សមាគមសម្ព័ន្ធអ្នកសារព័ត៌មានកម្ពុជា

មេដឹកនាំបក្សភ្លើងទៀនរិះគន់ការធ្វើទុក្ខបុកម្នេញ ខណៈលោក ហ៊ុន សែន គំរាមប្ដឹងថែមទៀត

សមាជិកគណបក្សភ្លើងទៀនត្រៀមលើកស្លាកគណបក្សនៅខេត្តកំពង់ធំ។ រូបភាពពីទំព័រFB របស់គណបក្សភ្លើងទៀន។
សមាជិកគណបក្សភ្លើងទៀនត្រៀមលើកស្លាកគណបក្សនៅខេត្តកំពង់ធំ។ រូបភាពពីទំព័រFB របស់គណបក្សភ្លើងទៀន។

ខណៈការបោះឆ្នោតជាតិ​នឹងចូល​មក​ដល់​នៅខែកក្តដា គណបក្សភ្លើងទៀន​បាន​មើល​ឃើញ​ពីការ​ធ្វើទុក្ខបុកម្នេញ​កាន់តែខ្លាំង ខណៈលោក​នាយករដ្ឋមន្ត្រី ហ៊ុន សែន បាន​គំរាមប្តឹង​គណបក្ស​នេះចំពោះការ​រិះគន់​លើ​​គណបក្សប្រជាជន​កម្ពុជា​។

លោកនាយក​រដ្ឋមន្ត្រី ហ៊ុន សែន កាលពី​ថ្ងៃ​ព្រហស្បតិ៍​បាន​គំរាម​ប្តឹង​គណបក្ស​ភ្លើងទៀន បន្ទាប់ពី​បក្សនេះចេញសេចក្តីថ្លែងការណ៍​ ដោយបាន​ចាត់ទុកថា គណបក្ស​ប្រជាជន​កម្ពុជា​បាន​​ធ្វើទុក្ខបុកម្នេញ​ផ្នែក​នយោបាយ និង​ការគំរាមកំហែង​មក​លើ​ខ្លួន​នៅមុនការបោះឆ្នោត​ជាតិ​នៅ​ថ្ងៃទី២៣ ខែកក្កដា​ខាងមុខ។

បន្ទាប់ពីការចាប់ខ្លួនលោក ថាច់ សេដ្ឋា អនុប្រធានគណបក្សភ្លើងទៀនកាលពីថ្ងៃចន្ទ  គណបក្ស​ភ្លើងទៀនបានចេញសេចក្តីថ្លែងការណ៍មួយកាលពីថ្ងៃពុធ ដោយអះអាងថា​គណបក្ស​ប្រជាជនកម្ពុជាកំពុងកំណត់គោលដៅលើប្រតិបត្តិការណ៍របស់បក្សខ្កួន។

សេចក្តីថ្លែងការណ៍បានសរសេរថា៖ «[យើង] ប្រឆាំងដាច់ខាតលើការគាបសង្កត់ ការគំរាម​កំហែង និងការ​ធ្វើទុក​បុកម្នេញ​ផ្នែកន​យោបាយគ្រប់រូបភាព​ពីគណបក្សកាន់អំណាច ដោយ​ទាម​ទារឱ្យបញ្ឈប់សកម្ម​ភាព​ទាំងនេះជាបន្ទាន់»

គណបក្សភ្លើងទៀនក៏បានអំពាវនាវឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុង​ប៉ារីសឆ្នាំ២៣​ ខែតុលា ឆ្នាំ១៩៩១ បំពេញកាតព្វកិច្ចរបស់ពួកគេក្នុងការជំរុញ​ឱ្យមានការ​គោរពសិទ្ធិមនុស្ស និងការអនុវត្ត​លទ្ធិប្រជាធិបតេយ្យពហុបក្ស។

លោកនាយករដ្ឋមន្រ្តី ហ៊ុន សែន បាន​ច្រានចោល​ការ​លើក​ឡើង​នេះហើយ​បាន​ស្នើ​ឱ្យ​មេធាវី​គណបក្ស​ប្រជាជន​កម្ពុជាពិនិត្យ​មើល​ពីលទ្ធភាពនៃ​ការ​ប្ដឹង​គណបក្សប្រឆាំងមួយនេះក្នុង​ពេល​ថ្លែង​សុន្ទរកថា​ កាល​​ពី​ថ្ងៃ​ព្រហស្បតិ៍។ កាលពីដើមខែនេះ លោកធ្លាប់បានព្រមានថា ការរិះគន់​ទៅលើអ្នកគណបក្សប្រជាជនកម្ពុជាថានឹងត្រូវប្រឈមមុខនឹងចំណាត់ការផ្លូវច្បាប់ ហើយ​លោក​បាន​ប្តេជ្ញាថានឹងកំទេចចោល​ក្រុម​ដែលលោកហៅថាជា​ក្រុមជ្រុលនិយម។

លោកហ៊ុន សែន បាន​ថ្លែង​កាល​ពី​ថ្ងៃ​ព្រហស្បតិ៍​ថា៖ «អ្នក​មិន​អាច​ចេញ​សេចក្តីថ្លែងការណ៍​ដោយ​​និយាយ​​ថា គណបក្ស​ប្រជាជន​កម្ពុជា​កំពុង​គំរាម​កំហែង និង​គាបសង្កត់បានទេ។ ខ្ញុំ​បាន​ស្នើ​ឱ្យ​មេធាវី​របស់​គណបក្ស​ប្រជាជន​កម្ពុជា​ពិនិត្យ​មើល​សេចក្តីថ្លែងការណ៍​នេះ»។

លោកបានចោទជាសំណួរថា៖«តើ​គណបក្ស​ប្រជាជន​កម្ពុជា​គំរាម​អ្នក​នៅ​កន្លែង​ណា និង​ពេលណា? ​ប្រសិន​បើ​អ្នក​មិន​ដក​ពាក្យនេះ ឬ​សុំ​ទោស​ទេ ត្រូវ​ប្តឹង​ទៀត»។

លោក​ ហ៊ុន សែន បាន​ឱ្យ​ដឹង​ថា ចាប់ពីពេលនេះទៅនឹងមិនអនុញ្ញាតឱ្យនណាម្នាក់​រិះគន់​គណបក្ស​ប្រជាជន​កម្ពុជាឡើយ ហើយ​លោក​នឹងប្រើប្រព័ន្ធតុលាការដើម្បីចាត់ការ។

លោកថ្លែងថា៖ «ពីថ្ងៃនេះទៅអត់មានអត់ឱន មិនលើកលែង​ មិនអត់ឱនតាំងពីក្រោមដល់លើ [មន្ត្រីបក្សប្រឆំាង] បើឯងត្រូវវៃខ្នោះវៃខ្នោះភ្លាមហ្មង អត់មានរញ៉េរញ៉ៃទេ»

ទន្ទឹមនឹងការជាប់ពន្ធនាគាររបស់លោក សេដ្ឋា ក្នុងការឃុំខ្លួនបណ្តោះអាសន្ន ពីបទចេញ​សែក​ស្អុយ​ក្នុងឆ្នាំ២០១៩ លោក សុន ឆ័យ អនុប្រធានម្នាក់ទៀតរបស់គណបក្សភ្លើងទៀន និង​ទី​ប្រឹក្សា​ជាន់ខ្ពស់គណបក្សនេះ លោក គង់ គាំ ត្រូវបានគណបក្សប្រជាជនកម្ពុជាប្តឹង និង​ប្រឈម​មុខនឹងការរឹបអូសទ្រព្យសម្បត្តិដើម្បីសងការខូចខាតផងដែរ។

លោក គាំ ត្រូវ​បាន​គណបក្ស​ប្រជាជន​កម្ពុជា​ប្ដឹង​កាល​ពី​ដើម​ខែ​នេះ​ពី​បទ​ញុះញង់​បន្ទាប់​ពី​លោកលើកឡើង​ថា​គណបក្ស​ប្រជាជន​ត្រូវ​បាន​បង្កើត​និង​គាំទ្រ​ដោយ​អំណាច​បរទេស។

លោក ឆ័យ ធ្លាប់​បាន​អះអាង​ថា ដំណើរការ​បោះឆ្នោត​ឃុំ​សង្កាត់ឆ្នាំ​២០២២ គឺ​លម្អៀង​ទៅ​ខាង​គណបក្ស​ប្រជាជន ហើយគណបក្សប្រជាជន​បាន​ប្តឹងទាម​ទារសំណង​១លានដុល្លារពី​បទ​បរិហារកេរ្តិ៍។

ប៉ុន្តែលោក ឆ័យ ហាក់​ព្យាយាម​​សម្រាល​នូវ​ការគំរាមរបស់លោក ហ៊ុន សែន ដោយលោកបាន​និយាយថាថ្នាក់ដឹកនាំរបស់គណបក្សភ្លើងទៀនកំពុង​រៀបចំយន្តការ​ពិភាក្សា​ជាមួយគណបក្ស​ប្រជាជនដើម្បីបន្ធូរបន្ថយភាពតានតឹងនេះ។

លោក​បានថ្លែងនៅក្នុងសន្និសីទសារព័ត៌មានកាលពីថ្ងៃអង្គារថា ការបោះឆ្នោតឆ្នាំ២០២៣​ជា​ឱកាសដ៏សំខាន់សម្រាប់កម្ពុជាក្នុងការស្តារមុខមាត់របស់ខ្លួនឡើងវិញ បន្ទាប់ពីតុលាការបាន​បញ្ជាឱ្យរំលាយគណបក្សប្រឆាំងដ៏ធំគឺគណបក្សសង្គ្រោះជាតិកាលពីឆ្នាំ២០១៧ និងការ​បោះ​ឆ្នោតជាតិឆ្នាំ២០១៨ ដែលគណបក្សប្រជាជនកម្ពុជាបានឈ្នះផ្តាច់មុខតែម្នាក់ឯង។ លោក សុន ឆ័យ បន្ត​ថាគណបក្សភ្លើងទៀន​នឹង​ពិចារណា​ការធ្វើ​ពហិការ​ចូលរួមការ​បោះឆ្នោត​ឆ្នាំ ២០២៣ ប្រសិន​បើ​ស្ថានការណ៍​នយោបាយ​មិន​ប្រសើរ​ឡើង។

លោក​បាន​បញ្ជាក់​ថា​៖ «​យើង​នឹង​ពិចារណា​យ៉ាង​ប្រុងប្រយ័ត្ន ហើយ​យើង​នឹង​មិន​សម្រេច​ចិត្ត​ដោយ​ផ្អែក​លើ​អារម្មណ៍​នោះ​ទេ។ នោះ​ហើយ​ជា​មូល​ហេតុ​ដែល​យើង​បន្ត​ការ​ចរចា​ជាមួយ​គណបក្ស​កាន់​អំណាច​ដើម្បី​ស្វែង​រក​ដំណោះ​ស្រាយ។ ប៉ុន្តែ​ប្រសិន​បើ​វា​ធ្លាក់​ទៅ​ក្នុង​ស្ថានភាព​កាន់តែ​អាក្រក់ ហើយ​យើង​មិន​អាច​ធ្វើ​អ្វី​បាន នោះ​ត្រូវ​តែ​មាន​ការ​សម្រេច​ចិត្ត​ឱ្យ​បាន​ច្បាស់​លាស់​មួយ»។

ប៉ុន្តែលោក ឆ័យ បដិសេធមិន​ឆ្លើយទេ ថាតើនេះជាសេនារីយោ​របស់​គណបក្ស​ប្រជាជន​ ដែលបាន​ប្រើប្រាស់​ចំណាត់ការ​ផ្លូវច្បាប់​ក្នុងការ​បង្រ្កាបបក្សភ្លើងទៀនមុនការបោះឆ្នោតដែរ​ឬ​យ៉ាងណានោះ។

លោក​បាន​ថ្លែង​ថា៖ «ទុក​ឱ្យ​សាធារណជន​វិនិច្ឆ័យ ប៉ុន្តែ​យើង​យល់​ថាបញ្ហានេះ​បាន​ធ្វើ​ឱ្យ​យើង​មាន​ការ​លំបាក​ក្នុង​ការ​ធ្វើ​ការងារ ព្រោះ​ថ្នាក់​ដឹកនាំ​បាន​ដើរ​តួនាទី​យ៉ាង​សំខាន់​ក្នុង​ការ​ពង្រឹង​គណបក្ស»។

កម្មករ​ប្រមូល​ឥវ៉ាន់​នៅ​ការិយាល័យ​គណបក្ស​ឆន្ទៈ​ខ្មែរ​ តាមបណ្តោយផ្លូវសុធារស ក្នុង​រាជធានី​ភ្នំពេញ នៅ​ថ្ងៃ​ទី១៨ ខែមករា ឆ្នាំ​២០២៣ ដែលជាទីតាំងដែលត្រូវបានរឹបអូសដោយរដ្ឋាភិបាល។ ខេមបូចា/ ព្រីង សំរាំង

ស្ថាបនិកគណបក្សកំណែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍ថា វិធានការផ្លូវច្បាប់​ចំពោះមេដឹកនាំគណបក្សភ្លើងទៀននៅមុនការបោះឆ្នោតអាចត្រូវបានគេមើលឃើញថាជា​ទង្វើនៃការគាបសង្កត់ផ្នែកនយោបាយ។

លោក​​​មាន​ប្រសាសន៍​ថា៖ «ខ្ញុំ​មាន​ការ​ព្រួយ​បារម្ភ​ពីដំណើការ​លទ្ធិប្រជាធិបតេយ្យ​នៅ​កម្ពុជា ហើយ​នេះ​ជាហេតុផល​យោបាយ ដែល​វាបាន​ដាក់​សម្ពាធ​លើ​គណបក្ស​ប្រឆាំង ជាពិសេស​គណបក្ស​ភ្លើង​ទៀន​។ វា​ហាក់​ដូច​ជា​គណបក្ស​កាន់​អំណាច​កំពុង​ប្រើ​វិធានការ​បែប​នេះ​ដើម្បី​កាត់​បន្ថយ​ឥទ្ធិពល​របស់​គូ​ប្រជែង»

លោក សេង សារី អ្នកស្រាវជ្រាវ​សង្គម ដែលកំពុង​រស់នៅអូស្ត្រាលីបន្ទាប់ពីប្រឈមមុខ​នឹង​ការ​គំរាមកំហែងពីលោក ហ៊ុន សែន កន្លងមក បាន​ឱ្យ​ដឹងថា ចំណាត់ការផ្លូវច្បាប់​ប្រឆាំងនឹង​មេដឹកនាំគណបក្សភ្លើងទៀននឹងអនុញ្ញាតឱ្យមានការផ្ទេរអំណាចកាន់តែងាយស្រួលសម្រាប់​អ្នក​ដឹកនាំជំនាន់ក្រោយរបស់គណបក្សប្រជាជនកម្ពុជា ជាពិសេសគឺលោក ហ៊ុន ម៉ាណែត កូនប្រុសច្បងលោកនាយករដ្ឋមន្ត្រី។

កាលពីខែធ្នូ ឆ្នាំ២០២១ គណបក្សប្រជាជនកម្ពុជាបានសម្រេចឱ្យលោក ម៉ាណែត ជាបេក្ខភាព​តែមួយគត់ដើម្បីស្នងតំណែងពីឪពុករបស់គាត់ ហើយគាត់ត្រូវបានគេរំពឹងថានឹង​មានឈ្មោះ​ក្នុង​សន្លឹក​ឆ្នោតឆ្នាំ 2028 ។

លោក សារី មានប្រសាសន៍ថា៖ «វាគ្រាន់តែជាយុទ្ធសាស្ត្រមួយដើម្បីបោសំអាតសៃហ្វៀន​នយោបាយ​ជំនាន់​ចាស់ ដើម្បី​បើក​ផ្លូវ​ឱ្យ​អ្នក​ជំនាន់ក្រោយ​របស់​គណបក្ស​ប្រជាជន​កម្ពុជា ពីព្រោះ​គាត់ប្រហែលជាដឹងថាកូនប្រុសរបស់គាត់ [ហ៊ុន ម៉ាណែត] នឹងមិនអាច​ប្រកួត​ប្រជែង​ជាមួយអ្នកនយោបាយជំនាន់គាត់​បាន​ទេ។ ដូច្នេះ​អ្វី​ដែល​លោក ហ៊ុន សែន កំពុង​ធ្វើ​នៅ​ពេល​នេះ គឺ​ជា​ផ្នែក​មួយ​នៃ​យុទ្ធសាស្ត្រ​ផ្ទេរ​អំណាច​ឱ្យ​កូន​ប្រុស​របស់​គាត់​»។​

លោក ប៉ា ចាន់រឿន ប្រធាន​វិទ្យាស្ថាន​កម្ពុជា​ដើម្បី​ប្រជាធិបតេយ្យ​បាន​ថ្លែង​ថា ការ​ចោទ​ប្រកាន់​លើ​មេដឹកនាំ​គណ​ភ្លើងទៀន​គឺ​ជា​ការ​ធ្វើ​ទុក្ខបុកម្នេញ​ផ្នែក​នយោបាយ​យ៉ាង​ច្បាស់។

លោកថ្លែង​ថា៖ «ការធ្វើទុក្ខបុកម្នេញនេះនឹងប៉ះពាល់ដល់ដំណើរការបោះឆ្នោត​និងលទ្ធផល​បោះឆ្នោត​»។ លោកបានបន្ថែមថា គណបក្សភ្លើងទៀនបានលេចចេញ​ជាគណបក្សប្រឆាំង​នាំមុខគេ ហើយដូច្នេះជាការគំរាមកំហែងដ៏ធំនៅតែបន្តពីគណបក្សប្រជាជនកម្ពុជា។

លោក​​បន្ត​ថា នៅពេល​ដែល​ដំណើរ​ការលទ្ធិប្រជាធិបតេយ្យ​ធ្លាក់ចុះ ការកើនឡើង​នៃ​អំណាច​ផ្តាច់ការតែងតែមើល​ឃើញ​ពីការ​ធ្វើ​ទុក្ខ​បុកម្នេញ​មក​លើ​អ្នក​នយោបាយ​ប្រឆាំង។ លោកបន្ត​ថា ការប្រើនយោបាយ​បំផ្លាញ​ ដើម្បី​បើក​ផ្លូវ​ឱ្យ​អ្នក​ជំនាន់ខ្លួន មិនមែនជា​របបសេរីពហុបក្សទេ ហើយ​វានឹងបង្កើត​នូវ​វប្បធម៌ «ទឹក​ឡើង​ត្រីស៊ីស្រមោច ទឹកហោច ស្រមោចស៊ីត្រី»។

អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអំពាវនាវដល់អង្គការ​សង្គមស៊ីវិល​ចៀសចេញពីភាពលម្អៀង ហើយបន្ថែមថា រដ្ឋាភិបាលនឹងមិនចុះញ៉ម​នឹងសម្ពាធអន្តរជាតិឡើយ។

លោក ឥសាន មានប្រសាសន៍ថា៖ «មិនថាគណបក្សកាន់អំណាចធ្វើអ្វីតាមផ្លូវច្បាប់ទេ ពួកគេ [អ្នកវិភាគនយោបាយ និងអង្គការសង្គមស៊ីវិល] នឹងនិយាយថាខុសទាំងអស់។ ដូច្នេះវា​ជារឿង​ធម្មតាទេ ហើយយើងមិនគួរជឿក្រុមទាំងនោះពេក​ទេ ព្រោះអ្វីដែលពួកគេកំពុងនិយាយ​គឺមិន​ត្រឹមត្រូវ។ យើង​គោរព​ច្បាប់​កម្ពុជា មិន​មែន​ច្បាប់​បរទេស​ទេ»

លោកបានបន្ថែមថា «គ្មានអ្វីដែលត្រូវបារម្ភទេ» ជុំវិញការដាក់ទណ្ឌកម្មបន្ថែមពីសហភាពអឺរ៉ុប ឬសហរដ្ឋអាមេរិក ដូចជាការដកប្រព័ន្ធអនុគ្រោះពន្ធជាដើម។

ស្ត្រី​ម្នាក់​បើក​ម៉ូតូ​កាត់​មុខ​ផ្ទះ​លោក សុន ឆ័យ អនុ​ប្រធាន​គណបក្ស​​ភ្លើងទៀន ដែល​តុលាការ​ចេញ​ដីកា​រឹបអូសយកជាបណ្ដោះអាសន្នកាលពី​ថ្ងៃ​ទី​២៨ ខែ​វិច្ឆិកា ឆ្នាំ​២០២២។ ខេមបូចា/ ព្រីង សំរាំង

សហភាពអឺរ៉ុបបានដកផ្នែកខ្លះនៃប្រព័ន្ធអនុគ្រោះពន្ធសម្រាប់កម្ពុជាក្នុងការនាំទំនិញចេញទៅទីផ្សារអឺរ៉ុបពោលគឺ២០% ដោយសារការព្រួយបារម្ភយ៉ាងធ្ងន់ធ្ងរ និងជាប្រព័ន្ធទាក់ទងនឹងការ​រំលោភសិទ្ធិមនុស្សបន្ទាប់ពីការរំលាយគណបក្សសង្រ្គោះជាតិកាលពីឆ្នាំ២០១៧ ។

លោក ហ៊ុន សែន និង​មន្ត្រី​កំពូល​ពីរ​រូប​របស់​គណបក្ស​កាន់​អំណាច ​ក៏​បាន​ប្តឹងពី​ករណី​បរិហារកេរ្តិ៍​ដែលប្រព្រឹត្តដោយ​លោក សម រង្ស៊ី សហ​ស្ថាបនិក​គណបក្ស​សង្គ្រោះ​ជាតិ ដែល​ឈាន​ដល់​ការ​រឹបអូស​ផ្ទះ​លោក សម រង្ស៊ី ដែល​ជាការរឹបអូសពីរដងព្រោះផ្ទះនោះក៏ជា​ទីស្នាក់ការ​របស់​គណបក្ស​សង្គ្រោះ​ជាតិផងដែរ។ ផ្ទះ​នេះ​ត្រូវ​បាន​គណបក្ស​ប្រជាជន​កម្ពុជា​លក់​ក្នុង​តម្លៃ​១,៦​លាន​ដុល្លារ​ដើម្បី​សង​ការ​ខូចខាត​ដែល​តុលាការ​បាន​ផ្តល់​ជូន។

លោក កន សាវាង្ស អ្នក​សម្រប​សម្រួល​នៃ​គណៈកម្មាធិការ​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌​នៅ​កម្ពុជា បាន​ថ្លែង​ថា សកម្មភាព​របស់​ប្រព័ន្ធ​តុលាការ​នឹង​រារាំង​មិន​ឱ្យ​មាន​ទីលាន​ប្រកួត​ស្មើ​គ្នា​សម្រាប់​គណបក្ស​នយោបាយ​ទាំងអស់​ក្នុង​ការ​បោះឆ្នោតនោះឡើយ។

លោកថ្លែងា​ថា៖ «ខ្ញុំមិនជំទាស់នឹងការអនុវត្តច្បាប់នេះទេ ប៉ុន្តែយើងឃើញថា វិធានការ​កំពុង​ត្រូវ​បានអនុវត្តនៅក្នុងដំណើរការបោះឆ្នោត ជាពិសេសទៅលើមេដឹកនាំ និង​សកម្មជន​នយោបាយ ​ជាក្តីកង្វល់មួយ។ ដំណើរការបោះឆ្នោតដែលប្រព្រឹត្តទៅដោយមានការ​គំរាម​កំហែង និងការភ័យខ្លាច មិនឆ្លុះបញ្ចាំងពីការចូលរួមដោយយុត្តិធម៌ទេ»

រាយការណ៍​បន្ថែម​ដោយ ផុន សុទ្ធីរ័ត្ន

ប្រែសម្រួលពីអត្ថបទភាសាអង់គ្លេស៖​ Candlelight Leaders Decry Persecution as Hun Sen Threatens Another Lawsuit

426 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម