សមាគមសម្ព័ន្ធអ្នកសារព័ត៌មានកម្ពុជា

គ្រួសារតាមផ្លូវរថភ្លើងនៅតែប្រឈមភាពមិនច្បាស់លាស់ ខណៈបេក្ខភាពក្រុមប្រឹក្សាសង្កាត់រក្សាភាពស្ងៀមស្ងាត់ជុំវិញដំណោះស្រាយ

សមាជិកគណបក្សប្រជាជនកម្ពុជាធ្វើយុទ្ធនាការនិងចែកចាយខិតបណ្ណបេក្ខភាពគណបក្សនៅក្នុងសហគមន៍ផ្លូវរថភ្លើង ដែលប្រឈមនឹងការបង្ខំឲ្យចាកចេញនៅសង្កាត់បឹងកក់២ ខណ្ឌទួលគោក រាជធានីភ្នំពេញ។ រូបថតកាលពីថ្ងៃទី២៤ ខែឧសភា ឆ្នាំ២០២២។ ខេមបូចា/ ស៊ន សារ៉ាត
សមាជិកគណបក្សប្រជាជនកម្ពុជាធ្វើយុទ្ធនាការនិងចែកចាយខិតបណ្ណបេក្ខភាពគណបក្សនៅក្នុងសហគមន៍ផ្លូវរថភ្លើង ដែលប្រឈមនឹងការបង្ខំឲ្យចាកចេញនៅសង្កាត់បឹងកក់២ ខណ្ឌទួលគោក រាជធានីភ្នំពេញ។ រូបថតកាលពីថ្ងៃទី២៤ ខែឧសភា ឆ្នាំ២០២២។ ខេមបូចា/ ស៊ន សារ៉ាត

អ្នកស្រី​ សេង ផា អាយុ ៦៣​ឆ្នាំ​ មិន​អាច​អាន​អក្សរ​នៅ​លើ​ខិតបណ្ណ​របស់​គណបក្ស​ប្រជាជន​កម្ពុជា​ ដែល​បាន​បិទ​លើ​ជញ្ជាំង​ផ្ទះ​ឈើ​របស់​អ្នកស្រី​នោះ​ទេ។ ប៉ុន្តែ​អ្នកស្រី​ស្គាល់​បេក្ខភាព​មួយ​រូប​ក្នុង​ចំណោម​​បេក្ខភាព​ក្រុមប្រឹក្សាសង្កាត់​សរុប​ ៣៥​នាក់ ក្នុង​សង្កាត់​បឹងកក់​២។

អ្នកស្រី​ ផា ដែល​បាន​រស់នៅ​តាម​បណ្តោយ​ផ្លូវ​រថភ្លើង​ចាប់តាំង​​ឆ្នាំ១៩៩០មក​ បាន​និយាយ​ថា អ្នកស្រី​ចង់ឃើញ​បេក្ខភាព​ចៅសង្កាត់អាណត្តិ​ថ្មី​ដោះស្រាយ​បញ្ហា​ផ្សេងៗ​នៅ​ក្នុង​សហគមន៍​របស់​អ្នកស្រី ជាពិសេស​ពាក់ព័ន្ធ​នឹង​ទីតាំង​ដែល​គ្រួសារ​តាម​បណ្តោយ​ផ្លូវ​រថភ្លើង​ដូច​អ្នកស្រី​ត្រូវ​ផ្លាស់​ទៅ​រស់នៅ បន្ទាប់​ពី​មាន​គម្រោងការ​​អភិវឌ្ឍ​ផ្លូវ​បេតុង​នៅតាម​ផ្លូវដែក។

អ្នកស្រី​បាន​ថ្លែង​ថា៖ «យើង​មិន​បាន​ឮ​គណបក្ស​ណា​មួយ​និយាយ​ពី​រឿង​នេះ [ការ​ផ្លាស់​ទី​លំនៅ]​ទេ។ ខ្ញុំ​មិន​ខ្វល់​ថា ពួកគាត់​មក​ពី​បក្ស​ណា​ទេ។ ខ្ញុំ​គិត​ថា ចៅសង្កាត់​ជាប់​ឆ្នោត​ថ្មី​គួរ​ជួយ​ប្រជាពលរដ្ឋ ដើម្បី​ពួកគេ​អាច​បន្ត​រស់នៅ​ទី​នេះឬទទួលបាន​សំណង​សមរម្យ»

អាជ្ញាធរ​ក្រុង​ភ្នំពេញ​នឹង​សាងសង់​ផ្លូវ​ប៉េតុង​ទទឹង​ ១២​ម៉ែត្រ និង​ប្រព័ន្ធ​បង្ហូរ​ទឹកលូ​តាម​បណ្តោយ​ផ្លូវ​រថភ្លើង ដោយ​បាន​បង្ក​ការ​ប៉ះពាល់​ដល់​គ្រួសារ​មួយ​ចំនួន​រស់​នៅ​តាម​បណ្តោយ​ផ្លូវ​ដែក​ ដែល​លាតសន្ធឹង​ពី​ខណ្ឌ​ទួលគោក រហូត​ដល់​ខណ្ឌ​ដូនពេញ និង​ខណ្ឌ​ឬស្សីកែវ។ គ្រួសារ​​រស់​នៅ​​ខណ្ឌ​ទួលគោក​មិនទាន់​ទទួល​បាន​ដំណោះស្រាយ​ណា​មួយ​នៅ​ឡើយ​ទេ​មក​ទល់​ពេល​នេះ។ ​

ការណ៍​​នេះ​បាន​បណ្តាល​ឲ្យ​គ្រួសារ​ជាង៣០ រស់​នៅ​តាម​បណ្តោយ​ផ្លូវ​ដែក ត្រូវ​តម្រូវ​ឲ្យ​ផ្លាស់ទី​លំនៅ​ទៅ​តំបន់​ជាយ​ក្រុង។ មក​ទល់​ពេល​នេះ គ្រួសារ​ទាំង​នេះ​បាន​បដិសេធ និង​បន្ត​ស្នើ​សុំ​ឲ្យ​អាជ្ញាធរ​ក្រុង​អនុញ្ញាត​ឲ្យ​ពួកគេ​បន្ត​ស្នាក់​នៅ​ទីតាំង​នៅក្នុងទីក្រុង។

កាល​ពី​ឆ្នាំ ២០២០ អាជ្ញាធរ​​ខណ្ឌ​ទួលគោក​បាន​ទុក​ពេល​ឲ្យ​សហគមន៍១៧ រយៈពេល​ ១​ខែ​ឲ្យ​ចាកចេញ​ពី​ទីលំនៅ​របស់​ពួកគេ។ បួន​ខែ​បន្ទាប់​មក​ អាជ្ញាធរ​បាន​ផ្អាក​ការបណ្តេញចេញ។ គ្រួសារ​ទាំង​នោះ​និយាយ​ថា ពួកគេ​នឹង​មិន​ចាកចេញ​នោះ​ទេ ប្រសិន​បើ​មិនមាន​សំណង​ល្អ​ជាង​នេះ ដូចជា ការ​ផ្លាស់​ទៅ​រស់នៅ​ក្នុង​ខណ្ឌ​ទួលគោក ឬ​ខណ្ឌ​ឬស្សីកែវ។ ហើយ​ចាប់តាំង​ពី​ពេល​នោះ​មក ពួកគេ​បាន​ប្រឈម​នឹង​ភាព​មិនច្បាស់លាស់។

ស្រប​ពេល​យុទ្ធនាការ​ឃោសនា​បោះឆ្នោត​ឃុំសង្កាត់​បាន​ចាប់ផ្តើម មាន​តែ​គណបក្ស​ប្រជាជន​កម្ពុជា​ប៉ុណ្ណោះ​បាន​ដាក់​តង់​ឃោសនា​តាម​បណ្តោយ​ផ្លូវ​រថភ្លើង​ក្នុង​សង្កាត់​បឹងកក់​២ រាជធានី​ភ្នំពេញ ដោយ​មាន​សមាជិក​គណបក្ស​ពីរ​បីនាក់​ចាំ​ចែក​ខិតបណ្ណ​ដល់​សាធារណជន។

អ្នកស្រី​ សេង ផា អ្នក​ភូមិ​រស់នៅ​សហគមន៍​ផ្លូវ​រថភ្លើង​ដែល​កំពុង​ប្រឈម​នឹង​ការ​បង្ខំ​ឲ្យ​ចាកចេញ មើល​ទៅ​ខិតបណ្ណ​របស់​គណបក្ស​ប្រជាជន​កម្ពុជា ដែល​បាន​បិទ​លើ​ជញ្ជាំង​ផ្ទះ​របស់​អ្នកស្រី។ រូបថត​កាល​ពី​ថ្ងៃ​ទី២៤ ខែ​ឧសភា ឆ្នាំ២០២២។ ខេមបូចា/ ស៊ន សារ៉ាត

អ្នកស្រី អ៊ីវ ម៉ាច អាយុ​ ៦២​ឆ្នាំ មាន​មុខរបរ​ជា​អ្នក​រើស​អេតចាយ​ ដែល​បាន​រស់នៅ​ទី​នេះ​ចាប់តាំង​ពី​ឆ្នាំ១៩៩២ មក​បាន​ប្រាប់​ ខេមបូចា ថា អាជ្ញាធរ​បាន​តម្រូវ​ឲ្យ​អ្នកស្រី​រើ​ផ្ទះ​ចេញ​ដោយ​មិនមាន​សំណង ហើយ​អ្នកស្រី​បាន​បដិសេធ។

អ្នកស្រី​បាន​និយាយ​ថា៖ «យើង​មិនដឹង​ថា តើពួកគេ​នឹង​ដោះស្រាយ​យ៉ាង​ណា​នោះ​ទេ ពីព្រោះ​អំឡុងពេល​ឃោសនា ពួកគេ​អត់​បាន​និយាយ​ពី​រឿង​នេះ​ទេ។ ពួកគេ​គ្រាន់​តែ​និយាយ​ថា មិនទាន់​មាន​ផែនការ​រុះរើ​ផ្ទះ​ចេញ​នោះ​ទេ»។ អ្នកស្រីបន្ថែមថា៖ «អាជ្ញាធរ​សង្កាត់​ពី​មុន​មក​ធ្លាប់​ប្រាប់​ឲ្យ​យើង​នៅ​ស្ងៀម ស៊ីបាយឲ្យឆ្ងាញ់ និងដេកលក់​ឲ្យ​ស្រួល។ តែ​ខ្ញុំ​មិនមាន​អារម្មណ៍​ស្រួល​នោះ​ទេ មក​ទល់​ពេល​នេះ»

អ្នកស្រី ម៉ុម សុភាព​ អ្នក​ភូមិ ១៧ អាយុ ៤១​ឆ្នាំ ដែល​បាន​រងការ​ប៉ះពាល់​ពី​ការ​អភិវឌ្ឍ​ផង​ដែរ និយាយ​ថា មាន​តែ​គណបក្ស​នយោបាយ​តែ​ពីរ​ប៉ុណ្ណោះ​គឺ​ គណបក្ស​ប្រជាជន​កម្ពុជា និង​គណបក្ស​ភ្លើង​ទៀន​ ដែល​ត្រូវ​បាន​ឃើញ​ថា បាន​មក​ឃោសនា​នៅ​ក្នុង​សហគមន៍​របស់​អ្នកស្រី។ ប៉ុន្តែ​គ្មាន​ការ​លើក​មក​និយាយ​ពី​បញ្ហា​ផ្លាស់ទី​លំនៅ ឬ​សំណង​ដល់​សហគមន៍​រស់នៅ​តាម​បណ្តោយ​ផ្លូវ​រថភ្លើង​នោះ​ទេ។ ​

អ្នកស្រី​បាន​ថ្លែង​ថា៖ «គណបក្ស​ភ្លើង​ទៀន​គ្រាន់​តែ​ចែក​ខិតបណ្ណ ស្រប​ពេល​គណបក្ស​ប្រជាជនកម្ពុជា​បង្រៀន​ប្រជាជន​ឲ្យ​គូស​លើ​ប្រអប់​របស់​គណបក្ស​» ដោយ​អ្នកស្រី​បាន​បន្ថែម​ថា អ្នកស្រី​ព្រួយបារម្ភ​ថា អាជ្ញាធរ​នឹង​បង្ខំ​ឲ្យ​គ្រប់គ្នា​ចាកចេញ និង​រុះរើ​លំនៅដ្ឋាន​ចេញ។

គណបក្ស​នយោបាយ​ចំនួន ១៧ បាន​ចាប់ផ្តើម​យុទ្ធនាការ​ឃោសនា​រយៈពេល​ពីរ​សប្តាហ៍​កាល​ពី​ថ្ងៃ​សៅរ៍​សប្តាហ៍​មុន ឆ្ពោះ​ទៅ​រក​ការ​បោះឆ្នោត​ក្រុមប្រឹក្សា​ឃុំសង្កាត់​នៅ​ថ្ងៃ​ទី៥ ខែ​មិថុនា​ខាង​មុខ។

គណបក្ស​ប្រជាជន​កម្ពុជា​បាន​ធ្វើការ​ឃោសនា​សារនយោបាយ​ពី​សន្តិភាព​ និង​ជ័យជម្នះ​ថ្ងៃ៧ មករា ឆ្នាំ១៩៧៩ ដែល​កំណត់​នូវ​ការ​ផ្តួលរំលំ​របប​ខ្មែរ​ក្រហម។

​លោក ប៉ា សុជាតិវង្ស ប្រធាន​គណបក្ស​ប្រជាជន​កម្ពុជា​​រាជធានី​ភ្នំពេញ បាន​និយាយ​ថា នេះ​មិនមែន​ជា​ពេលវេលា​សមស្រប​ក្នុង​ការ​និយាយ​ពី​ការ​ផ្លាស់ប្តូរ​ទីលំនៅ​នោះ​ទេ ហើយ​រឿង​នេះ​នឹង​ត្រូវ​យក​ទៅ​ពិភាក្សា​នា​ពេល​អនាគត​ជំនួស​វិញ។

លោក​បាន​ថ្លែង​ថា៖ «នេះ​មិនជាប់ពាក់ព័ន្ធ​នឹង​ការ​ប្តេជ្ញា​របស់​គណបក្ស​នយោបាយ​នោះ​ទេ ប៉ុន្តែ​​ពាក់ព័ន្ធ​នឹង​​គម្រោង​អភិវឌ្ឍន៍ហេដ្ឋារចនាសម្ព័ន្ធ​របស់​ក្រុង»។ លោកបន្ថែមថា៖ «តើ​ពួកគាត់​នឹង​បោះឆ្នោត​ឲ្យ​គណបក្ស​ដែល​ជួយ​គាត់​ ឬ​យ៉ាងណា? ហេតុអី​មិន​លើក​ពី​គណបក្ស​ដែល​ជួយ​ឲ្យ​ពួកគាត់​រស់​ឡើង​វិញ

គណបក្ស​ប្រជាជន​កម្ពុជា​បោះ​តង់​ឃោសនា​នៅ​សហគមន៍​តាម​បណ្តោយ​ផ្លូវ​រថភ្លើង​ដែល​ប្រឈម​នឹង​ការ​បង្ខំ​ឲ្យ​ចាកចេញ​នៅ​សង្កាត់​បឹងកក់​២ ខណ្ឌ​ទួលគោក រាជធានី​ភ្នំពេញ។ រូបថត​កាល​ពី​ថ្ងៃ​ទី២៤ ខែ​ឧសភា ឆ្នាំ​២០២២។ ខេមបូចា/ ស៊ន សារ៉ាត

លោក អំ សំអាត​ នាយកទទួលបន្ទុកចាត់ការទូទៅ​ប្រចាំ​អង្គការ​សិទ្ធិមនុស្ស​លីកាដូ បាន​និយាយ​ថា ពលរដ្ឋ​រងគ្រោះ​ចង់​ឃើញ​មាន​ការ​សន្យា​ផ្តល់​ជា​ដំណោះស្រាយ​ជាជាង​​គ្រាន់តែ​ដឹង​ពី​គោលនយោបាយ​របស់​គណបក្ស​នយោបាយ អំឡុងពេល​យុទ្ធនាការ​ឃោសនា​បោះឆ្នោត។

​លោក​បាន​ថ្លែង​ថា៖ «ពលរដ្ឋ​ចង់​ឃើញ​ថា គណបក្ស​ណា​អាច​ដោះស្រាយ​​បញ្ហា​របស់​ពួកគេ ជាពិសេស​មេឃុំចៅ​សង្កាត់​ដែល [ត្រូវ] ការពារ​ប្រយោជន៍​របស់​ពលរដ្ឋ​នៅ​ក្នុង​សហគមន៍»

លោក​បាន​បន្ថែម​ថា ការ​បោះឆ្នោត​ជ្រើស​ចៅសង្កាត់​គឺ​មាន​សារៈសំខាន់ ពីព្រោះ​ពួកគាត់​ត្រូវ​រស់​នៅ​ជាមួយ​នឹង​ពលរដ្ឋ និង​យល់ដឹង​ពី​បញ្ហា​ផ្សេងៗ​របស់​ពលរដ្ឋ៕ (រាយការណ៍បន្ថែមដោយ ស៊ើង និមល់)

479 views

ព័ត៌មានថ្មី

អត្ថបទពេញនិយម