អ្នកនេសាទខ្មែរ២នាក់ក្នុងចំណោម៣នាក់ ត្រូវបានអាជ្ញាធរខេត្តត្រាតរបស់ប្រទេសថៃ ដឹកមកប្រគល់ឱ្យអាជ្ញាធរខេត្តកោះកុងរបស់កម្ពុជា នៅច្រកទ្វារព្រំដែនចាំយាម នៅព្រឹកថ្ងៃទី៧ ខែកញ្ញា បន្ទាប់ពីបានជាប់ពន្ធនាគារគ្រប់ចំនួន ទៅតាមការកាត់ទោសរបស់តុលាការថៃ ពីបទចូលនេសាទក្នុងដែនទឹកថៃ ដោយខុសច្បាប់។
សូមបញ្ជាក់ថា សំណុំរឿងនេះ ត្រូវបានក្រសួងការបរទេសកម្ពុជា ធ្វើការតវ៉ាទាមទារឱ្យអាជ្ញាធរថៃដោះលែងអ្នកនេសាទខ្មែរទាំង៣នាក់នេះ ចាប់តាំងពីមានការចាប់ខ្លួនកាលពីថ្ងៃទី២២ខែកុម្ភៈ ឆ្នាំ២០២៦មកម្ល៉េះ ដោយសំអាងថា យោធាជើងទឹកថៃ បានចូលមកចាប់ខ្លួនប្រជានេសាទខ្មែរទាំងនេះ និងទូកនេសាទរបស់ពួកគេ នៅក្នុងដែនទឹកកម្ពុជា ក្នុងខេត្តកោះកុង។ ប៉ុន្តែអាជ្ញាធរថៃមិនព្រមដោះលែងឡើយ។
លោក ឈិត រតនៈ អ្នកនាំពាក្យរដ្ឋបាលខេត្តកោះកុង បានប្រាប់សារព័ត៌មានខេមបូចាថា អ្នកនេសាទខ្មែរ២នាក់ក្នុងចំណោម៣នាក់ ដែលត្រូវបានយោធាជើងទឹកថៃចាប់ខ្លួនកាលពីថ្ងៃទី ២២ ខែកុម្ភៈ ឆ្នាំ២០២៦ ត្រូវបានអាជ្ញាធរថៃដោះលែងមកវិញហើយនៅថ្ងៃទី៧ ខែកញ្ញានេះ តាមច្រកព្រំដែនចាំយាម។
ពួកគេទាំង២នាក់ រួមមាន ទី១ឈ្មោះ ជួន សុភាព ភេទប្រុស អាយុ ៤២ឆ្នាំ រស់នៅខេត្តកំពតជាកម្មករទូកនេសាទ និងម្នាក់ទៀតឈ្មោះ នាង ចាន់ណា ភេទប្រុសអាយុ ២៧ឆ្នាំ ជាកម្មករទូកនេសាទ រស់នៅខេត្តកំពង់ចាម។
លោកបញ្ជាក់ថា៖ «ស្ថានភាពសុខភាពពួកគាត់ទាំងពីរនាក់ នៅមានភាពប្រក្រតីធម្មតាទេ។ ចាំមើលគាត់ត្រឡប់ទៅផ្ទះវិញ យើងនឹងតាមដានសុខភាពពួកគាត់បន្ត។ ចំពោះម្នាក់ទៀត ខាងភាគីថៃ មិនទាន់បានដោះលែងនឹងគឺឈ្មោះ ង៉ូវ រ័ត្ន ភេទប្រុសអាយុ៣២ឆ្នាំរស់នៅខេត្តកំពត គឺជាអ្នកបើកបរទូក ដែលអាជ្ញាធរថៃមិនទាន់ដោះលែងនៅឡើយទេ»។
បើតាមលោក ឈិត រតនៈ បន្ទាប់ពីបានទទួលអ្នកនេសាទខ្មែរទាំងពីរនាក់ ពីអាជ្ញាធរខេត្តត្រាតរបស់ថៃ នៅច្រកចាំយាម ពួកគាត់ត្រូវបានបញ្ជូនទៅកាន់លំនៅឋានរៀងៗខ្លួន។
បើទោះបីជាប្រទេសទាំងពីរ កើតមានជម្លោះព្រំដែនជាង១ឆ្នាំមកហើយយ៉ាងណាក្តី ក៏កិច្ចសហប្រតិបត្តិការ រវាងខេត្តកោះកុង និងខេត្តត្រាត គឺនៅមានទំនាក់ទំនងជាធម្មតា។
លោកបានថ្លែងថា៖ «អានេះវាជាកិច្ចការការទូត យើងត្រូវតែមានទំនាក់ទំនងគ្នាទៅវិញទៅមក ពីព្រោះករណីដែលមានពលករយើង ដែលត្រូវបានភាគីថៃបញ្ជូនមក តាមច្រកចាំយាម យើងក៏ត្រូវការទាក់ទងទៅកាន់ខេត្តត្រាតផងដែរ»។
ជាមួយគ្នានេះ អ្នកនាំពាក្យរដ្ឋបាលខេត្តកោះកុង បានអំពាវនាវដល់បងប្អូនប្រជានេសាទមេត្តានេសាទនៅតំបន់ទឹករាក់ ឬក៏ចៀសឆ្ងាយពីតំបន់ព្រំដែនទឹក រវាងកម្ពុជានិងថៃដើម្បីចៀសវាងបញ្ហាណាមួយ ដែលអាចកើតឡើងជាយថាហេតុ។
សារព័ត៌មានខេមបូចា មិនមានប្រភពទាក់ទង ដើម្បីស្នើសុំការអត្ថាធិប្បាយពីអ្នកនេសាទខ្មែរទាំងពីរនាក់ដែលត្រូវបានថៃដោះលែងមកវិញនោះទេ។ ប៉ុន្តែបើយោងតាមវីដេអូឃ្លីបដែលត្រូវបានបង្ហោះលើបណ្តាញសង្គម ឃើញកូនៗរបស់អ្នកនេសាទទាំងពីរនាក់ បានរត់ទៅអោបឪពុករបស់ពួកគេ ដោយក្តីនឹករឭក ហើយបានយំ។
លោក មឿន តុលា នាយកប្រតិបត្តិ អង្គការសម្ព័ន្ធភាពការងារ និងសិទ្ធិមនុស្ស (CENTRAL)បានលើកឡើងថា ប្រសិនបើប្រជានេសាទខ្មែរទាំងនោះពិតជាធ្វើការនេសាទ ស្ថិតនៅក្នុងដែនទឹករបស់កម្ពុជាពិតមែន មិនគួរត្រូវបានអាជ្ញាធរ ឬកងទ័ពបរទេស ចូលមកចាប់ខ្លួនពួកគាត់យកទៅនោះទេ ហើយបើមានការចាប់ខ្លួនដូចករណីខាងលើនេះ អាជ្ញាធរកម្ពុជា ត្រូវមានកិច្ចអន្តរាគមន៍ ហើយរិះរកមធ្យោបាយផ្សេងៗដើម្បីការពារប្រជាពលរដ្ឋខ្មែរដែលជាអ្នកនេសាទទាំងនោះ។
លោកថ្លែងថា៖ «អាហ្នឹងវាជារឿងមួយសំខាន់ វាជាតួនាទីរបស់រដ្ឋ ហីបើសិនជារដ្ឋអត់បានធ្វើរឿងហ្នឹងទេ អាហ្នឹងជាការខកខានរបស់អាជ្ញាធររដ្ឋ អាហ្នឹងចំណុចទី១។ ចំណុចទី២ គួរតែមានការណែនាំឱ្យបានច្បាស់លាស់ ទៅដល់ប្រជាពលរដ្ឋ ថាតើដែនទឹកត្រឹមណាដែលប្រជានេសាទយើងអាចធ្វើការនេសាទបាន ហើយដែនទឹកត្រឹមណា ដែលប្រជានេសាទមិនអាចចូលទៅនេសាទបាន ដើម្បីកុំឱ្យមានផលប៉ះពាល់ជាអវិជ្ជមានទៅដល់ពួកគាត់មានន័យថាត្រូវបានគេចាប់ខ្លួន»។
សម្រាប់លោក តុលា បើសិនជាមានកន្លែងណាមួយនៅលើដែនសមុទ្រ ដែលមិនមានភាពច្បាស់លាស់រវាងអាជ្ញាធរថៃ និងអាជ្ញាធរខ្មែរទេនោះ គឺត្រូវតែមានការពន្យល់ណែនាំទៅដល់ប្រជាពលរដ្ឋឱ្យបានច្បាស់លាស់ជាជាងគាត់ទៅនេសាទដោយគិតថា ទីនោះជាដែនទឹករបស់កម្ពុជា ហើយត្រូវបានយោធាបរទេសចាប់ខ្លួន។
ទាក់ទងទៅនឹងការពិន័យលោក មឿន តុលា យល់ថា វាមិនមែនជាកំហុសរបស់អ្នកនេសាទខ្មែរទាំងនោះទេ បើសិនជាដែនទឹកដែលពួកគាត់ទៅនេសាទ ជាដែនទឹករបស់កម្ពុជា ហើយអាជ្ញាធរគួរតែមានវិធានការក្នុងការជួយទៅដល់ពួកគេ។
សារព័ត៌មានខេមបូចា មិនអាចទាក់ទងលោក ចាន់ រតនា អ្នកនាំពាក្យក្រសួងការបរទេសកម្ពុជា ដើម្បីស្នើសុំធ្វើអត្ថាធិប្បាយលើបញ្ហានេះបានទេ នៅថ្ងៃទី៧ ខែកញ្ញា នេះ។ ប៉ុន្តែលោកចាន់ រតនា ធ្លាប់បានថ្លែងប្រាប់អ្នកសារព័ត៌មាន កាលពីពេលកន្លងមកថា តុលាការខេត្តត្រាតប្រទេសថៃ បានកាត់ទោសអ្នកនេសាទខ្មែរចំនួន៣នាក់ ក្នុងនោះ ២នាក់ ត្រូវកាត់ទោសឱ្យជាប់ពន្ធនាគារ ៤ខែ និងពិន័យជាប្រាក់ក្នុងម្នាក់ៗ ៩ម៉ឺនបាត (១០លានរៀល) និងអ្នកបើកបរទូកនេសាទម្នាក់ទៀត ត្រូវកាត់ទោសឱ្យជាប់ពន្ធនាការ ១ឆ្នាំ ៤ខែ និងពិន័យជាប្រាក់ជាង ២ម៉ឺនបាត (១៤លានរៀល)បើទោះបីជាមានការតវ៉ាជំទាស់យ៉ាងខ្លាំងជាបន្តបន្ទាប់ពីតំណាងកុងស៊ុលកម្ពុជា ប្រចាំនៅខេត្តស្រះកែវ ប្រទេសថៃយ៉ាងណាក៏ដោយ។
សូមបញ្ជាក់ថា កាលពីថ្ងៃទី២២ ខែកុម្ភៈ ឆ្នាំ២០២៦ ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីប្រកាសព័ត៌មានមួយ ទាមទារឱ្យប្រទេសថៃ ដោះលែងពលរដ្ឋកម្ពុជាដែលជាអ្នកនេសាទ៣នាក់ រួមនឹងទូកនេសាទរបស់ពួកគេវិញជាបន្ទាន់ បន្ទាប់ពីអ្នកទាំងនោះ ត្រូវបានកងទ័ពជើងទឹកថៃចាប់ខ្លួនក្នុងថ្ងៃដដែលនោះ។
ក្រសួងការបរទេសបញ្ជាក់ថា អ្នកនេសាទជនជាតិខ្មែរទាំង៣នាក់នោះ ត្រូវបានកងទ័ពជើងទឹកថៃ ចូលមកចាប់ខ្លួន កាលពីថ្ងៃទី២២ ខែកុម្ភៈ និងរឹបអូសទូកនេសាទរបស់ពួកគេ ត្រង់ទីតាំងស្ថិតនៅចម្ងាយជាង៧ម៉ាយល៍សមុទ្រ (៧,២ ម៉ាយល៍សមុទ្រ) ប្រហែលជាង១១គីឡូម៉ែត្រ (១១,២៦ គីឡូម៉ែត្រ) ពីកោះយ៉ ដែលស្ថិតក្នុងខេត្តកោះកុង។ សកម្មភាពនេះ គឺជាការរំលោភយ៉ាងច្បាស់លើអធិបតេយ្យ និងដែនទឹករបស់កម្ពុជា ព្រមទាំងច្បាប់អន្តរជាតិផងដែរ៕
