សមាគមសម្ព័ន្ធអ្នកសារព័ត៌មានកម្ពុជា

សាលាដំបូងខេត្តកំពង់ស្ពឺសម្រេចឱ្យតំណាងជនជាតិដើមភាគតិចសួយរួចផុតពីបទចោទពាក់ព័ន្ធទំនាស់ដីធ្លី

ប្រជាសហគមន៍ជនជាតិដើមភាគតិចសួយជាង២០នាក់ ឡើងមកគាំទ្រនៅមុខតុលាការខេត្តកំពង់ស្ពឺ អំឡុងពេលសវនាការកាលពីថ្ងៃទី១ ខែកុម្ភៈ ឆ្នាំ២០២៤។ (រូបភាពផ្ដល់ឱ្យ)
ប្រជាសហគមន៍ជនជាតិដើមភាគតិចសួយជាង២០នាក់ ឡើងមកគាំទ្រនៅមុខតុលាការខេត្តកំពង់ស្ពឺ អំឡុងពេលសវនាការកាលពីថ្ងៃទី១ ខែកុម្ភៈ ឆ្នាំ២០២៤។ (រូបភាពផ្ដល់ឱ្យ)

សាលាដំបូងខេត្តកំពង់ស្ពឺ នៅរសៀលថ្ងៃទី១៣ ខែកុម្ភៈ បានសម្រេចឱ្យតំណាងជនជាតិដើមភាគតិចសួយមួយរូបរួចផុតពីបទចោទប្រកាន់ «រំលោភកាន់កាប់អចនវត្ថុអ្នកដទៃ» ពាក់ព័ន្ធ​នឹង​ទំនាស់ដីព្រៃសហគមន៍ ក្នុងស្រុកឱរ៉ាល់ ខេត្តកំពង់ស្ពឺ។

អ្នកនាំពាក្យសាលាដំបូងខេត្តកំពង់ស្ពឺ លោក ផេង ស៊ីភ័ណ មានប្រសាសន៍យ៉ាងខ្លី​ថា តុលាការ​​បាន​សម្រេចលើកលែងការចោទប្រកាន់លើលោក ម៉ែន ម៉េន ជាសកម្មជន​ដីធ្លី​មួយ​​រូប​រស់នៅភូមិដំបងវេញ ឃុំសង្កែសាទប ស្រុកឱរ៉ាល់។

លោក ផេង ស៊ីភ័ណ បានបញ្ជាក់ថា៖ «លោកចៅក្រមសម្រេចឱ្យរួចពីបទចោទហើយ»

កាលពីថ្ងៃទី១ ខែកុម្ភៈ​ ឆ្នាំ២០២៤ តុលាការខេត្តកំពង់ស្ពឺបានបើកសវនការជំនុំជម្រះ​លើ​សំណុំ​រឿង​ជនជាតិដើមភាគតិចសួយនេះ នៅពេលនោះមានសាក្សីចំនួន២រូបបានចូលបំភ្លឺ និង​ប្រជាសហគមន៍​ជាង២០នាក់បានឡើងមកគាំទ្រនៅមុខតុលាការ។ 

ជនរងការចោទប្រកាន់ក្នុងសំណុំរឿងនេះ លោក ម៉ែន ម៉េន បានសាទរចំពោះសាលក្រម​របស់​តុលាការ​ដែលលោកចាត់ទុកថា បានផ្ដល់យុត្តិធម៌ដល់ខ្លួន។ 

បើតាម លោក ម៉េន លើកឡើងថា បុគ្គលដែលដាក់ពាក្យប្ដឹងប្រឆាំងនឹងលោក គឺអ្នកស្រី តាំង ស៊ីវផេន ជា​អ្នកមានលុយ និងអំណាចមួយ​រូបរស់នៅរាជធានីភ្នំពេញ និងបានអះអាងថា ខ្លួន​មាន​ប្លង់​កម្មសិទ្ធ​លើដីព្រៃសហគមន៍របស់ជនជាតិដើមភាគតិចសួយរបស់លោក។

លោកបានបដិសេធថា បានរំលោភលើដីរបស់អ្នកស្រី ស៊ីវផេន ក្រោមហេតុផលថា ដីព្រៃ​សហគមន៍​នេះជារបស់ជនជាតិដើមភាគតិចដែលបានអាស្រ័យផល និងជាកន្លែង​គោរព​សក្ការៈ​បូជាតាំងពីយូរណាស់មកហើយ។ 

ការសម្រេចឱ្យរួចផុតពីបទចោទនេះ លោក​បានអះអាងថា ដោយសារតុលាការ​មិនមាន​ភស្តុតាង​​គ្រប់គ្រាន់ដើម្បីបញ្ជាក់ថា លោកបានរំលោភលើដីរបស់ដើមបណ្ដឹង។

លោកបានគូសបញ្ជាក់ថា ជម្លោះដីធ្លីជាមួយអ្នកស្រី ស៊ីវផេន នេះបានកើតឡើងតាំងពី​ឆ្នាំ​២០២០ នៅពេលអ្នកស្រី លេចវត្តមានចេញ​មក​អះអាងថា ខ្លួនមានប្លង់​កាន់កាប់​មួយ​ផ្នែក​នៃ​ដី​សហគមន៍របស់ជនជាតិដើមភាគតិចសួយ។ 

លោកបន្តអះអាងថា កាលពីដំបូងឡើយ ប្រជាសហគមន៍ជាច្រើន​រូបបានរងពាក្យបណ្ដឹង​នេះ​។ យ៉ាងណា លោកថា ដើមបណ្ដឹងបានសម្រេចប្ដឹងលោកតែម្នាក់ប៉ុណ្ណោះ ដោយសារលោក​លេច​មុខ​ខ្លាំង និងសកម្មក្នុងការតវ៉ារឿងដីធ្លីនេះ។

ប្រជាសហគមន៍ជនជាតិដើមភាគតិចសួយជាង២០នាក់ ឡើងមកគាំទ្រ​នៅមុខ​តុលាការ​​ខេត្តកំពង់ស្ពឺ អំឡុងពេលសវនាការកាល​ពីថ្ងៃទី១ ខែកុម្ភៈ ឆ្នាំ២០២៤។ (រូបភាពផ្ដល់ឱ្យ)

បើតាមជនជាតិដើមភាគតិចសួយបានឱ្យដឹងថា ដីមានទំនាស់នេះមានឈ្មោះថា សហគមន៍​ដី​ព្រៃ​ភ្នំដងសន្ទួច ​ដែលមានទីតាំងស្ថិតនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ និងមានទំហំប្រមាណ១៦៦ហិកតា ដោយមានពលរដ្ឋជាង២០០គ្រួសារ ដោយគ្របដណ្ដប់លើពីរភូមិអាស្រ័យផល ដូចជា ​ការកាប់វល្ល៍ ដកផ្សិតជាដើម។

ចាប់តាំងពីឆ្នាំ២០២០ នៅពេលដែលមានអ្នកមានលុយ និងអំណាច បានអះអាងថា គេមាន​ប្លង់​កម្មសិទ្ធិនៃផ្នែកខ្លះនៃដីសហគមន៍មក ពួកគេដែលជាជនជាតិដើមភាគតិចបាន​រងការ​ធ្វើ​ទុក្ខបុកម្នេញតាមរយៈការដាក់ពាក្យប្ដឹង និងពិបាកក្នុងការធ្វើដំណើរទៅដីសហគមន៍របស់ខ្លួន ដោយសារការហ៊ុមព័ទ្ធរបងពីខាងក្រៅ។

ខេមបូចា មិនអាចសុំការអត្ថាធិប្បាយពីដើមបណ្ដឹង អ្នកស្រី តាំង ស៊ីវផេន បានទេ គិតចាប់​ថ្ងៃ​អង្គារ​ដល់ថ្ងៃ​ពុធនេះ។

ជនដើមភាគតិចសួយមួយរូប គឺអ្នកស្រី ហឿន ឡូត អាយុ៥៥ឆ្នាំ រស់នៅភូមិដំបងវេញ ឃុំសង្កែសាទប និយាយថា ការសម្រេចរបស់តុលាការជារឿងត្រឹមត្រូវ​ដោយសារ​ដីមាន​ទំនាស់​នេះ ជាដីព្រៃសហគមន៍របស់ជនជាតិដើមភាគតិច។ 

អ្នកស្រី បញ្ជាក់ថា៖ «យល់ឃើញថាត្រឹមត្រូវ ព្រោះដីនេះជាដីសហគមន៍»

ទោះជាយ៉ាងណាក៏ដោយ ជនជាតិដើមភាគតិចរូបនេះស្នើឱ្យ អ្នកស្រី ស៊ីវផេន បើកផ្លូវឱ្យ​អ្នក​ភូមិ​អាចធ្វើដំណើរទៅកាន់ដីព្រៃ​សហគមន៍​ដើម្បីធ្វើសក្ការៈបូជា និងអាស្រ័យផល បន្ទាប់​ពី​មាន​ការធ្វើរបងហ៊ុមព័ទ្ធផ្នែកខ្លះនៃដីសហគមន៍ដែលជាផ្លូវចូលរបស់ពលរដ្ឋ។

អ្នកស្រីបន្ថែមថា៖ «គេហ៊ុមព័ទ្ធអត់មានផ្លូវចេញចូលផង គេហ៊ុមព័ទ្ធប្រហែល៣០ហិកតា ច្រក​ចូលបិទពីដើមទីអស់រលីង»។

លោក ណន សារុន មេឃុំសង្កែសាទប បដិសេធថា មានការបិទផ្លូវទៅកាន់ដីសហគមន៍ ដោយ​លោកអះអាងថា លើកលែងតែពលរដ្ឋចូលកាប់ទន្រ្ទានដីព្រៃទើបមានការរារាំង​មិន​ឱ្យចូល។

​លោកបានបញ្ជាក់ថា៖ «បើធ្វើក្រៅពីហ្នឹងគេអត់ឱ្យទៅទេ បើគោរពបូជាទៅពេលណា​ក៏គេឱ្យ​ទៅដែរ»

នាយកអង្គការសមធម៌ លោក អៀង វុទ្ធី សង្កេតឃើញថា បញ្ហាដីធ្លីបានកើតឡើងច្រើន​ ជាពិសេស​នៅតំបន់ដែលមានជនជាតិដើម​ភាគតិចរស់នៅស្របពេលដែលជនជាតិដើម​ភាគតិចទាំងនោះធ្វើកសិកម្មបែបពនេចរដែលមិនមានទីកំណត់ច្បាស់លាស់។

លោក វុទ្ធី បានសាទរចំពោះសាលក្រមរបស់តុលាការឱ្យរួចផុតពីបទចោទនេះ បន្ទាប់​ពី​មិន​មានភស្តុតាងក្នុងការដាក់បន្ទុកលើជនជាតិដើមភាគតិច។  

លោកថ្លែងថា៖«វាជារឿងដែលល្អ ប្រសិនបើតុលាការរកឃើញថាមិនមានពិរុទ្ធ ហើយលើក​លែង​ការចោទប្រកាន់លើជនជាតិដើម ភាគតិច។ ចឹងយើងសាទរលើការសម្រេចចិត្តហ្នឹង»

កាលពីថ្ងៃទី១៩ ខែធ្នូ ឆ្នាំ២០២៣ សាលាដំបូងខេត្តកំពង់ធំ បានផ្តន្ទាទោសជនជាតិដើម​ភាគ​តិច​កួយ​៧នាក់ ដាក់ពន្ធនាគារ​១ខែ​ ក្រោម​បទចោទ​«ប្ដឹងបរិហារបង្កាច់កេរ្តិ៍» ពាក់ព័ន្ធនឹង​ទំនាស់​​ដី​ព្រៃ​សហគមន៍ ប៉ុន្តែទោសទាំងអស់ត្រូវព្យួរធម្មតា និងរួមគ្នាសងជំងឺចិត្ត២លាន រៀល​ដល់ដើមបណ្តឹងរដ្ឋប្បវេណី។

ជនជាតិដើមភាគតិចកួយទាំងនោះ បានចាត់ទុក​សេចក្ដី​សម្រេចរបស់តុលាការ​ថាជា​រឿង​«អយុត្តិធម៌»​សម្រាប់ពលរដ្ឋដែលខំប្រឹងការពារដីព្រៃរបស់រដ្ឋ៕

470 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម