សមាគមសម្ព័ន្ធអ្នកសារព័ត៌មានកម្ពុជា

អ្នកបើកបរយានយន្តអគ្គិសនីនៅតែប្រឈមនឹងឧបសគ្គជាច្រើន ទោះបីជារដ្ឋាភិបាលមានគោលដៅបង្កើតហេដ្ឋារចនាសម្ព័ន្ធក្ដី

ធុរកិច្ចបង្កើតថ្មីរបស់ចិន ឈ្មោះ App EV Bike បានបើកទីតាំងមួយកន្លែងនៅក្នុងរាជធានីភ្នំពេញ កាលពីខែមុន ក្នុងគោលបំណងរៀបចំបើកការិយាល័យ ខណៈដែលវិស័យនេះកំពុងផុលផុសឡើងនៅកម្ពុជា។ (ខេមបូចា/ ទិត ច័ន្ទតារា)
ធុរកិច្ចបង្កើតថ្មីរបស់ចិន ឈ្មោះ App EV Bike បានបើកទីតាំងមួយកន្លែងនៅក្នុងរាជធានីភ្នំពេញ កាលពីខែមុន ក្នុងគោលបំណងរៀបចំបើកការិយាល័យ ខណៈដែលវិស័យនេះកំពុងផុលផុសឡើងនៅកម្ពុជា។ (ខេមបូចា/ ទិត ច័ន្ទតារា)

អ្នកបើកបរ​សេវាដឹកជញ្ជូន​នៅភ្នំពេញ ទេព កក្កដា បានជ្រើសរើសទិញ​ម៉ូតូ​អគ្គិសនី​មួយ​គ្រឿង​​កាលពី​ប្រាំបីខែមុន បន្ទាប់ពី​ប្រើប្រាស់​ម៉ូតូប្រើសាំងប្រចាំថ្ងៃរបស់​លោក​អស់​រយៈពេល​បីឆ្នាំកន្លះ​មក។ សម្រាប់រូបលោក វាមិនមែន​ព្រោះតែថ្លៃហ្គាស​មួយមុខនោះ​ទេ។

លោក​បញ្ជាក់​ថា៖ «ម៉ូតូ[ប្រើសាំង]វាត្រូវការច្រើន។ វានៅចាក់ប្ដូរប្រេងម៉ាស៊ីន ចឹងមួយ​ខែ​​ស្អុយណាស់ប្រេងម៉ាស៊ីនក៏ដូរ២​ដងទៅ៣ដងដែរ​»«បើគិតជាដុល្លារវាអស់ ១៣០ ទៅ១៥០មួយខែតាមយើងរត់ រត់កាន់តែច្រើនយើងដូរកាន់តែច្រើនប្រេងម៉ាស៊ីន។ អ៊ីចឹង​​វាអានេះ[ម៉ូតូអគ្គិសនី]មួយខែខ្ញុំជួលតែ៨០​ អ៊ីចឹងវារៀងកាត់បន្ថយច្រើនជាង​បង»​។​

មិនមែនតែ កក្កដា ម្នាក់ទេដែលប្រើប្រាស់ម៉ូតូ​អគ្គិសនី។ យានយន្តអគ្គិសនី ឬហៅថា EVs បាន​កើន​ប្រជាប្រិយភាព​នៅក្នុង​ប្រទេស​កម្ពុជា បន្ទាប់ពី​មាន​ការវិនិយោគថ្មីៗ​ពី​អន្តរជាតិ និង​កិច្ច​ប្រឹងប្រែងពីសំណាក់រដ្ឋាភិបាល ដោយ​ក្នុងនោះ ការចុះបញ្ជីបាន​កើន​ឡើង​ស្ទើរតែបីដងពីឆ្នាំ២០២២ដល់ឆ្នាំ២០២៣។ របាយការណ៍មួយដែល​ចេញផ្សាយ​កាលពីខែមុន ដោយ​ក្រសួង​សាធារណការ​និង​ដឹក​ជញ្ជូន បង្ហាញពី​ផែនទីចង្អុលផ្លូវ​សម្រាប់​​បណ្ដាញស្ថានីយ​សាកអាគុយ​ទូទាំង​ប្រទេស​សម្រាប់​យានយន្តអគ្គិសនី។ ប៉ុន្តែ ដោយ​មាន​ EVs ចុះបញ្ជីតែប្រមាណ ១៥០០គ្រឿង​ប៉ុណ្ណោះ​នៅក្នុង​ប្រទេស កង្វះ​ហេដ្ឋា​រចនា​សម្ព័ន្ធ​កំពុងរារាំង​ដល់​ការងាកមកប្រើប្រាស់​យានយន្ត​អគ្គិសនី​ឱ្យកាន់តែ​ទូលំ​ទូលាយ​ ហើយក៏​អាច​នឹង​ធ្វើ​ឱ្យយឺតយ៉ាវ​ដល់​ល្បឿន​នៃការ​អភិវឌ្ឍ​វិស័យ​​មួយនេះ​ ថែម​ទៀត​ផង ។​

កុន សេងហ៊ន ជាអ្នកគ្រប់គ្រង​ហាងមួយ​កន្លែង​នៅរាជធានីភ្នំពេញរបស់ NWOW ជា​ផ្នែក​មួយ​នៃ​ក្រុមហ៊ុន EV មកពីប្រទេសហ្វីលីពីន ដែលទើបតែបើក​សាខា​៥កន្លែង​នៅ​ក្នុង​រាជធានីក្នុងអំឡុង​៥ឆ្នាំចុងក្រោយនេះ នៅពេលដែល​តម្រូវការ​សម្រាប់​កូនម៉ូតូ និង​យានយន្ត​កង់បួន​របស់​ខ្លួន​បាន​កើនឡើង ។

អ្នកនាង សេងហ៊ន និយាយថា៖ «វា[ទិន្នន័យក្នុងការលក់]ខុសគ្នារាងច្រើនដែរបង បើ​ប្រៀប​ទៅ​នឹងពីរឆ្នាំមុន»។ អ្នកនាងបន្តថា៖ «យើងលក់ចឹងទៅពេលខ្លះយើង​មានភ្ញៀវ​ចាស់ៗ​គាត់ស្គាល់ចឹងទៅគាត់ណែនាំអោយបងប្អូនឬក៏មិត្តភក្តិដែរសួរណាំចឹងណា ពេលខ្លះភ្ញៀវក៏មកទៅតាមនិងដែរ»។ អ្នកនាង សេងហ៊ន បាន​និយាយថា ពីមុន អតិថិជន​​បារម្ភពីការទិញម៉ូតូដែលផលិតនៅប្រទេសចិន ប៉ុន្តែ ឥឡូវ​វា​លែង​ជា​បញ្ហា​ទៀត​ហើយ ដោយសារតែ​យានយន្តអគ្គិសនី​ចិន​មាន​កាន់តែទូទៅ​​នៅក្នុង​ទីក្រុង។

ក្រុមហ៊ុន EV បរទេស ក្នុងនោះរាប់ទាំងក្រុមហ៊ុនចិន បាន​ចាប់យកឱកាស​ពី​ការចាប់​អារម្មណ៍​កាន់តែច្រើនឡើងរបស់អតិថិជន ដែលនាំឱ្យមានការបើក​ហាងលក់ចែកចាយ​បន្ត​ថ្មីៗ​ជាច្រើន នៅក្នុងទូទាំង​រាជធានីភ្នំពេញ។ តួយ៉ាង ក្រុមហ៊ុនធុរកិច្ចថ្មីរបស់ចិន App EV Bike បាន​បើក​ទីតាំង​​មួយកន្លែង​នៅភ្នំពេញកាលពីខែមករា ក្នុង​គោលបំណង​​ត្រៀមខ្លួនបង្កើត​វត្តមានរបស់ខ្លួន នៅខណៈដែល​ឧស្សាហកម្មមួយនេះកំពុង​ចាក់ឫស​​នៅក្នុង​ប្រទេស​កម្ពុជា ។​

បន្ថែមពីលើ​កំណើននៃការវិនិយោគពីក្រៅប្រទេស ការលើកទឹកចិត្ត​ពីរដ្ឋាភិបាលកម្ពុជា​ក៏កំពុង​ទាក់ទាញ​ប្រជាជន​​ឱ្យទិញ EVs ផងដែរ។ នៅឆ្នាំ២០២២ ក្រសួង​សាធារណការ​និងដឹក​ជញ្ជូន ​បាន​ដាក់ចេញគោលដៅ​មួយ​​ ដោយកំណត់ថា ដល់ឆ្នាំ២០៥០ យានយន្ត​៤០% និង​ម៉ូតូ៧០% ត្រូវតែជា​យានយន្តនិងម៉ូតូ​អគ្គិសនី។ រដ្ឋាភិបាល​បាន​ផ្ដល់​ការលើកទឹកចិត្ត​ដល់​ក្រុមហ៊ុននានា ដែលធ្វើការលើវិស័យ​យានយន្ត​អគ្គិសនី ដោយ​កំណត់​យកពន្ធគយ​ពី​ EVs ត្រឹមតែប្រហែល​ពាក់កណ្ដាលប៉ុណ្ណោះ​នៃអត្រា​ពន្ធគយ​នាំចូល​លើ​យានយន្តបែបប្រពៃណី ។​

អ្នកនាំពាក្យ​ក្រសួង​សាធារណការ​ និងដឹកជញ្ជូន លោក ហ៊ាង សុទ្ធាយុត្តិ បានថ្លែង​នៅ​ក្នុង​​សារតេឡេក្រាមថា រដ្ឋាភិបាល​កំពុង​ធ្វើការងារដើម្បី​«ផ្ដល់​ការលើកទឹកចិត្ត​ផ្នែក​ពន្ធ​បន្ថែមដើម្បី​លើកទឹកចិត្ត​ដល់​ការ​ងាកមកប្រើប្រាស់និងការនាំចូល​យានយន្ត​អគ្គិសនី»​។ លោកបានបន្តថា រដ្ឋាភិបាលក៏បានបង្កើត​គណៈកម្មាធិការអន្តរក្រសួង​មួយដើម្បី​ធ្វើ​គោលនយោបាយទាក់ទងនឹង EVs ផងដែរ ហើយគណៈកម្មាធិការនេះ​គ្រោងនឹង​បញ្ចប់​​​​ក្របខ័ណ្ឌ​គោលនយោបាយមួយជាស្ថាពរ នៅ​ដំណាច់ឆ្នាំនេះ។ ក្របខ័ណ្ឌនេះ​នឹង​រួមបញ្ចូល​ព័ត៌មានលម្អិត​អំពីការលើកទឹកចិត្ត​ដល់​ការនាំចូល EVs វិធានការការពារ​បរិស្ថាន និង​លក្ខខណ្ឌ​តម្រូវ​ដែលអាចនឹងមានទាក់ទងនឹង​ស្ថានីយ​សាកអាគុយ ។

រដ្ឋមន្ត្រីក្រសួងបរិស្ថាន លោក អ៊ាង សុផល្លែត និងអ្នកនាំពាក្យក្រសួង លោក ជួប ប៉ារីស មិនបាន​ឆ្លើយតប​នឹងសំណើ​សុំ​ការអត្ថាធិប្បាយទេ ។

ចំពោះលោក អ៊ែនឌី ជុន ដែល​ជា​អគ្គនាយកក្រុមហ៊ុនកូរ៉េ Very Words ការលើក​ទឹក​ចិត្ត​ពី​រដ្ឋាភិបាល​​គឺជាកត្តាដ៏ចម្បងមួយ​ដែលនាំ​ឱ្យ​ក្រុមហ៊ុន​លោក​ចូលប្រឡូក​ក្នុង​ឧស្សាហកម្ម EV នៅកម្ពុជា។ ក្រុមហ៊ុននេះក៏បានទទួល​មូលនិធិ​ពី​រដ្ឋាភិបាលកូរ៉េ​ផង​ដែរ ដើម្បី​លើក​ទឹកចិត្ត​ដល់​​បច្ចេកវិទ្យា​បរិស្ថានមេត្រី​នៅ​ក្នុង​ប្រទេសកម្ពុជា។

លោក​បាន​បញ្ជាក់ថា៖ «វាច្បាស់ណាស់ថា វាជាពេលវេលា​ដែល​ត្រូវ​ផ្លាស់ប្ដូរទៅរក​​ការបម្លាស់ទី​ប្រកប​ដោយ​និរន្តរភាព»។ លោកបន្ថែមថា ពីដើម​ឡើយ ក្រុមហ៊ុននេះ​ផលិត​បន្ទះ​សូឡា​ និងធ្វើការងារ​ទៅលើ​ការនាំចូល​ហេដ្ឋា​រចនាសម្ព័ន្ធ​អគ្គិសនី ប៉ុន្តែ បន្ទាប់មក ក្រុមហ៊ុនបាន​ងាកមក​ផ្ដោត​លើ​ EVs វិញ បន្ទាប់ពី​ត្រូវបាន​លើកទឹកចិត្ត​ដោយ​មន្ត្រីរដ្ឋាភិបាល​កម្ពុជា។ ក្រុមហ៊ុន​បាន​បើក​រោងចក្រ​មួយ​កាលពីខែឧសភា ឆ្នាំទៅមិញ សម្រាប់​ការ​ដំឡើង​ម៉ូតូ​អគ្គិសនី​ ដែលស្ថិតនៅ​ជាយរាជធានីភ្នំពេញ ។

គិតមកដល់ពេលនេះ រោងចក្រ​ផលិតបានម៉ូតូ១០០គ្រឿងហើយ ដើម្បីជាភ័ស្តុតាង​នៃ​គោលគំនិត ដែល​លោក ជុន និយាយថា លក់ដាច់អស់​ភ្លាមៗ។ បច្ចុប្បន្ន ក្រុមហ៊ុន​កំពុង​​ទទួលបាន​សំណើ​«ជាច្រើន» ហើយ​ក្រុមហ៊ុន​មានផែនការ​នឹង​ផលិតម៉ូតូ​​ឱ្យបាន ១០ ០០០គ្រឿង​ក្នុង​មួយ​ឆ្នាំ ចេញពីរោងចក្រ​នេះ នៅពេលដែល​វាដំណើរការ​ពេញ​សមត្ថភាព​ទាំងស្រុង។

Very Words ក្រុមហ៊ុនអភិវឌ្ឍន៍ប្រកបដោយចីរភាព​មកពីប្រទេសកូរ៉េ បាន​បើក​​រោង​ចក្រ​​មួយ​កន្លែង​សម្រាប់ដំឡើង​ម៉ូតូ​អគ្គិសនីដែលស្ថិតនៅខាងក្រៅ​រាជធានី​ភ្នំពេញ កាល​ពីខែឧសភា។ (ខេមបូចា/ ទិត ច័ន្ទតារា)

ការកសាង​ហេដ្ឋារចនា​សម្ព័ន្ធ EV

កង្វះស្ថានីយសាកអាគុយ​នៅតែជាឧបសគ្គដែលរឹតត្បិត​ខ្លាំង​ទៅលើ​ការប្រើប្រាស់​ EVs ដែលកំពុង​ទទួលបានការកោតសរសើរ ជាពិសេស នៅតាមទីកន្លែងដែលស្ថិតនៅក្រៅ​ទីប្រជុំជនកណ្ដាល​ក្រុងសំខាន់ៗ។ មានពេលមួយនោះ លោក កក្កដា ដែល​ជាអ្នក​បើកបរ​​ផ្ដល់សេវាដឹកជញ្ជូន ត្រូវ​បណ្ដើរ​ម៉ូតូរបស់ខ្លួន​ពី​ខណ្ឌជ្រោយចង្វារនៃ​រាជធានីភ្នំពេញ បន្ទាប់ពី​ម៉ូតូ​អស់​អាគុយ ។ ​ខណ្ឌមួយចំនួន​ដែល​ចេញ​ឆ្ងាយ​ពី​កណ្ដាល​ក្រុង ដូចជា ច្បារអំពៅ និង​ជ្រោយចង្វារ បច្ចុប្បន្ន ពុំទាន់​មាន​កន្លែង​ប្ដូរ​អាគុយ​សម្រាប់​ម៉ូតូ​អគ្គិសនី​ នៅឡើយទេ។

សូម្បី​លោក​ ដូមីនិក វីល្លៀម ដែលជាឯកអគ្គរាជទូត​ចក្រ​ភពអង់គ្លេស​ប្រចាំ​កម្ពុជា ដែល​បាន​បើកបរ​រថយន្ត​អគ្គិសនីម៉ាក Jaguar តាំងពីពេល​លោក​មកដល់​ប្រទេសកម្ពុជា​មក​ម្ល៉េះ ក៏នៅជួប​បញ្ហាលំបាក​ខ្លះៗ ក្នុងការ​សាកអាគុយ​រថយន្តរបស់លោក បើទោះបី​លោក​មាន​បុគ្គលិក​មួយ​ក្រុម​​ចូលរួមនៅក្នុង​ការធ្វើដំណើរ​ផ្លូវឆ្ងាយៗរបស់​លោកក្ដី ។ លោកបាននិយាយថា ជម្រើសនៃការប្រើប្រាស់រថយន្ត​របស់​លោក គឺជាផ្នែកមួយនៃ​គោលនយោបាយការបរទេសទូទៅ​របស់​ប្រទេស​អង់គ្លេស ដែលលើកទឹកចិត្ត​ជំរុញ​និរន្តរភាពតាមរយៈ​ស្ថានទូតរបស់​ខ្លួន ។ លោក​ឯកអគ្គរាជទូត បានថ្លែងថា៖ «យើង​ចង់​អនុវត្ត​ជាសកម្មភាពជាក់ស្ដែងនូវអ្វីដែល​យើងនិយាយពី​ការធ្វើដំណើរឆ្ពោះទៅដល់​អព្យាក្រឹតភាពកាបោន»។ លោក​បាន​ពន្យល់ពីគោលនយោបាយ​ការបរទេស​របស់​ស្ថានទូត យ៉ាងដូច្នេះថា៖ «អ្នកអាចធ្វើអ្វីៗបានច្រើន​ដែល​អ្នកចង់ធ្វើជាមួយនឹង​រថយន្ត​ជាមួយនិងរថយន្តអគ្គិសនី​»

ដំបូងឡើយ លោក​ប្រើរថយន្តអគ្គិសនីនេះតែសម្រាប់​ការជិះនៅក្នុង និងជុំវិញរាជធានី​ភ្នំពេញប៉ុណ្ណោះ ។ ប៉ុន្តែ យូរៗទៅ លោក​បានចាប់ផ្ដើម​ជិះវា​ទៅកាន់​គោលដៅ​ធ្វើ​ដំណើរ​​​ឆ្ងាយៗ ក្នុង​នោះរួមមាន ខេត្តសៀមរាប និងខេត្តព្រះសីហនុ ផងដែរ។ ប៉ុន្តែ លោក​​បាន​ឱ្យដឹងថា គេចាំបាច់ត្រូវធ្វើផែនការ​ដោយប្រុងប្រយ័ត្នសម្រាប់​ដំណើរ​ទាំង​នេះ ដោយសារតែ​ចំនួនស្ថានីយ​សាកអាគុយនៅមានកម្រិត។ តួយ៉ាង នៅខេត្ត​ព្រះសីហនុ មានកន្លែងសាកអាគុយតែមួយកន្លែងគត់​ដែល​រថយន្តរបស់​លោក​អាចប្រើប្រាស់បាន ដែលមានទីតាំងស្ថិតនៅជាប់នឹង​ទីផ្សារទំនើបមួយដែល​បិទ​ដំណើរការ​ពីម៉ោង៥ល្ងាចរហូតដល់​ម៉ោង៩ព្រឹក ។ ចំពោះដំណើរទៅខេត្តបាត់ដំបងវិញ ស្ថានីយ​សាកអាគុយ​ដែលក្រុមការងាររបស់លោក​បានគ្រោងថា​នឹង​ប្រើប្រាស់វា គឺ​លែង​ដំណើរការ​ហើយ។

នៅរាជធានីភ្នំពេញ អាជីវកម្ម​ប្ដូរអាគុយ​កាន់តែច្រើនកំពុងរីកដុះដាល​សាយភាយ​ដែល​អនុញ្ញាត​ឱ្យ​អ្នកបើកបរ​ម៉ូតូ​និងកង់បី​អគ្គិសនី​អាច​ប្ដូរ​អាគុយ​ដែលប្រើ​អស់​ យក​អាគុយថ្មី​បានយ៉ាងរហ័សទាន់ចិត្ត នៅតាម​ស្ថានីយ។ ឧទាហរណ៍ ក្រុមហ៊ុន Oyika មាន​ស្ថានីយ​ប្ដូរអាគុយ​ជាច្រើន​នៅជុំវិញទីក្រុងភ្នំពេញ និងមាន​ App មួយដែល​បង្ហាញ​ពីផែនទី​នៃ​ចំនួន​​អាគុយ​ថ្មីដែលអាចប្ដូរបាននៅតាមទីតាំងនីមួយៗ ។

អ្នកបើកបរ​ប្ដូរអាគុយម៉ូតូរបស់ខ្លួននៅស្ថានីយមួយកន្លែង។ អាជីវកម្ម​ប្ដូរ​អាគុយ​យានយន្តអគ្គិសនីកើតឡើង​យ៉ាងផុសផុល​​នៅ​រាជធានីភ្នំពេញ ។ (ខេមបូចា/ ទិត ច័ន្ទតារា)​

ប៉ុន្តែ អាជីវកម្ម​សាកអាគុយយានយន្ត​អគ្គិសនីក៏មិនមែនគ្មាន​ឧបសគ្គនោះ​ដែរ។ ខណៈ​ដែល​រថយន្ត​ប្រើប្រេងឥន្ធនៈ​អាច​ចាក់ប្រេង​នៅស្ថានីយប្រេង​ណាមួយក៏បាន ក្រុមហ៊ុន EV នីមួយៗ​នៅ​កម្ពុជា​ប្រើប្រាស់អាគុយខុសៗគ្នា ហើយ​ជារឿយៗ ពួកគេ​ពឹងផ្អែក​លើ​ថ្លៃ​សាកអាគុយ​ដើម្បី​រក​ប្រាក់ចំណេញ។ នេះមានន័យថា ក្រុមហ៊ុននីមួយៗ​ចាំបាច់ត្រូវ​សាងសង់​ហេដ្ឋា​រចនា​សម្ព័ន្ធ​ប្ដូរ​អាគុយ​ផ្ទាល់ខ្លួន​របស់​ពួកគេ ហើយ​អ្នកបើកបរ​ត្រូវ​ជ្រើស​​​រើស​​ផ្លូវ​ធ្វើដំណើរជាក់លាក់​ដើម្បី​ទៅ​ដល់​ស្ថានីយរបស់ក្រុមហ៊ុន​ដែលខ្លួន​ប្រើ​ប្រាស់​យានយន្ត​អគ្គិសនី ។

លោក ជុន នៃក្រុមហ៊ុន Very Words បានថ្លែងថា៖ «យើងចាំបាច់​ត្រូវតែ​​ពិភាក្សា​​អំពីស្តង់ដារភាវូបនីយកម្ម ប៉ុន្តែ វាមិនមែនងាយស្រួលទេ»«ក្រុមហ៊ុននីមួយៗ​មានគំរូ​អាជីវកម្ម​ផ្ទាល់ខ្លួន​រៀងៗខ្លួន»

លើសពីនេះទៀត ស្ថានីយទាំងនេះ​ត្រូវមានបុគ្គលិកគ្រប់គ្រាន់ ពីព្រោះ​ ជានិច្ចកាល អ្នក​បើក​បរ​មិនបានថែទាំ​អាគុយដែលគេជួលបានល្អដូចគ្នានឹងអាគុយ​ផ្ទាល់ខ្លួន​របស់​ពួកគេនោះ​ទេ។ សន្តិសុខមួយរូប​នៅ​ឯ​ស្ថានីយ​ប្ដូរ​អាគុយ​ Okiya មួយកន្លែង​នៅភ្នំពេញ បានប្រាប់ ខេមបូចា កាលពីខែមករាថា អតិថិជនរុញ គ្រវែង និង​វាយ​អាគុយ​នៅ​ពេល​ប្រគល់វាត្រឡប់មកវិញ ជាពិសេស នៅពេលយប់។ ហើយសូម្បីតែ EVs នៅថ្មី​នៅ​ឡើយ​សម្រាប់​ប្រទេស​កម្ពុជា បុគ្គលិក​សន្តិសុខដដែល​និយាយថា ស្ថានីយ​ដែល​គាត់​ធ្វើការ​មិន​អាចឆ្លើយតបទៅនឹង​ចំនួន​អតិថិជន​ដែល​មក​សាកអាគុយ​យាន​យន្ត​របស់​ពួកគេ​បានគ្រប់គ្នាឡើយ ។ បុគ្គលិកសន្តិសុខ​បាន​លើកឡើងថា ជាធម្មតា ស្ថានីយ​សាក​អាគុយមួយ​បញ្ចូលភ្លើងអាគុយបាន ៦គ្រឿង​ក្នុង​ពេល​តែមួយ ប៉ុន្តែ នៅ​កន្លែង​របស់​​លោក​អាចសាកអាគុយបានតែ៤គ្រឿង​ប៉ុណ្ណោះក្នុងមួយពេល ដោយសារអគារ​ពុំ​មាន​ទិន្នផល​អគ្គិសនីគ្រប់គ្រាន់​ដើម្បីគាំទ្រ​ដល់​ការបញ្ចូលអាគុយ​បានច្រើនជាងនេះ។

ក្រុមហ៊ុនផ្សេងៗទៀត​កំពុង​អនុវត្ត​គំរូ​សាកអាគុយ​ដោយ​ដោត​ភ្លើង ដែល​យានយន្តមាន​អាគុយ​តែមួយនិងមិនអាចដោះចេញពីយានយន្តបាន ហើយ​អ្នកប្រើប្រាស់អាច​សាក​អាគុយ​​នៅតាម​ស្ថានីយ​សាកអាគុយលឿនណាមួយ​ក៏បាន ឬ​អាច​សាកនៅផ្ទះក៏បាន។ ប្រភេទយានយន្តបែបនេះត្រូវការ​ហេដ្ឋារចនាសម្ព័ន្ធ​មិនសូវស្មុគស្មាញ៖ យានយន្ត​ដែល​​​ប្រើថាមពលទាប​ ដូចជា ម៉ូតូអគ្គិសនី​អាចសាកអាគុយ​ដោយប្រើ​ដុំភ្លើង​ធម្មតា​នៅតាមផ្ទះបាន។ យានយន្តធំៗជាងនេះ ជាទូទៅ ត្រូវការ​ស្ថានីយ​សាកអាគុយ​ពិសេស​​ដើម្បីកាត់បន្ថយ​ថិរវេលា​សម្រាប់ការបញ្ចូល​ឱ្យ​ពេញ។ ប៉ុន្តែ ទោះជាយ៉ាងណា ដោយ​សារ​តែស្ថានីយ​សាកអាគុយភាគច្រើនបំផុត​មានទីតាំង​ស្ថិតនៅក្នុងរាជធានីភ្នំពេញ ការប្រើប្រាស់ EVs នៅតែនៅមានកម្រិតដដែល។

ការសម្លឹងទៅអនាគត

បច្ចុប្បន្ន កម្ពុជា​មិនទាន់រៀបចំខ្លួនរួចរាល់នៅឡើយទេសម្រាប់​ការ​ផ្លាស់ប្ដូរពេញលេញ​ទៅរក​ EVs។ បណ្ដាញខ្សែ​ចរន្តអគ្គិសនីរបស់ប្រទេស​​អាចរ៉ាប់រង​អគ្គិសនីប្រហែលតែ ៤,៦ជីហ្គាវ៉ាត់ប៉ុណ្ណោះនៅក្នុងពេលតែមួយ នេះ​បើ​យោងតាម​របាយការណ៍ឆ្នាំ២០២៣ ដែល​ចេញផ្សាយ​ដោយ​អាជ្ញាធរ​អគ្គិសនីកម្ពុជា (EAC) ដែលបរិមាណនេះ​តិចជាង​អ្វី​ដែលត្រូវការចាំបាច់ដើម្បី​បញ្ចូល​អាគុយ​សម្រាប់រថយន្ត​អគ្គិសនី ១០០ ០០០គ្រឿង។

ប៉ុន្តែ ប្រជាជនកម្ពុជា​ភាគច្រើនបំផុត​អាចមានលទ្ធភាពទិញត្រឹមតែម៉ូតូអគ្គិសនី​ដែល​ស៊ីភ្លើង​ទាប​ត្រឹម២គីឡូវ៉ាត់ប៉ុណ្ណោះ ដែលជាបរិមាណថាមពលដែល​ស៊ីដោយ​ម៉ាស៊ីន​ត្រជាក់​ទូទៅ។ នេះ​បើ​យោងតាម​លោក Dean Rizzetti នាយកគោលនយោបាយ​​ថាមពល នៅអង្គការ Energy Lab Cambodia។ អត្ថប្រយោជន៍របស់ EVs គឺថាវា​អាច​រក្សាទុក​អគ្គិសនី​ដែលបញ្ចូល​ក្នុងអំឡុងពេលដែលតម្រូវការប្រើប្រាស់មានកម្រិតទាប និង​ប្រើប្រាស់ថាមពល​នោះវិញ​ក្នុងអំឡុងពេល​ដែលតម្រូវការប្រើប្រាស់មាន​កម្រិត​ខ្ពស់ ដោយ​មិនបង្ក​ជាបន្ទុកធ្ងន់ទៅលើ​ខ្សែបណ្ដាញ​អគ្គិសនី​នៅពេល​លំបាកណាមួយ ។

លោក Dean Rizzetti បានសរសេរ​តាមអ៊ីមែលយ៉ាងដូច្នេះថា៖ «នៅពេលថ្ងៃរះ ឡាន​របស់​​អ្នក​អាច​បញ្ចូលភ្លើងបាន ហើយ​ពេលដែល​ខ្វះថាមពលកកើតឡើងវិញ​ ការ​បញ្ចូល​ភ្លើង​អាច​បញ្ឈប់បាន»។ សមត្ថភាពទិន្នផលអគ្គិសនីរបស់​កម្ពុជា​បាន​កើនឡើង​ប្រហែល២៥%ក្នុងរយៈពេល​២ឆ្នាំ​ចុងក្រោយ​នេះ នេះបើយោងតាម​ EAC។

លោក Dean ប្រមើលមើលឃើញ​ឧបសគ្គ​​​ចំពោះការងាកទៅប្រើប្រាស់ EVs ឱ្យកាន់តែទូលំទូលាយ ថាអាចជម្នះបាន ដោយ​​សារការកែលម្អ​ហេដ្ឋា​រចនាសម្ព័ន្ធមិនសូវអស់ចំណាយច្រើនពេកទេ ហើយវានឹង​ផ្ដល់​ការសន្សំសំចៃបានច្រើន​ដល់​អ្នកបើកបរ ព្រមទាំង​ការកាត់បន្ថយ​ការបំពុលខ្យល់ ។

សមត្ថភាពទិន្នផលអគ្គិសនីរបស់​កម្ពុជា​បាន​កើនឡើង​ប្រហែល២៥%ក្នុងរយៈពេល​២ឆ្នាំ​ចុងក្រោយ​នេះ នេះបើយោងតាម​ EAC។ លោក Dean ប្រមើលមើលឃើញ​ឧបសគ្គ​​​ចំពោះការងាកទៅប្រើប្រាស់ EVs ឱ្យកាន់តែទូលំទូលាយ ថាអាចជម្នះបាន ដោយ​​សារការកែលម្អ​ហេដ្ឋា​រចនាសម្ព័ន្ធមិនសូវអស់ចំណាយច្រើនពេកទេ ហើយវានឹង​ផ្ដល់​ការសន្សំសំចៃបានច្រើន​ដល់​អ្នកបើកបរ ព្រមទាំង​ការកាត់បន្ថយ​ការបំពុលខ្យល់។

ស្ថានីយ​សាកអាគុយសម្រាប់យានយន្តអគ្គិសនីមួយកន្លែងនៅក្នុង​រាជធានីភ្នំពេញ ។ ស្ថានីយ​សាកអាគុយភាគច្រើនបំផុត​មានទីតាំងស្ថិតក្នុងក្រុង ដែលរឹតត្បិត​ដល់​ប្រើប្រាស់​ EVs នៅតំបន់ផ្សេងទៀត​នៅក្នុង​ប្រទេស ។ (ខេមបូចា / ទិត ច័ន្ទតារា)

សាស្ត្រាចារ្យ Riccardo Corrado នៃសាកលវិទ្យាល័យអាមេរិកាំងភ្នំពេញ ដែលស្រាវជ្រាវ​ទៅលើ​បច្ចេកវិទ្យាព័ត៌មាន ​និងសារគមនាគមន៍​សម្រាប់ការអភិវឌ្ឍ មានការរំពឹងទុក​ទាប​សម្រាប់​ឧស្សាហកម្ម​ EV នៅក្នុងព្រះរាជាណាចក្រ​កម្ពុជា ។

លោកសាស្រ្តាចារ្យ​បានសរសេរ​នៅក្នុង​អ៊ីមែលយ៉ាងដូច្នេះថា៖ «ផ្លូវនានានៅខាង​ក្រៅ​រាជធានី​ភ្នំពេញ​នៅខ្វះខាតនៅឡើយ ហើយ​ការគិតពី​ហេដ្ឋា​រចនា​សម្ព័ន្ធ​ EV អាចនឹង​លឿន​ពេក»។ លោក​បានបន្ថែមថា កម្ពុជា​គួរតែ​«ផ្ដោត​លើ​បញ្ហាជាក់ស្ដែង​ឱ្យបានច្រើន​ជាងនេះ និងមួយជំហានម្ដងៗ បង្កើត​ប្រព័ន្ធអេកូឡូស៊ី​ដែលផ្ដល់អាទិភាពទៅលើ​ការផលិត​ និងចែកចាយថាមពល កម្លាំងពលកម្មជំនាញ ការអប់រំ និង​ប្រព័ន្ធ​ថែទាំ​សុខភាព»

លោក Corrado បានកត់សម្គាល់ថា សូម្បីតែប្រទេស​អភិវឌ្ឍន៍បំផុត​នៅលើ​ពិភពលោក​មិន​ទាន់រកឃើញ​ឧត្ដមានុវត្តន៍សម្រាប់ឧស្សាហកម្ម EVs នៅឡើយទេ ។ ការប្រញាប់​ប្រញាល់​ក្នុងការអបអរ​ការប្រើប្រាស់ EV នៅកម្ពុជា និងការចង់​ប្រកាស​ EVs ថា​ជា​ដំណោះ​ស្រាយ​នៃ​បញ្ហា​ដឹកជញ្ជូនអាចជាការយល់ឃើញដែលមិនត្រឹមត្រូវទេ ។

រដ្ឋាភិបាលកម្ពុជា​កំពុង​បោះជំហានទៅមុខ​ពេញទំហឹង​ជាមួយនឹង​គោលដៅ EVs របស់​ខ្លួន ហើយថែមទាំង​ព្យាករថា ដល់ត្រឹមឆ្នាំ២០៤០ នឹងមាន​យានយន្តកង់ពីរ​និងកង់បី​អគ្គិសនី​១លាន​គ្រឿង​ដែលនឹងចរាចរនៅលើដងផ្លូវ​។ តម្លៃ​ទាបនៃការបញ្ចូលអាគុយ​សម្រាប់​យានយន្តអគ្គិសនីបើធៀបនឹងការចាក់សាំងមួយពេញ​ គឺជាការទាក់ទាញ​ចំពោះអតិថិជន។ ប៉ុន្តែ ដរាបណា​ ហេដ្ឋារចនាសម្ព័ន្ធដែលងាយស្រួលប្រើប្រាស់​មិន​ទាន់​មានច្រើនជាងនេះទេ ចំពោះអ្នកបើកបរ​សេវាដឹកជញ្ជូន ដូច កក្កដា ពួកគេនឹង​នៅតែ​រក្សាការប្រើប្រាស់​ម៉ូតូ​ចាក់សាំងរបស់​ខ្លួន​ជាបន្តទៀតដដែល៕

រាយការណ៍បន្ថែមដោយ Leila Goldstein

ប្រែសម្រួលពីអត្ថបទភាសាអង់គ្លេស៖ Electric Vehicle Drivers Still Face Roadblocks Despite Government Infrastructure Goals

989 views

ព័ត៌មានថ្មីៗ

អត្ថបទពេញនិយម