កន្លងទៅជិត៤ឆ្នាំហើយចាប់តាំងពីអតីតបុគ្គលិកក្រុមហ៊ុនរថយន្តក្រុង Giant Ibis ត្រូវបានបញ្ឈប់ពីការងារ អំឡុងពេលមានការរីករាលដាលជំងឺកូវីដ-១៩ ដោយមិនផ្តល់ប្រាក់បំណាច់ការងារនិងប្រាក់អតីតភាពការងារ ខណៈដែលពួកគេបន្តដាក់សម្ពាធឱ្យក្រុមហ៊ុនរថយន្តក្រុងឱ្យទទួលយកពួកគេចូលធ្វើការវិញ ឬផ្តល់សំណងដល់ពួកគេ។
បុគ្គលិកដែលបច្ចុប្បន្ននៅសល់ត្រឹមតែ១១នាក់ បើធៀបពីមុនដែលមានមួយក្រុមធំ ក៏កំពុងទទូចឱ្យក្រសួងការងារ និងបណ្តុះបណ្តាលវិជ្ជាជីវៈ និងអាជ្ញាធរដោះស្រាយបញ្ហារបស់ពួកគេ និងឲ្យក្រុមហ៊ុនរថយន្តក្រុង Giant Ibis ដែលជាក្រុមហ៊ុនបុត្តសម្ព័ន្ធរបស់ក្រុមហ៊ុន Royal Group Co Ltd យកពួកគេចូលធ្វើការវិញ ឬផ្តល់សំណងដល់ពួកគេ។ កាលពីដើមខែមីនាឆ្នាំនេះ សហជីពឯករាជ្យរបស់ក្រុមហ៊ុនរថយន្តក្រុង Giant Ibis បានដាក់លិខិតទៅក្រសួងម្តងទៀត ដោយអំពាវនាវឱ្យជួយដល់បុគ្គលិកទទួលបានការងារឡើងវិញ ឬផ្តល់សំណង។
បុគ្គលិកបានតវ៉ាប្រឆាំងនឹងក្រុមហ៊ុនជិត២០ដងចាប់តាំងពីពួកគេត្រូវបានបណ្តេញចេញពីការងារ។ ថ្មីៗនេះ លោក សៀម ម៉ូរ៉ាឌី ប្រធានសហជីពឯករាជ្យនៃក្រុមហ៊ុនរថយន្តក្រុង Giant Ibis បាននិយាយថា លោកជំទាស់នឹងការឆ្លើយតបរបស់ក្រសួងដែលថា បញ្ហារបស់បុគ្គលិកគឺជាជម្លោះបុគ្គល។ លោកនិយាយថា៖ «នេះមិនមែនជាជម្លោះបុគ្គលទេ។ វាគឺជាវិវាទរវាងបុគ្គលិកនិងក្រុមហ៊ុនដែលរំលោភច្បាប់ការងារ»។
កាលពីឆ្នាំ២០២០ អ្នកបើកបររថយន្តក្រុងចំនួន៨០នាក់ ត្រូវបានបញ្ឈប់ពីការងារ ដោយមិនផ្តល់ប្រាក់បំណាច់ការងារ និងប្រាក់អតីតភាពការងារ នៅពេលដែលក្រុមហ៊ុននេះបានផ្អាកប្រតិបត្តិការ អំឡុងពេលមានការផ្ទុះជំងឺកូវីដ-១៩។ ច្បាប់តម្រូវឲ្យផ្តល់ប្រាក់បំណាច់ និងប្រាក់អតីតភាពការងារនៅពេលដែលបញ្ឈប់បុគ្គលិកពីការងារ។
ទោះជាយ៉ាងណា បុគ្គលិកជាច្រើនបានបោះបង់ការទាមទារ ដោយនៅសល់១១នាក់បន្តតស៊ូទាមទារយុត្តិធម៌។ បុគ្គលិកពីរបីនាក់ប៉ុណ្ណោះត្រូវបានទទួលចូលធ្វើការវិញ ឬទទួលបានសំណងមួយចំនួនក្នុងរយៈពេលប៉ុន្មានឆ្នាំកន្លងមកនេះ។
ក្រុមហ៊ុនរថយន្តក្រុង Giant Ibis ដែលចាត់ទុកខ្លួនឯងថា ជា «ក្រុមហ៊ុនរថយន្តក្រុងដែលមានទំនួលខុសត្រូវនិងឈានមុខគេ» របស់ប្រទេសកម្ពុជានោះ ត្រូវបានបើកដំណើរការដោយក្រុមហ៊ុន Royal Group របស់អ្នកឧកញ៉ា គិត ម៉េង ក្នុងឆ្នាំ២០១១។ ក្រុមហ៊ុននេះបានចាប់ផ្តើមជាមួយនឹងប្រតិបត្តិការក្នុងស្រុកក្នុងឆ្នាំ២០១២ មុនពេលពង្រីកទៅកាន់ប្រទេសវៀតណាម និងប្រទេសថៃ។
របាយការណ៍របស់អូស្ត្រាលីដាក់ឈ្មោះលោក Jacob Monstross ជា «ស្ថាបនិក និងជាដៃគូគ្រប់គ្រង» របស់ក្រុមហ៊ុនរថយន្ត Giant Ibis ។ របាយការណ៍ដដែលនេះក៏បានបញ្ជាក់ថា លោក Jacob Monstross គឺជាសមាជិកជាន់ខ្ពស់នៃក្រុមហ៊ុន Royal Group ផងដែរ។
ស្របជាមួយគ្នានេះដែរ លោក កត្តា អ៊ន អ្នកនាំពាក្យក្រសួងការងារ បានឆ្លើយតបតាមតេឡេក្រាមថា លោកបានទទួលលិខិតពីបុគ្គលិក ដោយកត់សម្គាល់ថា នៅពេលនេះ អគ្គលេខាធិការនៃលេខាធិការដ្ឋានគណៈកម្មការប្រឹក្សាការងារកំពុង «សម្របសម្រួលយន្តការដោះស្រាយ» ដើម្បីដោះស្រាយបញ្ហានេះ។
លោក កត្តា អ៊ន មានប្រសាសន៍ថា៖ «ប្រសិនបើភាគីមិនឈានដល់ការព្រមព្រៀងគ្នានោះ ពួកគេអាចប្តឹងទៅតុលាការបាន ព្រោះនេះជាវិវាទបុគ្គល»។
យោងតាមមាត្រា៩៥ នៃច្បាប់ស្តីពីការងារ កម្មករនិយោជិតដែលត្រូវគេបញ្ឈប់ពីការងារ ត្រូវបានរក្សាទុករវាងពីរឆ្នាំនូវអាទិភាពក្នុងការទទួលឲ្យចូលធ្វើការវិញក្នុងមុខងារប្រភេទដូចគ្នាក្នុងសហគ្រាសដដែល។ លើសពីនេះ ច្បាប់តម្រូវឱ្យនិយោជកបង់ប្រាក់អតីតភាពការងារ និងប្រាក់បំណាច់ការងារក្នុងករណីបណ្តេញចេញ។ ច្បាប់ការងារក៏ចែងផងដែរថា ត្រូវតែបង់សំណងជំងឺចិត្ត ប្រសិនបើកិច្ចសន្យាការងារត្រូវបានបញ្ចប់ភ្លាមៗ ឬមានការរំលោភកិច្ចសន្យា។
លោក ច័ន្ទ ប៊ុណ្ណាត អាយុ៦៥ឆ្នាំ អតីតអ្នកបើកបររថយន្តក្រុង រស់នៅក្នុងស្ថានភាពក្រីក្រនៅក្នុងបន្ទប់ជួលបានសុំឱ្យក្រុមហ៊ុនដោះស្រាយបញ្ហារបស់ពួកគាត់ ហើយទទួលយកលោក និងបុគ្គលិកផ្សេងទៀតចូលធ្វើការ និងផ្តល់សំណង។
លោកប៊ុណ្ណាត បាននិយាយថា៖ «មិនទាន់មានដំណោះស្រាយសម្រាប់ពួកយើងទេ ហើយខ្ញុំមានការចំណាយច្រើនក្នុងគ្រួសារ រួមទាំងថ្លៃឈ្នួលផ្ទះផងដែរ។ សេដ្ឋកិច្ចគ្រួសាររបស់យើងពឹងផ្អែកទាំងស្រុងលើការងាររបស់ខ្ញុំជាអ្នកបើកបររថយន្តក្រុង។ ខ្ញុំសង្ឃឹមថា យើងអាចត្រឡប់ចូលធ្វើការវិញ និងទទួលបានសំណងសមរម្យពីក្រុមហ៊ុន»។
លោក ប៊ុនណាត បាននិយាយថា សកម្មភាពរបស់ក្រុមហ៊ុនដែលធ្វើឲ្យគាត់បាត់បង់ចំណូលនិងការងារដែល «ស្រឡាញ់» ប៉ះពាល់ដល់សុខភាពផ្លូវចិត្តលោក។
លោកបានលើកឡើងថា៖ «ការងារជាអ្នកបើកបរ គឺជាអាជីពដែលខ្ញុំស្រឡាញ់។ សកម្មភាពរបស់ក្រុមហ៊ុនបានបំផ្លាញក្តីសង្ឃឹមរបស់ខ្ញុំទាំងស្រុង និងប៉ះពាល់ដល់ជីវិតប្រចាំថ្ងៃរបស់ខ្ញុំ។ សុខភាពផ្លូវចិត្តរបស់ខ្ញុំក៏ត្រូវប៉ះពាល់ដែរ ដោយសារបាត់បង់ប្រាក់ចំណូល»។
លោកបានបន្ថែមថា៖ «ខ្ញុំស្នើសុំឱ្យក្រសួងពិនិត្យមើលការអនុវត្តរបស់ក្រុមហ៊ុន និងធានាថា ពួកគេគោរពតាមច្បាប់ការងារ និងគោលការណ៍ណែនាំរបស់ក្រសួង។ អ្វីដែលបានកើតឡើងចំពោះយើង គឺមិនយុត្តិធម៌ទាល់តែសោះ»។
បើតាមលោក ម៉ូរ៉ាឌី ថា លោកបានដាក់លិខិតទៅក្រសួងម្តងទៀតកាលពីថ្ងៃទី១ ខែមីនា ឆ្នាំ២០២៤ ដើម្បីស្នើសុំឱ្យក្រុមហ៊ុនទូទាត់សំណង និងអនុញ្ញាតឱ្យបុគ្គលិកចូលធ្វើការវិញ។
លោកបាននិយាយថា៖ «ទោះបីជាគ្មានដំណោះស្រាយសម្រាប់យើងក៏ដោយ ក៏យើងមិនបោះបង់ដែរ។ យើងនឹងបន្តតស៊ូមតិ ព្រោះឯកសារផ្លូវច្បាប់បានដាក់រួចហើយ»។
លោកបាននិយាយថា កូដកម្មត្រូវបានគ្រោងទុក ដោយមានការជូនដំណឹងដល់អាជ្ញាធរខណ្ឌជ្រោយចង្វារ និងសាលាក្រុងភ្នំពេញពីរសប្តាហ៍មុនព្រឹត្តិការណ៍នៅថ្ងៃទី២ និងទី៣ ខែមីនា ឆ្នាំ២០២៤។ ទោះបីជាយ៉ាងណាក៏ដោយ បួនថ្ងៃមុនកូដកម្ម អាជ្ញាធរបានជូនដំណឹងដល់សហជីពឯករាជ្យថា ពួកគេនឹងមិនត្រូវបានអនុញ្ញាតឱ្យធ្វើកូដកម្មទេ ព្រោះវាធ្វើឱ្យប៉ះពាល់ដល់សណ្តាប់ធ្នាប់សាធារណៈ។ ជំនួសមកវិញ ពួកគេត្រូវបានជំរុញឱ្យ «រង់ចាំមើល» វិធានការបន្ទាប់របស់ក្រសួង។
លោក ម៉ូរ៉ាឌី បាននិយាយថា៖ «ក្នុងនាមជាតំណាងនិយោជិត ខ្ញុំកំពុងស្នើសុំដំណោះស្រាយពីរដ្ឋាភិបាលថ្មីឱ្យបានឆាប់តាមដែលអាចធ្វើទៅបាន។ ដើម្បីតម្លាភាព និងយុត្តិធម៌សម្រាប់យើង រដ្ឋាភិបាលគួរពិនិត្យមើលជម្លោះរវាងបុគ្គលិកនិងក្រុមហ៊ុន Giant Ibis ដែលរំលោភសិទ្ធិការងារនៅកម្ពុជា»។
លោក អ៊ូ ផាន្នី តំណាងក្រុមហ៊ុនរថយន្តក្រុង Giant Ibis មិនអាចទាក់ទងសុំការអត្ថាធិប្បាយបានទេ ខណៈក្រុមហ៊ុន Royal Group ក៏មិនឆ្លើយតបនឹងសំណួរតាមរយៈអ៊ីមែលដែរ។
លោក អំ សំអាត នាយកកិច្ចការទូទៅនៃអង្គការសិទ្ធិមនុស្សលីកាដូ មានប្រសាសន៍ថា ការដោះស្រាយបញ្ហានេះបានអូសបន្លាយពេលយូរដែលធ្វើឲ្យប៉ះពាល់ដល់ជីវភាពរបស់ពួកគេ។
លោកនិយាយថា៖ «បញ្ហាអូសបន្លាយកាន់តែយូរ វាកាន់តែធ្វើឲ្យបុគ្គលិកឈឺចាប់ និងនាំឲ្យអស់សង្ឃឹម និងបាត់បង់ទំនុកចិត្តលើអាជ្ញាធរ។ នេះមិនមែនជារូបភាពល្អទេ ដូច្នេះបញ្ហានេះគួរតែត្រូវបានដោះស្រាយឲ្យបានឆាប់តាមដែលអាចធ្វើទៅបាន»។
លោក សំអាត មានប្រសាសន៍ថា មិនមានអ្វីខុសទេ ក្នុងការរៀបចំកូដកម្មដោយសន្តិវិធី ដែលស្របតាមច្បាប់ការងារ និងធានាដោយរដ្ឋធម្មនុញ្ញ។
លោកបានបន្ថែមថា៖ «វាគឺជាសិទ្ធិរបស់បុគ្គលិកក្នុងការធ្វើកូដកម្មដោយសន្តិវិធី។ គួរតែផ្តល់ដំណោះស្រាយ ប្រសិនបើអាជ្ញាធរនិយាយថា វាជាការរំលោភលើសណ្តាប់ធ្នាប់សាធារណៈនោះ។ គាត់គួរតែដោះស្រាយ ព្រោះខ្ញុំជឿថា គ្មានអ្នកណាចង់ធ្វើកូដកម្មទេ។ ដូច្នេះ ដោះស្រាយហើយបញ្ចប់បញ្ហានេះជូនពួកគាត់»៕
ប្រែសម្រួលពីអត្ថបទភាសាអង់គ្លេស Laid Off Giant Ibis Bus Drivers Ask Why Resolution Is Taking So Long, Fight Continues For Job, Compensation