សមាគមសម្ព័ន្ធអ្នកសារព័ត៌មានកម្ពុជា

ក្រុមអ្នកការពារសិទ្ធិមនុស្សជំរុញឲ្យរដ្ឋាភិបាលស្ដារលទ្ធិប្រជាធិបតេយ្យឡើងវិញ

ក្រុមអ្នកការពារសិទ្ធិមនុស្សប្រមូលផ្ដុំគ្នាបារព្ធទិវាសិទ្ធិមនុស្សអន្តរជាតិនៅទីលានប្រជាធិបតេយ្យថ្មីក្នុងរាជធានីភ្នំពេញ ថ្ងៃទី១០ ខែធ្នូ ឆ្នាំ២០២១។ ខេមបូចា/ បញ្ញា ឆព័ណ្ណ
ក្រុមអ្នកការពារសិទ្ធិមនុស្សប្រមូលផ្ដុំគ្នាបារព្ធទិវាសិទ្ធិមនុស្សអន្តរជាតិនៅទីលានប្រជាធិបតេយ្យថ្មីក្នុងរាជធានីភ្នំពេញ ថ្ងៃទី១០ ខែធ្នូ ឆ្នាំ២០២១។ ខេមបូចា/ បញ្ញា ឆព័ណ្ណ

ក្រុម​អ្នកការពារ​សិទ្ធិមនុស្សជាង​ ២០០​នាក់​បាន​ប្រមូល​ផ្ដុំ​គ្នា​នៅ​ថ្ងៃ​សុក្រ​នេះ នៅ​ទីលាន​ប្រ​ជាធិបតេយ្យ​ថ្មី​ក្នុង​រាជធានី​ភ្នំពេញ ដើម្បី​ទាមទារ​ឲ្យ​រដ្ឋាភិបាល​ស្ដារ​សិទ្ធិ​មនុស្ស និង​ប្រជា​ធិបតេយ្យ​ឡើង​វិញ​នៅ​ក្នុង​ប្រទេស​កម្ពុជា ដោយ​បាន​លើក​ឡើ​ថា​អ្វី​ដែល​ពួក​ខ្លួន​បាន​និយាយ​រង​សម្ពាធ​កាន់​តែ​ខ្លាំង​។

ក្នុង​​ឱកាស​ប្រារព្ធ​ខួប​ទី​៧៣​នៃទិវា​សិទ្ធិ​មនុស្ស​អន្តរជាតិ សកម្មជន​និយាយ​ថាស្ថានភាពបច្ចុប្បន្ននេះ ​វា​មិន​មាន​​​រឿង​គួរ​ឲ្យ​អំណរ​ច្រើន​នោះទេ​។

លោក នី សុខា ប្រ​ធាន​សមាគម​សិទ្ធិ​មនុស្ស​អាដហុក មាន​ប្រសាសន៍​ថា​ស្ថានភាព​សិទ្ធិ​មនុស្ស​នៅ​កម្ពុជា​បាន​ធ្លាក់​ចុះ​ក្នុង​អំឡុង​វិបត្តិ​កូវីដ-១៩ រយៈ​ពេល​ពីរ​ឆ្នាំ​មក​នេះ ដោយ​ថា​នាំ​ឲ្យ​ករណី​បំពាន​សិទ្ធិ​មនុស្ស​មានការ​កើន​ឡើង​។​

លោកមានប្រសាសន៍​ថា៖ «​យើង​បារម្ភ​អំពី​ការគំរាម​កំហែង​លើ​សិទ្ធិ​បញ្ចេញ​មតិ ការ​ម្រមូល​ផ្ដុំ និង​ការ​ជួប​ជុំ​ផ្នែក​នយោបាយ» ដោយលោកបន្ថែមថា៖ ​«​យើង​ក៏​បារម្ភ​អំពី​ការ​បន្ត​ចាប់​ខ្លួន និង​អំពើ​ហិង្សា​ប្រឆាំង​នឹង​សកម្ម​ជន និង​អ្នក​នយោបាយ ខណៈ​ដែល​អាជ្ញាធរ​មិនទាន់​បាន​រក​ឃើញ​ជន​ដៃ​ដល់ ឬឃាត​ករ​»។​

សកម្ម​ជន​បរិស្ថាន កញ្ញា ស៊ុន រដ្ឋា ជាសមាជិក​របស់​អង្គការ​មាតាធម្មជាតិ ដែល​ទើប​ត្រូវ​បាន​ដោះ​លែង​ពី​ពន្ធនាគារ កាលពី​ដើម​ខែ​វិច្ឆិកា ក្រោយ​ជាប់​ឃុំ​អស់​ប្រាំខែដោយសារ​ការ​តស៊ូមតិ បាន​លើក​ឡើង​ថា សកម្មជន​បរិស្ថាន​មិន​ត្រូវ​បានអាជ្ញាធរ​លើក​ទឹក​ចិត្ត​នោះទេ តែ​ផ្ទុយ​ទៅ​វិញ​មាន​តែ​ការ​ហាម​ឃាត់ និង​គំរាម​កំហែង​។​

កញ្ញា​ឲ្យ​ដឹង​នៅ​ថ្ងៃសុក្រ​នេះថា៖ «ខ្ញុំ​សូម​ជំរុញ​ឲ្យ​រដ្ឋាភិបាល​ទម្លាក់​រាល់បទ​ចោទ​ប្រឆាំង​នឹង​សកម្មជន​បរិស្ថាន ក៏​ដូច​ជា​សកម្មជន​ផ្សេង​ទៀត ដែល​បាន​ប្រើ​ប្រាស់​សិទ្ធិ​របស់​ខ្លួន ដូច​ជា​យុវ​ជន​ ក៏​ដូ​ច​ជាជន​រង​គ្រោះ​បញ្ហា​​ដីធ្លី»។

ដូច​គ្នា​ដែរ កញ្ញា ឈឿន ដារ៉ាវី សមាជិក​របស់ក្រុម​យុវជន​ខ្មែរ​ថាវរៈ ដែល​ត្រូវ​ទើប​ដោះលែង​ពី​ពន្ធនាគារ​នៅ​ថ្ងៃជា​មួយ​ កញ្ញា រដ្ឋា ដែរ​នោះ បាន​លើក​ឡើង​ថា សិទ្ធិ​ធ្វើ​ការ​របស់​ខ្លួន​បាន​រង​ការ​គំរាម​កំហែង​ជា​ច្រើនពី​អាជ្ញាធរ​។​

កញ្ញាបន្ថែម​ថា៖ «​មាន​បញ្ហា​សង្គម​ជាច្រើន ដូច​ជា​បញ្ហា​ព្រៃ​ឈើ និង​អយុត្តិ​ធម៌​សង្គម ដែល​អាច​បង្អាក់​ស្មារតី​យុវជន ដែលចូល​រួម​ខ្វល់​ខ្វាយពី​រឿង​សង្គម»។​

សកម្មជន​បរិស្ថានទទួលពាន​រង្វាន់​ផ្នែក​សិទ្ធិ​មនុស្ស​ក្នុង​​ឱកាស​ប្រារព្ធ​ខួប​ទី​៧៣​នៃទិវា​សិទ្ធិ​មនុស្ស​អន្តរជាតិ បន្ទាប់​ពី​ចេញពី​ពន្ធនាគារ​កាលពី​ខែមុន។ រូបភាព​ថត​នៅ​ថ្ងៃទី​១០ ខែធ្នូ ឆ្នាំ២០២១។ ខេមបូចា/ បញ្ញា ឆព័ណ្ណ​
សកម្មជន​បរិស្ថានទទួលពាន​រង្វាន់​ផ្នែក​សិទ្ធិ​មនុស្ស​ក្នុង​​ឱកាស​ប្រារព្ធ​ខួប​ទី​៧៣​នៃទិវា​សិទ្ធិ​មនុស្ស​អន្តរជាតិ បន្ទាប់​ពី​ចេញពី​ពន្ធនាគារ​កាលពី​ខែមុន។ រូបភាព​ថត​នៅ​ថ្ងៃទី​១០ ខែធ្នូ ឆ្នាំ២០២១។ ខេមបូចា/ បញ្ញា ឆព័ណ្ណ​

ការ​ជួប​ជុំ​នៅ​ថ្ងៃ​សុក្រ​នេះ ធ្វើ​ឡើង​ប្រហែល​មួយ​ខែ​បន្ទាប់​ពី​មាន​ការ​ដោះ​លែង​សកម្មជន​ជាង​១០​នាក់ នៅ​សប្ដាហ៍​តែ​មួយ​កាលពី​ខែ​វិច្ឆិកា ពី​ពន្ធនាគារ។​ ភាគ​ច្រើន​នៃ​អ្នក​ដែល​ត្រូវ​ដោះ​លែង​នោះ បាន​រង​បទ​ចោទ​ពី​បទ​ញុះញង់ និង​ការ​ចោទ​ប្រកាន់​ទាក់​ទង​នឹង​ការ​បញ្ចេញមតិ​របស់​ពួកគេ​។ របាយការណ៍​អង្គការ​លីកាដូ បាន​ឲ្យ​ដឹង​ថា ក្នុង​ឆ្នាំ​២០២០ សមត្ថកិច្ច​បាន​ចាប់​ខ្លួន​មនុស្ស​ ១៥៨​នាក់​ដោយ​សារតែការបញ្ចេញ​មតិ​តាម​ប្រព័ន្ធ​អនឡាញ ហើយ​ក្នុង​នោះ​មាន​មនុស្ស​ចំនួន ៧៣នាក់ កំពុង​នៅ​បន្ត​ជាប់​ឃុំ​នៅ​ឡើយ​គិត​ត្រឹម​ចុង​ឆ្នាំ​នេះ។​

របាយការណ៍​អង្គការ​លីកាដូ លើក​ឡើង​ទៀត​ថារដ្ឋាភិបាល​បាន​ប្រើ​ប្រាស់​បណ្ដាញ​តាម​ដាន​ដ៏​ទូលំទូលាយ​របស់​ខ្លួន​ក្នុង​ការ​បង្ក្រាប​ ពិសេស​លើ​សកម្មជន ដោយ​មាន​ទាំង​ការ​បំពារបំពាន និង​ការ​ចោទ​ប្រកាន់​បទ​ឧក្រិដ្ឋ។​

ការ​តវ៉ា​របស់​អង្គការ​សង្គម​ស៊ីវិល​នេះ ធ្វើ​ឡើង​ស្រប​ពេល​ដែល​កម្ពុជា​កំពុង​ប្រឈម​នឹង​សម្ពាធ​ការទូត​ពី​សហរដ្ឋអាមេរិក អំពី​អ្វី​ដែល​ក្រ​សួងពាណិជ្ជកម្ម​អាមេរិក​បាន​ហៅ​ថា​ជាអំពើ​ពុក​រលួយ​ជា​ប្រព័ន្ធ និង​ការ​រំលោភសិទ្ធិ​មនុស្ស​។​

ដូច​គ្នា​ដែរ​កាលពី​ខែ​វិច្ឆិកា សភាអាមេរិក​ក៏​បាន​អនុម័ត​ច្បាប់​ដែល​អាច​បង្កើន​ការ​ដាក់ទណ្ឌ​កម្ម​ប្រឆាំង​នឹង «​មន្ត្រី​ជាន់ខ្ពស់​រដ្ឋាភិបាល យោធា ឬ​មន្ត្រី​កងកម្លាំង​ប្រដាប់អាវុធ​ផ្សេងទៀត» ដែល​រង​ការ​ចោទ​ថា​បាន​ជាប់​ពាក់​ព័ន្ធ​នឹង​ការ​រំលោភសិទ្ធិ​មនុស្ស។ ការ​ដាក់ទណ្ឌ​កម្ម​អាច​រួម​ទាំង​ការ​បង្កក​ទ្រព្យសម្បត្តិ​របស់​អ្នក​ទាំង​នោះ​មាន​នៅ​សហរដ្ឋអាមេរិក និង​រឹត​ត្បិត​លើ​ការ​ចេញ​ចូល​ទឹក​ដី​អាមេរិក​។​

កាល​ពី​សប្ដាហ៍​មុន ក្រ​សួង​ពាណិជ្ជកម្ម​អាមេរិក បាន​ប្រកាស​ការ​រឹត្បឹត​ថ្មី​បន្ថែម​ទៀត​លើ​ពាណិជ្ជកម្ម​ជាមួយ​កម្ពុជា ហើយ​កាលពី​ថ្ងៃពុធ បាន​ប្រកាស​ហាម​ឃាត់​ការ​លក់​អាវុធ​មក​ឲ្យ​កម្ពុជា​ផង​ដែរ​។​

ជាការឆ្លើយតបទៅនឹងការរឹតត្បឹនេះ លោក​នាយក​រដ្ឋ​មន្ត្រី​ ហ៊ុន សែន បានសរសេរសារនៅលើហ្វេសប៊ុករបស់លោក ដោយបាន​បញ្ជា​ទៅ​មន្ត្រី​យោធាឲ្យប្រមូលអាវុធ និងសម្ភារៈយោធារបស់អាមេរិកមករក្សាទុក ឬកំទេចចោល។

​លោកបានរសេរសេរថា៖ «ទន្ទឹមនឹងនេះ ខ្ញុំសូមដាក់ចេញបទបញ្ជាដល់អង្គភាពប្រដាប់អាវុធទាំងអស់ ឱ្យធ្វើការត្រួតពិនិត្យឡើងវិញជាបន្ទាន់អំពីអាវុធ និងសម្ភារៈយោធា ដែលកម្ពុជាមានបច្ចុប្បន្ន ហើយត្រូវប្រមូលអាវុធ និងសម្ភារៈយោធាអាមេរិកទាំងអស់ ប្រសិនបើមាន យកទៅរក្សាទុកក្នុងឃ្លាំង ឬយកទៅកំទេចចោល តាមការជាក់ស្តែង។

រដ្ឋាភិបាល​កម្ពុជា​បាន​ច្រាន​ចោល​ការ​ចោទ​ប្រកាន់​ថាការ​បំពានសិទ្ធិ​មនុស្ស​មានការ​កើន​ឡើង ដោយ​អ្នក​នាំពាក្យបាន​លើក​ឡើង​ផ្ទុយ​ពី​នេះវិញ​។​

លោក ជិន ម៉ាលីន អនុប្រធាន​គណៈកម្មាធិការ​សិទ្ធិមនុស្ស​កម្ពុជា និង​ជា​អ្នក​នាំពាក្យ​ក្រ​សួង​យុត្តិ​ធម៌ មាន​ប្រ​សាសន៍​ថា មិនមាន​ការ​ចាំ​បាច់​ណា​ត្រូវ​ស្ដារ​លទ្ធិ​ប្រ​ជា​ធិបតេយ្យ​នៅ​កម្ពុជា​ឡើង​វិញនោះទេ ដោយ​លោក​ថា​ស្ថានភាព​សិទ្ធិ​មនុស្ស​នៅ​កម្ពុជា​កំពុង​តែ​ល្អ​ប្រសើរ​ឡើង​។​ ជាមួយ​គ្នា​នេះ​ដែរ លោកថា រដ្ឋាភិបាល​បាន​មើល​ឃើញ​ដែរ​ពីស្ថាន​ភាពសិទ្ធិ​មនុស្សដែល​​ត្រូវ​ការ​ការ​ធ្វើ​ឲ្យ​ល្អ​ប្រសើរ​ថែម​ទៀត​។​ ​

លោក​បន្ត​ថា៖ «អ្វី​ដែល​យើង​ត្រូវ​ធ្វើ​គឺ​ធ្វើ​ឲ្យ​ស្ថានភាព​សិទ្ធិ​មនុស្ស និង​លទ្ធិ​ប្រជា​ធិបតេយ្យ​នៅ​កម្ពុជាកាន់​តែ​ប្រសើរ​ឡើង។ មាន​បញ្ហា​ប្រ​ឈម​​មួយ​ចំនួន​នៅ​កើត​មាន ដូច​នេះ​យើង​ត្រូវ​តែ​យក​ចិត្ត​ទុក​ដាក់​លើ​កត្តា​ប្រឈម​ទាំង​នោះ» ដោយលោកបន្ថែមថា៖ ​«​សកម្ម​ភាព​ផ្លូវ​ច្បាប់​ប្រឆាំង​នឹង​អ្នក​បំពាន​ច្បាប់​មិន​មែន​ជា​ការ​រំលោភ​សិទ្ធិមនុស្ស ឬ​រឹតត្បឹត​សេរីភាព​បញ្ចេញ​មតិ​នោះទេ ប៉ុន្តែ​ជាការអនុវត្ត​ច្បាប់​ក្នុង​សង្គម​ប្រជា​ធិបតេយ្យ»។​

លោក​បន្ថែម​ទៀតថា ការ​ដាក់​ទណ្ឌកម្ម​ថ្មីរបស់​អាមេរិក​​នេះ គឺ​ជា​លទ្ធផល​នៃ​បញ្ហា​ភូមិសាស្រ្ត​នយោបាយ​ជាមួយ​ប្រទេស​ចិន​។​

លោក លើក​ឡើងថា៖ «បញ្ហា​នីតិរដ្ឋ សិទ្ធិមនិស្ស និង​ប្រជា​ធិបតេយ្យ គឺគ្រាន់​ជាលេស​ក្នុង​ការ​ជ្រៀត​ជ្រែក​កិច្ច​ការ​ផ្ទៃ​ក្នុង​កម្ពុជា។ អាមេរិក​បាន​អនុវត្ត​ស្ដង់​ដារ​ពីរ​​រវាង​កម្ពុជា និង​សម្ព័ន្ធ​មិត្ត​របស់​ខ្លួន ដែល​មាន​ស្ថាន​ភាព​សិទ្ធិ​មនុស្ស និង​លទ្ធិ​ប្រ​ជា​ធិបតេយ្យ​អាក្រក់​ជាង​កម្ពុជា»។​

ក្រុម​អង្គការ​មិន​មែន​រដ្ឋាភិបាល​ និង​សហជីព​បាន​ច្រាន​ចោល​ការ​លើក​ឡើង​បែបនេះ និង​បាន​អំពាវ​នាវ​ឲ្យ​រដ្ឋាភិបាល​បើក​លំហសិទ្ធិ​ធ្វើ​នយោបាយ​សម្រាប់​ការ​បោះ​ឆ្នោត​ឃុំ​សង្កាត់​ក្នុង​ឆ្នាំ​២០២២ និង​ការ​បោះ​ឆ្នោត​ជាតិ​ឆ្នាំ២០២៣ ខាង​មុខ។​

លោក យាង សុធារិន្ទ និង​អ៊ួន ឈិន អតីត​អ្នកសារព័ត៌មាន​វិទ្យុអាស៊ីសេរី បាន​ទទួល​ពានរង្វាន់​ផ្នែក​សិទ្ធិ​មនុស្ស​នៅ​កម្មវិធី​ថ្ងៃសុក្រនេះ។ រូបភាពថ្ងៃទី​១០​ ខែធ្នូ ឆ្នាំ​២០២១។​ ខេមបូចា/ បញ្ញា ឆព័ណ្ណ
លោក យាង សុធារិន្ទ និង​អ៊ួន ឈិន អតីត​អ្នកសារព័ត៌មាន​វិទ្យុអាស៊ីសេរី បាន​ទទួល​ពានរង្វាន់​ផ្នែក​សិទ្ធិ​មនុស្ស​នៅ​កម្មវិធី​ថ្ងៃសុក្រនេះ។ រូបភាពថ្ងៃទី​១០​ ខែធ្នូ ឆ្នាំ​២០២១។​ ខេមបូចា/ បញ្ញា ឆព័ណ្ណ

លោក សឹង សែនករុណា មន្ត្រី​ស៊ើប​អង្កេត​ជាន់​ខ្ពស់​របស់​សមាគម​សិទ្ធិ​មនុស្ស​អាដហុក មាន​ប្រសាសន៍​ថា អ្នក​សារព័ត៌មាន និង​សកម្មជន​សិទ្ធិ​មនុស្ស​ចំនួន​ ២៧​រូប បាន​ទទួលពាន​រង្វាន់​ផ្នែក​សិទ្ធិ​មនុស្ស ដោយសារ​តែអ្នក​ទាំង​នោះបាន​ធ្វើ​ការ​សម្រាប់​សង្គម​ទាំង​មូល​។​

លោក យាង សុធារិន្ទ អតីត​អ្នកសារព័ត៌មាន​របស់​វិទ្យុ​អាស៊ីសេរី និង​ជា​អ្នក​បាន​ទទួល​ពានរង្វាន់​ម្នាក់​ផង បាន​លើក​ឡើង​ថា ការទទួល​ស្គាល់​នេះជា​ការ​លើក​ទឹក​ចិត្ត​ពី​ក្រុម​អង្គការ​សង្គមស៊ីវិល​ចំពោះ​អ្នក​សារព័ត៌មាន និង​សកម្មជនផ្សេងទៀត ដែល​បាន​រង​ការធ្វើ​ទុក្ខ​បុក​ម្នេញ និង​ប្រឈម​ការ​ចោទ​ប្រកាន់ពីតុលាការ។​

លោកមានប្រសាសន៍ថា៖ «សម្រាប់ខ្ញុំ ពាន​រង្វាន់​នេះជាការ​លើក​ទឹក​ចិត្ត​ដ៏​ធំមួយ ហើយ​វាក៏​បាន​បង្ហាញ​ពី​ការយក​ចិត្ត​ទុក​ដាក់​របស់​សង្គម​ស៊ីវិល​ចំពោះ​អ្វី​ដែល​យើង​បានធ្វើ​នាពេល​កន្លង​មក» លោកបន្ថែមថា៖ «​វា​ក៏​បង្ហាញ​ដែរថា អ្វី​ដែល​យើង​បាន​ធ្វើ គឺ​ទទួល​ស្គាល់​ដោយ​សង្គម​ស៊ីវិល ដែល​វា​ខុស​ពី​អ្វី​ដែល​អាជ្ញាធរ​បាន​ចោទ​ប្រកាន់​មក​លើ​យើង»

ប្រែសម្រួលពីអត្ថបទភាសាអង់គ្លេស៖ Rights defenders urge government to restore civil space

76 views
ព័ត៌មានថ្មីៗ »
អត្ថបទពេញនិយម »