សមាគមសម្ព័ន្ធអ្នកសារព័ត៌មានកម្ពុជា

នាយករដ្ឋបាលស្រុកសង្កែរិះគន់ថាថ្នាក់លើតែងតាំងមន្ត្រីខុសនីតិវិធី

មន្ត្រីកំពុងជិះម៉ូតូចូលក្នុងបរិវេណសាលាស្រុកសង្កែ ខេត្តបាត់ដំបង។ រូបថតនៅថ្ងៃទី២៥ ខែវិច្ឆិកា ឆ្នាំ២០២២។ ខេមបូចា/ បញ្ញា ឆ័ពណ្ណ
មន្ត្រីកំពុងជិះម៉ូតូចូលក្នុងបរិវេណសាលាស្រុកសង្កែ ខេត្តបាត់ដំបង។ រូបថតនៅថ្ងៃទី២៥ ខែវិច្ឆិកា ឆ្នាំ២០២២។ ខេមបូចា/ បញ្ញា ឆ័ពណ្ណ

នាយករដ្ឋបាលសាលាស្រុកសង្កែខេត្តបាត់ដំបងបានដាក់លិខិតលាឈប់ពីតួនាទីដោយ​បញ្ជាក់​ថា លោកមិនពេញចិត្ត អាជ្ញាធរថ្នាក់ខេត្តតែងតាំងមន្ត្រីថ្នាក់ខេត្ត​ដូចគ្នា​ឱ្យមកកាន់​តួនាទី​ជាអភិបាលរងស្រុកខុសនីតិវិធី។

លោក​ គង់ សុគុណ្ណា នាយករដ្ឋបាលសាលាស្រុកសង្កែបាន​ដាក់លិខិតលាលែង​ពីតួនាទី​កាលពីថ្ងៃទី២១ ខែវិច្ឆិកា ឆ្នាំ២០២២ ដោយបញ្ជាក់ថា លោកមានបញ្ហាផ្លូវចិត្ត​ពីការទទួល​រងភាពអយុត្តិធម៌ក្នុងការតែងតាំងអភិបាលរងស្រុកមានភាពមិនប្រក្រតី។​

លោក សុគុណ្ណា ថ្លែងប្រាប់ខេមបូចា នៅថ្ងៃទី២៤ ខែវិច្ឆិកា បន្ថែមលើលិខិតថា តាមនីតិវិធី​លោកជានាយករដ្ឋបាលត្រូវទទួលបានការតែងតាំងជាអភិបាលរងថ្មី ប៉ុន្តែអភិបាលខេត្ត​បែរជាតែងតាំងមន្ត្រីថ្នាក់ខេត្តឱ្យមកកាន់តួនាទីនេះវិញ។​

លោក សុគុណ្ណា​ ថ្លែងថា៖ «ករណីនេះ អភិបាលរងមួយរូបលោក ជា សំអ៊ុន គាត់ជាអតីត​ប្រធាន​ច្រកចេញចូលតែមួយសាលាខេត្ត។ ដល់ពេលឯកឧត្តម សុខ លូ គាត់ដក ជា សំអ៊ុន ហ្នឹងចេញពីប្រធានការិយាល័យច្រកចេញចូលតែមួយហ្នឹងទៅ ក៏រកកន្លែងកៅអីសម្រាប់​ជំនួសឱ្យគាត់វិញ ក្លាយជាអភិបាលរងស្រុកសង្កែហ្នឹងទៅ»។​

លោក គង់ សុគុណ្ណា ឱ្យដឹងថា លិខិតរបស់លោកដាក់ទៅរដ្ឋមន្ត្រីក្រសួងមហាផ្ទៃ​តាមរយៈ​អភិបាលខេត្តបាត់ដំបងកាលពីថ្ងៃទី២១ ខែវិច្ឆិកា នោះ នៅមិនទាន់មានការឆ្លើយតបនៅឡើយ​ទេ។​

អភិបាលស្រុកសង្កែលោក ​នាង ច័ន្ទថារ៉ា ថ្លែងថា ការតែងតាំងនេះ លោកមិនបានដឹងទេ ព្រោះថ្នាក់ខេត្តរៀបចំមករយៈពេល៤ខែមកហើយ ចំណែករូបលោកទើប​កាន់តំណែងនេះ​បាន២ខែប៉ុណ្ណោះ។ នៅពេលសួរថា តើត្រូវសម្រេចយ៉ាងណា ចំពោះការស្នើសុំលាឈប់ពី​តួនាទី​របស់នាយករដ្ឋបាលនេះ? លោកថា រង់ចាំការសម្រេចពីថ្នាក់លើសិន។​

លោក ច័ន្ទថារ៉ា​ បញ្ជាក់ថា៖ «ចាំមើលខ្ញុំឆ្លងយោបល់ទៅថ្នាក់ដឹកនាំសិនថា តើគាត់ឯកភាព​តាមសំណូមពរនេះឬអត់?។ បើគាត់ឯកភាពមានតែរៀបចំជូនតាមសំណូមពរគាត់»។

អភិបាលខេត្តបាត់ដំបង លោក សុខ លូ មិនបកស្រាយច្រើនទេ លើករណីនេះ ដោយបញ្ជាក់​ថា ការតែងតាំងអភិបាលរងស្រុកសង្កែនោះមិនមានអ្វីមិនប្រក្រតីនោះទេ។ ឆ្លើយបែបនេះ​ហើយ​លោកក៏ចុចបិទទូរសព្ទទៅមិនស្តាប់សំនួរបន្តទេ។​

លោក សុខ លូ មានប្រសាសន៍យ៉ាងខ្លីថា៖«ខ្ញុំដូចមិនយល់ថា មានភាពមិនប្រក្រតី ឬ ភាពអយុត្តិធម៌យ៉ាងម៉េចទេ ខ្ញុំមិនដឹងដែរ ទាល់តែសួរទៅគាត់ផ្ទាល់»។

អ្នកនាំពាក្យក្រសួងមហាផ្ទៃលោក ខៀវ សុភ័គ ថ្លែងថា លោកបានដឹងករណី​នាយករដ្ឋបាល​ស្រុកសង្កែសុំលាលែងពីតំណែងនេះតាមសារព័ត៌មាន ប៉ុន្តែលោកមិនទាន់ទទួលបាន​លិខិត​ជាផ្លូវការនៅឡើយ។ ទោះយ៉ាងណាលោកថា បើម្ចាស់ខ្លួនសុំលាឈប់ហើយថ្នាក់លើ​មានតែ​យល់ស្របមិនអាចបង្ខំឱ្យធ្វើការទៀតបានទេ។​

លោក ខៀវ សុភ័គ ថ្លែងថា៖ «បើគាត់សុំលាឈប់ហើយ យើងត្រូវតែអនុញ្ញាតហើយ ព្រោះ​តាម​ចិត្តគាត់។ បើគាត់សុំឈប់ហើយយើងមិនឱ្យគាត់ឈប់ វាហាក់ដូចជាយើងបង្ខំឱ្យ​គាត់​ធ្វើការទាំងបង្ខំ»

លោក គង់ សុគុណ្ណា (រូបខាងស្តាំ) នៅក្នុងពិធីមួយកាលពីថ្ងៃទី៦ ខែមករា ឆ្នាំ២០១៨។ រូបភាពហ្វេសប៊ុក Kong Sokonna

ករណីនេះ លោក យិន​​ ម៉េងលី មន្ត្រីសមាគមអាដហុកប្រចាំខេត្តបាត់ដំបង ជំរុញឱ្យស្ថាប័ន​ពាក់ព័ន្ធ​ត្រូវស៊ើបអង្កេតករណីនេះ ដើម្បីកុំឱ្យមានការតែងតាំងមន្ត្រី​ដោយមានការប្រកាន់​​បក្ខពួក ឬពុករលួយដែលប៉ះពាល់ទាំងមន្ត្រីដែលខិតខំធ្វើការងារ និងប៉ះពាល់ដល់សង្គម​ទាំង​មូល។​

លោក ម៉េងលី លើកឡើងថា៖ «ខ្ញុំស្នើឱ្យមានការអង្កេតឡើងវិញ ធ្វើអធិការកិច្ចពី​ក្រសួងមហាផ្ទៃ លើបញ្ហានេះថា តើវាមានភាពមិនប្រក្រតី ឬ វាមានភាពប្រក្រតី»។

លោក ម៉េងលី ជំរុញភាគីពាក់ព័ន្ធដោះស្រាយឱ្យបានទាន់ពេលវេលា ដើម្បីកុំឱ្យរឿង​នេះ​ក្លាយ​ជាបញ្ហារ៉ាំរៃក្នុងសង្គម។​

លោក ប៉ិច ពិសី នាយកប្រតិបត្តិអង្គការ​តម្លាភាពកម្ពុជា យល់ឃើញថា បច្ចុប្បន្នមន្ត្រី​នៅ​ថ្នាក់មូលដ្ឋានមានសមត្ថភាពច្រើនដូច្នេះគួរដំឡើងតួនាទីអ្នកមូលដ្ឋានដែលពួកគេដឹងបញ្ហានៅទីនោះស្រាប់។​

លោក ប៉ិច ពិសី ថ្លែងថា៖ «អ្នកពីក្រៅក៏មិនមានបញ្ហាទាស់ខុសអីដែរ ប៉ុន្តែជួនកាលគាត់​អត់​យល់បរិបទនៅក្នុងតំបន់ហ្នឹងទេ ហើយមកដល់ពេលនេះខ្ញុំយល់ថា អ្នកនៅមូលដ្ឋាននីមួយៗ​មានសមត្ថភាពមានបទពិសោធន៍គ្រប់គ្រាន់ក្នុងការទទួលបានតំណែងក្នុងការដឹកនាំមូលដ្ឋាន​របស់គាត់»។​

ទោះយ៉ាងណា លោក ប៉ិច ពិសី លើកទឹកចិត្តឱ្យនាយករដ្ឋបាលស្រុកសង្កែ​លើកយកបញ្ហា​ដែលយល់ថា ការតែងតាំងខុសប្រក្រតី ឬមានបញ្ហាអ្វីផ្សេងៗ​នៅពីក្រោយនោះ​ទៅជជែក​ជាមួយ​ស្ថាប័នថ្នាក់ដឹកនាំខាងលើទៀតដើម្បីដោះស្រាយ។​ បើតាមលោក​ គង់ សុគុណ្ណា បានបន្ថែមថា សាលាស្រុកសង្កែតែងតាំង​អភិបាលរងថ្មី២រូប​គឺ១រូប​​នេះមន្ត្រីនៅសាលាស្រុក និង១រូបទៀតចាត់តាំងមន្ត្រីមកពីសាលាខេត្ត ហើយអ្នកទាំង២​ត្រូវ​ប្រកាសឱ្យចូលកាន់តួនាទីនៅថ្ងៃទី២៥ ខែវិច្ឆិកា ឆ្នាំ២០២២។  លោកបន្តថា ចំពោះការ​ផ្សព្វផ្សាយ​ព័ត៌មានពីភាពមិនប្រក្រតី និងការលាលែងចេញពីតួនាទីនេះលោកមិនបារម្ភពី​សុវត្ថិភាពទេ ព្រោះជាការសុខចិត្តបាត់បង់ផលប្រយោជន៍ ឬតួនាទីផ្ទាល់ខ្លួនដើម្បីយុត្តិធម៌៕

324 views

ព័ត៌មានថ្មីៗ

អត្ថបទពេញនិយម