ពលរដ្ឋខេត្តត្បូងឃ្មុំ៤នាក់ត្រូវបានតុលាការកំពូលបើកសវនាការលើបណ្តឹងសារទុក្ខរបស់ពួកគេដោយសារសាលាឧទ្ធរណ៍ខេត្ដត្បូងឃ្មុំផ្តន្ទាទោសឱ្យពួកគេជាប់ទោស២ឆ្នាំ ប៉ុន្ដែទោសនោះព្យួរ ហើយពួកគេទាមទារឱ្យតុលាការទម្លាក់បទចោទលើពួកគេ ខណៈសង្គមស៊ីវិលថា ​តុលាការគួរទម្លាក់បទចោទលើពលរដ្ឋទាំងនោះ។

សាលាដំបូងខេត្ដក្រចេះបានចេញដីកាកោះហៅពលរដ្ឋ៦នាក់តាមបណ្ដឹងរបស់ក្រុមហ៊ុនឯកជនចំនួនពីរ ឱ្យចូលបំភ្លឺពាក់ព័ន្ធនឹងដំណើររឿង​«រំលោភកាន់កាប់ទ្រព្យសម្បត្ដិរដ្ឋដោយខុសច្បាប់ និងបទហិង្សាទៅលើអ្នកកាន់កាប់អចលនវត្ថុដោយសុចរិត»ដែលប្រព្រឹត្ដ​លើ​ដីសម្បទានសេដ្ឋកិច្ចរបស់ក្រុមហ៊ុន អំឡុងឆ្នាំ២០២៤ រហូតបច្ចុប្បន្ន ខណៈពលរដ្ឋច្រានចោលការចោទប្រកាន់នេះថា គ្មានមូលដ្ឋាន​ដោយទាមទារឱ្យបង្ហាញភស្ដុតាងលើអង្គហេតុ។

ពលរដ្ឋជិត១០០នាក់តំណាងឱ្យអ្នកភូមិជាង២០០គ្រួសារនាំគ្នាតវ៉ានៅសាលាឃុំចំណាលើ ស្រុកស្ទោង ខេត្ដកំពង់ធំ ទាមទារដកមេភូមិចេញដោយអះអាងថា យកតួនាទី និងផ្លូវសាធារណៈ​បម្រើផលប្រយោជន៍ផ្ទាល់ខ្លួនដែលធ្វើឱ្យប៉ះពាល់ជីវភាព និងផ្លូវចិត្ដពួកគាត់ ខណៈ​អភិបាល​ស្រុកថា កំពុងស៊ើបអង្កេត និងស​ម្របសម្រួលលើបញ្ហានេះ។