរ និងលុបបំបាត់ការកាប់បំផ្លាញព្រៃឈើខុសច្បាប់ និងបទល្មើសសត្វព្រៃ ។
កាលពីថ្ងៃចន្ទ ក្រុមយវជនខ្មែរថាវរៈបានបង្ហោះសារនៅលើបណ្ដាញសង្គមហ្វេសប៊ុកថា ឥឡូវនេះ ក្រុមរបស់ពួកគេបានក្លាយជាអង្គការមិនរកប្រាក់ចំណេញមួយជាផ្លូវការហើយ ។ នៅក្នុងការប្រកាសរបស់ខ្លួន ខ្មែរថាវរៈ បានលើកឡើងថា «ផ្នែកនៃបញ្ហាបទល្មើសព្រៃឈើគឺបណ្ដាលមកពីសហគមន៍ក្រីក្រ ដែលគ្មានប្រភពចំណូលច្បាស់លាស់ ដែលបង្ខំឱ្យពួកគេប្រព្រឹត្តខុសច្បាប់ទៅបំផ្លិចបំផ្លាញធនធានធម្មជាតិ»។
អ្នកស្រី ឈឿន ដារ៉ាវី ប្រធានអង្គការខ្មែរថាវរៈ បាននិយាយថា អង្គការផ្ដោតជាចម្បងទៅលើការអភិវឌ្ឍនៅក្នុងសហគមន៍ដើម្បីធានាជីវភាពរស់នៅល្អប្រសើរជាងមុន និងកាត់បន្ថយ ឬលុបបំបាត់ការកាប់បំផ្លាញព្រៃឈើនិងការប្រមាញ់សត្វដោយខុសច្បាប់ ។ អ្នកស្រីបានបន្ថែមថា អង្គការនេះមានសមាជិក ៥រូប ក្នុងនោះរួមមានអនុប្រធានមួយរូប និងសមាជិក ៣រូបផ្សេងទៀត ។
អ្នកស្រី ដារ៉ាវី ឡើងកាន់តំណែងជាប្រធាននេះបន្តពីស្វាមីរបស់អ្នកស្រី និងសហស្ថាបនិកខ្មែរថាវរៈ លោក ហ៊ុន វណ្ណៈ ដែលបានលាលែងពីតំណែងកាលពីខែកុម្ភៈ ឆ្នាំ២០២៣ ដើម្បីបើកផ្លូវឱ្យយុវជនជំនាន់ថ្មីដឹកនាំស្ថាប័ននេះបន្ត ។ អង្គការនេះនឹងចាប់ផ្ដើមគម្រោងរបស់ខ្លួនឡើងវិញ ជាដំបូង នៅតំបន់អារ៉ែង បន្ទាប់មក នៅព្រៃឡង់ ។ អ្នកស្រី ដារ៉ាវី បានសង្កេតឃើញថា ប្រជាជននៅតំបន់អារ៉ែងនៅពុំទាន់មានប្រភពចំណូលច្បាស់លាស់នៅឡើយ និងនាំគ្នាកាប់ព្រៃឈើលក់ទៅឱ្យឈ្មួញដែលនេះជាអំពើខុសច្បាប់ ។
ដើម្បីដោះស្រាយបញ្ហានេះ អង្គការខ្មែរថាវរៈចូលរួមនៅក្នុងការអភិវឌ្ឍសហគមន៍ ដើម្បីឱ្យប្រជាជនមានការងារធ្វើដែលអាចរកចំណូលចិញ្ចឹមជីវិតបានផង និងអភិរក្សព្រៃឈើផង ។
អ្នកស្រី ដារ៉ាវី បាននិយាយថា៖ «យើងមើលឃើញថា បទល្មើសនឹងនៅតែមាន ដរាបណាសហគមន៍នៅតែគ្មានប្រភពចំណូលច្បាស់លាស់ ដែលប្រភពចំណូលនៅខ្វះនៅឡើយ ហើយឈ្មួញ[បន្ត]ទាក់ទងពួកគេឱ្យចូលទៅក្នុងព្រៃដើម្បីកាប់[ឈើ] ទោះបីពួកគេដឹងថាវាខុសច្បាប់ក៏ដោយ ។ ដូច្នេះ ពួកគេរំលោភច្បាប់ដើម្បីតែការរស់រានប៉ុណ្ណោះ»។
ការប្រាស្រ័យទាក់ទងនិងការចរចាដើម្បីដោះស្រាយបញ្ហា
អ្នកស្រីដារ៉ាវី បានបញ្ជាក់ថា អង្គការខ្មែរថាវរៈមិនជាប់ពាក់ព័ន្ធនឹងរដ្ឋាភិបាល ឬក្រុមនយោបាយណាមួយឡើយ ប៉ុន្តែ ជាអង្គការមួយដែលធ្វើការផ្តោតសំខាន់ដើម្បីបម្រើផលប្រយោជន៍សាធារណៈ និងស្វែងរកដំណោះស្រាយពីគ្រប់ភាគីទាំងអស់ដើម្បីប្រយោជន៍សហគមន៍ តាមរយៈការចរចាដោយសន្តិវិធី ។
អ្នកស្រី ដារ៉ាវី បាននិយាយថា៖ «គោលការណ៍របស់យើងគឺមិនលម្អៀង និងប្រកាន់ខ្ជាប់មិនងាករេ ។ យើងធ្វើដូច្នេះដើម្បីជួយសហគមន៍ដោះស្រាយបញ្ហារបស់ពួកគេ ។ យើងនឹងទៅកាន់គ្រប់ទិសទី និងខិតខំឱ្យអស់សមត្ថភាពដើម្បីជួយស្វែងរកដំណោះស្រាយ»។
អ្នកស្រីបានថ្លែងថា យុវជនដែលចូលរួមជាមួយខ្មែរថាវរៈ គឺជាយុវជនវ័យក្មេងដែលសកម្មលើបញ្ហាសង្គម ។ អ្នកស្រីថា៖ «វិធីថ្មីនៃការតស៊ូមតិដើម្បីសហគមន៍ល្អប្រសើរមួយ គឺមិនដូចពីមុនទេដែលយើងបានឈរនៅកណ្ដាល ។ យើងនឹងមិនប្រឆាំង[រដ្ឋាភិបាល]ដើម្បីបង្កបញ្ហាដដែលនោះទេ ប៉ុន្តែ ចរចាស្វែងរកដំណោះស្រាយឱ្យសហគមន៍»។
អ្នកស្រី ដារ៉ាវី បានបន្តថា៖ «កាលពីសកម្មភាពមុនៗ យើងបានធ្វើការតស៊ូមតិខ្លាំងក្លា ហើយវាមានភាពប្រឈមខ្លាំង។ វិធីនោះមិនចំណេញទេ ប៉ុន្តែ នៅពេលដែលយើងប្រាស្រ័យទាក់ទងគ្នា ដំណោះស្រាយអាចសម្រេចទៅបាន» ។ ដោយអ្នកស្រីបន្ថែមថា៖ «យើងបានស្នើសុំសម្ដេចឱ្យមានដំណោះស្រាយ ។ សូម្បីតែករណីខ្លះដែលមិនអាចដោះស្រាយបាន ប៉ុន្តែ អាចដោះស្រាយបានដោយមានលក្ខខណ្ឌជាក់លាក់[ដែលត្រូវបានដាក់បញ្ចូល]សម្រាប់សហគមន៍ មានតែការពិភាក្សាគ្នាដោយសន្តិវិធីប៉ុណ្ណោះ មិនមែនយកគ្នាជាសត្រូវទេ[ដែលអាចដោះស្រាយបាន]»។
កាលពីពាក់កណ្ដាលខែសីហា ឆ្នាំ២០២២ អ្នកស្រី ដារ៉ាវី និងក្រុមខ្មែរថាវរៈរបស់អ្នកស្រី ក្នុងនោះរួមមានអ្នកសារព័ត៌មាន VOD ប្រាំរូបផងដែរ ត្រូវបានឃាត់ខ្លួនសាកសួរពីបទបង្ហោះដ្រូនដោយមិនមានការអនុញ្ញាត និងបង្ហោះផ្សាយផ្ទាល់នៅលើបណ្ដាញសង្គមហ្វេសប៊ុក ។
នៅក្រោយការចុះបញ្ជីរួច សហស្ថាបនិកនិងជាសកម្មជនបរិស្ថាន លោក ហ៊ុន វណ្ណៈ បាននិយាយថា លោកលែងមានតួនាទីអ្វីនៅក្នុងស្ថាប័ននេះទៀតហើយ ប៉ុន្តែថា លោកនឹងផ្ដល់ការជួយគាំទ្រផ្អែកទៅតាមបទពិសោធន៍របស់លោក ។
លោក វណ្ណៈ បានពន្យល់ថា៖ «ដូចអ្វីដែលខ្ញុំបានប្រាប់ភរិយារបស់ខ្ញុំ [ដារ៉ាវី] អ៊ីចឹង ខ្មែរថាវរៈ មិនអាចដំណើរការដូចពីមុនបានទេ ដែលកាលពីមុន ក្រុមសកម្មជនរបស់យើង ច្រើនតែជំទាស់នឹងរដ្ឋាភិបាល ១០០% ប៉ុន្តែ ឥឡូវនេះ យើងយល់[ស្ថានការណ៍] ហើយចង់ផ្លាស់ប្ដូរយុទ្ធសាស្ត្ររបស់យើង ។ ពេលខ្លះ យើងចាំបាច់ត្រូវសហការជាមួយរដ្ឋាភិបាលផងដែរ»។
មានគំនិតជំទាស់
លោក ម៉ូត គឹមរី អនុប្រធានសមាគម ខ្មែរថាវរៈ បានប្រាប់ ខេមបូចា ថា លោកសង្ឃឹមថានឹងបានឃើញផលប្រយោជន៍នៃការអភិវឌ្ឍទៅដល់សហគមន៍និងរដ្ឋាភិបាល ពីព្រោះ ខ្មែរថាវរៈ ផ្ដល់តម្លៃដល់សារសំខាន់នៃការប្រាស្រ័យទាក់ទងគ្នាដើម្បីស្វែងរកដំណោះស្រាយ ជាជាង«ច្រានគ្នាទៅវិញទៅមក» ។
លោក គឹមរី និយាយថា៖ «យើងមិនបោះបង់ការជួយដល់សហគមន៍ទេ ប៉ុន្តែ ពេលនេះ យើងចូលរួមជាមួយអាជ្ញាធរ អ្នកជំនាញផ្នែកបរិស្ថាននិងច្បាប់ដើម្បីដោះស្រាយបញ្ហាសហគមន៍ ។ យើងនឹងសហការជាមួយគ្រប់ភាគីពាក់ព័ន្ធទាំងអស់ ដោយសារតែយើងគិតថា មានតែការប្រាស្រ័យទាក់ទងគ្នាប៉ុណ្ណោះដែលជាយុទ្ធសាស្ត្រ[ត្រឹមត្រូវ]ដើម្បីផ្ដល់ផលប្រយោជន៍ និង[ធានា]ការអភិវឌ្ឍពិតប្រាកដ[ដល់សហគមន៍]»។
លោក គឹមរី បានជំរុញដល់យុវជនដែលធ្លាប់ធ្វើការងារលើបញ្ហាបរិស្ថានឱ្យគាំទ្រ ឬចូលរួមជាមួយ ខ្មែរថាវរៈ ពីព្រោះចលនានេះកំពុងអភិវឌ្ឍនិងជួយដល់សហគមន៍ពិតប្រាកដ ជាជាងរិះគន់ថ្នាក់ដឹកនាំ ឬអាជ្ញាធរ ។
លោក គឹមរី បាននិយាយថា៖ «យើងផ្លាស់ប្ដូរពីការរិះគន់ ប៉ុន្តែ មកជាការចូលរួមទាំងអស់គ្នា ។ នេះជាអ្វីដែលខ្ញុំកំពុងលើកទឹកចិត្តដល់យុវជនឱ្យចូលរួម ពីព្រោះគ្មានប្រទេសណាមួយដែលមានប្រព័ន្ធយុត្តិធម៌ ការអនុវត្តប្រឆាំងអំពើពុករលួយ ឬលទ្ធិប្រជាធិបតេយ្យល្អបំផុតនោះទេ»។
កញ្ញា ឆែម ស្រីគា អាយុ ២៣ឆ្នាំ ដែលធ្លាប់ជាផ្នែកមួយនៃចលនាខ្មែរថាវរៈ បានប្រាប់ ខេមបូចា ថា កញ្ញាលែងមានទំនាក់ទំនង ឬធ្វើការជាមួយអង្គការនេះទៀតហើយ ពីព្រោះ ឥឡូវនេះ «ទស្សនវិស័យរបស់ពួកគេខុសពីមុនហើយ» ។
កញ្ញា ស្រីគា និយាយថា៖ «ខ្ញុំលែងនៅជាមួយខ្មែរថាវរៈទៀតហើយ ។ ខ្ញុំចាកចេញកាលពីមួយឆ្នាំមុន ពីព្រោះយើងមានគំនិតផ្ទុយគ្នា ហើយខ្ញុំចង់ផ្ដោតលើការសិក្សារបស់ខ្ញុំ»។
កញ្ញាបានកត់សម្គាល់ថា កញ្ញាភ្ញាក់ផ្អើលចំពោះការចុះបញ្ជីក្រុមខ្មែរថាវរៈជាអង្គការមិនមែនរដ្ឋាភិបាល ប៉ុន្តែ ទោះជាយ៉ាងណា កញ្ញាសង្ឃឹមថា អង្គការនេះនឹងឈរដើម្បីប្រជាជន និងជួយដល់សហគមន៍ ។ កញ្ញាបានបន្ថែមថា វាជាការប្រសើរណាស់ បើសិនជាអង្គការនេះឈរដោយឯករាជ្យ ។
ក្ដីមន្ទិលអំពីភាពឯករាជ្យ
មន្ត្រីសម្របសម្រួលគម្រោងបណ្ដាញយុវជនកម្ពុជា លោក អូត ឡាទីន បានអបអរសាទរចំពោះការចុះបញ្ជីផ្លូវការរបស់អង្គការខ្មែរថាវរៈ ប៉ុន្តែ មិនហ៊ានសន្និដ្ឋានទៅលើកម្រិតនៃភាពឯករាជ្យរបស់អង្គការនេះឡើយ ។ ដោយផ្អែកតាមការសង្កេតរបស់លោក ឡាទីន ទៅលើសមាគខ្មែរថាវរៈកាលពីពេលកន្លងមក ពួកនេះបានចូលរួមនៅក្នុងការងារសង្គមនិងការអភិវឌ្ឍដើម្បីធានាថាសង្គមមួយមានភាពរីកចម្រើន និងការពារធនធានធម្មជាតិ ។
លោកបាននិយាយថា៖ «ពាក់ព័ន្ធនឹងការអនុវត្តជាក់ស្ដែងនៃនិន្នាការរបស់អង្គការ យើងនឹងបន្តតាមដានទៅលើរបៀបដែល ខ្មែរថាវរៈ [ឆ្លើយតបចំពោះបញ្ហានានា] នៅពេលដែលខ្លួនបើកដំណើរការឡើងវិញ»។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានសាទរចំពោះការចុះបញ្ជីរបស់អង្គការនេះ និងការបន្តដំណើរការឡើងវិញរបស់ខ្លួន ។
ទោះបីជាយ៉ាងណា ពាក់ព័ន្ធនឹងកម្រិតនៃភាពឯករាជ្យរបស់ ខ្មែរថាវរៈ គឺអាស្រ័យលើលទ្ធផលការងាររបស់ពួកគេ ។ លោកបានមានប្រសាសន៍ថា៖ «វានឹងអាស្រ័យលើថាតើអ្នកណាដឹកនាំការងារទៅថ្ងៃអនាគត ។ យើងនឹងឃើញ»។
លោកបានបន្ថែមថា៖ «វាជារឿងល្អ ដរាបណាមានកិច្ចប្រឹងប្រែងដើម្បីដោះស្រាយបញ្ហានៅក្នុងសង្គម ស្របទៅតាមបេសកកម្មរបស់អង្គការ [និង]ជួយដល់ការអភិវឌ្ឍជាតិ» ៕
ប្រែសម្រួលពីអត្ថបទភាសាអង់គ្លេស៖ Khmer Thavrak Registers With Interior Ministry, Plans New Approach To Resolve Issues
