រដ្ឋាភិបាលកម្ពុជានឹងធ្វើទំនើបកម្មយោធាឱ្យមានសមត្ថភាពខ្ពស់ក្នុងការការពារពីការវាយប្រហាររបស់ខ្មាំងដែលមានបច្ចេកវិទ្យាទំនើប ដោយធ្វើការកសាងសមត្ថភាព និងការពង្រឹងរចនាសម្ព័ន្ធកងទ័ព ព្រមទាំងបង្កើតអង្គភាពជំនាញនានាដើម្បីឆ្លើយតបនឹងតម្រូវការនិងការគំរាមកំហែងថ្មីៗ។
អ្នកវិភាគបានអំពាវនាវឱ្យកម្ពុជាចាប់យកកិច្ចសហការជាពហុភាគីដើម្បីអភិវឌ្ឍសមត្ថភាពយោធា ដោយសារប្រទេសលោកសេរីមានជំនាញខ្ពស់ផ្នែកបច្ចេកវិទ្យាប្រឆាំងភេរវកម្មតាមប្រព័ន្ធអ៊ីនធឺណិត។
ថ្លែងក្នុងខួបលើកទី២៥ឆ្នាំនៃការបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ថ្ងៃទី២៤ ខែមករា ឆ្នាំ២០២៤ លោកនាយករដ្ឋមន្រ្តី ហ៊ុន ម៉ាណែត លើកឡើងថា ការធ្វើទំនើបកម្មកងទ័ពនេះ ដើម្បីធានាថា យោធាកម្ពុជាមានសមត្ថភាពគ្រប់គ្រាន់ក្នុងការការពារដែនអធិបតេយ្យភាព សន្តិសុខ និងឯករាជ្យជាតិរបស់ខ្លួន។
លោកនាយករដ្ឋមន្រ្តី ក៏បានបញ្ជាក់ថា កម្ពុជាមិនអនុញ្ញាតឱ្យមានកងកម្លាំងបរទេសដាក់មូលដ្ឋានទ័ពលើទឹកដីរបស់ខ្លួនឡើយ។ លោកបន្តថា លោកបានជួបជាមួយបណ្ដាទូតមួយចំនួននៅកម្ពុជា កាលពីពេលកន្លងទៅ ហើយគេទទួលស្គាល់ថា ក្រុមមនុស្សអាក្រក់ដែលចង់បំផ្លាញសន្តិភាពពិភពលោកកំពុងមានបច្ចេកវិទ្យាកាន់តែទំនើប។
ចំពោះការធ្វើឱ្យប្រសើរឡើងនូវវិស័យយោធា លោក បានអះអាងថា កងកម្លាំងថ្មើរជើងទាំងអស់ត្រូវបានដាក់ឱ្យស្ថិតក្រោមបញ្ជាការដ្ឋានកងទ័ពជើងគោក ហើយអង្គភាពមួយចំនួននឹងបង្កើតឡើងក្នុងករណីមានបញ្ហានិងការគំរាមកំហែងថ្មីៗដែលកើតមាន។
លោកបញ្ជាក់ថា ការប្រឈមមុខនឹងហានិភ័យនៃអំពើភេរវកម្ម ការវាយប្រហារតាម អ៊ីនធឺណិត និងការប្រើប្រាស់បច្ចេកវិទ្យាទំនើបក្នុងប្រតិបត្តិការយោធា រាប់ទាំងយន្តហោះឌ្រូន និងផ្កាយរណបសម្រាប់ស៊ើបការជាដើម ដែលទាមទារឱ្យយោធាកម្ពុជាត្រូវការអភិវឌ្ឍសមត្ថភាពរបស់ខ្លួនតាមការវិវត្តនៃបច្ចេកវិទ្យានេះ។
ជុំវិញការពង្រឹងសមត្ថភាព និងរចនាសម្ព័ន្ធកងទ័ព លោកនាយករដ្ឋមន្រ្តីថ្លែងថា មានទាំងការកែសម្រួលកម្មវិធីហ្វឹកហ្វឺន និងការរៀបចំរចនាសម្ព័ន្ធស្ថាប័នកងទ័ពឱ្យរឹងមាំ តាមរយៈការអភិវឌ្ឍជំនាញក្នុងការដឹកនាំបញ្ជា ការបង្កើតសាលាយោធាបន្ថែម និងការជួយផ្គត់ផ្គងដល់យោធាចារ្យក្នុងការស្រាវជ្រាវលើកម្មវិធីសិក្សារបស់កងទ័ព។ សាលាយោធាត្រូវបណ្ដុះបណ្ដាលលើជំនាញរថក្រោះ កាំភ្លើងធំ និងការពារដែនអាកាស។
បន្ទាប់ពីទទួលបានការបណ្ដុះបណ្ដាលអំពីការប្រើប្រាស់បច្ចេកវិទ្យាយោធាមានលក្ខណៈទំនើប លោកនាយករដ្ឋមន្រ្តីថា កងទ័ពនឹងមានសមត្ថភាពក្នុងការការពារ ឬវាយបកទៅកាន់សត្រូវដែលមានបច្ចេកវិទ្យាខ្ពស់ត្រលប់ទៅវិញ។
បន្ថែមពីលើនេះ លោកបន្តថា កម្ពុជាក៏នឹងបង្កើនកិច្ចសហប្រតិបត្តិការជាមួយបណ្ដាប្រទេសជាច្រើនដើម្បីដោះស្រាយបញ្ហារួមជាសកល ដូចជា ឧក្រិដ្ឋឆ្លងដែន និងភេរវកម្មជាដើម។
លោកបន្ថែមថា៖«គោលដៅក្នុងការធ្វើបរិវត្តន៍នៃកងកម្លាំងប្រដាប់អាវុធយើង ទៅជាកម្លាំងទំនើបមានសមត្ថភាព ធានាបាននូវភាពម្ចាស់ការក្នុងការការពារអធិបតេយ្យភាព សុខសន្តិភាព និងឯករាជ្យភាពរបស់ជាតិ»។
ខេមបូចាមិនអាចសូមការអត្ថាធិប្បាយបន្ថែមពីអ្នកនាំពាក្យក្រសួងការពារជាតិ លោក ឈុំ សុជាតិ និងអ្នកនាំពាក្យបញ្ជាការដ្ឋានកងទ័ពជើងទឹក លោក ទៀ វិចិត្រ បានទេ ដោយសារទូរសព្ទខលចូល ប៉ុន្តែអត់មានអ្នកទទួល ខណៈអ្នកនាំពាក្យបញ្ជាការដ្ឋានកងទ័ពជើងគោក លោក ម៉ៅ ផល្លា ថា លោកចាំបាច់សុំការអនុញ្ញាតពីមេបញ្ជាការទ័ពជើងគោក លោក ម៉ៅ សុផាន់ ជាមុនសិន ខណៈមេបញ្ជាការកងទ័ពជើងគោក លោក ម៉ៅ សុផាន់ មិនអាចទាក់ទងបាន។
ដោយឡែក លោក ម៉ី ឌីណា មេបញ្ជាការមូលដ្ឋានសមុទ្រ បានអះអាងថា ការធ្វើទំនើបកម្មយោធា គឺរួមបញ្ជូលទាំងការធ្វើឱ្យប្រសើរនូវសមត្ថភាព កងទ័ពជើងទឹក ជើងគោក និងអាកាស។ តែយ៉ាងណាលោកមិនទាន់អាចរៀបរាប់បានទេថា តើកងទ័ពជើងទឹកនឹងធ្វើទំនើបកម្មយ៉ាងដូចម្ដេច។
លោកបញ្ជាក់ថា៖«ធ្វើតែកម្រិតណាមិនទាន់អាចបង្ហាញបាន»។
ដើម្បីអភិវឌ្ឍសមត្ថភាពកងទ័ពកម្ពុជាឱ្យមានកម្រិតខ្ពស់ លោក សំរិទ្ធ សារ៉េត មេបញ្ជាការកងពលតូចអន្តរាគមន៍លេខ៥ មានប្រសាសន៍ថា ការធ្វើទំនើបកម្មយោធា គឺជាជម្រើសដ៏ល្អបំផុត។លោក សារ៉េត បន្តថា សព្វាវុធនៅកងពលរបស់លោកមិនទាន់មានលក្ខណៈស្តង់ដារនៅឡើយ ហើយលោកក៏បានស្នើសុំបន្ថែមកងទ័ពចំនួនទៀតសម្រាប់អង្គភាពនេះ។
លោកបន្ថែមថា៖ «តាមអនុសាសន៍របស់សម្ដេចធិបតី ហ៊ុន ម៉ាណែត ល្អហើយ ព្រោះទ័ពឥឡូវត្រូវការទំនើបកម្មទាំងអស់ហ្នឹង»។
លោក ឈុំ ខេង មេបញ្ជាការកងពលតូចអន្តរាគមន៍លេខ៦ គាំទ្រចំពោះការសម្រេចរបស់លោក នាយករដ្ឋមន្រ្តី ហើយលោកយល់ថា ការធ្វើទំនើបកម្មនេះ ជារឿងល្អសម្រាប់យោធាកម្ពុជា។
ដោយឡែក លោក អ៊ុក ចន្ធា លេខាកងពលតូចអន្តរាគមន៍លេខ៦ បានបន្ថែមថា ការធ្វើទំនើបកម្មយោធានេះនឹងធ្វើឱ្យកងទ័ពមានសមត្ថភាពខ្លាំងក្លាជាងមុនក្នុងការការពារដែនអធិបតេយ្យភាពរបស់ជាតិ។
បើតាមលេខារូបនេះ បច្ចុប្បន្នកងពលតូចលេខ៦ ត្រូវការសព្វាវុធទំនើបៗបន្ថែមទៀត រួមមានកាំភ្លើងបាញ់យន្តហោះ និងរថក្រោះផងដែរ ដោយសារបច្ចុប្បន្នសព្វាវុធទាំងនោះមានលក្ខណៈសាមញ្ញពេក។
លោកបញ្ជាក់ថា៖«ទំនើបកម្មនឹងល្អអាចទប់ទល់សត្រូវបាន ព្រោះអីឡូវនេះកងទ័ពអីមានអាវុធថ្មីៗដែរ ដូចថាមានគូសត្រូវអីពាក់ព័ន្ធនឹងបញ្ហាព្រំដែនអីយើងអត់ខ្លាចសត្រូវ»។
អ្នកវិភាគនយោបាយ លោក ឯម សុវណ្ណរ៉ា គាំទ្រចំពោះការធ្វើឱ្យប្រសើរឡើងនូវសមត្ថភាពយោធាកម្ពុជា ហើយលោកជំរុញឱ្យការធ្វើទំនើបកម្មនេះឱ្យបានលឿន និងពង្រីកវិសាលភាពឱ្យបានច្រើនផ្នែក។
ទន្ទឹមនេះ អ្នកវិភាគនយោបាយរូបនេះ យល់ថា ការធ្វើទំនើបកម្មយោធា កម្ពុជាគួរតែមានការកិច្ចសហការជាមួយបណ្ដាប្រទេសជឿនលឿនជាច្រើនដើម្បីពង្រឹងបច្ចេកវិទ្យាយោធាតាមប្រព័ន្ធអ៊ីនធឺណិតមិនមែនគ្រាន់តែផ្ដោតលើប្រទេសចិនមួយប៉ុណ្ណោះ។
លោកថ្លែងថា៖ «បច្ចេកវិទ្យាប្រឆាំងភេរវកម្មតាមប្រព័ន្ធអ៊ីនធឺណិតអី ចិនមានកម្រិតទេ មិនអាចរីកចម្រើនទាន់លោកខាងលិច លោកខាងលិចគេមានមធ្យោបាយច្រើន»៕