សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋនៅឃុំមួយខេត្តបាត់ដំបងតវ៉ាដោយ​សារ​អាជ្ញាធរកាត់ឆ្វៀលដីពួកគាត់ទៅឱ្យឃុំផ្សេងគ្រប់គ្រង

មន្ត្រីវាស់វែងដីធ្លី និងប្រជាពលរដ្ឋចូលរួមក្នុងវេទិការប្រជុំផ្សព្វផ្សាយសេចក្តីប្រកាសកំណត់តំបន់ដី ដើម្បីវិនិច្ឆ័យការចុះបញ្ជីដីធ្លីលក្ខណៈជាប្រព័ន្ធចំនួនបួនភូមិ ក្នុងឃុំកំពង់ព្រះ ស្រុកសង្កែ ខេត្តបាត់ដំបង នៅព្រឹកថ្ងៃទី១៤ ខែកុម្ភ: ឆ្នាំ២០២៤។ (ខេមបូចា/ សុខ សាវី)
មន្ត្រីវាស់វែងដីធ្លី និងប្រជាពលរដ្ឋចូលរួមក្នុងវេទិការប្រជុំផ្សព្វផ្សាយសេចក្តីប្រកាសកំណត់តំបន់ដី ដើម្បីវិនិច្ឆ័យការចុះបញ្ជីដីធ្លីលក្ខណៈជាប្រព័ន្ធចំនួនបួនភូមិ ក្នុងឃុំកំពង់ព្រះ ស្រុកសង្កែ ខេត្តបាត់ដំបង នៅព្រឹកថ្ងៃទី១៤ ខែកុម្ភ: ឆ្នាំ២០២៤។ (ខេមបូចា/ សុខ សាវី)

ប្រជាពលរដ្ឋក្នុងឃុំកំពង់ព្រះ ស្រុកសង្កែ ខេត្តបាត់ដំបង បានតវ៉ាជំទាស់មិនឱ្យអាជ្ញាធរ​កាត់​ឆ្វៀល​ដីពួកគាត់ដែលអាស្រ័យផលយូរឆ្នាំ​មកហើយទៅឱ្យរដ្ឋបាលឃុំ​ផ្សេងគ្រប់គ្រងនោះទេ ដោយលើកហេតុផលមួយចំនួនដូចជាថា​ឆ្ងាយពិបាកធ្វើដំណើររកសេវារដ្ឋបាល ​និងមិន​ស្គាល់​មន្ត្រីឃុំជាដើម។

ការតវ៉ាជាថ្មីនេះកើតឡើងកាលពីព្រឹកថ្ងៃទី១៤ខែកុម្ភៈឆ្នាំ២០២៤ ខណៈដែលគណៈកម្មការ រដ្ឋបាលខេត្តបាត់ដំបង​បានបើកកិច្ចប្រជុំ​ផ្សព្វ​ផ្សាយសេចក្តីប្រកាសកំណត់តំបន់ធ្វើការវិនិច្ឆ័យ​ការចុះបញ្ជីដីធ្លី​លក្ខណៈជាប្រព័ន្ធ​ចំនួន​បួនភូមិ ក្នុង​ឃុំកំពង់ព្រះ ស្រុកសង្កែ ខេត្តបាត់ដំបង រួម​មាន​ភូមិបញ្ញា ភូមិកំពង់ព្រះ ភូមិស្រះកែវ និងភូមិអណ្តូងត្រាច នៅក្នុងបរិវេណ វត្តកំពង់ព្រះ​។ ក្នុងកិច្ចប្រជុំផ្សព្វផ្សាយនេះមាន​ប្រជាជន​ចូលរួមប្រមាណជាង៥០០នាក់ និងមានអាជ្ញាធរ​ពាក់ព័ន្ធថ្នាក់ខេត្ត​ ស្រុក និងឃុំផងដែរ។

ក្នុងកិច្ចប្រជុំផ្សព្វផ្សាយនោះតំណាងប្រជាពលរដ្ឋខាងលើបានក្រោកឈរលើកឡើងតវ៉ាស្នើសុំឱ្យអាជ្ញាធរខេត្តជួយអន្តរាគមន៍រក្សាព្រំប្រទល់ដីរបស់ពួកគាត់ឱ្យស្ថិតនៅក្រោមការគ្រប់គ្រង​របស់រដ្ឋបាលឃុំកំពង់ព្រះដដែល ហើយពួកគាត់មិនយល់ព្រមទៅចុះបញ្ចីដីធ្លីនៅរដ្ឋបាល​ឃុំកំពង់ព្រាង​នោះទេ។ បន្ថែមពីនោះពួកគាត់បានបដិសេធទទួលយកការដោះស្រាយ​របស់​អាជ្ញាធរ​ឃុំ និងស្រុកកាលពីសប្តាហ៍​កន្លងមក។

ស្មៀនឃុំកំពង់ព្រះ លោក សំ ស៊ីណា បានឱ្យដឹងថា ក្រោយពីប្រជាពលរដ្ឋឡើងតវ៉ាច្រើននាក់​ក្នុងកិច្ចប្រជុំផ្សព្វផ្សាយ​​​ខាងលើនេះលោក​​បានប្រគល់ឯកសារតវ៉ាសុំរក្សាព្រំដីនៅដដែល​ដោយ​​​មានភ្ជាប់មេដៃរបស់ប្រជាពលរដ្ឋជាង៦០០នាក់(ទាំងអ្នកប៉ះពាល់និងប្រជាពលរដ្ឋគាំទ្រការតវ៉ា) និងឯកសារបដិសេធលទ្ធផល​កិច្ចប្រជុំ​ដោះស្រាយរបស់រដ្ឋបាលស្រុកសង្កែ នៅថ្ងៃទី៧ ខែកុម្ភៈ ឆ្នាំ២០២៤ ព្រមទាំង​ឯកសារពាក់ព័ន្ធ​មួយចំនួនទៀតជូនទៅ​ឱ្យ​គណៈកម្មការរដ្ឋបាលខេត្ត។

ទាក់ទងបញ្ហានេះ លោក នាង ច័ន្ទថារ៉ា អភិបាលស្រុកសង្កែ ខេត្តបាត់ដំបង បានឱ្យដឹងថា ប្រជាពលរដ្ឋមិនយល់​ព្រមតាមការដោះស្រាយកម្រិតត្រឹមឃុំ និងស្រុកនោះទេ ដោយគាត់ចង់​ឱ្យរដ្ឋបាលខេត្តដោះស្រាយ​រឿងព្រំប្រទល់ដីរវាងឃុំកំពង់ព្រះនិងកំពង់ព្រាងវិញ។

លោកបញ្ជាក់បន្ថែមថា ការឡើងតវ៉ារបស់ពលរដ្ឋខាងលើនេះលោក អ៊ូ ដារី អភិបាលរង​ខេត្ត ដែលដឹកនាំវេទិកា បានឆ្លើយតបទៅប្រជាពលរដ្ឋថារឿងព្រំប្រទល់ដីនេះគាត់មិនទាន់​បក​ស្រាយ​បានភ្លាមៗនោះទេ គឺត្រូវមានផែនទីនិងប្រវត្តិដីច្បាស់លាស់ដោយលោក​សន្យាថា​នឹង​បើកកម្មវិធីប្រជុំដោះស្រាយមួយទៅសប្តាហ៍ក្រោយ ដោយអញ្ជើញអ្នកពាក់ព័ន្ធទៅដោះ​ស្រាយ​​​គ្នា​នៅរដ្ឋបាលខេត្តផ្ទាល់។

លោក ច័ន្ទថារ៉ា បន្ថែមថា៖ «ការចុះបញ្ជីនៅតែបន្តដដែលមិនមានរាំងស្ទះនោះទេចំពោះ​ភូមិ​ណា​​ដែលអត់មានបញ្ហា ចំណែកភូមិណាដែលមានការតវ៉ារឿងព្រំប្រទល់ដី គឺផ្អាកសិន​ដោយ​រង់ចាំ​ការដោះស្រាយរួចរាល់ សិនទើបអាចចុះបញ្ជីបាន»

លោកអភិបាលស្រុកបញ្ជាក់ថា ឱ្យដឹងថាកាលពីថ្ងៃទី៧ ខែកុម្ភៈ ឆ្នាំ២០២៤ រដ្ឋបាលស្រុក​ ក្រុម​ប្រឹក្សា​ឃុំទាំងពីរ និងមន្រ្តីពាក់ព័ន្ធបានប្រជុំដោះស្រាយ និងសម្របសម្រួលម្តងហើយ ដោយ​សម្រេចកាត់ឆ្វៀលដីតំបន់២​មួយ​ចំនួនឱ្យស្ថិតនៅក្រោមការគ្រប់គ្រងក្នុងឃុំកំពង់ព្រាង និង​ដី​មួយ​ចំនួនទៀតទុកនៅដដែល។ ពេលនោះក្រុមប្រឹក្សាឃុំមួយចំនួនបានលើកដៃគាំទ្រ និង​មួយ​ចំនួនទៀតមិនគាំទ្រនោះទេ។

លោក ច័ន្ទថារ៉ា បន្ថែមថា៖ «ប្រជាពលរដ្ឋទាមទាកាន់កាប់ដីតាមព្រំប្រទល់គ្រប់គ្រងតាំងពី អំឡុងសម័យអសន្តិសុខ(សម័យសង្គ្រាម)​មិនទទួលតាមផែនទីរដ្ឋបាលឃុំដែលទទួលស្គាល់ដោយក្រសួងមហាផ្ទៃនោះទេ»

កាលពីព្រឹកថ្ងៃទី១២ ខែកុម្ភៈ ប្រជាពលរដ្ឋប្រមាណ៦០នាក់តំណាងឱ្យពលរដ្ឋជាង២០០​គ្រួសារ​រស់នៅ​ឃុំកំពង់ព្រះ ស្រុកសង្កែ ខេត្តបាត់ដំបង បានលើកគ្នាមកតវ៉ា នៅសាលា​ឃុំ​កំពង់ព្រះ ម្តង​ហើយ ​​ដើម្បីតវ៉ាដល់អាជ្ញាធរ និងមន្រ្តីជំនាញសម្រេចកាត់ឆ្វៀលដីរបស់​ពួកគាត់ សរុប​ប្រហែល​៦០០ហិកតាឱ្យស្ថិតក្រោមការគ្រប់គ្រងរបស់ឃុំកំពង់ព្រាង។

ប្រជាពលរដ្ឋម្នាក់អ្នកស្រី សឿម ណាន ដែលមានដីស្រែ២ហិកតានៅចំណុចតាសាម ស្ថិតនៅ​តំបន់​ពីរ​ក្នុងភូមិស្រះកែវ ឃុំកំពង់ព្រះ បាននិយាយថា​ ​ដីកេរ្តិ៍របស់គាត់ត្រូវបានម្តាយឪពុក​ចែក​ឱ្យ​ច្រើនឆ្នាំមកហើយប៉ុន្តែថ្មីៗនេះអាជ្ញាធរបានសម្រេច​កាត់ឆ្វៀលដីរបស់គាត់​ទៅក្រោមការ​គ្រប់គ្រងរបស់ឃុំកំពង់ព្រាងវិញដែលជាហេតុធ្វើឱ្យគាត់ និងអ្នកភូមិសម្តែងការ​ភ្ញាក់ផ្អើល​និង​មិន​សប្បាយចិត្ត។

អ្នកស្រី សឿម ណាន បន្តថា៖ «អាជ្ញាធរកាត់ដីស្រែពួកខ្ញុំឱ្យក្រោមការគ្រប់គ្រង​របស់​ឃុំ​កំពង់ព្រាង​ វាឆ្ងាយពិបាក ធ្វើដំណើរទៅរកសេវារដ្ឋបាលផ្សេងៗ​ព្រោះមានចម្ងាយ៧​ទៅ​១០គីឡូឯណោះ»

ប្រជាពលរដ្ឋម្នាក់ទៀតលោក មួន ម៉េត បាននិយាយថាគាត់មានដីស្រែប្រមាណ​២០ហិកតា​ដែលបានកាន់កាប់ តាំងពីឆ្នាំ២០០៨មកក្រោមការគ្រប់គ្រងរបស់ឃុំកំពង់ព្រះ​ ក្រោយមក​អាជ្ញាធរ និងមន្រ្តីជំនាញភូមិបាលស្រុក បានចុះមកវាស់វែង​និងកំណត់ព្រំប្រទល់​ដីដើម្បីធ្វើប្លង់​កម្មសិទ្ធិជូនប្រជាពលរដ្ឋចាប់ពីខែសីហា ឆ្នាំ២០២៣មក។

លោកបន្តថា ពេលនោះប្រជាពលរដ្ឋបាននាំគ្នាវាស់វែងតាមការជូនដំណឹងរបស់អាជ្ញាធរ​ដោយសារ ខែភ្លៀងតំបន់នោះលិចទឹកប្រជាពលរដ្ឋ​ខ្លះបានជួលទូក​អ្នកភូមិជិះទៅវាស់វែងដី​ដើម្បី​បាន​ធ្វើប្លង់កម្មសិទ្ធិស្របច្បាប់ ប៉ុន្តែក្រោយមកប្រជាពលរដ្ឋមានការភ្ញាក់ផ្អើល​នៅ​ពេល​ដែល​អាជ្ញាធរ​ឱ្យទៅបំពេញឯកសារចុះបញ្ជីនៅឃុំកំពង់ព្រាងវិញ។

លោក មួន ម៉េត បញ្ជាក់ថា៖ «ប្រជាពលរដ្ឋជួលទូកម្នាក់១ម៉ឺនរៀលទៅវាស់​ ​ពេលវាស់វែង​ហើយ​ បែរជាគេឱ្យទៅ​បំពេញឯកសារចុះបញ្ជីនៅឃុំកំពង់ព្រាងវិញ ប្រជាពលរដ្ឋនាំគ្នាភ្ញាក់​ផ្អើល​និងបានប្រឆាំង​តវ៉ាមិនយល់ព្រម​ដល់បច្ចុប្បន្ន»

លោក មួន ម៉េត បន្ថែមថា ការកាត់ឆ្វៀលឱ្យស្ថិតនៅក្រោមការគ្រប់គ្រងរបស់ឃុំ​កំពង់ព្រាង​វិញ​​នេះ​ធ្វើឱ្យបង្កការលំបាក​ដល់ប្រជាពលរដ្ឋក្នុងការទៅរកសេវារដ្ឋបាល​ដែលមានចម្ងាយ​ជិត​១០​គីឡូម៉ែត្រនិងថ្ងៃ​ក្រោយនៅពេលដែលរាជរដ្ឋាភិបាលកាត់ឆ្វៀលដីបន្ថែម​ឱ្យ​ប្រជាពលរដ្ឋ​ដែលខ្វះខាតដីទៀតនោះ គឺនឹងបានទៅលើប្រជាជន នៅឃុំផ្សេងហើយ។

ប្រជាពលរដ្ឋឃុំកំពង់ព្រះប្រមាណ៦០នាក់តំណាងឱ្យជាង២០០គ្រួសារ​ឡើង​ទៅ​តវ៉ា​នៅ​សាលាឃុំកំពង់ព្រះកុំឱ្យអាជ្ញាធរកាត់ឆ្វៀលដីរបស់ពួកគាត់ឱ្យទៅឃុំផ្សេងគ្រប់គ្រង។ រូបថតនៅថ្ងៃទី១២ ខែកុម្ភៈ ឆ្នាំ២០២៤។ (ខេមបូចា/ សុខ សាវី)

កាលពីថ្ងៃទី៦ វិច្ឆិកា ឆ្នាំ២០២៣ ប្រជាពលរដ្ឋប្រមាណជាង១០០នាក់រស់នៅភូមិស្រះកែវ និង​ភូមិកំពង់ព្រះ ស្រុកសង្កែ ខេត្តបាត់ដំបង បាន​នាំគ្នាមកតវ៉ានៅសាលាឃុំកំពង់ព្រះម្តងហើយ​តវ៉ា​ឱ្យ​អាជ្ញាធររក្សាព្រំប្រទល់រដ្ឋបាល​ឃុំកំពង់ព្រះដែលមានព្រំប្រទល់ចាប់ពីចំណុចអញ្ចាញ​ទួលតាទិត ទួលម្រះព្រៅ បឹងអន្សែន បឹងសំបុកសត្វ និងចំណុចអូរជំនុំរហូតដល់បឹងទន្លេសាប​ជាព្រំប្រទល់ឃុំទាំងពីរ(គឺឃុំកំពង់ព្រះ និងកំពង់ព្រាង)នៅដដែល។​

ការតវ៉ានេះប្រជាពលរដ្ឋអះអាងថា បានអាស្រ័យផលតាំងពីដូនតារៀងមក ហេតុអ្វីអាជ្ញាធរ​កាត់​ឆ្វៀលដីតំបន់២ និងតំបន់៣ក្នុងភូមិស្រះកែវ និងភូមិកំពង់ព្រះ ក្នុងឃុំកំពង់ព្រះ ឱ្យ​ទៅ​ចុះ​បញ្ជី​នៅ​ភូមិអូសទូក ក្នុងឃុំកំពង់ព្រាងវិញ​ដោយពួកគាត់សុំរក្សាដែនដីចាស់​គ្រប់គ្រង​ដោយ​ឃុំកំពង់ព្រះដដែល។

លោក សំ ស៊ីណា ស្មៀនឃុំកំពង់ព្រះបានឱ្យដឹងថា ក្រោយពីប្រជាពលរដ្ឋតវ៉ានោះ​មកនៅ​ថ្ងៃ​ទី៧ ​ខែកុម្ភៈ ឆ្នាំ២០២៤ អាជ្ញាធរបានបើកកិច្ចប្រជុំដោះស្រាយ​នៅសាលាស្រុកសង្កែ​ដែលមាន​ក្រុមប្រឹក្សាឃុំទាំងពីរ និងមន្រ្តីពាក់ព័ន្ធចូលរួមដោះស្រាយផង។ កិច្ចប្រជុំនោះមិនបានដោះ​ស្រាយ​តាមសំណូមពរពលរដ្ឋនោះទេដោយបានសម្រេចកាត់ឆ្វៀលដី​តំបន់២ និងតំបន់៣​នៅ​ឃុំកំពង់ព្រះទៅឱ្យឃុំកំពង់ព្រាង​គ្រប់គ្រងនៅចំណុចខាងលើនេះ ។

លោកបញ្ជាក់ថា ប្រជាពលរដ្ឋបានបដិសេធមិនទទួលយកលទ្ធលផលកិច្ចប្រជុំ​របស់អាជ្ញាធរ​ស្រុក​សង្កែ និងមន្រ្តីពាក់ព័ន្ធខាងលើនោះទេ​ទើបពួកគាត់នាំគ្នាឡើងមកតវ៉ាដល់​សាលាឃុំ​ជាថ្មី​​ម្តង​ទៀត​ នៅថ្ងៃចន្ទ ទី១២ ខែកុម្ភៈ ដើមសប្តាហ៍នេះ ដើម្បីសុំកុំឱ្យកាត់ឆ្វៀលដីពួកគាត់​ដែលគ្រប់គ្រង​ប្រហែល​៤០ឆ្នាំមកហើយទៅឱ្យក្រោមការគ្រប់គ្រងរបស់​ឃុំផ្សេង។

លោក ហ៊ីង ស៊ីថា មេឃុំកំពង់ព្រះ បាន​បញ្ជាក់ថា មាន​ប្រជាពលរដ្ឋ​ប្រហែលជាង២០០គ្រួសារ​ដែលត្រូវកាត់ឆ្វៀលដីរាប់រយហិកតាក្នុងភូមិស្រះកែវ និងភូមិកំពង់ព្រះស្ថិត​ក្នុងឃុំកំពង់ព្រះ​ឱ្យ​ស្ថិតទៅការគ្រប់គ្រងរដ្ឋបាលរបស់ឃុំកំពង់ព្រាងវិញ។

លោកបានរំលឹកសាវតាបញ្ជាក់ថា ដោយសារដីតំបន់នោះមិនទាន់មានការវាស់វែងកំណត់​តាមផែនទីត្រឹមត្រូវមិនដឹងព្រំប្រទល់ត្រឹម​ណាប្រជាពលរដ្ឋដែលមានដីស្រែទីនោះបាន​អាស្រ័យផលរហូតមកដល់បច្ចុប្បន្ន។ នៅពេលដែលរាជរដ្ឋាភិបាលបានសម្រេចកាត់ឆ្វៀលដី​ជូនប្រជាពលរដ្ឋ និងចាប់ផ្តើមចុះបញ្ជីត្រឹមត្រូវទើបប្រជាពលរដ្ឋបានដឹងពីព្រំប្រទល់ដី​របស់​ខ្លួន​​ក៏ចាប់ផ្តើមធ្វើការតវ៉ាតែម្តង។

លោកមេឃុំបន្ថែមថា៖ «ព្រោះកន្លងមកដីគាត់ធ្លាប់អាស្រ័យផលពីមុនមកក្រោមការ​គ្រប់គ្រង​ខាង​ឃុំកំពង់ព្រះ មានបញ្ហាអីតែងតែសួរនាំខាងឃុំកំពង់ព្រះ ក្រវ៉ាត់ភ្លឺ លើកប្រឡាយអី តែងតែ​សួរនាំខាងឃុំកំពង់ព្រះ តែក្រោយ ពីការកាត់ឆ្វៀលក្នុងខ្សែឡាញព្រំប្រទល់វាចូល​ទៅក្រោម​ការ​គ្រប់គ្រង់របស់កំពង់ព្រាងវិញវាទាក់ទងនឹងផែនទីដែលគូរបង្ហាញរបស់ភូមិបាល »

ទោះបីយ៉ាងណា លោកមេឃុំបញ្ជាក់ថា លោកបានឱ្យលោកមេភូមិដែលមកតវ៉ាដែរ​ចុះ​ស្រង់​ទិន្នន័យឱ្យបានច្បាស់លាស់ពីទំហំដីតំបន់​២​ដែលកាត់ឆ្វៀលហើយ និងចំនួនប្រជាពលរដ្ឋ​ជាក់​ស្តែងដែលប៉ះពាល់ដើម្បីឃុំមានទិន្នន័យច្បាស់លាស់ផ្ញើជូនទៅមន្ទីរអង្គភាពជំនាញ​ថ្នាក់​លើ​ដើម្បីធ្វើការដោះស្រាយ។

ចំណែក មេឃុំកំពង់ព្រាង លោក សំ ឈើន បានបញ្ជាក់ថា បើតាមផែនទី គឺទីតាំងដីខាងលើ​ស្ថិតនៅឃុំកំពង់ព្រាង មិនមែនកំពង់ព្រះនោះទេ ប៉ុន្តែក្រោយពីមានការប្រជុំ​សម្រប​សម្រួល​ច្រើនសារ អាជ្ញាធរឃុំកំពង់ព្រាង​បានឯកភាពកាត់ការគ្រប់គ្រងប្រហែល​ពាក់កណ្តាល​ឱ្យទៅ​ឃុំកំពង់ព្រះគ្រប់គ្រង ដោយយកអូរខាងត្បូងធ្វើព្រំប្រទល់។

លោកមេឃុំបន្ថែមថា៖ «ការព្រមព្រៀងនេះគឺឯកភាពទាំងអស់គ្នាទាំងឃុំនិងស្រុកទៀត គោល​ជំហរ​របស់​ខ្ញុំបើគេទាមទារយកទាំងអស់ចឹងវាប៉ះពាល់ដល់អារម្មណ៍ប្រជាជនខ្ញុំដែរ ព្រោះវាជា​ដី​​របស់យើងបើឱ្យគេទាំងអស់ចឹងវាបាត់ក្នុងផែនទីហើយ»

ទាក់ទិនបញ្ហាខាងលើនេះលោក ទេព កុសល់ ប្រធានភូមិបាលស្រុកសង្កែ បានបញ្ជាក់ថា ស្រុក​​បានប្រជុំដោះស្រាយដោយមានឃុំ និង​ក្រុមប្រឹក្សាលើកដៃឯកភាពគ្នា​រួចរាល់អស់​ហើយ​។ ដោយលោកបញ្ជាក់ថាការកំណត់ព្រំប្រទល់រដ្ឋបាលតាមបច្ចេកទេសច្បាប់បាន​កំណត់​យក​ផ្លូវ យកប្រឡាយ និងយកអូរជាព្រំមិនអាចយកតាមការស្នើសុំរបស់​ប្រជាពលរដ្ឋ​បាននោះទេ។

លោក ទេព កុសល់ បញ្ជាក់បន្ថែមថា៖ «គាត់ស្នើសុំឱ្យកាត់តាមអ្វីដែលគាត់ធ្វើត្រង់ណា ឱ្យ​វាងតាមគាត់ មិនអាចទៅរួចនោះទេ»

លោកលើកឡើងថា អាជ្ញាធរមិនបានដកសិទ្ធិរបស់ប្រជាពលរដ្ឋនោះទេ គឺគាត់អាចប្រើប្រាស់​អាស្រ័យ​ផល និងចុះបញ្ជីដីស្របច្បាប់បានធម្មតា ប៉ុន្តែគ្រាន់តែចុះបញ្ជីដីធ្លីវាឆ្លងឃុំប៉ុណ្ណោះ។

លោកបន្ថែមថា៖ «គាត់មានអីត្រូវពិបាក ចឹងគាត់ទៅទិញដីនៅភ្នំពេញអី ទិញម៉េចកើតបើគាត់​ថាពិបាក វាអត់បាត់សិទ្ធិគាត់ទេ បើគណៈកម្មការបំបាត់សិទ្ធិគាត់កិបកេងដីគាត់បានវាខុស ច្បាប់គេកំណត់អញ្ចឹង​»

ខេមបូចា មិនអាចទំនាក់ទំនងលោក សួន សុភា ប្រធានមន្ទីរដែនដីនគររូបនីយកម្ម និង​សំណង់​ខេត្តបាត់ដំបង ដើម្បីបំភ្លឺបន្ថែមបាននោះទេ។

លោក អ៊ិន គង់ជិត មន្រ្តីសម្របសម្រួលអង្គការសិទ្ធិមនុស្ស លីកាដូរ ប្រចាំខេត្តបាត់ដំបង និង​បន្ទាយមានជ័យ បានបញ្ជាក់ថា ករណីខាងលើមានតែសម្របសម្រួល​ផ្នែករដ្ឋបាល ​ដើម្បី​ធ្វើការ​ដោះស្រាយជូនពលរដ្ឋមិនមានអ្វីស្មុគស្មាញនោះទេ។ លោក គង់ជិត បានជម្រុញ​ឱ្យ​អាជ្ញាធរ​ឃុំកំពង់ព្រះ គួរពន្លឿនការធ្វើរបាយការណ៍ជូនទៅថ្នាក់ស្រុក ហើយបើស្រុកដោះ​ស្រាយ​មិនចេញគួរផ្ញើសំណូមពរ​​ប្រជាពលរដ្ឋនេះបញ្ជូនទៅខេត្តបន្ត​ដើម្បីធ្វើការដោះស្រាយ​បញ្ហាខាងលើជូនពួកគាត់។

លោក គង់​​ជិត ​បន្ថែមថា៖ «ប្រជាជនគាត់ធ្លាប់អាស្រ័យផលតំបន់ហ្នឹងនិងធ្លាប់គ្រប់គ្រង​ដោយ​អាជ្ញាធរ​កំពង់ព្រះ ហើយបើផែនទីរដ្ឋបាលស្ថិតនៅក្នុងឃុំកំពង់ព្រាង គឺវាស្ថិតនៅស្រុកតែមួយ​មិនមាន​ការលំបាកនោះ​ទេ បើស្ថិតនៅស្រុកផ្សេងគ្នាទើបវាលំបាក ខ្ញុំជឿថា​អាជ្ញាធរស្រុកអាច​សម្របសម្រួលបានរឿងនេះមិនមានអ្វីស្មុគស្មាញផង មិនគួរធ្វើឱ្យប្រជាពលរដ្ឋ​ខ្វាយខ្វល់នោះ​ទេ»

269 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម