សាលាដំបូងរាជធានីភ្នំពេញសម្រេចឃុំខ្លួនមន្រ្តីបក្សភ្លើងទៀនមួយរូប ខណៈចៅសង្កាត់រងទី២របស់បក្សភ្លើងទៀនម្នាក់ទៀតកំពុងសាកសួរពាក់ព័ន្ធនឹងបទក្លែងបន្លំ ប្រើប្រាស់លិខិតក្លែង និងក្លែងបន្លំឯកសារសាធារណៈ។
កាលពីថ្ងៃចន្ទ អាជ្ញាធរបានចាប់ខ្លួន លោក ខឹម ចាន់វណ្ណៈ ក្នុងផ្ទះរបស់លោកតាមដីកាបញ្ជាឱ្យចូលខ្លួនរបស់តំណាងអយ្យការ ប៉ុន្តែសាច់ញាតិរបស់ជនត្រូវចោទថា សមត្ថកិច្ចមិនបានបង្ហាញដីកានោះទេ ហើយព្រលយពាក្យថា «ធ្វើអីដឹងខ្លួនឯង»។
ក្នុងថ្ងៃដដែល បន្ទាប់ពីការចាប់ខ្លួន លោក ចាន់វណ្ណៈ គណបក្សភ្លើងទៀនបានចេញសេចក្ដីថ្លែងការណ៍ដោយថ្កោលទោស អាជ្ញាធរក្រុងភ្នំពេញ ថា ចាប់ខ្លួនលោក ចាន់វណ្ណៈ ដល់ផ្ទះដោយមិនមានដីកា ដែលមានទីតាំងនៅភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ។ មួយថ្ងៃបន្ទាប់ អាជ្ញាធរក្រុងភ្នំពេញក៏បានចេញលិខិតជំទាស់ទៅនឹងការចោទប្រកាន់នេះ។
នៅល្ងាចថ្ងៃអង្គារនេះ លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ មានប្រសាសន៍ថា ចៅក្រមស៊ើបសួរបានសម្រេចឃុំខ្លួនលោកស្រី ឆាយ ចិន្តា ជាបណ្ដោះអាសន្ននៅមណ្ឌលអប់រំកែប្រែទី២ ដោយជាប់ចោទពីបទក្លែងបន្លំឯកសារសាធារណៈ តាមបញ្ញត្តិមាត្រា៦២៩ នៃក្រមព្រហ្មទណ្ឌ ដែលបានប្រព្រឹត្តទៅកាលពីខែមីនា ឆ្នាំ២០២២ នៅភូមិខ្ទរ សង្កាត់ព្រែកលៀប ខណ្ឌជ្រោយចង្វារ។
លោកបានបន្តថា ចំណែក លោក ខឹម ចាន់វណ្ណៈ កំពុងស្ថិតក្រោមនីតិវិធីស៊ើបសួរនៅឡើយ និងអាចសម្រេចនៅថ្ងៃស្អែក ដោយត្រូវចោទពីបទបន្លំ និងប្រើប្រាស់លិខិតក្លែង ដែលបានប្រព្រឹត្តកាលពីអំឡុងខែវិច្ឆិកា ឆ្នាំ២០២៣ នៅរាជធានីភ្នំពេញ តាមមាត្រា៦២៦, ៦២៧ និង ៦២៨នៃក្រមព្រហ្មទណ្ឌ។
លោកថ្លែងថា៖«លោក ខឹម ចាន់វណ្ណៈ ចៅក្រមស៊ើបសួរកំពុងតែស៊ើបសួរនៅឡើយ។ […] [លោកស្រី ឆាយ ចិន្តា] ត្រូវបានចៅក្រមសម្រេចឃុំខ្លួនបណ្ដោះអាសន្ននៅម២»។
យោងតាមក្រមព្រហ្មទណ្ឌ ការក្លែងបន្លំ និងការប្រើប្រាស់លិខិតក្លែង ត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀលទៅ៦លានរៀល តាមមាត្រា៦២៧ និង៦២៨។ ចំណែកបទក្លែងបន្លំឯកសារសាធារណៈត្រូវផ្ដន្ទាទោសដាក់ពន្ធនាគារពី៥ឆ្នាំទៅ ១០ឆ្នាំ តាមមាត្រា៦២៩។
គណបក្សភ្លើងទៀន បានចាត់ទុកការចាប់ខ្លួន លោក ចាន់វណ្ណៈ ជារូបភាពនៃការគំរាមកំហែង ដោយមានបំណងបំបាក់ស្មារតីពលរដ្ឋមិនឱ្យចូលរួមសកម្មភាពនយោបាយជាមួយបក្សភ្លើងទៀន ជាពិសេសបង្កបរិយាកាសមុនការបោះឆ្នោតព្រឹទ្ធសភារឹតតែអួលអាប់។
បក្សប្រឆាំងនេះ បានទាមទារឱ្យសមត្ថកិច្ចដោះលែង លោក ចាន់វណ្ណៈ ជាបន្ទាន់ដោយឥតលក្ខខណ្ឌ និងបញ្ឈប់ការចាប់ខ្លួន ការឃុំខ្លួន ការគំរាមកំហែង និងការធ្វើទុក្ខបុកម្នេញតាមគ្រប់រូបភាពមកលើថ្នាក់ដឹកនាំ សមាជិកបក្សភ្លើងទៀន បន្តទៀត ដើម្បីធានាថា បរិយាកាសមុនការបោះឆ្នោតព្រឹទ្ធសភានិងក្រុមប្រឹក្សារាជធានីខេត្ត ក្រុង ស្រុក ខណ្ឌ ក្នុងឆ្នាំ២០២៤ ប្រកបដោយសេរី ត្រឹមត្រូវ និងយុត្តិធម៌។
មន្រ្តីបក្សប្រឆាំងទាំង២រូបដែលរងការចោទប្រកាន់នេះ គឺលោកស្រី ឆាយ ចិន្តា មានតួនាទីជា ប្រធានចលនាស្រ្តីខណ្ឌ និងហេរញ្ញិកបក្សភ្លើងទៀនខណ្ឌជ្រោយចង្វារ ខណៈលោក ខឹម ចាន់វណ្ណៈ ជាប្រធានស្ដីទីបក្សភ្លើងទៀនរាជធានីភ្នំពេញ និងជាចៅសង្កាត់រងទី២ នៅសង្កាត់កាកាបទី២។
ឆ្លើយតបទៅនឹងការលើកឡើងនេះ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានចេញសេចក្តីប្រកាសព័ត៌មានមួយជុំវិញការឃាត់ខ្លួនលោក ខឹម ចាន់វណ្ណ: ថា មានភស្តុតាងគ្រប់គ្រាន់ពីជនរងគ្រោះ និងយោងតាមដីកាបង្គាប់ឱ្យចូលខ្លួនរបស់លោកព្រះរាជអាជ្ញារង សេង ហៀង ដោយមិនជាប់ពាក់ព័ន្ធនឹងការគំរាមកំហែង និងធ្វើទុកបុកម្នេញលើសកម្មជននយោបាយណាមួយឡើយ។
ក្នុងលិខិតខាងលើ បញ្ជាក់ថា លោក ចាន់វណ្ណៈ បានក្លែងបន្លំស្នាមមេដៃ និងហត្ថលេខពលរដ្ឋចំនួន៣រូប ដើម្បីយកទៅចុះបញ្ជីបេក្ខជនបម្រុងក្រុមប្រឹក្សាសង្កាត់ផ្សារថ្មីទី៣របស់បក្សភ្លើងទៀន ដែលធ្វើឡើងកាលពីថ្ងៃទី៧ ខែវិច្ឆិកា ឆ្នាំ២០២៣។ ត្រង់ចំណុចកាលបរិច្ឆេទនេះ អ្នកនាំពាក្យ គជប លោក ហង្ស ពុទ្ធា ថ្លែងថា លោកមិនដឹងច្បាស់ថា ការចុះឈ្មោះបេក្ខជនបម្រុងនេះសំដៅលើការបោះឆ្នោតជ្រើសតាំងតំណាងរាស្រ្តកន្លងមក ឬយ៉ាងណានោះទេ។
ប្រធានបក្សភ្លើងទៀន លោក ទាវ វណ្ណុល មានប្រសាសន៍ថា គណបក្សភ្លើងទៀនមិនទាន់ដឹងច្បាស់ថាតើ លោក ចាន់វណ្ណៈ បានប្រព្រឹត្តកំហុសឆ្គងអ្វីនោះទេ។ លោកថា ប្រសិនបើអាជា្ញធរមានភស្តុតាងក្នុងការដាក់បន្ទុកលើមន្រ្តីរបស់លោកនោះ គណបក្សនឹងរៀបចំមេធាវីដើម្បីតតាំងក្ដីនៅតុលាការតាមច្បាប់។
ជុំវិញការចាប់ខ្លួននេះ លោក វណ្ណុល ថា៖«យល់ថា ខ្ញុំថាករណីនេះ គឺជាករណីបង្កការអាប់អួរ មុនពេលបោះឆ្នោតព្រឹទ្ធសភា»។
អ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា ថ្លែងថា អាជ្ញាធរចាប់ខ្លួនលោក ចាន់វណ្ណៈ តាមរយៈបណ្ដឹងរបស់ជនរងគ្រោះ ដែលត្រូវបាន លោក ចាន់វណ្ណៈ យកឈ្មោះ ស្នាមមេដៃ និងហត្ថលេខារបស់គេទៅចុះឈ្មោះជាបេក្ខជនបម្រុងក្រុមប្រឹក្សាបក្សភ្លើងទៀន សង្កាត់ផ្សារថ្មីទី៣ ដោយមិនមានការយល់ព្រមពីសាមីខ្លួន ដែលបានប្រព្រឹត្តទៅកាលពីថ្ងៃទី៧ ខែវិច្ឆិកា ឆ្នាំ២០២៣។
លោកបញ្ជាក់ថា៖ «គាត់យកឈ្មោះគេយកទៅឈរឈ្មោះជាបញ្ជីរាយនាមបេក្ខជនបម្រុងក្រុមប្រឹក្សាសង្កាត់ផ្សារថ្មីទី៣ ដែលមិនមានការអនុញ្ញាតពីសាមីខ្លួន សាមីខ្លួនអត់ដឹងខ្លួន»។
លោកបានអះអាងថា ប្រជាពលរដ្ឋចំនួន៣នាក់ ដែលរងគ្រោះក្នុងការក្លែងបន្លំឯកសារនេះ បានដាក់ពាក្យប្ដឹងនៅស្នងការនគរបាលរាជធានីភ្នំពេញ កាលពីថ្ងៃទី១១ ខែមករា ឆ្នាំ២០២៤ ដោយលោកបញ្ជាក់ថា ក្នុងសំណុំរឿងនេះ មានជនរងការចោទប្រកាន់ចំនួន២រូប ក្នុងនោះមានម្នាក់ទៀតជាស្រ្តី ប៉ុន្តែលោកបដិសេធក្នុងការបញ្ជាក់អំពីអត្តសញ្ញាណ។
កូនស្រីរបស់លោក ខឹម ចាន់វណ្ណៈ គឺកញ្ញា ខឹម ច័ន្ទវណ្ណនីរចនា ឱ្យដឹងថា កាលពីរសៀលថ្ងៃម្សិលមិញ មានសមត្ថកិច្ចប្រហែល២០នាក់ ដោយខ្លះស្លៀកពាក់ឯកសណ្ឋាន និងផ្សេងទៀតជាស៊ីវិល បានចាប់ខ្លួនឪពុករបស់នាងកំឡុងពេលសម្រាកនៅក្នុងផ្ទះ ថែមទាំងបានរុះរើអីវ៉ាន់ខាងក្នុងផ្ទះទៀតផង។
កញ្ញាបន្តថា គិតមកដល់ថ្ងៃអង្គារនេះ ក្រុមគ្រួសារនៅមិនទាន់ទទួលបានព័ត៌មានច្បាស់ទេថា តើលោក ចាន់វណ្ណៈ បានប្រព្រឹត្តកំហុសអ្វីឡើយ។ បើតាមកូនស្រី លោក ចាន់វណ្ណៈ បានឱ្យដឹងថា លោក ជាចៅសង្កាត់រងទី២ កូតាបក្សភ្លើងទៀន នៅសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ
កញ្ញាបន្ថែមថា៖ «សុំមើលដីកាគេថា ធ្វើអីដឹងខ្លួនឯង ហើយគេចាប់ប៉ាយកទៅហ្មង»។
បដិសេធក្នុងការផ្ដល់ឈ្មោះពេញដោយបារម្ភពីសុវត្ថិភាព កូនស្រីរបស់លោកស្រី ឆាយ ចិន្តា គឺអ្នកស្រី បរមី យល់ថា ការចាប់ខ្លួនម្ដាយរបស់នាងជាការគំរាមកំហែងយ៉ាងធ្ងន់ធ្ងរលើមន្រ្តីបក្សប្រឆាំងកុំឱ្យចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅពេលខាងមុខ។
អ្នកស្រីបានអះអាងថា មានសមាជិកបក្សភ្លើងទៀនខ្លះត្រូវបានគេទិញទឹកចិត្ត ខណៈបណ្ដឹងប្រឆាំងនឹងម្ដាយរបស់នាងនាពេលនេះ ជាប់ពាក់ព័ន្ធនឹងការអវត្តមានរបស់បក្សភ្លើងទៀនក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ នៅសង្កាត់ព្រែកលៀប កាលពីឆ្នាំ២០២២។
អ្នកស្រីនិយាយថា៖«ការយកលេសកំចាត់ដៃគូឬបក្សដិបក្ស និងការចូលរួមពីអាជ្ញាធរ ការមិនអនុញ្ញាតឱ្យចូលរួមប្រកួតឬបោះឆ្នោត ក្រោមហេតុផលខុសនីតិវិធីនៃ គ.ជ.ប គឺការរៀបចំសមាជិក សមាជិកាឈរឈ្មោះ (មិនពេញលក្ខណៈ) មានសមាជិក ឬសកម្មជន[បក្សភ្លើងទៀន] ត្រូវបានគេទិញទឹកចិត្តជាដើម»។
អ្នកនាំពាក្យ គជប លោក ហង្ស ពុទ្ធា ថ្លែងថា ជុំវិញករណីការចុះឈ្មោះជាបេក្ខជនបម្រុងសម្រាប់បក្សភ្លើងទៀននេះ នៅសង្កាត់ផ្សារថ្មីទី៣នេះ មិនមានពលរដ្ឋដាក់ពាក្យបណ្ដឹងមក គជប ទេ។
នាយកប្រតិបត្តិអង្គការសម្ព័ន្ធភាពការងារសិទ្ធិមនុស្សកម្ពុជា (CHRAC) លោក រស់ សុដ្ឋា អំពាវនាវឱ្យមានការឃ្លាំមើលជុំវិញសំណុំរឿងនេះ ដោយលោកបារម្ភខ្លាចថា ការចោទប្រកាន់ និងការដោះស្រាយរឿងក្ដីពាក់ព័ន្ធមន្រ្តីបក្សប្រឆាំងនេះមិនមានយុត្តិធម៌។
លោកលើកឡើងថា៖ «ខ្ញុំគិតថា អង្គការសង្គមស៊ីវិលក៏គួរតាមដានរឿងហ្នឹងឱ្យបានល្អិតល្អន់ដែរ ដើម្បីមើលថា តើការចោទប្រកាន់ហ្នឹងសមស្រប ឬក្រោមឥទ្ធិពលនយោបាយណាមួយចឹង ថាតើការចោទប្រកាន់មានលក្ខណៈយុត្តិធម៌ និងត្រឹមត្រូវឬអត់»។
បើតាមរបាយការណ៍ពីអគ្គលេខាធិការបក្សភ្លើងទៀន លោក លី សុធារ៉ាយុទ្ធ បានឱ្យដឹងថា មានសមាជិកបក្សភ្លើងទៀនចំនួន១០នាក់ ត្រូវបានចាប់ខ្លួន និងជាប់ពន្ធនាគារ ឬជាប់ឃុំក្នុងរយៈពេលជិត២ឆ្នាំនេះ ខណៈមួយចំនួនទៀតបានរត់គេចខ្លួចទៅក្រៅប្រទេស។ លោកបន្ថែមថា ការចាប់ខ្លួនសមាជិក២រូបនៅរាជធានីភ្នំពេញនេះ ជាករណីថ្មីដែលកើតឡើងនៅដើមឆ្នាំ២០២៤។
Updateនៅវេលាម៉ោង១១និង៣០នាទី ថ្ងៃទី១៨ ខែមករា ឆ្នាំ២០២៣៖ សាលាដំបូងរាជធានីភ្នំពេញ បានចោទប្រកាន់មន្ត្រីគណបក្សភ្លើងទៀន២រូប ពីបទក្លែងបន្លំ ប្រើប្រាស់លិខិតក្លែង និងក្លែងបន្លំឯកសារសាធារណៈពាក់ព័ន្ធនឹងដំណរការរៀបចំការបោះឆ្នោត និងឃុំខ្លួនក្នុងពន្ធនាគារបណ្តោះអាសន្ន យោងតាមអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មានប្រសាសន៍នៅរសៀលថ្ងៃទី១៧ ខែមករា ឆ្នាំ២០២៤៕
