ពលរដ្ឋខេត្តត្បូងឃ្មុំ៤នាក់ត្រូវបានតុលាការកំពូលបើកសវនាការលើបណ្តឹងសារទុក្ខរបស់ពួកគេដោយសារសាលាឧទ្ធរណ៍ខេត្ដត្បូងឃ្មុំផ្តន្ទាទោសឱ្យពួកគេជាប់ទោស២ឆ្នាំ ប៉ុន្ដែទោសនោះព្យួរ ហើយពួកគេទាមទារឱ្យតុលាការទម្លាក់បទចោទលើពួកគេ ខណៈសង្គមស៊ីវិលថា តុលាការគួរទម្លាក់បទចោទលើពលរដ្ឋទាំងនោះ។
យោងតាមពលរដ្ឋដែលបានចូលឆ្លើយនៅតុលាការកំពូលនៅថ្ងៃទី៧ ខែតុលា បានឱ្យដឹងថា ពួកគេមិនពេញចិត្ដនឹងសេចក្ដីសម្រេចរបស់សាលាឧទ្ធរណ៍ខេត្ដត្បូងឃ្មុំដែលបានផ្ដន្ទាទោសពួកគេ៤នាក់ឱ្យជាប់ទោសម្នាក់ៗ២ឆ្នាំ ប៉ុន្ដែត្រូវព្យួរ កាលពីថ្ងៃទី១១ ខែសីហា ឆ្នាំ២០២២ ដោយចោទពីបទ«ធ្វើឱ្យខូចខាតដោយចេតនាមានស្ថានទម្ងន់ទោស ដោយសារការប្រព្រឹត្ដមានបុគ្គលច្រើនរូបដែលធ្វើសកម្មភាពក្នុងឋានៈជាសហចារី»។
សម្រាប់ពលរដ្ឋម្នាក់ទៀត គឺលោក វឿន វឿ អាយុ៣៨ឆ្នាំ បាននិយាយប្រាប់ ខេមបូចា ក្រោយពីលោកចេញពីតុលាការកំពូល ថា លោកមិនសុខចិត្ដនឹងការសម្រេចសាលាឧទ្ធរណ៍ និងសាលាដំបូងទាំងដែលពួកលោកមិនបានប្រព្រឹត្ដការចោទប្រកាន់នោះទេ។ លោកបន្ដថា តុលាការបានសាកសួរពួកលោក ប៉ុន្ដែលោកបានប្រគល់តួនាទីឱ្យមេធាវីជាអ្នកឆ្លើយ។ យ៉ាងណាលោកថា តុលាការនឹងប្រកាសសាលក្រមនៅថ្ងៃចន្ទទី១៤ ខែតុលា នៅដើមសប្ដាហ៍ក្រោយនេះ ដែលលោកសង្ឃឹមថា តុលាការកំពូលនឹងផ្ដល់យុត្ដិធម៌ឱ្យពួកលោករួចផុតពីទោស។
លោកលើកឡើងថា៖ «ខ្ញុំមិនសុខចិត្តនឹងការសម្រេចរបស់សាលាឧទ្ធរណ៍ដែលដាក់ទោសខ្ញុំទាំងដែលខ្ញុំមិនបានប្រព្រឹត្ដដូចការចោទផងបង។គេ[តុលាការកំពូល]សួរខ្ញុំ តែខ្ញុំប្រគល់ឱ្យមេធាវីអ្នកឆ្លើយ។ គេនឹងប្រកាសសាលក្រមថ្ងៃចន្ទសប្ដាហ៍ក្រោយបង។ ខ្ញុំសង្ឃឹមតុលាការកំពូលនឹងទម្លាក់ទោសពួកខ្ញុំចោល បង»។
នៅរសៀលថ្ងៃទី១៦ ខែមករា ឆ្នាំ២០២៤ សាលាឧទ្ធរណ៍ត្បូងឃ្មុំបានបើកការជំនុំជម្រះករណីទំនាស់ដីធ្លីដែលអូសបន្លាយពេលជាច្រើនឆ្នាំរវាងប្រជាពលរដ្ឋ និងក្រុមហ៊ុនចិន Harmony Win Investment និងបានប្រកាសសាលក្រមកាលពីថ្ងៃទី១៥ ខែកុម្ភៈ ឆ្នាំ២០២៤ ដោយសម្រេចតាមសាលាដំបូងដដែល។
ពលរដ្ឋទាំង៤រូបរួមមាន អ្នកស្រី ឃឹម សុខជាង លោក វឿន វឿ លោក ចក់ ជ័យ លោក ពុំ ពេជ្រ និងសមាជិកផ្សេងទៀត ដែលតុលាការបានចោទពីបទ«ធ្វើឱ្យខូចខាតដោយចេតនា មានស្ថានទម្ងន់ទោសដោយសារការប្រព្រឹត្ត មានបុគ្គលច្រើនរូប ដែលធ្វើសកម្មភាព ក្នុងឋានៈជាសហចារី» ដែលប្រព្រឹត្តនៅចំណុចទួលពពែល ស្ថិតក្នុងភូមិសែ្រប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំ កាលពីថ្ងៃទី១១ ខែមិថុនា ឆ្នាំ២០២០។
បន្ថែមពីនេះអ្នកស្រី ឃឹម សុខជាង អាយុ២៨ឆ្នាំ បាននិយាយថា ទោះអ្នកស្រីមិនបានជាប់ពន្ធនាគារក៏ដោយ ប៉ុន្ដែស្ថិតនៅក្រោមការឃ្លាំមើលពីតុលាការដោយអ្នកស្រីមិនអាចទៅណា ឬចំណាកស្រុកដើម្បីរកលុយដោះបំណុលបាន។ អ្នកស្រីទទូចឱ្យតុលាការកំពូលទម្លាក់បទចោទលើពួកអ្នកស្រីដើម្បីមានសិទ្ធិសេរីភាព និងអាចប្រកបមុខរបរចឹញ្ចឹមជីវិតឡើងវិញ។
អ្នកស្រី សុខជាង បញ្ជាក់ថា៖ «ខ្ញុំមិនអាចទៅណាបាន ព្រោះស្ថិតក្រោមការឃ្លាំមើលតុលាការ។ ខ្ញុំចង់បានសេរីភាពខ្ញុំមកវិញ ព្រោះខ្ញុំមិនបានធ្វើដូចការចោទទេបង»។
ជុំវិញរឿងនេះដែរ អ្នកស្រី ម៉ៅ ធីតា អគ្គលេខាធិការតុលាការកំពូល មានប្រសាសន៍នឹង ខេមបូចា ថា តុលាការនឹងប្រកាសសាលដីកានៅថ្ងៃទី១៤ ខែតុលា ដើមសប្ដាហ៍ក្រោយនេះ។
អ្នកនាំពាក្យរូបនេះថ្លែងថា៖ «តុលាការគេនឹងប្រកាសសាលដីកានៅថ្ងៃ១៤ខែតុលាលើសំណុំរឿងនេះប្អូន»។
កន្លងមក ប្រជាសហគមន៍ចំនួន៣ភូមិ រួមមាន ភូមិកំប្រើស ភូមិត្រពាំងព្រីង និងភូមិស្រែប្រាំង ដែលស្ថិតក្នុងឃុំត្រពាំងព្រីង ស្រុកតំបែរ ខេត្តត្បូងឃ្មុំ មានគ្នាប្រមាណ៥៥នាក់ ក្នុងនោះមានស្ត្រី២៩ នាក់បាននាំគ្នាកាន់បដានៅមុខសាលាឧទ្ធរណ៍ខេត្តត្បូងឃ្មុំដោយពួកគាត់ស្នើសុំឱ្យតុលាការ ទម្លាក់បទចោទមកលើសមាជិកសហគមន៍របស់ពួកគាត់។
ពួកគាត់ក៏បានទទូចនឹងស្នើសុំដល់រដ្ឋាភិបាលអាណត្តិថ្មី មេត្តាជួយពន្លឿនដល់អាជ្ញាធរពាក់ព័ន្ធឱ្យជួយដោះស្រាយបញ្ហាដីធ្លីជូនពួកគាត់ ដោយពួកគាត់អះអាងថា ចាប់តាំងពីបាត់បង់ដីធ្លីមក ប្រជាពលរដ្ឋចំណាកស្រុកកាន់តែច្រើន ជំពាក់បំណុលមីក្រូហិរញ្ញវត្ថុ និងឯកជនកាន់តែកើនឡើង ហើយកន្លងមក តំណាងសហគមន៍ខ្លះ ក៏ធ្លាប់បានជាប់ពន្ធនាគារ ដោយសារបញ្ហាដីធ្លីដែរ។
បើតាមលោក អំ សំអាត នាយកចាត់ការទូទៅនៃអង្គការ លីកាដូ បានទទូចឱ្យតុលាការទម្លាក់បទចោទចោលដោយសំអាងថា វិធាននេះមិនបានផ្ដល់ផលចំណេញដល់អាជ្ញាធរនោះទេ។ លោកទាមទារឱ្យឈប់ប្រើប្រព័ន្ធតុលាការដើម្បីដាក់បន្ទុកពលរដ្ឋលើជម្លោះដីធ្លីបន្ដទៀត។
លោក សំអាត ថ្លែងថា៖ «រឿងបញ្ហាដីធ្លីមិនគួរយកជម្រើសការប្ដឹងផ្ដល់តាមតុលាការដើម្បីជាគំនាបសម្រាប់ពួកគាត់បន្ថែមទៀតទេ។ខ្ញុំគិតថាតុលាការកំពូលលោកនឹងពិនិត្យ ពិចារណាដើម្បីផ្ដល់យុត្ដិធម៌សម្រាប់ពួកគាត់ដោយទម្លាក់បទចោទចោល»។
បើតាមការបញ្ជាក់របស់លោក សំអាត បានបន្តថា សំណុំរឿងនេះ គឺមេធាវីរបស់អង្គការ លីកាដូ ជាអ្នកកាន់តាំងពីដើមមក។ លោកបន្ដថា កាលពីថ្ងៃ២៤ ខែមិថុនា ឆ្នាំ២០២១ ពលរដ្ឋសរុប៩នាក់ត្រូវបានជាប់ចោទពីបទ «ធ្វើឱ្យខូចខាតដោយចេតនាមានស្ថានទម្ងន់ទោស ដោយសារការប្រព្រឹត្ដមានបុគ្គលច្រើនរូបដែលធ្វើសកម្មភាពក្នុងឋានៈជាសហចារី»ដោយសម្រេចក្នុងម្នាក់ៗជាប់ពន្ធនាគារ២ឆ្នាំ ប៉ុន្ដែទោសត្រូវបានព្យួរ។
ក្រោយពីជំនុំជម្រះចប់ពលរដ្ឋបានប្ដឹងទៅសាលាឧទ្ធរណ៍ខេត្ដត្បូងឃ្មុំដោយមានគ្នា៥នាក់ ហើយសាលាឧទ្ធរណ៍បានសម្រេចតម្កល់សាលក្រមរបស់សាលាដំបូង នៅថ្ងៃទី១១ ខែសីហា ឆ្នាំ២០២២ លើសំណុំរឿងរបស់ពួកគាត់ ប៉ុន្ដែពួកគាត់នៅតែទទួលភាពអយុត្ដិធម៌ដដែល។ ពួកគាត់បន្ដប្តឹងសារទុក្ខទៅតុលាការកំពូល ដោយនៅសល់តែ៤នាក់កាលពីថ្ងៃទី២៣ ខែសីហា ឆ្នាំ២០២៣។ លោកបន្ដថា ក្រោយពីតុលាការកំពូលកាត់ក្តីរួចក៏បានបង្វិលសំណុំរឿងរបស់ពួកគាត់ឱ្យសាលាឧទ្ធរណ៍ត្បូងឃ្មុំកាត់ក្ដីម្ដងទៀត។
កាលពីថ្ងៃទី៦ ខែធ្នូ ឆ្នាំ២០២៣ កន្លងទៅ សាលាឧទ្ធរណ៍ខេត្ដត្បូងឃ្មុំ បានចេញដីកាកោះហៅប្រជាពលរដ្ឋចំនួន៤រូបឱ្យចូលសវនាការតាមបណ្ដឹងរបស់មេធាវី លី សុចិត្រា និងមេធាវី ណាត ច័ន្ទតារា ដោយប្ដឹងឧទ្ធរណ៍នឹងសាលក្រមព្រហ្មទណ្ឌចុះថ្ងៃទី៣០ ខែមិថុនា ឆ្នាំ២០២១ របស់សាលាដំបូងខេត្ដត្បូងឃ្មុំត្រង់ចំណុចនៃសេចក្ដីសម្រេចទាំងមូល។
ក្នុងដីកាកោះហៅបានបញ្ជាក់ពីបទចោទ«ធ្វើឱ្យខូចខាតដោយចេតនាមានស្ថានទម្ងន់ទោស ដោយសារការប្រព្រឹត្ដមានបុគ្គលច្រើនរូបដែលធ្វើសកម្មភាពក្នុងឋានៈជាសហចារី»។
កាលពីព្រឹកថ្ងៃទី១៩ ខែតុលា ឆ្នាំ២០២២ កន្លងទៅ ពលរដ្ឋមកពីឃុំត្រពាំងព្រីង ស្រុកតំបែរ ខេត្ដត្បូង បាននាំគ្នាដាក់ពាក្យបណ្ដឹងទៅសាលាឧទ្ធរណ៍ដើម្បីស្នើសុំពន្លឿននីតិវិធី និងស្នើសុំឱ្យភាគីខាងក្រុមហ៊ុនចិនបង្ហាញភស្ដុតាងលើសំណុំរឿងលេខ០៨ ចុះថ្ងៃទី២៧ ខែតុលា ឆ្នាំ២០២០ ស្ដីអំពីបណ្តឹងរក្សាការពារ។
នៅក្នុងពាក្យបណ្ដឹងដែលពលរដ្ឋបានដាក់ទៅសាលាឧទ្ធរណ៍ខេត្ដត្បូងឃ្មុំថា ពួកគាត់មិនអាចទទួលយកបាននូវការបង្ហាញសំអាងហេតុរបស់ភាគីក្រុមហ៊ុនចិន និងមិនទាន់បានដាក់បង្ហាញឱ្យមានភាពជាក់លាក់នូវភស្ដុតាងដែលក្រុមហ៊ុនតែងតែអះអាងថា បានទិញដីពីពួកគាត់នោះនៅឡើយទេ។
ដោយពលរដ្ឋបានស្នើសុំចំនួន៣ចំណុច៖ ទី១ស្នើសុំពន្លឿននីតិវិធីជំនុំជម្រះលើសំណុំរឿង ទី២ ស្នើសុំឱ្យខាងក្រុមហ៊ុន Harmony Win Investment បង្ហាញភស្ដុតាងនៃកិច្ចសន្យាទិញលក់របស់ក្រុមហ៊ុនជាមួយភាគីពលរដ្ឋ និងទី៣ ស្នើសុំឱ្យមានការធ្វើកោសល្យវិច្ឆ័យលើភស្ដុតាង រួមមានកិច្ចសន្យាទិញលក់ និងស្នាមមេដៃនៃភាគីលក់ និងទិញ។
ក្នុងពាក្យបណ្ដឹងដដែលបន្ដថា៖ «យើងខ្ញុំទាំងអស់គ្នាជាសហកូនបំណុលនៃបណ្ដឹងខាងលើ បាន និងកំពុងរងចាំដំណោះស្រាយតាមយន្ដការតុលាការជាយូរមកហើយ ធ្វើឱ្យមានការអូសបន្លាយ និងខាតបង់នូវប្រយោជន៍ និងប៉ះពាល់នៃការរស់នៅប្រចាំថ្ងៃរបស់ពួកយើងខ្ញុំទាំងអស់គ្នា ដោយក្រុមហ៊ុននៅតែបន្ដសកម្មភាពនៅលើអចលនៈវត្ថុដែលកំពុងស្ថិតនៅក្នុងការរក្សាការពារនៅឡើយ យើងខ្ញុំមិនអាចទទួលយកបានទេ»។
យោងតាមឯកសារមួយចងក្រងដោយសមាគមសម្ព័ន្ធសហគមន៍កសិករកម្ពុជា បាននិយាយថា ប្រជាពលរដ្ឋក្នុងសហគមន៍ស្រែប្រាំង បានចូលមកកាន់កាប់ដីនៅតំបន់នេះនៅឆ្នាំ២០០២។ សហគមន៍នេះមាន២៥០គ្រួសារ និងកាន់កាប់ដីទំហំ៧៨០ហិកតា។
ដីព្រៃលិចទឹករបស់សហគមន៍ស្រែប្រាំង និងសហគមន៍បុស្សស្នោ ទំហំ៥៨០ហិកតា ផ្តើមមានជម្លោះជាមួយក្រុមហ៊ុនចិន Harmony Win Investment ចាប់តាំងពីឆ្នាំ២០១៤មក និងដីទំហំ២០០ហិកតាទៀត មានជម្លោះជាមួយឧកញ៉ា ម៉ែន ចាន់ធឿន។
ចាប់ពីពេលនោះមក ពលរដ្ឋនៅក្នុងសហគមន៍តែងចូលរួមតវ៉ា និងទប់ស្កាត់ប្រឆាំងនិងការឈូសឆាយដីពីសំណាក់ក្រុមហ៊ុន និងបានឡើងមកភ្នំពេញញឹកញាប់ដើម្បីដាក់ញត្តិទៅក្រសួងពាក់ព័ន្ធឱ្យជួយអន្តរាគមន៍រកដំណោះស្រាយ រួមមាន ក្រសួងដែនដី ក្រសួងមហាផ្ទៃ និងខុទ្ទកាល័យនាយករដ្ឋមន្ត្រី ជាដើម។
របាយការណ៍ដដែលនិយាយទៀតថា ខណៈគ្មានកិច្ចអន្តរាគមន៍ពីថ្នាក់ជាតិ តំណាងសហគមន៍៣រូបដែលមានឈ្មោះក្នុងញត្តិ រួមមាន លោក សែម សាង លោក ហឿន ស៊ីនាថ និង លោក សែម ចំណាន ត្រូវបានសមត្ថកិច្ចចាប់ខ្លួនជាបន្តបន្ទាប់តាមដីកាបង្គាប់របស់តុលាការខេត្តត្បូងឃ្មុំ៕
