ប្រជាពលរដ្ឋសំណូមពរដល់អាជ្ញាធរជួយពន្លឿនការដោះស្រាយ ខណៈពេលដែលពលរដ្ឋកំពុងជួបផលប៉ះពាល់ជីវភាពប្រចាំថ្ងៃក្រោយពីផ្ទះពួកគាត់បានខូចខាតដោយសារបាក់ស្រុតចូលទន្លេកាលពីចុងខែមេសា ហើយពួកគាត់មិនទាន់ទទួលបានដំណោះស្រាយនៅឡើយ។
របាយការណ៍របស់លេខាធិការដ្ឋានគ្រប់គ្រងគ្រោះមហន្តរាយខេត្តកណ្ដាលបង្ហាញថាប្រជាពលរដ្ឋ២១គ្រួសារ និងផ្ទះចំនួន៤០ខ្នងបានរងផលប៉ះពាល់ ដោយមានផ្ទះពីរខ្នងបានបាក់ចូលទន្លេ ២៨ខ្នងផ្សេងទៀតរងការខូចខាតធ្ងន់ធ្ងរ និង១០ខ្នងផ្ទះទៀតរកការខូចខាតតិចតួច។
របាយការណ៍អះអាងថាការបាក់ស្រុតផ្ទះប្រជាពលរដ្ឋគឺដោយសារទឹកបានស្រកចុះ ហើយដីក៏បានបាក់ដោយសារប្រជាពលរដ្ឋបានសង់ផ្ទះជិតមាត់ទន្លេពេក ដែលនាំឲ្យមានទម្ងន់ខ្លាំងលើច្រាំងទន្លេ។ ក្នុងរបាយការណ៍មិនបានបញ្ជាក់ថាការបូមខ្សាច់ជាមូលហេតុនោះទេ។ ប្រជាពលរដ្ឋនៅទីនោះជាច្រើនបានប្រាប់ខេមបូចា ថា ពួកគេជឿថាការបូមខ្សាច់គឺជាមូលហេតុនាំឱ្យមានការបាក់រលំផ្ទះបែបនេះ។
លោក វ៉ា ស្រ៊ុន និងប្រពន្ធ មានមុខរបរជាអ្នកដូរលុយដែលជាអ្នករងគ្រោះដោយផ្ទះរបស់គាត់ខូចខាតធ្ងន់ធ្ងរ បានលើកឡើងថា មកដល់ពេលនេះមិនទាន់ទទួលបានដំណោះស្រាយនៅឡើយទេ ហើយលោកសំណូមពរឱ្យអាជ្ញាធរេជួយផ្តល់ដំណោះស្រាយឱ្យបានឆាប់។
លោកបន្តថា គាត់បានទៅលក់ដូរកន្លែងដើមវិញបាន១០ថ្ងែហើយនៅក្បែរផ្សារដោយពេលថ្ងៃលក់ដូរធម្មតាហើយពេលយប់ត្រូវទៅសម្រាកនៅផ្ទះបងប្អូន។
លោក ស៊្រុន បញ្ជាក់ថា៖ «គេមិនទាន់ដោះស្រាយឱ្យទេដឹងជាម៉េចៗទេនេះតាំងពីពេលបាក់មកដល់ឥឡូវគឺនៅទ្រឹង គេឱ្យយើងនៅចាំអ្នកជំនាញមកពិនិត្យសិន ហើយគេអត់កំណត់ទេថាពេលណាទេ សង្ឃឹមថាពួកគាត់នឹងដោះស្រាយឱ្យបានឆាប់មកចុះ ព្រោះបើឱ្យចាំយូរទៀតវាកាន់តែប៉ះពាល់ដល់របរលក់ដូររកស៊ីរបស់ពួកយើងទៀតហើយ»។
ប្រពន្ធរបស់របស់លោក ស៊្រុន គឺអ្នកស្រី គឹម ម៉ាណែត ក៍បានឱ្យដឹងថា អ្នកស្រីក៏បារម្ភពីសុវត្ថិភាពក្នុងការប្រកបរបរប្រចាំថ្ងៃនេះដែរ បើទោះតូបលក់នៅជិតថ្នល់ក៏ដោយ។
អ្នកស្រីបន្ថែមថា៖ «ធ្វើយ៉ាងម៉េចទេខ្លាចក៏ខ្លាចដែរពីពេលនោះមកខ្ញុំបាក់ស្បាតហើយតែក៏ត្រូវលក់ដូរបន្តព្រោះខ្ញុំមានតែពីរនាក់យាយតាហ្នឹង ទោះមិនសូវមានម៉ូយដូចមុនក៏គ្រាន់បានរួចថ្លៃថ្នាំប្តីមួយខែៗដែរ ណាមួយទៅនៅផ្ទះបងប្អូនជាបណ្តោះអាសន្នក៏ពិតមែនតែក៏ខ្លាចចិត្តគេដែរ យើងមិនអាចចេះតែនៅរហូតបានទេ»។
លោក ឡោ ស៊ុយសែ អាជីវករលក់មាសនិងជាពលរដ្ឋរងគ្រោះក្នុងចំណោមពលរដ្ឋផ្សេងទៀត មកដល់ពេលនេះគាត់មិនទាន់ទទួលបានដំណោះស្រាយនៅឡើយទេ។ គាត់សំណូមពរឱ្យអាជ្ញាធរជួយដោះស្រាយឱ្យបានឆាប់ដើម្បីកាត់បន្ថយការប៉ះពាល់របស់ពលរដ្ឋរងគ្រោះ។
លោកបន្តថា៖ «ពេលនេះកំពុងតែប៉ះពាល់ការរកស៊ីខាតលក់ដូរ ជាធម្មតារើទៅលក់កន្លែងថ្មីបាត់ម៉ូយលក់មិនដាច់ដូចកន្លែងពីមុនទេ។ ខ្ញុំសំណូមពរឱ្យរដ្ឋជួយទប់ស្កាត់ច្រាំងបាក់នៅពេលទឹកឡើងហើយសុំធ្វើឡើងវិញទៅតាមជាក់ស្តែងនិងជួយដោះស្រាយឱ្យបានឆាប់ៗ»។
លោកបន្តថា ក្រោយពេលបាក់ស្រុតនេះហើយ លោកឃើញមានអាជីវកម្មបូមខ្សាច់ក្នុងតំបន់នេះនៅតែបន្តបូមនិងដឹកតាមទន្លេក្រោយផ្ទះគាត់រាល់ថ្ងៃ។
លោក ឈាង តាង មេឃុំព្រែកគយ ថ្លែងថា ខាងអាជា្ញធរកំពុងតែធ្វើការជាមួយអ្នកជំនាញនិងពន្លឿនការដោះស្រាយជូនពលរដ្ឋឱ្យបានលឿន។
លោកលើកឡើងថា៖ «អាជ្ញាធរនិងមន្ត្រីជំនាញពាក់ពន្ធ័កំពុងតែសិក្សាស្រាវជ្រាវលើករណីនេះរាល់ថ្ងៃនេះក្នុងការដោះស្រាយឱ្យបានឆាប់ ហើយសម្រាប់ពេលវេលាជាក់លាក់មិនទាន់អាចកំណត់បាននៅឡើយទេ»។
អ្នកសារព័ត៌មានខេមបូចា មិនអាចសុំការឆ្លើយតបពីអភិបាលខេត្តកណ្តាល លោក គង់ សោភណ្ឌ័ បាននោះទេកាលពីថ្ងៃទី១១ខែឧសភា ខណៈលោក នូវប៉េង ច័ន្ទតារា អភិបាលរង និងអ្នកនាំពាក្យខេត្តកណ្តាល គ្រាន់តែថ្លែងថា អាជ្ញាធរកំពុងតែដោះស្រាយហើយ តែសម្រាប់ពេលវេលាជាក់លាក់លោកថាមិនទាន់អាចកំណត់និងដឹងច្បាស់នៅឡើយទេ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក មានប្រសាសន៍ថា កាលណាមានផលប៉ះពាល់ដោយសារគ្រោះបាក់ដីកើតឡើងពលរដ្ឋតែងតែមានផលប៉ះពាល់តិច រឺច្រើនទៅតាមស្ថានភាពជាក់ស្តែង ប៉ុន្តែអាជ្ញាធរមូលដ្ឋានគួរតែដោះស្រាយពិនិត្យមើលឱ្យបានឆាប់រហ័ស។
ប្រសិនបើបាត់បង់ទីលំនៅរស់នៅស្របច្បាប់របស់ពលរដ្ឋ គឺវាប៉ះពាល់ទៅដល់សិទ្ធិសេរីភាពដូចជាមានលំនៅដ្ឋានសមរម្យ ហើយបញ្ហានេះជាការទទួលខុសត្រូវរបស់អាជ្ញាធរត្រូវធ្វើយ៉ាងណាដើម្បីទប់ស្កាត់បញ្ហាហ្នឹង តើជាការកើតឡើងដោយសារអ្វី? វាមិនអីទេបើសិនជាបង្កឡើងពីធម្មជាតិតែបើមកពីកត្តាមនុស្សបូមខ្សាច់បូមដីនៅតំបន់ហ្នឹង អាជ្ញាធរគួរតែមានវិធានការ។
លោក សែនករុណា លើកឡើងថា៖ «គួរតែមានវិធានការឱ្យបានច្បាស់លាស់មុននឹងអនុញ្ញាតឱ្យបូមខ្សាច់នៅតំបន់នេះកុំឱ្យប៉ះពាល់ដល់ការរស់នៅរបស់ពលរដ្ឋនិងបរិស្ថាន។ អាជ្ញាធរគួរតែពិនិត្យមើលឡើងវិញ មិនគួរបណ្តែតបណ្តោយនោះទេបញ្ហាហ្នឹងកើតឡើងនាំឱ្យមានការបាត់បង់ដីធ្លីប៉ះពាល់ដល់ផ្ទះសម្បែង ការរកស៊ីលក់ដូរ សុខភាពសាធារណៈ អនាម័យ សុវត្ថិភាព និងជីវភាពរស់នៅប្រចាំថ្ងៃរបស់ពលរដ្ឋ»។
លោកបន្ថែមថា ក្នុងករណីនេះបើសិនជានៅបន្តអូសបន្លាយមិនទាន់មានការដោះស្រាយដល់ពលរដ្ឋ អាចនឹងប៉ះពាល់ដល់តួនាទីនិងការទទួលខុសត្រូវរបស់អាជ្ញាធរនិងអភិបាលកិច្ចល្អរបស់ខ្លួនមិនបានត្រឹមត្រូវ ហើយអាចបន្តឱ្យខូចបរិស្ថាននៅទំបន់នោះ៕
