សមាគមសម្ព័ន្ធអ្នកសារព័ត៌មានកម្ពុជា

មន្ត្រីស្រុកឆែបតម្រូវឱ្យពលរដ្ឋឆ្លងការអនុញ្ញាត​ពីអាជ្ញាធរមុននិយាយ​ជាមួយអ្នកព័ត៌មាន

លោក ហៀម គឹមហុង សមាជិកគណៈកម្មការសហគមន៍សង្កែមួយ និងជាបណ្តាញព្រៃព្រះរកា ពាក់អាវពណ៌ត្រួយចេក កំពុងឈរនិយាយទៅកាន់ប្រជាសហគមន៍សង្កែមួយនៅក្នុងអង្គប្រជុំកាលពីពេលកន្លងទៅ។ (រូបភាពផ្តល់ឱ្យ)
លោក ហៀម គឹមហុង សមាជិកគណៈកម្មការសហគមន៍សង្កែមួយ និងជាបណ្តាញព្រៃព្រះរកា ពាក់អាវពណ៌ត្រួយចេក កំពុងឈរនិយាយទៅកាន់ប្រជាសហគមន៍សង្កែមួយនៅក្នុងអង្គប្រជុំកាលពីពេលកន្លងទៅ។ (រូបភាពផ្តល់ឱ្យ)

អាជ្ញាធរចំនួន៥ស្ថាប័ននៅស្រុកឆែប ខេត្តព្រះវិហារ បានឱ្យប្រជាសហគមន៍ម្នាក់ផ្តិតស្នាមមេដៃ​ទទួលលក្ខខណ្ឌថា ត្រូវឆ្លងការអនុញ្ញាត​ពីអាជ្ញាធរពាក់ព័ន្ធសិនមុននិយាយជាមួយអ្នកសារព័ត៌មាន ដើម្បីការពារកុំឱ្យការផ្សព្វផ្សាយនោះប៉ះពាល់កិត្តិយសថ្នាក់ដឹកនាំ។

លិខិតចុះថ្ងៃទី២៧ ខែកុម្ភៈ មានន្ត្រីចំនួន៥ស្ថាប័នរួមមាន លោក ឡាច លិក នាយករដ្ឋបាល​ស្រុកឆែប  លោក លិញ សំឡូត ប្រធានការិយាល័យ​កសិកម្មស្រុក លោក សេង លាង នាយផ្នែក​រដ្ឋបាល​ព្រៃឈើ លោក ឡេវ សុផល មេឃុំសង្កែមួយ និងលោក ជុំ សុឡាង មេប៉ុស្តិ៍នគរបាល​ឃុំសង្កែមួយ។ លិខិតនេះបានតម្រូវឱ្យលោក ហៀម គឹមហុង ជាសមាជិកគណៈកម្មការ សហគមន៍​សង្កែមួយ និងជាបណ្តាញព្រៃព្រះរកាផ្តិតស្នាមមេដៃទទួលកំហុស  ចំពោះការផ្តល់បទសម្ភាសន៍​ដល់​អ្នកសារព័ត៌មាន​នៅពេលកន្លងទៅ។

លិខិតនេះបានផ្តោតលើចំណុច២សំខាន់គឺឈប់ផ្តល់បទសម្ភាសន៍ឱ្យសារព័ត៌មាន និងឈប់​ធ្វើ​សកម្មភាពណាដែលនាំឱ្យប៉ះពាល់ដល់​កិត្តិយសថ្នាក់ដឹកនាំ។

នាយករដ្ឋបាលស្រុកឆែប លោក ឡាច លិក ថ្លែងថា ការតម្រូវឱ្យលោក ហៀម គឹមហុង ធ្វើ​កិច្ចសន្យា​នេះ មិនមែនជាការគំរាមកំហែង ឬបំបិទសិទ្ធិសេរីភាពទេ គឺលោកថា គ្រាន់តែចង់ឱ្យ​មាន​ឆ្លង​ការអនុញ្ញាតពីអាជ្ញាធរដែនដីដែលគ្រប់គ្រងនៅទីនោះ។​

លោក ឡាច លិក ថ្លែងថា៖«ដោយជម្រាបប្រាប់គាត់ថា ប្រសិនបើមានបញ្ហាលើកក្រោយៗ​សូមឱ្យ​គាត់សហការជាមួយមេភូមិមេឃុំឱ្យបានដឹងគ្នា កុំគាត់ធ្វើតែគាត់ ចឹងទៅដល់ចេញព័ត៌មាន​ផ្សព្វផ្សាយ​ទូទាំងពិភពលោកទៅវាថាអាជ្ញាធរគាត់អ្នកគ្រប់គ្រង​ប្រជាពលរដ្ឋគាត់អត់ដឹងអីវិញ ធ្វើឱ្យ​ខូចដល់ភូមិដល់ឃុំអត់មានការគ្រប់គ្រងប្រជាពលរដ្ឋខ្លួនឯង ហើយចេះតែផ្តល់ព័ត៌មាន​ជាមួយ​អ្នកសារព័ត៌មាន​ផ្សាយ»

មេឃុំសង្កែមួយលោក ឡេវ សុផល ឱ្យដឹងថា ការធ្វើកិច្ចសន្យានេះមិនបានបិទសិទ្ធិសេរីភាពទេ គឺ នៅតែអាចនិយាយបានប៉ុន្តែធ្វើយ៉ាងណាកុំឱ្យប៉ះពាល់ដល់ថ្នាក់ដឹកនាំ។​

លោក ឡេវ សុផល ថ្លែងថា៖«អាហ្នឹងអត់អត់អីទេគាត់ធ្វើ[និយាយ]ឱ្យតែការពិតតែដូចថាខាងរ៉ែងខាងអីអ៊ីចឹងគឺគាត់ ខាងរ៉ែគាត់មានអាជ្ញាប័ណ្ណត្រឹមត្រូវមកគាត់ធ្វើបស់គាត់ ហត្ថលេខាមកពីរដ្ឋមន្ត្រីរដ្ឋអី មកពីលើអស់ហើយ ដល់ពេលនេះទៅយើងថាបង្លាយផ្តេសផ្តាសទៅប៉ះពាល់ដល់ថ្នាក់ដឹកនាំ»

លោក លិញ សំឡូត ប្រធានការិយាល័យកសិកម្មស្រុកឆែប មិនឆ្លើយសំណួរតាមទូរសព្ទទេដោយ តម្រូវអ្នកព័ត៌មានទៅដល់ស្រុកឆែបផ្ទាល់ ចំណែកលោក ជុំ សុឡាង មេប៉ុស្តិ៍នគរបាលសង្កែមួយថា កិច្ចការនេះគឺថ្នាក់លើជាអ្នកសួរ ប្រជាសហគមន៍លោកមិនដឹងទេ។

ចំណែកលោក សេង លាង ផ្នែករដ្ឋបាលព្រៃឈើស្រុកឆែប ខេមបូចាមិនអាចស្វែងរកការឆ្លើយតប បានទេនៅថ្ងៃទី២៩ខែកុម្ភៈ។

អ្នកនាំពាក្យក្រសួងព័ត៌មាន លោក ទេព អស្នារិទ្ធ បានថ្លែងថា រដ្ឋាភិបាលបានធានាសិទ្ធិសេរីភាព​ផ្នែកបញ្ចេញមតិ និងសារព័ត៌មានដូចមានចែងក្នុងរដ្ឋធម្មនុញ្ញ។ ទោះយ៉ាងណាលោក រំឭកថា ការ​ប្រើប្រាស់សិទ្ធិត្រូវអនុលោមតាម ច្បាប់មិនឱ្យប៉ះពាល់ដល់សិទ្ធិអ្នកដទៃ។

លោក ទេព អស្នារិទ្ធ បញ្ជាក់ថា ករណីនៅស្រុកឆែប លោកថា ក្រសួងត្រូវប្រមូលព័ត៌មាន​បន្ថែម​ទៀត​មុនសន្និដ្ឋាន។

លោក ទេព អស្នារិទ្ធ ថ្លែងថា៖ «ចាំបាច់ណាស់ត្រូវតែស្រាវជ្រាវឱ្យបានល្អិតល្អន់ ដើម្បីប្រមូល​ព័ត៌មាន​​ឱ្យបានគ្រប់ជ្រុងជ្រោយអំពីអង្គហេតុ និងអង្គច្បាប់ដែលបង្ហាញអំពីស្ថានភាព​ដែលកើត​ឡើង​ជុំវិញនឹងករណីនេះ។ ទោះជាយ៉ាងណាក៏ដោយខ្ញុំសូមលើកទឹកចិត្តដល់ភាគីពាក់ព័ន្ធទាំងអស់​ក្នុងការសហការគ្នាក្នុងការផ្តល់ព័ត៌មាន ទទួលបាននូវព័ត៌មាន និងរាយការណ៍ព័ត៌មាន ដោយ​សុចរិតភាព ដោយភាពស្មោះត្រង់ ដើម្បីលើកកម្ពស់ការទទួលបានព័ត៌មាន និងការផ្សព្វផ្សាយ​ព័ត៌មាន សេរីភាពសារព័ត៌មាននៅប្រទេសកម្ពុជាយើង»

លោក ហៀម គឹមហុង​ សមាជិកគណៈកម្មការសហគមន៍សង្កែមួយ និងជាបណ្តាញ​ព្រៃព្រះរកា ពាក់អាវស ពាក់មួកប៉ារ៉ា ប្រគល់​អង្រឹងដល់ប្រជាសហគមន៍សង្កែមួយកាល ពីពេលកន្លង​ទៅ។ (រូបភាពផ្តល់ឱ្យ)

សមាជិកគណៈកម្មការសហគមន៍សង្កែមួយ និងជាបណ្តាញព្រៃព្រះរកាលោក ហៀម គឹមហុង ថ្លែងថា កន្លងមកសហគមន៍របស់លោក​រងគ្រោះដោយសារក្រុមហ៊ុនស្ករអំពៅ ហើយនៅដើមឆ្នាំ ២០២៤នេះ មានបញ្ហាជាមួយក្រុមហ៊ុនរុករករ៉ែថែមទៀត។ លោកបន្តថា អ្វីដែល​ធ្វើ និងនិយាយ​ជាមួយអ្នកសារព័ត៌មានកន្លងទៅគឺនិយាយតែការពិតជំរុញឱ្យមានដំណោះស្រាយលើបញ្ហា​ប្រជាពលរដ្ឋក្នុង​សហគមន៍​តែប៉ុណ្ណោះ។

លោក ហៀម គឹមហុង ឱ្យដឹងថា នៅថ្ងៃប្រជុំគ្នា ហើយឱ្យលោកផ្តិតមេដៃលើកិច្ចសន្យានោះ គឺ​អាជ្ញាធរបានដកទូរសព្ទរបស់លោកទុក មិនឱ្យថតរូប និងសំឡេង ហើយនិយាយថា «ក្បាល​នរណាសក់អ្នកនោះ» ប្រជាសហគមន៍មានបញ្ហាឱ្យគេរកដំណោះស្រាយខ្លួនឯង ដោយកុំ​ឱ្យ​លោក​ចេញមុខជួយរកដំណោះស្រាយ។ 

លោក ហៀម គឹមហុង ចាត់ទុកការតម្រូវឱ្យលោកផ្តិតស្នាមមេដៃលើកិច្ចសន្យានេះថា ជាការគំរាម កំហែងមិនឱ្យលោកជួយរកដំណោះស្រាយបញ្ហាក្នុងសហគមន៍។

លោក ហៀម គឹមហុង ថ្លែងថា៖ «វាមើលទៅឃើញមានតែការគំរាមកំហែងបិទសិទ្ធិ​របស់ខ្ញុំដែល​ខ្ញុំ​មាន និយាយថាខ្ញុំជួយប្រជាពលរដ្ឋរបស់ខ្ញុំ គាត់ស្រែងត្រង់ណាខ្ញុំជួយគាត់ត្រង់ហ្នឹង ហើយគាត់​[មន្ត្រី]​មកធ្វើអីមិនឱ្យខ្ញុំជួយគាត់ប្រជា[ពលរដ្ឋ]។ គាត់[មន្ត្រី]ឆ្លើយនិយាយ ថា​ក្បាលនរណាសក់​អ្នក​នោះ។ គាត់[មន្ត្រី]និយាយក្នុងប្រជុំជាមួយខ្ញុំដែលឱ្យខ្ញុំធ្វើកិច្ចសន្យា»

ទោះយ៉ាងណាលោក ហៀម គឹមហុង បញ្ជាក់ថា ឱ្យតែសមាជិកសហគមន៍របស់លោករងគ្រោះ ហើយត្រូវការឱ្យលោកជួយរកយុត្តិធម៌លោកនៅតែជួយដដែល។

លោក ហៀម គឹមហុង បន្ថែមថា៖«ខ្ញុំថាខ្ញុំក៏ទទួលថាខ្ញុំទទួលផ្តិចដែរ ប៉ុន្តែថាខ្ញុំថាបើម្ចាស់ចម្ការ​គាត់មិនស្រែក ម្ចាស់ដំណាំគាត់មិនស្រែក ខ្ញុំក៏បិទឆឹង បើសិនជាមានស្រែកខ្ញុំ​នៅតែទាមទារ​ទៀត​នោះឯង បើគាត់នៅតែទាមទារខ្ញុំត្រូវតែជួយគាត់។ ខ្ញុំថាអ៊ីចឹង!»

ជុំវិញបញ្ហានេះ នាយកសម្ព័ន្ធអ្នកសារព័ត៌មានកម្ពុជា(ខេមបូចា) លោក ណុប វី មានថ្លែងថា ជាទម្រង់នៃការគំរាមកំហែងដល់អ្នកសារព័ត៌មាន និងប្រជាពលរដ្ឋនៅមូលដ្ឋានដែល​ស្វែងរក​ដំណោះស្រាយ។ លោកជំរុញឱ្យអាជ្ញាធរមូលដ្ឋានដូរពីការរារាំងមិនឱ្យមានការ​បញ្ចេញមតិពី​មូលដ្ឋានមកជាការប្រឹងប្រែងជួយរកដំណោះស្រាយបញ្ហាដែលពលរដ្ឋកំពុងប្រឈមវិញ។

លោក ណុប វី មានថ្លែងថា៖«អាជ្ញាធរមូលដ្ឋានគួរតែពង្រឹងការដោះស្រាយបញ្ហាជូនពលរដ្ឋវិញ ជាជាងការបិទខ្ទប់ព័ត៌មាន ដែលវាអាចនឹងធ្វើឱ្យថ្នាក់ដឹកនាំរដ្ឋាភិបាលមិនទទួលដឹងពីអ្វី​ដែល​កើត​មានឡើងពិតប្រាកដនៅសហគមន៍មូលដ្ឋាន»

នាយកអង្គការពន្លកខ្មែរ ខេត្តព្រះវិហារ លោក ប៉ឹក សោភ័ណ ចាត់ទុកថា នេះជាការគំរាមកំហែង​ធ្ងន់ធ្ងរ​ដែលមិនត្រូវនៅក្នុងសង្គមប្រជាធិបតេយ្យទេ។ លោកជំរុញឱ្យស្ថាប័នពាក់ព័ន្ធ នៅថ្នាក់ជាតិ​ពិនិត្យមើលការងាររបស់មន្ត្រីនៅថ្នាក់ស្រុកនេះ។

លោក សុភ័ណ ប៉ឹក ថ្លែងថា៖«អាជ្ញាធរជាអ្នកលើកកម្ពស់ការអនុវត្តសិទ្ធិ តែបើឃើញអាជ្ញាធរ​ជា​អ្នក​រំលោភបំពានច្បាប់កំពូលបែបនេះ គឺជាទោសទណ្ឌណា៎បាទ។ ជាទោសទណ្ឌមួយដែលគួរតែ​អាជ្ញាធរ​ថ្នាក់ជាតិពិនិត្យមើលការអនុវត្តរបស់អាជ្ញាធរនៅថ្នាក់ក្រោមជាតិ ហើយវាធ្វើឱ្យប៉ះពាល់ដល់​កិត្តិយស​ដល់រាជរដ្ឋាភិបាលរបស់យើងផងដែរបាទ»

មាត្រា៤១នៃរដ្ឋធម្មនុញ្ញាកម្ពុជាចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពសារព័ត៌មាន សេរីភាពបោះពុម្ពផ្សាយ និងសេរីភាពនៃការជួបប្រជុំ។

ចំណែកមាត្រា១៩នៃកតិកាសញ្ញាអន្តរជាតិស្តីពី សិទ្ធិពលរដ្ឋ និងសិទ្ធិនយោបាយចែងថា ជនគ្រប់ រូប​មានសិទ្ធិប្រកាន់យកមតិរបស់ខ្លួនដោយគ្មានការជ្រៀតជ្រែក។ ជនគ្រប់រូបមានក្នុងការ​បញ្ចេញ​មតិ។​ សិទ្ធិទាំងនេះរាប់បញ្ជូលទាំងសេរីភាពស្រាវជ្រាវព័ត៌មាន ទទួល និងផ្សព្វផ្សាយព័ត៌មាន និងគំនិតគ្រប់បែបយ៉ាងដោយមិនគិតព្រំដែន ដោយផ្ទាល់មាត់ សរសេរ ឬបោះពុម្ព។

បើទោះជាសេរីភាពនៃការបញ្ចេញមតិ និងសេរីភាពសារព័ត៌មានមានចែងការពារទាំងនៅក្នុង​ច្បាប់​ជាតិ និងច្បាប់អន្តរជាតិដែលកម្ពុជាទទួលស្គាល់ក៏ដោយ ក៏សិទ្ធិទាំងនេះនៅតែរងការគំរាមកំហែង។

មជ្ឈមណ្ឌលសិទ្ធិមនុស្សកម្ពជា(CCHR) ចេញផ្សាយរបាយការណ៍ មួយនៅចុងឆ្នាំ២០២៣ ដែលរក​ឃើញ​ថា សេរីភាពបញ្ចេញមតិ និងសេរីភាពសារព័ត៌មាន នៅតែធ្លាក់ចុះ និងមានការគំរាម​កំហែង។ របាយការណ៍បញ្ជាក់ថា ចាប់ពីខែកញ្ញា ឆ្នាំ​២០២២ ដល់ខែសីហា ឆ្នាំ២០២៣ យ៉ាងហោចណាស់​អ្នកកាសែត១៦នាក់ និងអ្នកការពារ​សិទ្ធិ​មនុស្ស១០០នាក់ប្រឈមមុខនឹងវិធានការផ្លូវច្បាប់​ក្នុង​អំឡុង​រយៈ​ពេលនោះ​៕

532 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម