សមាគមសម្ព័ន្ធអ្នកសារព័ត៌មានកម្ពុជា

ខណៈសិស្សវិលចូលថ្នាក់រៀនវិញ អ្នកជំនាញកត់សម្គាល់ពីផលវិបាកបន្តមាន ក្រោយពីសាលាបិទទ្វាររយៈពេលយូរ

សិស្សវិលចូលសិក្សាក្នុងថ្នាក់រៀន បន្ទាប់ពីសាលារៀនបានបើកទ្វារឡើងវិញក្នុងរាជធានីភ្នំពេញ។ រូបថតកាលពីថ្ងៃទី១ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង
សិស្សវិលចូលសិក្សាក្នុងថ្នាក់រៀន បន្ទាប់ពីសាលារៀនបានបើកទ្វារឡើងវិញក្នុងរាជធានីភ្នំពេញ។ រូបថតកាលពីថ្ងៃទី១ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង

ស្រប​ពេល​សិស្ស​កំពុង​វិលត្រឡប់​មក​រៀន​ក្នុង​ថ្នាក់​​ជា​បន្តបន្ទាប់​ អ្នក​ជំនាញ​ចាប់ផ្តើម​កត់សម្គាល់​ពី​ផលប៉ះពាល់​ពី​ការ​សិក្សា​ពី​ចម្ងាយ​អស់រយៈពេល​ជិត​មួយ​ឆ្នាំ​កន្លះ​កន្លង​ទៅ​នេះ។​

អ្នកជំនាញ​និយាយ​ថា ការ​សិក្សា​របស់​សិស្ស​បាន​រង​ការ​ប៉ះពាល់​យ៉ាង​ខ្លាំង​ដោយសារ​តែ​សាលារៀន​បាន​បិទទ្វារ​អស់​រយៈពេល​យូរ​អំឡុងពេល​ការ​រាតត្បាត​ជំងឺ​កូវីដ១៩។ ហើយ​អ្វី​ដែល​គួរ​ឲ្យ​កត់សម្គាល់​ជាង​នេះ​គឺ កង្វះខាត​ការ​សិក្សា​តាម​ថ្នាក់រៀន​អំឡុងពេល​វិបត្តិ​ជំងឺ​កូវីដ១៩ បាន​កាត់បន្ថយ​លទ្ធភាព​ទទួល​បាន​ការ​អប់រំ​សម្រាប់​កុមារ​មួយ​ចំនួន ជាពិសេស​កុមារ​ដែល​រស់នៅ​តំបន់​ដាច់ស្រយាល និង​មក​ពី​គ្រួសារ​ក្រីក្រ។

ដោយ​សំដៅ​ទៅ​ការ​សន្និដ្ឋាន​ដូចនេះ ធនាគារ​ពិភពលោក និង​អង្គការ​ភាព​ជា​ដៃគូ​សកល​ដើម្បី​ការ​អប់រំ​កាល​ពី​ថ្ងៃទី​១៨ ខែ​មករា បាន​ប្រកាស​ផ្តល់​កញ្ចប់​ហិរញ្ញប្បទាន​ថ្មី​ចំនួន ៦៩.​២៥ លាន​ដុល្លារ​សម្រាប់​ការ​អភិវឌ្ឍ​វិស័យ​អប់រំ​នៅ​កម្ពុជា។ សេចក្តី​ថ្លែងការណ៍​រួម​ពី​អង្គការ​ទាំងពីរ​លើកឡើង​ថា ធនាគារ​នឹង​ផ្តល់​ឥណទាន​ចំនួន ៦០​លាន​ដុល្លារ​តាមរយៈ​សមាគម​អភិវឌ្ឍន៍​អន្តរជាតិ​ ស្រប​ពេល​អង្គការ​ភាព​ជា​ដៃគូ​សកល​ដើម្បី​ការ​អប់រំ​នឹង​ផ្តល់​ឥណទាន​ចំនួន ៩.២៥​លាន​ដុល្លារ។

សេចក្តីថ្លែងការណ៍​ខាង​លើ​នេះ​លើកឡើង​ថា ហិរញ្ញប្បទាន​នេះ​នឹង​ត្រូវ​ប្រើ​ដើម្បី​គាំទ្រ​ដល់​គម្រោង​លើកកម្ពស់​វិស័យ​អប់រំ​ទូទៅ​ (GEIP) រយៈពេល​​ប្រាំ​ឆ្នាំ​នៅ​ក្នុង​​ប្រទេស ដោយ​សំដៅ​ជួយ​កម្ពុជា​សម្រេច​គោលដៅ​ក្នុង​ការ​បង្កើត​និង​អភិវឌ្ឍន៍​ធនធាន​មនុស្សប្រកប​ដោយ​គុណភាព​ខ្ពស់​បំផុត​ ដើម្បី​ស្ថាបនា​សង្គម​មួយ​ដែល​ផ្អែក​លើ​ចំណេះ​ដឹង។ សេចក្តីថ្លែងការណ៍​ក៏​បាន​បន្ត​ថា រដ្ឋាភិបាល​កម្ពុជា​បាន​ប្តេជ្ញា​លើកកម្ពស់​គុណភាព​អប់រំ​សម្រាប់​កុមារ និង​ដោះស្រាយ​បញ្ហា​វិសមភាព​ក្នុង​ការ​ទទួល​បាន​ការ​អប់រំ​ប្រកប​ដោយ​គុណភាព។

អ្នក​នាំពាក្យ​ក្រសួង​អប់រំ​លោក រស់ សុវាចា បាន​ប្រាប់​ ខេមបូចា ថា ក្រសួង​ស្វាគមន៍​និង​សាទរ​កិច្ចសហប្រតិបត្តិការ​ជាមួយ​វិស័យ​ឯកជន និង​ដៃគូ​អភិវឌ្ឍ​ន៍ រួម​មាន​ ធនាគារ​ពិភពលោក​ ក្នុង​ការ​ជួយ​លើកកម្ពស់​គុណភាព​អប់រំ និង​ពង្រឹង​សុវត្ថិភាព​និង​សុខមាលភាព​សម្រាប់​ការ​បង្រៀន​និង​សិក្សា​អំឡុងពេល​វិបត្តិ​ជំងឺ​កូវីដ១៩។ ប៉ុន្តែ​លោក​សុំ​មិន​បញ្ចេញ​យោបល់​ពាក់ព័ន្ធ​នឹង​បែបផែន​ដែល​ក្រសួង​នឹង​អនុវត្ត​គម្រោង​នេះ។  

សេចក្តីថ្លែងការណ៍​ពី​ទីភ្នាក់ងារ​ផ្តល់​ហិរញ្ញប្បទាន​ខាង​លើ​ក៏​មិនបាន​បញ្ជាក់​លម្អិត​ពី​ការ​អនុវត្ត​គម្រោង​ផង​ដែរ។

​អ្នកស្រី Maryam Salim អ្នកគ្រប់គ្រង​នៃ​ធនាគារពិភពលោក​ប្រចាំ​នៅ​កម្ពុជា បាន​និយាយ​ក្នុង​សេចក្តីថ្លែងការណ៍​ថា ហិរញ្ញប្បទាន​នឹង​ផ្តោត​លើ​សិស្ស​ងាយរងគ្រោះ​ក្នុង​ការ​បោះបង់​ចោល​ការ​សិក្សា ដូចជា សិស្ស​ពិការ ឬ​សិស្ស​មក​ពី​គ្រួសារ​ក្រីក្រ ឬ​គ្រួសារ​ជនជាតិដើម​ភាគ​តិច។

អ្នកស្រី​បាន​ថ្លែង​ថា៖ «យើង​សង្ឃឹម​យ៉ាង​មុតមាំ​ថា គម្រោង​នេះ​នឹង​ដោះស្រាយ​បញ្ហា​ប្រឈម​ទាំង​នោះ និង​ធ្វើឲ្យ​អ្វីៗ​ប្រសើរ​ឡើង​វិញ»។

សេចក្តីថ្លែងការណ៍​បាន​លើកឡើង​ថា មាន​សកម្មភាព​មួយ​ចំនួន​ដែល​នឹង​ត្រូវ​អនុវត្ត​នៅ​ក្នុង​គម្រោង​ ដូចជា ការ​ដាក់បញ្ចូល​កម្មវិធី​នៅ​ក្នុង​ការ​គ្រប់គ្រង​តាម​សាលា ការ​លើកកម្ពស់​បរិស្ថាន​សិក្សា និងការ​ពង្រឹង​សមត្ថភាព​គ្រូបង្រៀន ថ្នាក់​ដឹកនាំ​សាលា គ្រូ​គរុ​កោសល្យ និង​បុគ្គលិក​ក្នុង​វិស័យ​អប់រំ​ជា​ដើម។

ស្រ្តី​ម្នាក់​បើកបរ​កាត់​សាលារៀន​បិទទ្វារ​មួយ​អំឡុងពេល​ការ​រាតត្បាត​ជំងឺ​កូវីដ១៩ នៅ​រាជធានី​ភ្នំពេញ។ រូបថត​កាល​ពី​ថ្ងៃទី១១ ខែ​មីនា ឆ្នាំ២០២១។ ខេមបូចា/ ព្រីង សំរាំង
ស្រ្តី​ម្នាក់​បើកបរ​កាត់​សាលារៀន​បិទទ្វារ​មួយ​អំឡុងពេល​ការ​រាតត្បាត​ជំងឺ​កូវីដ១៩ នៅ​រាជធានី​ភ្នំពេញ។ រូបថត​កាល​ពី​ថ្ងៃទី១១ ខែ​មីនា ឆ្នាំ២០២១។ ខេមបូចា/ ព្រីង សំរាំង

ទីភ្នាក់ងារ​អង្គការ​សហប្រជាជាតិ​ដូចជា អង្គការ Unicef បាន​កំណត់​ការ​បិទទ្វារ​សាលារៀន​រយៈពេល​យូរ​ជា​កត្តា​ដាក់​សម្ពាធ​យ៉ាង​ធំ​មួយ​សម្រាប់​កុមារ​ក្នុង​វ័យ​សិក្សា។ យោង​ទៅ​តាម​របាយការណ៍​របស់​អង្គការ Unicef ចុះ​ផ្សាយ​កាល​ពី​ខែ​មិថុ​នា​ឆ្នាំ​មុន ការ​បិទទ្វារ​សាលារៀន​រយៈពេល​​យូរ​អាច​ប៉ះពាល់​មិន​ត្រឹម​តែ​សមត្ថភាព​សិក្សា​របស់​សិស្ស​ប៉ុណ្ណោះ​ទេ ប៉ុន្តែ​ថែមទាំង​ទៅ​លើ​សុខភាព​ផ្លូវកាយ និង​ផ្លូវ​ចិត្ត​របស់​ពួកគេ​ផង​ដែរ។

កម្ពុជា​បាន​បិទ​គ្រឹះស្ថាន​សិក្សា​ទាំងរដ្ឋ​និង​ឯកជន​ទូទាំង​ប្រទេស​ជា​លើកដំបូង​ ក្នុង​ខែ​មីនា ឆ្នាំ​២០២០ នៅ​ពេល​មាន​​ការ​រាតត្បាត​ជំងឺ​កូវីដ១៩ រហូត​ដល់​ខែ​វិច្ឆិកា​ ឆ្នាំ​ដដែល​នេះ។ បន្ទាប់​មក​ សាលារៀន​បាន​បើកទ្វារ​ឡើង​វិញ​ក្នុង​រយៈពេល​ខ្លី មុន​ពេល​ត្រូវ​បិទទ្វារ​សាជាថ្មី​ ដោយសារ​ការ​ផ្ទុះ​ឆ្លង​ជំងឺ​កូវីដ១៩ ក្នុង​ព្រឹត្តិការណ៍​សហគមន៍ ២០​កុម្ភៈ ដែល​បាន​ចាប់ផ្តើម​ឲ្យ​មាន​ការ​ឆ្លងរាលដាល​ជា​បន្តបន្ទាប់។ រដ្ឋាភិបាល​បាន​ចាប់ផ្តើម​ធ្វើការ​បើកសាលារៀន​ឡើង​វិញ​ក្នុង​ទ្រង់ទ្រាយ​ធំ កាល​ពី​ដើម​ខែ​វិច្ឆិកា​ ឆ្នាំ​មុន ខណៈពេល​មាន​ការ​យុទ្ធនាការ​ចាក់វ៉ាក់សាំង​ទូទាំង​ប្រទេស។

យ៉ាង​ណាក៏ដោយ ទីភ្នាក់ងារ​អភិវឌ្ឍន៍​អន្តរជាតិ​ដែល​មាន​ទិសដៅ​ផ្តោត​លើ​ការ​អប់រំ​ដូចជា អង្គការ Unesco និយាយ​ថា បើ​ទោះ​បី​ជា​នៅ​ពេល​សាលារៀន​បាន​បើកទ្វារ​ឡើងវិញ នៅ​តែ​មាន​ការ​លំបាក​ក្នុង​ការ​ធានា​ថា កុមារ​និង​យុវជន​នឹង​ត្រឡប់​ទៅ​សិក្សា​ក្នុង​ថ្នាក់​រៀន​វិញ។

អង្គការ​ Unesco បាន​លើកឡើង​នៅ​ក្នុង​ការ​សេចក្តីថ្លែងការណ៍​ឆ្លើយតប​លើ​ផ្នែក​អប់រំ​អំឡុងពេល​វិបត្តិ​កូវីដ១៩ លើ​សាកល​លោក​ថា ឧបសគ្គ​ផ្នែក​សេដ្ឋកិច្ច​នឹង​បង្អាក់​សិស្ស​មិន​ឲ្យ​ចូល​សាលារៀន។ ស្រប​ជាមួយ​​នឹង​ការ​បិទទ្វារ​រយៈពេល​វែង ទីភ្នាក់ងារ​អង្គការសហប្រជាជាតិ​មួយ​នេះ​បាន​សរសេរ​ក្នុង​ន័យ​ដើម​ថា៖ «ផលវិបាក​ផ្នែក​សេដ្ឋកិច្ច​បាន​ដាក់សម្ពាធ​ឲ្យ​កុមារ​ទៅ​ធ្វើការ​និង​រកចំណូល​ដើម្បី​ជួយ​គ្រួសារ​ដែល​មាន​បន្ទុក​ផ្នែក​ហិរញ្ញវត្ថុ»។

​​យោង​តាម​ក្រសួង​អប់រំ នៅ​ឆ្នាំ​សិក្សា ២០១៩ និង២០២០ អត្រា​បោះបង់ចោល​ការ​សិក្សា​សម្រាប់​សិស្ស​នៅ​បឋមសិក្សា​បាន​កើនឡើង​ ៦,៨​ភាគរយ ធៀប​នឹង​ ៤,៤​ភាគរយ​កាល​ពី​ឆ្នាំ​មុន។

សម្រាប់​សិស្ស​នៅ​អនុវិទ្យាល័យ​ថ្នាក់​ទី៧ ដល់​ទី៩ អត្រា​បោះបង់​ចោល​ការ​សិក្សា​បាន​កើន​ឡើង​ពី ១៥,៨​ភាគរយ មក​ ១៨,៦​ភាគរយ។ អត្រា​បោះបង់​ចោល​ការ​សិក្សា​សម្រាប់​សិស្ស​វិទ្យាល័យ​ថ្នាក់​ទី១០ ដល់​ទី១២ មិន​បាន​ប្រែប្រួល​នោះ​ទេ ដោយ​ស្ថិត​នៅ​អត្រា ១៦,៩​ភាគរយ។

​​លោក Daniel Schmucking តំណាង​អង្គការ​សិក្សា​គោលនយោបាយ​ Konrad Adenauer Stiftung ប្រចាំ​កម្ពុជា និយាយ​ថា ការ​បិទសាលារៀន​ពិតជា​បង្ក​ការ​លំបាក​យ៉ាង​ខ្លាំង​សម្រាប់​សិស្ស​ដែល​មិន​មាន​គ្រឿងឧបករណ៍​ឌីជីថល​ដើម្បី​សិក្សា​តាម​ប្រព័ន្ធ​អនឡាញ។ លោក​បាន​ថ្លែង​ថា កាល​ពី​គ្រា​នោះ គ្រូបង្រៀន​មិន​បាន​ទទួល​ការ​ហ្វឹកហ្វឺន​ពី​ការ​បង្រៀន​តាម​ប្រព័ន្ធ​អនឡាញ​នោះ​ទេ។

​​លោក​បាន​ថ្លែង​ថា៖ «គួរ​ឲ្យ​សោកស្តាយ រហូត​មក​ដល់​ពេល​នេះ សាលារៀន និង​មហាវិទ្យាល័យ​មួយ​ចំនួន​នៅ​តែ​បន្ត​បិទទ្វារ និង​បន្ត​ជាមួយ​នឹង​ការ​សិក្សា​តាម​ប្រព័ន្ធ​អនឡាញ»។ លោកបន្ថែមថា៖ « ស្រប​ពេល​កម្ពុជា​កំពុង​បើក​សេដ្ឋកិច្ច​ឡើង​វិញ​ ជា​ការ​សំខាន់​ដែល​សាលារៀន និង​មហាវិទ្យាល័យ​វិល​ត្រឡប់​មក​ការ​សិក្សា​ក្នុង​ថ្នាក់​រៀន​វិញ​ឲ្យ​បាន​ឆាប់រហ័ស ដែល​នេះ​អាច​ជួយ​ឲ្យ​សិស្ស​តាមទាន់​នូវ​អ្វី​ដែល​ពួកគេ​ខកខាន​រៀន​អំឡុងពេល​វិបត្តិ​ជំងឺកូវីដ១៩»។

​​អ្នកស្រី អ៊ុក ឆាយ៉ាវី ប្រធាន​សមាគម​គ្រូបង្រៀន​ឯករាជ្យ​ បាន​​ប្រាប់​ ខេមបូចា ថា វិសមភាព​​ក្នុង​ការ​ទទួល​បាន​ការ​អប់រំ​គឺ​ចោទ​ជា​បញ្ហា​រួច​ស្រាប់​ទៅ​ហើយមុន​ពេល​មាន​វិបត្តិ​ជំងឺ​កូវីដ១៩ ហើយ​វា​កាន់​តែ​ធ្ងន់ធ្ងរ​អំឡុងពេល​វិបត្តិ​ជំងឺ​នេះ។

អ្នកស្រី​បាន​ថ្លែង​ថា៖ «សិស្សានុសិស្ស ជាពិសេស​អ្នក​ដែល​រស់​នៅ​តំបន់​ដាច់ស្រយាល​ តែង​ជួប​ការ​លំ​បាក​អំឡុងពេល​សិក្សា​តាម​អនឡាញ»។ អ្នកស្រីបន្ថែមថា៖ «ហើយ​ជាមួយ​គ្នា​នេះ កង្វះខាត​ឧបករណ៍​ឌីជីថល និង​សេវា​អ៊ីនធឺណិត​ខ្សត់ខ្សោយ​​គឺ​ជា​បញ្ហា​ចម្បង​ពីរ​ ដែល​ពួកគេ​បាន​ជួប​ប្រទះ»។

លោក​ រចំ សាមឿន គ្រូបង្រៀន​មួយ​រូប​នៅ​សាលាបឋមសិក្សា​ តាកុកភ្នង ក្នុង​ស្រុក​អូយ៉ាដាវ​ ខេត្ត​រតនគិរី​និយាយ​ថា សូម្បី​តែ​ការ​សិក្សា​ក្នុង​ថ្នាក់​រៀន​វិលត្រឡប់​មក​វិញ​ក៏​ពិតមែន​ សិស្ស​ដែល​ភាគច្រើន​មក​លើ​សហគមន៍​ជនជាតិ​ដើមភាគ​តិច​នៅ​តែ​មាន​ការ​លំបាក​ក្នុង​ការ​ចូលរៀន​វិញ​ ដោយសារ​តែ​ពួកគេ​ត្រូវ​ជួយ​គ្រួសារ​ធ្វើ​ស្រែចម្ការ។

លោក​បាន​ថ្លែង​ថា៖ «ឪពុកម្តាយ​មិន​សូវ​គាំទ្រ​ពួកគេ​ឲ្យ​រៀន​សូត្រ​នោះ​ទេ ប៉ុន្តែ​ចង់​ឲ្យ​ពួកគេ​ជួយ​ការងារ​ច្រើន​ជាង។ ឧទាហរណ៍ មក​ទល់​ពេល​ឥឡូវ​នេះ សិស្សភាគច្រើន​អវត្តមាន​ ពីព្រោះ​ពួកគេ​ត្រូវ​ជួយ​ឪពុកម្តាយ​ប្រមូលផល​ដំណាំ»។ លោកបន្ថែមថា៖ «ហើយ​ដោយសារ​តែ​ហេតុផល​នេះ សិស្ស​មួយ​ចំនួន​ប្រហែល​សម្រេច​ចិត្ត​ឈប់​រៀន នៅ​ពេល​ដែល​ពួកគេ​រៀន​មិន​ទាន់​សិស្ស​ដទៃ​ទៀត»

ប្រែសម្រួលពីអត្ថបទភាសាអង់គ្លេស៖ With students back in class, experts note lasting impact of school closures

98 views

ព័ត៌មានថ្មី

អត្ថបទពេញនិយម