ព័ត៌មានជាតិ, សង្គម

កម្ពុជាឈ្នះមេដាយមាសគុនខ្មែរជើងឯកអាស៊ីចំនួន៣៥ ប៉ុន្តែតិចជាងម្ចាស់ផ្ទះវៀតណាម

៨ កញ្ញា ២០២៦ ម៉ោង ១០:៥៨ ព្រឹក
ស៊ា បញ្ញា

ប្រទេសវៀតណាម៖ ការប្រកួតគុនខ្មែរជើងឯកអាស៊ី លើកទី១ ឆ្នាំ២០២៦ នៅទីក្រុង Can Tho ប្រទេសវៀតណាម បានបិទបញ្ចប់ ដោយជោគជ័យ កាលពីយប់ថ្ងៃទី៨ ខែកញ្ញា ហើយជាលទ្ធផលម្ចាស់ផ្ទះវៀតណាម ដណ្តើមបានមេដាយមាសច្រើនជាងគេ និងតាមពីក្រោយដោយកម្ពុជា ជាម្ចាស់ក្បាច់គុន ចំណែកចិន ឡាវ និងឥណ្ឌូនេស៊ី ក៏ដណ្តើមបានមេដាយមាសផងដែរ។

តាមរយៈការប្រកួតចំនួន៥ថ្ងៃ ក្រុមអត្តពលិកកម្ពុជា ដណ្តើមបានមេដាយមាសនាំមុខលើម្ចាស់ផ្ទះវៀតណាម ជាបន្តបន្ទាប់ ប៉ុន្តែសម្រាប់ការប្រកួតចំនួន១៤វិញ្ញាសាចុងក្រោយ កាលពីថ្ងៃចន្ទ ដែលជាថ្ងៃបិទកម្មវិធីនោះ វៀតណាម ដណ្តើមបានមេដាយមាសបន្ថែមចំនួន១១ទៀត ហើយការឈ្នះបានមេដាយមាស៣៨ ប្រាក់៣០ និងសំរឹទ្ធ៧នេះ បានជួយឱ្យវៀតណាម ឈរនៅចំណាត់ថ្នាក់លេខ១ លើកម្ពុជាវិញ ដែលឈ្នះបានមេដាយមាស៣៥ ប្រាក់២៧ និងសំរឹទ្ធ៩។

ចំណែក ឥណ្ឌូនេស៊ី បានឈ្នះមេដាយមាស១ ប្រាក់៥ សំរឹទ្ធ៣ តាមពីក្រោយដោយឡាវ ដែលឈ្នះបានមេដាយមាស១ ប្រាក់២ សំរឹទ្ធ១ ចំណែកប្រទេសចិន ហ្វីលីពីន និងម៉ាឡេស៊ី ក៏ទទួលបានមេដាយមាសម្នាក់១គ្រឿង រួមជាមួយមេដាយប្រាក់ និងសំរឹទ្ធមួយចំនួនទៀតផងដែរ ខណៈ៤ប្រទេសទៀត បានត្រឹមមេដាយប្រាក់ និងសំរឹទ្ធ ត្រឡប់ទៅវិញ។

ថ្លែងនៅក្នុងពិធីបិទការប្រកួត កាលពីយប់ថ្ងៃចន្ទនោះ លោក ខូវ ឆាយ អគ្គលេខាធិការសហព័ន្ធគុនខ្មែរអន្តរជាតិ និងប្រធានសហព័ន្ធកីឡាប្រដាល់គុនខ្មែរ បានកោតសរសើរ ទៅដល់ប្រតិភូទាំង១២ប្រទេស ដែលបានចូលរួមក្នុងការប្រកួតគុនខ្មែរជើងឯកអាស៊ី លើកទី១ ឆ្នាំ ២០២៦ នៅប្រទេសវៀតណាមនេះ ហើយការខិតខំប្រឹងប្រែង និងការលះបង់របស់គ្រប់ភាគីពាក់ព័ន្ធ ជាពិសេសម្ចាស់ផ្ទះវៀតណាម បានចូលរួមចំណែកយ៉ាងសំខាន់ក្នុងភាពជោគជ័យនៃព្រឹត្តិការណ៍ជាប្រវត្តិសាស្ត្រនេះ។

លោកបានថ្លែងថា៖ «ព្រឹត្តិការណ៍នេះមានអត្ថន័យលើសពីការដណ្ដើមមេដាយ។ វាបានប្រមូលផ្ដុំកីឡាករ កីឡាការិនី គ្រូបង្វឹក មន្ត្រីបច្ចេកទេស និងថ្នាក់ដឹកនាំកីឡាមកពីបណ្ដាប្រទេសនានានៅទូទាំងអាស៊ី។ វាបានផ្ដល់ឱកាសឱ្យយើងផ្លាស់ប្ដូរបទពិសោធន៍ ពង្រឹងកិច្ចសហប្រតិបត្តិការ និងកសាងចំណងមិត្តភាពយូរអង្វែងតាមរយៈកីឡា គឺយើងរួមគ្នាកសាងអនាគតដ៏រឹងមាំសម្រាប់គុនខ្មែរ»។

យ៉ាងណាក៏ដោយ លោក ខូវ ឆាយ បានទទួលស្គាល់ថា ការរៀបចំការប្រកួតគុនខ្មែរជើងឯកអាស៊ីនេះ នៅមានចំណុចខ្វះខាតមួយចំនួន ដែលត្រូវកែប្រែបន្ថែមទៀត ព្រោះនេះជាការរៀបចំលើកដំបូង ដែលតែងតែមានការលំបាក ប៉ុន្តែយើងធ្វើបានប៉ុណ្ណោះ គឺល្អប្រសើរហើយ ហើយជាបន្តបន្ទាប់ទៀត កាន់តែប្រសើរ ព្រោះនេះជាមុខមាត់គុនខ្មែរយើងទាំងមូលតែម្តង។

លោកបានបញ្ជាក់ថា៖ «នេះជាព្រឹត្តិការណ៍របស់យើង ហើយប្រទេសនៅក្នុងតំបន់អាស៊ី បានចូលរួមប្រកួតដណ្តើមយកមេដាយគុនខ្មែររបស់យើង។ ទោះបីជា វៀតណាម ដណ្តើមបានមេដាយមាសច្រើន ប៉ុន្តែមេដាយទាំងអស់ សុទ្ធតែជាមេដាយគុនខ្មែរ អ៊ីចឹងគេយកទៅផ្សព្វផ្សាយគុនខ្មែររបស់យើងទេ ហើយក្នុងនាមយើងជាម្ចាស់ក្បាច់គុន មិនមែនថា យើងអន់ទេ តែយើងចង់ផ្តល់ឱកាសឱ្យប្រទេសចូលរួមទាំងអស់ បានប្រកួតប្រជែងយកមេដាយ»។

លោក ខូវ ឆាយ បានឱ្យដឹងទៀតថា យើងបានបញ្ចូនមកតែ៦៤នាក់ ចំណែកម្ចាស់ផ្ទះវៀតណាម បានដាក់អត្តពលិកចូលរួមដល់៩៦នាក់ អ៊ីចឹងប្រាកដណាស់ គេមានឱកាសប្រកួតប្រជែងយកមេដាយកាន់តែច្រើន ចំណែកកម្ពុជាមិនបានយកកម្រិត A មកទេ ហើយកម្រិត B ក៏យកមកតិចដែរ។

លោកបានថ្លែងថា៖ «យើងចង់ផ្តល់ឱកាសឱ្យអត្តពលិកថ្នាល ដែលកំពុងមានសក្តានុពល អ៊ីចឹងយើងនៅតែមានមោទនភាព នៅពេលឃើញថ្នាលរបស់យើង ធ្វើបានល្អបែបនេះ ខណៈម្ចាស់ផ្ទះវៀតណាម គេដាក់សុទ្ធតែជម្រើសជាតិ ដោយសារគេចង់ឈ្នះ និងបង្ហាញទៅដល់ប្រជាពលរដ្ឋគេ ដើម្បីឱ្យមានការគាំទ្រដល់វិស័យគុនខ្មែរ ជាកីឡាជាតិរបស់យើង អ៊ីចឹងយើងចូលរួមអបអរដល់ម្ចាស់ផ្ទះវៀតណាម ដែលទទួលបានចំណាត់ថ្នាក់លេខ១នេះ»។

នៅក្នុងការប្រកួតនេះ គណៈកម្មការរៀបចំការប្រកួត ហាក់មានភាពលម្អៀងខ្លះទៅលើម្ចាស់ផ្ទះវៀតណាម ជុំវិញការកាត់សេចក្តី និងការកំណត់ទម្ងន់ប្រកួត ដោយកីឡាករកីឡាការិនីកម្ពុជាមួយចំនួន ត្រូវបានរៀបចំឱ្យប្រកួតជាមួយអត្តពលិកវៀតណាម ដែលមានទម្ងន់លើសខ្លួន ចាប់ពីចន្លោះ ១ទៅ៦គីឡូក្រាម ប៉ុន្តែអត្តពលិកកម្ពុជា នៅតែយល់ព្រមប្រកួត ព្រោះពួកគេយល់ថា ការផ្សព្វផ្សាយ និងការបង្ហាញភាពខ្លាំងរបស់ «គុនខ្មែរ» វាសំខាន់ជាងការឈ្នះបានមេដាយមាសទៅទៀត។

ក្រុមកីឡាករ កីឡាការិនី និងគណៈប្រតិភូកម្ពុជា ថតជាមួយគ្នា បន្ទាប់ពីការប្រកួតថ្ងៃចុងក្រោយ ថ្ងៃទី៧ ខែកញ្ញា ឆ្នាំ២០២៦ នៅទីក្រុង Can Tho ប្រទេសវៀតណាម។ (ខេមបូចា/ស៊ា បញ្ញា)

កីឡាការិនីជាម្ចាស់មេដាយមាសស៊ីហ្គេម មឿយ សឹង បានទទួលយកលទ្ធផលចាញ់កីឡាការិនីវៀតណាម Vo Thi Ngoc Phoung ក្នុងការប្រកួតផ្តាច់ព្រ័ត្រទម្ងន់ ៦៣,៥គីឡូក្រាម បើទោះបីជាការប្រកួតនេះកីឡាការិនីវ័យ ២៦ឆ្នាំរូបនេះ មានទម្ងន់ស្រាលជាងគូប្រកួតម្នាក់នេះ ចំនួន ៥,៥គីឡូក្រាមក៏ដោយ។

មឿយ ស៊ឹង បាននិយាយក្រោយការប្រកួតថា៖ «ការសម្រេចឱ្យចាញ់ដោយពិន្ទុនេះ ខ្ញុំទទួលយកបាន។ យើងតគីឡូឱ្យគេ តែយើងនៅតែប្រឹងប្រែងប្រកួតឱ្យអស់ពីសមត្ថភាព ព្រោះខ្ញុំចង់ដណ្តើមយកមេដាយមាស គ្រាន់តែថា គេធំជាងយើងពេក គឺប្រៀបដូចកូនក្មេងវាយជាមួយមនុស្សចាស់ ប៉ុន្តែនៅក្នុងកីឡាបែបហ្នឹង ហេតុនេះខ្ញុំអត់បាក់ទឹកចិត្តទេ។ ការបរាជ័យ វាជាមេរៀន ធ្វើឱ្យយើងកាន់តែខំប្រឹងប្រែងថែមទៀត ដើម្បីឈានទៅសម្រេចគោលដៅធំ»។

ផ្ទុយពីនេះកីឡាករ ឯម ទិត្យ ដែលគេស្គាល់ថា ជាកីឡាករ ប៉ែនកាក់ អាត្នោត នោះ មិនបានគិតដូច មឿយ ស៊ឹង នោះទេ។ អាត្នោត មានកំហឹងក្នុងចិត្ត នៅពេលឃើញមិត្តរួមជាតិរបស់ខ្លួន បានចាញ់អត្តពលិកវៀតណាមជាបន្តបន្ទាប់ សម្រាប់ការប្រកួតកាលពីថ្ងៃចន្ទនោះ ជាពិសេសការចាញ់ដោយសន្លប់ ហើយនេះជាមូលហេតុដែល អាត្នោត ខំប្រឹងវាយសម្រុក ដើម្បីផ្តួលកីឡាករវៀតណាម Dang Vu Phong ឱ្យសន្លប់នៅទឹកទី២វិញ សម្រាប់ការប្រកួតកម្រិត A ទម្ងន់ក្រោម ៧០គីឡូក្រាម។

កីឡាករ ឯម ទិត្យ បាននិយាយក្រោយការប្រកួតថា៖ «នៅថ្ងៃនេះ ខ្ញុំឃើញខ្មែរយើងចាញ់ច្រើន ហើយសំខាន់ខ្ញុំឃ្លានវ៉ៃតែម្តង ព្រោះខ្ញុំបានធ្វើគីឡូរង់ចាំការប្រកួតនេះចូល៧ថ្ងៃហើយ។ តាមពិតខ្ញុំចង់ផ្តួលគេឱ្យសន្លប់នៅទឹកទី១ គ្រាន់កម្លាំងនៅពេញដូចគ្នា មិនអាចធ្វើបាន តែខ្ញុំបានផ្តួលគេឱ្យសន្លប់នៅទឹកទី2 ហើយខ្ញុំពិតជាសប្បាយចិត្តខ្លាំងមែនទែន ដែលបានលើកទង់ជាតិ នៅក្រៅប្រទេស និងយកមេដាយមាសយកទៅជូនជាតិវិញ»។

ចំណែកកីឡាការិនីកម្ពុជា ស្រេង ស្រីនាត ដែលទើបទទួលបានឱកាសមកប្រកួតនៅក្រៅប្រទេសជាលើកដំបូងនោះ ត្រូវបានដាក់ឱ្យប្រកួតជាមួយកីឡាការិនីជើងខ្លាំង និងជាម្ចាស់មេដាយមាសពិភពលោករបស់វៀតណាម Phung Thi Hong Tham ក្នុងទម្ងន់ក្រោម៦០គីឡូក្រាម ប៉ុន្តែរឿងដ៏គួរឱ្យភ្ញាក់ផ្អើលបំផុតនោះ ស្រីនាត បែរជាអាចយកឈ្នះជើងខ្លាំងចាស់វស្សារបស់វៀតណាមម្នាក់នេះ ដោយពិន្ទុដាច់។

មិនទាន់ទាំងបាត់ហត់ពីការប្រកួតផងនោះ ស្រេង ស្រីនាត បាននិយាយដោយរំភើបថា៖ «នេះជាលើកទី១ ដែលខ្ញុំបានមកប្រកួតនៅក្រៅប្រទេស។ ខ្ញុំមានអារម្មណ៍ភ័យដែរ នៅពេលដឹងថា ដៃគូរបស់ខ្ញុំ ជាជើងខ្លាំង និងជាគ្រូបង្វឹកជម្រើសជាតិនៅទីនេះ ប៉ុន្តែការលើកទឹកចិត្តរបស់គ្រូបង្វឹក និងជនរួមជាតិ ធ្វើឱ្យខ្ញុំលែងខ្លាចអ្វីទាំងអស់ ពេលឡើងដល់លើសង្វៀន ហើយខ្ញុំពិតជារំភើបខ្លាំងណាស់ ចំពោះការដណ្តើមបានមេដាយជូនជាតិ សម្រាប់ការចេញមកប្រកួតនៅក្រៅប្រទេស ជាលើកដំបូងនេះ»។

ចំណែកលោក ផាត សូដា ដែលជាគ្រូធំ ដឹកនាំក្រុមប្រតិភូកីឡាកម្ពុជា សម្រាប់ការប្រកួតនេះ បាន កោតសរសើរទៅដល់ក្រុមអត្តពលិកកម្ពុជាទាំងអស់ ដែលបានប្រឹងប្រែងប្រកួតដោយប្រើបេះដូង ជាពិសេសក្រុមអត្តពលិកថ្នាល ដែលបានបង្ហាញគុណភាពកាន់តែល្អ សម្រាប់ការទទួលបានឱកាសប្រកួតនៅក្រៅប្រទេសនេះ។

លោកបានបញ្ជាក់ថា៖ «យើងឃើញថា នៅក្នុងចំណោមមេដាយ ដែលយើងទទួលបាន គឺក្រុមអត្តពលិកថ្នាល ដណ្តើមបានចូល៩០ភាគរយទៅហើយ ព្រោះធម្មតាក្មេង មិនដែលបានចូលរួមប្រកួតធំៗនៅក្រៅប្រទេសបែបនេះ ដល់អ៊ីចឹងគាត់មានការរំភើបខ្លាំង និងប្រឹងប្រែងប្រកួតដោយបេះដូង និងអស់ពីសមត្ថភាព ដើម្បីឱ្យគេស្គាល់គុនខ្មែរកាន់តែធំទូលាយថែមទៀត»។

លោក ខូវ ឆាយ ទទួលស្គាល់ថា កីឡាករ កីឡាការិនីថ្នាលរបស់គុនខ្មែរ ពិតជាអាចបង្កើននូវបទពិសោធន៍ និងសមត្ថភាពបច្ចេកទេសរបស់ពួកគាត់ កាន់តែប្រសើរ សម្រាប់ការទទួលបានឱកាសប្រកួតជាមួយអត្តពលិកមកពីកម្រិតទ្វីបបែបនេះ ហើយក្រៅពីលទ្ធផលបច្ចេកទេសមេដាយ និងបទពិសោធន៍នេះ ពួកគេបានរួមចំណែកយ៉ាងសំខាន់ ក្នុងការផ្សព្វផ្សាយគុនខ្មែរ ទៅកាន់ឆាកអន្តរជាតិ។

លោកបញ្ជាក់ថា៖ «ក្នុងនាមយើងជាម្ចាស់ក្បាច់គុន យើងចំណេញក្នុងការកៀរគរចូលរួម ហើយតាមរយៈព្រឹត្តិការណ៍កីឡានេះ យើងអាចផ្លាស់ប្តូរទំនាក់ទំនងការទូត វប្បធម៌ និងផ្លាស់ប្តូរកិច្ចសហប្រតិបត្តិការផ្សេងៗទៀតរវាងប្រទេសនៅក្នុងទ្វីបអាស៊ី ក៏ដូចជារឹងចំណងសាមគ្គីភាពកាន់តែរឹងមាំ នៅក្នុងគ្រួសារគុនខ្មែររបស់យើង អ៊ីចឹងនេះជាគុណផលដ៏សំខាន់ ដែលយើងទទួលបានពីការរៀនចំព្រឹត្តិការណ៍គុនខ្មែរជើងឯកអាស៊ី គឺយើងបានរួបរួមគ្នាក្នុងគ្រួសារគុនខ្មែរ កាន់តែរឹងមាំក្នុងសហគមន៍នៃទ្វីបអាស៊ីនេះ»។

ជាមួយការទទួលបានជោគជ័យ ក្នុងការរៀបចំព្រឹត្តិការណ៍គុនខ្មែរជើងឯកអាស៊ីនេះ ប្រទេសឥណ្ឌូនេស៊ី បានស្នើសុំធ្វើម្ចាស់ផ្ទះបន្តពីវៀតណាម។ លោក ខូវ ឆាយ ថ្លែងថា៖ «ឥណ្ឌូនេស៊ី មានការជឿជាក់ថា គាត់អាចធ្វើម្ចាស់ផ្ទះការប្រកួតគុនខ្មែរជើងឯកអាស៊ី លើកទី២ បាន ហើយយើងនឹងធ្វើការងារជាមួយឥណ្ឌូនេស៊ី ដើម្បីកែប្រែចំណុចខ្វះខាតមួយចំនួន ដែលមាននៅក្នុងការប្រកួតលើកទី១នេះ ធ្វើយ៉ាងណាឱ្យការប្រកួតលើកទី២ នៅឆ្នាំ២០២៧ កាន់តែទទួលបានលទ្ធផលល្អ សម្រាប់គ្រួសារគុនខ្មែរ នៅទ្វីបអាស៊ី»៕