កសិករកំពុងព្រួយបារម្ភអំពីការធ្លាក់ចុះតម្លៃស្រូវជាបន្តបន្ទាប់ ខណៈដែលគណបក្សនយោបាយមួយបានជំរុញឱ្យរដ្ឋាភិបាលបញ្ចេញកញ្ចប់ថវិកាពិសេសដើម្បីដោះស្រាយបញ្ហានេះ។
កសិករម្នាក់បានបង្ហោះវីដេអូឃ្លីបមួយនៅលើបណ្តាញសង្គមហ្វេសប៊ុក ដោយបញ្ជាក់ថា តម្លៃស្រូវបានធ្លាក់ចុះមកប្រហែល ៥០០រៀលក្នុងមួយគីឡូក្រាម បន្ទាប់ពីការប្រមូលផលនៅខេត្តបន្ទាយមានជ័យ។ លោកបាននិយាយថា តម្លៃបច្ចុប្បន្ន គឺ៦០០រៀល បើប្រៀបធៀបនឹងតម្លៃកាលពីឆ្នាំមុនមានតម្លៃចន្លោះពី ១ ១៥០រៀល ទៅ ១ ២៥០រៀល។
អ្នកស្រី ដេន ចាន់នី ជាកសិករដាំស្រូវនៅស្រុកត្បែងមានជ័យ ខេត្តព្រះវិហារ បានប្រាប់ សារព័ត៌មានខេមបូចា ថា អ្នកស្រីនឹងប្រមូលផលស្រូវរបស់អ្នកស្រី ទោះបីជាតម្លៃបានធ្លាក់ចុះយ៉ាងខ្លាំងនៅឆ្នាំនេះក៏ដោយ ដែលធ្វើឱ្យអ្នកស្រីព្រួយបារម្ភពីការខាតបង់យ៉ាងធ្ងន់ធ្ងរ។
អ្នកស្រីបានដាំស្រូវពូជនាងអុក និងនាងអំ ដែលឥឡូវនេះកំពុងលក់ក្នុងតម្លៃត្រឹមតែ ៦០០រៀលប៉ុណ្ណោះក្នុងមួយគីឡូក្រាម គឺស្ទើរតែពាក់កណ្តាលនៃតម្លៃកាលពីឆ្នាំមុនដែលមានតម្លៃ ១ ១៥០រៀលក្នុងមួយគីឡូក្រាម។ អ្នកស្រីបានបន្ថែមថា ទោះបីក្នុងតម្លៃថោកយ៉ាងនេះហើយ ក៏ឈ្មួញស្រូវនៅតែមានភាពស្ទាក់ស្ទើរក្នុងការប្រមូលទិញស្រូវផងដែរ។
អ្នកស្រី ចាន់នី បានធ្វើស្រែអស់រយៈពេលជាង១៧ឆ្នាំមកហើយ និងបានដាំដុះស្រូវលើផ្ទៃដីចំនួន៣ហិកតានៅឆ្នាំនេះ ដែលអាចទទួលផលបានពី៥ទៅ៦តោន។ ដូចកសិករជាច្រើននាក់ទៀតនៅក្នុងភូមិរបស់ខ្លួន អ្នកស្រី ត្រូវខ្ចីលុយពីធនាគារដើម្បីបង់ថ្លៃដើមក្នុងការបង្ករបង្កើនផលស្រូវនៅឆ្នាំនេះ។
អ្នកស្រី ចាន់នី បាននិយាយថា៖ «ស្រូវចុះថោក ហើយអត់មានឈ្មួញចុះទិញទេ។ កសិករខាងខ្ញុំ កំពុងតែងត្អូញយ៉ាប់ហើយ ព្រោះជំពាក់ធានាច្រើន។ បើតម្លៃបាន៦០០៛ សូម្បីតែថ្លៃជីថ្នាំ និងថ្លៃត្រាក់ទ័រ គឺអត់ទូទាត់ចង់រួចទេ»។
អ្នកស្រីបានអះអាងថា អ្នកស្រីមិនទាន់បានឃើញសេចក្តីប្រកាសណាមួយពីក្រសួងកសិកម្មពីតម្លៃស្រូវនៅឡើយទេ ដោយបន្ថែមទៀតថា អ្នកស្រីមិនដឹងពីវិធីចូលទៅកាន់សហគមន៍កសិកម្មទំនើប ឬកម្មវិធីគាំទ្រនានានោះទេ។
អ្នកស្រីបន្តថា៖ «ក្នុងនាមខ្ញុំជាកសិករក្នុងភូមិពោធិ៍ ឃុំពៅធិ៍ ខ្ញុំសុំជម្រាបសំណូមពរឱ្យឈ្មួញ និងសហគមន៍ ជួយឱ្យស្រូវមានតម្លៃសមរម្យសម្រាប់កសិករដើម្បីកុំឱ្យខាតដូចខ្ញុំ។ ខ្ញុំសូមស្នើរទៅខាងក្រសួងទាំងអស់ឱ្យជួយប្រជាពលរដ្ឋកសិករនៅខាងខេត្តព្រះវិហារផង។ នៅភូមិនេះ ពលរដ្ឋក្រីក្រ ហើយឥឡូវស្រូវចុះថោក បំណុលក៏កាន់តែកើនឡើងព្រោះកសិករសុទ្ធតែយកលុយពីធនាគារមកធ្វើស្រែ។ សុំឱ្យក្រសួងទាំងអស់ជួយរក្សាតម្លៃស្រូវឱ្យបានសមរម្យ។ ពួកខ្ញុំរាល់ថ្ងៃខំណាស់»។
កសិករម្នាក់ទៀតឈ្មោះ លោក តៃ សំណាង មកពីខេត្តតាកែវ បានមានប្រសាសន៍ថា លោកកំពុងរៀបចំប្រមូលផលស្រូវនៅលើដីស្រែចំនួន៦ហិកតានៅចុងខែនេះ (ខែវិច្ឆិកា) ហើយក៏មានការព្រួយបារម្ភពីការធ្លាក់ចុះយ៉ាងខ្លាំងនៃតម្លៃស្រូវនៅឆ្នាំនេះដែរ។
លោកបានឱ្យដឹងថា កាលពីឆ្នាំមុន ស្រូវលក់បានតម្លៃ ១ ២៥០រៀលក្នុងមួយគីឡូក្រាម ប៉ុន្តែតម្លៃបានធ្លាក់ចុះមកនៅប្រហែល ៨០០រៀល។ ទោះជាយ៉ាងណាក៏ដោយ លោកមិនដឹងថា អ្វីជាមូលហេតុដែលបណ្ដាលឱ្យមានការធ្លាក់ចុះបែបនេះទេ។ លោកបានជំរុញឱ្យក្រសួងដែលពាក់ព័ន្ធជួយធានាតម្លៃឱ្យបានសមរម្យសម្រាប់កសិករ។
លោកបានបញ្ជាក់ថា៖ «ប្រសិនបើតម្លៃនៅតែទាប ពួកយើងនឹងប្រឈមមុខនឹងខាតហើយ។ យើងខ្ចីលុយដើម្បីទិញជី និងថ្នាំសម្លាប់សត្វល្អិត ហើយយើងអាចសងលុយគេវិញបានលុះត្រាតែយើងលក់ស្រូវបានសិន»។ លោកបានបន្តថា ក្នុងរយៈពេលប៉ុន្មានឆ្នាំដែលលោកធ្វើស្រែ តម្លៃស្រូវមិនដែលធ្លាក់ចុះក្រោម ១ ០០០រៀលក្នុងមួយគីឡូក្រាមទេ។
លោកក៏បានប្រាប់ សារព័ត៌មានខេមបូចា ដែរថា លោកមិនបានចូលរួមក្នុងសហគមន៍កសិកម្មទំនើបណាមួយទេ ព្រោះលោកមិនដឹងថាចូលដោយរបៀបណានោះទេ។
រដ្ឋមន្ត្រីក្រសួងកសិកម្ម លោក ឌិត ទីណា កាលពីពេលថ្មីៗនេះ បានអំពាវនាវដល់ឈ្មួញឱ្យផ្តល់តម្លៃសមរម្យសម្រាប់ស្រូវក្នុងអំឡុងពេលប្រមូលផលបច្ចុប្បន្ននេះ ដោយកត់សម្គាល់ថា កសិករកំពុងប្រមូលផលស្រូវនាងអំ ខណៈកសិករនៅតំបន់ផ្សេងទៀតទូទាំងប្រទេសក៏កំពុងប្រមូលផលស្រូវផ្ការំដួលដែរ។
លោកបានមានប្រសាសន៍ថា៖ «អំពាវនាវឱ្យបងបង្អូនដែលជាឈ្មួញ ជួយទិញពីបងប្អូនប្រជាកសិករយើងក្នុងតម្លៃសមរម្យទៅ ដូចជាស្រូវផ្ការំដួលនេះក្នុងវង្វង់ ១ ០០០រៀលនេះ ជាតម្លៃសមរម្យមែនទែន»។
លោក ទីណា បានបន្តថា៖ «ខ្ញុំក៏បានជជែកជាមួយនឹងសហព័ន្ធស្រូវអង្ករដូចគ្នា គឺត្រៀមក្នុងខែ១១ យុទ្ធនាការក្នុងការប្រមូលទិញស្រូវរបស់យើងក្នុងតម្លៃសមរម្យនេះ»។
លោកក៏បានអំពាវនាវដល់ម្ចាស់បំណុលឱ្យពន្យារពេលការសងបំណុល ដោយលើកឡើងពីតម្លៃទីផ្សារទាប ដែលធ្វើឱ្យកសិករមានការលំបាកក្នុងការសងប្រាក់កម្ចី។ លោកបានលើកទឹកចិត្តកសិករឱ្យបង្កើតសហគមន៍ដើម្បីពង្រឹងលទ្ធភាពរបស់ពួកគេក្នុងការទទួលបានប្រាក់កម្ចី និងកែលម្អសហគមន៍កសិកម្ម ដោយចែករំលែកថា កម្ពុជាមានកសិករចំនួន ១,៧លានគ្រួសារ និងដីកសិកម្មចំនួន ៣លានហិកតា។
ក្រសួងរបស់លោកក៏កំពុងពង្រីកកិច្ចសហការរវាងសហគមន៍ជាមួយដៃគូឯកជន ដូចជាក្រុមហ៊ុន វីរៈ ប៊ុនថាំ ដែលទិញស្រូវក្នុងតម្លៃ ៩៥០រៀលក្នុងមួយគីឡូក្រាម បើប្រៀបធៀបនឹងតម្លៃបច្ចុប្បន្នគឺ ៦០០រៀល។ លោកបានចង្អុលបង្ហាញថា ស្រូវប្រហែល ៣០ ០០០តោនកំពុងត្រូវបានប្រមូលផលជារៀងរាល់ថ្ងៃ ហើយទោះបីជាតម្លៃបច្ចុប្បន្នទាបក៏ដោយ ការគណនាបានបង្ហាញថាទិន្នផលនឹងមានកម្រិតខ្ពស់។
គណបក្សប្រជាធិបតេយ្យមូលដ្ឋាន ដែលជាគណបក្សប្រឆាំង បានសម្តែងការព្រួយបារម្ភពីតម្លៃស្រូវសើមធ្លាក់ចុះបែបនេះ ដោយស្នើសុំឱ្យរដ្ឋាភិបាលបញ្ចេញ«កញ្ចប់ថវិកាពិសេស» ដើម្បីប្រមូលទិញស្រូវពីកសិករក្នុងតម្លៃសមរម្យ។
គណបក្សបានលើកឡើងក្នុងសេចក្តីអំពាវនាវរបស់ខ្លួនថា៖«[តម្លៃស្រូវសើម] កំពុងធ្លាក់ចុះយ៉ាងគំហុកក្នុងរដូវពេលប្រមូលផលនេះ ដែលកំពុងបង្កផលប៉ះពាល់យ៉ាងធ្ងន់ធ្ងរដល់ជីវភាពរស់នៅ និងបង្កើតជាបន្ទុកបំណុលបន្ថែមដល់បងប្អូនប្រជាកសិករខ្មែរនៅទូទាំងប្រទេសកម្ពុជា»។
ប្រធានគណបក្សប្រជាធិបតេយ្យមូលដ្ឋាន លោក សេក សុខា បានសង្កេតឃើញបញ្ហាប្រឈមមួយចំនួនដែលកសិករកំពុងជួបប្រទះ រួមមានតម្លៃទាបជាប់រហូត ខ្វះឃ្លាំងស្តុកស្រូវ និងឈ្មួញកណ្តាលដែលមានបញ្ហា។
លោកបានថ្លែងថា៖ «កសិករភាគច្រើនបានខ្ចីលុយគេសម្រាប់ធ្វើស្រែចម្ការ ហើយពួកគាត់ត្រូវសងប្រាក់កម្ចីវិញបន្ទាប់ពីប្រមូលផលរួច ដល់អ៊ីចឹងវាពិបាកនៅពេលដែលពួកគាត់ត្រូវលក់ស្រូវក្នុងតម្លៃទាប»។
លោកបានបន្តថា ស្ថាប័នពាក់ព័ន្ធ«បានដឹងរួចហើយ»ថា បញ្ហានៅទីណា ហើយរដ្ឋាភិបាលគួរតែបែងចែកថវិកាពិសេសដើម្បីដោះស្រាយស្ថានការណ៍នេះ។
អ្នកនាំពាក្យក្រសួងកសិកម្ម លោក ឃឹម ហ្វីណង់ មិនទាន់បានឆ្លើយតបទៅនឹងសំណួររបស់ អ្នកសារព័ត៌មានខេមបូចា នៅឡើយទេ នៅពេលអត្ថបទនេះចេញផ្សាយ៕
ប្រែសម្រួលពីអត្ថបទភាសាអង់គ្លេស៖ Farmers Struggle With Falling Rice Price, Plea for Govt Support
