ជនសង្ស័យ៣នាក់ជាមន្ត្រីប៉ូលិស និងប្រជាការពារកំពុងត្រូវបានសាកសួរនៅសាលាដំបូងរាជធានីភ្នំពេញពីបទ«កំហែងយកប្រាក់»ក្រោយពីយុវជន៥នាក់ដែលរងគ្រោះពីហេតុការណ៍បានផ្ដល់បទសម្ភាសន៍ឱ្យសារព័ត៌មានអនឡាញកាលពីថ្ងៃទី២៥ ខែមករា ត្រង់ចំណុចស្ថានីយ៍ប្រេងឥន្ធនៈមួយកន្លែង ផ្លូវវែងស្រេង ខណ្ឌមានជ័យ ខណៈសមត្ថកិច្ចថាកំពុងបន្ដស្វែងរកជនសង្ស័យ៣នាក់ទៀត។
លោក ជួន ណារិន្ទ បានថ្លែងថា លោកបានឱ្យក្រុមការងារលោកកសាងសំណុំរឿងបញ្ជូនទៅសាលាដំបូងរួចហើយកាលពីថ្ងៃទី៣០ ខែមករា។ លោកបន្ដថា នៅសល់ជនសង្ស័យ៣នាក់សមត្ថកិច្ចកំពុងតាមស្វែងរក ដើម្បីដាក់ទោសតាមផ្លូវច្បាប់។ លោកថា ករណីបែបនេះ លោកថាកំពុងបន្ដស្វែងរកបន្ថែមទៀត តែលោកមិនបានបញ្ជាក់ថាមានប៉ុន្មានករណីនោះទេ។
លោកបន្ដថា៖ «យើងបានបញ្ជូនទៅតុលាការអស់ហើយកាលព្រឹកមិញនេះ។ រឿងជំរិតយកលុយ។ នៅសល់៣នាក់ទៀតយើងកំពុងតាមចាប់ខ្លួន ទាំងអស់៦នាក់។ យើងកំពុងបន្ដស្វែងរកករណីបែបហ្នឹងបន្ដទៀត។ ខ្ញុំមិនអាចប្រាប់បានទេថាមានប៉ុន្មានករណី។ ខ្ញុំជាប់ប្រជុំ អរគុណ»។
នៅព្រឹកថ្ងៃទី៣០ ខែមករា ឆ្នាំ២០២៤នេះ ស្នងការដ្ឋាននគរបាលជាតិរាជធានីភ្នំពេញបានចេញបំភ្លឺថា ករណីយុវជន៥នាក់ដែលបានសម្ភាសន៍ជាមួយអ្នកសារព័ត៌មាននៅលើបណ្ដាញសង្គម កាលពីថ្ងៃទី២៥ ខែមករា ឆ្នាំ២០២៤ ដោយបានចោទប្រកាន់ថាមានសមត្ថកិច្ចគាបយកលុយនៅចំណុចប្រេងឥន្ធនៈតេលាលូប្រាំផ្លូវវែងស្រេង ភូមិដំណាក់ធំ៥ សង្កាត់ស្ទឹងមានជ័យ ខណ្ឌមានជ័យ។
តាមបទបញ្ជារបស់លោក ជួន ណារិន្ទ អគ្គស្នងការរង និងស្នងការនគរបាលរាជធានីភ្នំពេញ កម្លាំងការិយាល័យនគរបាលព្រហ្មទណ្ឌកម្រិតស្រាលសហការជាមួយកម្លាំងអធិការដា្ឋននគរបាលខណ្ឌមានជ័យ បានធ្វើការស្រាវជ្រាវត្រួតពិនិត្យកន្លែងកើតហេតុ និងប្រមូលវត្ថុតាងតាមកាមេរ៉ាសុវត្ថិភាព និងការសាកសួរពីយុវជនរងគ្រោះ បានឈានដល់ការឃាត់ខ្លួនមន្រ្ដីប៉ុស្ដិ៍នគរបាលរដ្ឋបាលស្ទឹងមាន៣នៃអធិការដ្ឋាននគរបាលខណ្ឌមានជ័យ១នាក់ និងប្រជាការពារ២នាក់ទៀត ពីបទ«កំហែងយកប្រាក់»។
ជនសង្ស័យទាំង៣នាក់រួមមានឈ្មោះ ព្រុំ វណ្ណរឿន ភេទប្រុស តួនាទីជាអនុសេនីយ៍ឯក និងឈ្មោះ នាង វណ្ណី ហៅ ប៉ាន់ នី ភេទប្រុសមានតួនាទីជាប្រជាការពារ និងឈ្មោះគឹម សុខា ប្រុស តួនាទីជាប្រជាការពារ។ ជនសង្ស័យទាំង៣នាក់ត្រូវកម្លាំងជំនាញបានកសាងសំណុំរឿងបញ្ជូនទៅតុលាការដើម្បីចាត់ការតាមផ្លូវច្បាប់។ ហើយសមត្ថកិច្ចកំពុងស្វែងរកចាប់ខ្លួនជនសង្ស័យ៣នាក់ទៀត។
ចំណែកលោក សួស វិទ្យារ៉ាន់ឌី អ្នកនាំពាក្យសាលាដំបូងបានឱ្យ ខេមបូចា ដឹងថា ខាងតុលាការកំពុងបន្ដនីតិវិធី ដោយលោកថា ចៅក្រមកំពុងសាកសួរដើម្បីដាក់បទចោទ។ យ៉ាងណាលោកមិនបានលម្អិតឱ្យខេមបូចានោះទេ។
លោកបន្ដថា៖ «ចៅក្រមកំពុងសាកសួរដើម្បីដាក់បទចោទ។ ខ្ញុំអាចនិយាយបានតែប៉ុណ្ណឹងទេ»។
តាមមាត្រា៣៦៣នៃក្រមព្រហ្មទណ្ឌ អំពើកំហែងយក គឺជាអំពើដែលប្រព្រឹត្តដោយការប្រើហិង្សា ការគំរាមកំហែង ថា នឹងប្រើហិង្សា ឬដោយការបង្ខិតបង្ខំ ដើម្បីទទួលបាននូវហត្ថលេខា ឬស្នាមម្រាមដៃ ការសន្យា ឬការបោះបង់ចោលអ្វីមួយ ការបង្ហាញអាថ៌កំបាំងណាមួយ ការប្រគល់មូលនិធិ តម្លៃ ឬទ្រព្យសម្បត្តិអ្វីមួយ ។ អំពើកំហែងយក ត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ពី៤លានរៀលទៅ១០លានរៀល។ អំពើនេះ អាចប្រឈមផ្តន្ទាទោសដាក់ពន្ធនាគារពី៥ទៅ១០ឆ្នាំ តាមស្ថានទម្ងន់ទោសទាក់ទងទៅនឹងជនរងគ្រោះដែលជាបុគ្គលទន់ខ្សោយពិសេសនារីមានគភ៌ជាដើម។
ចំណែកឯ លោក អ៊ុក បូនីន អធិការនគរបាលខណ្ឌមានជ័យ បានថ្លែងប្រាប់ខេមបូចា នៅព្រឹកថ្ងៃទី៣១ ខែមករា ថា ជុំវិញករណីនេះគឺមានគ្នា៦នាក់។ ហើយ៣នាក់ត្រូវបានចាប់ខ្លួន នៅសល់៣នាក់ លោកកំពុងបន្ដស្រាវជ្រាវដើម្បីចាប់ខ្លួន។ យ៉ាងណាលោកសុំមិនអត្ថាធិប្បាយ បន្ថែមនោះទេ។
អធិការខណ្ឌរូបនេះបន្ដថា៖ «បាទ! ទាំងអស់៦នាក់ យើងចាប់បាន៣នៅសល់៣នាក់យើងកំពុងបន្ដស្រាវជ្រាវ។ ខ្ញុំអាចជម្រាបជូនបងបានប៉ុណ្ណឹងលើសពីហ្នឹងខ្ញុំមិននិយាយបានទេ»។
ក្នុងមាត្រាដដែលថា ករណីមានការប្រើប្រាស់អាវុធ ឬដោយគំរាមកំហែងនឹងអាវុធ អ្នកប្រព្រឹត្តប្រឈមជាប់ពន្ធនាគារពី៧ទៅ១៥ឆ្នាំ ក្នុងករណីហិង្សាដែលនាំឱ្យមានការកាត់អវយវៈ និងពិការភាពជាអចិន្ត្រៃយ៍ ត្រូវប្រឈមពី១០ទៅ២០ឆ្នាំ។ អំពើកំហែងយក ក៏មានស្ថានទម្ងន់ទោសពី១៥ទៅ៣០ឆ្នាំផងដែរ ប្រសិនបើមានការធ្វើទារុណកម្ម ឬអំពើឃោឃៅ ឬហិង្សាដែលបណ្តាលឱ្យជនរងគ្រោះស្លាប់ ដោយគ្មានចេតនា។
លោក ប៉ិច ពិសី នាយកប្រតិបត្ដិនៃអង្គការតម្លាភាពកម្ពុជា បានលើកឡើងថា ករណីនេះកន្លងមកមានច្រើនណាស់ដែរ ការយកតួនាទីរបស់ខ្លួនទៅប្រព្រឹត្ដអំពើពុករលួយដោយគំរាមកំហែងពលរដ្ឋដើម្បីជំរឹតទារប្រាក់។ លោកបន្ដថា សកម្មភាពក្លែងបន្លំនេះបានបង្កភាពវឹកវរដល់ពលរដ្ឋ និងបានបង្កអសន្ដិសុខសង្គម ហើយវាជារឿងមិនគួរឱ្យកើតមាននោះទេ។ យ៉ាងណាលោកថា ស្នងការនគរបាលជាតិគួរតែពង្រឹង និងបង្រ្កាបឱ្យទាន់ពេលវេលា ដើម្បីឱ្យពលរដ្ឋមានទំនុកចិត្ដ។
លោកបានបន្ថែមថា៖ «ខ្ញុំយល់ថាអាជ្ញាធរគួរតែពង្រឹងឱ្យបានរឹងមាំ ព្រោះកន្លងមកយើងបានដឹងស្រាប់ហើយថាការយកតួនាទីរបស់ខ្លួនទៅប្រព្រឹត្ដអំពើពុករលួយនេះចេះតែកើតមាន។ កាលណាសកម្មភាពនេះកាន់តែមានពលរដ្ឋកាន់តែលែងមានទំនុកចិត្ដលើមន្រ្ដីសាធារណៈ»៕
