សមាគមសម្ព័ន្ធអ្នកសារព័ត៌មានកម្ពុជា

ជនបរទេសមួយរូបនឹងត្រូវឱ្យចាកចេញពីកម្ពុជានៅថ្ងៃនេះ បន្ទាប់ពីចូលរួមសកម្មភាពជាមួយយុវជនស្រលាញ់បរិស្ថាន

ក្រុមសកម្មជន និងយុវជនស្រលាញ់បរិស្ថានកំពុងចេញពីសាលាខណ្ឌដូនពេញ និងត្រៀមឡើងរថយន្តរបស់សមត្ថកិច្ចត្រលប់ទៅកាន់កន្លែងផ្ញើម៉ូតូនៅក្បែរវត្តឧណ្ណាលោមវិញ ក្រោយឃាត់ដើម្បីសាកសួរនៅសាលាខណ្ឌដូនពេញអស់រយៈពេល៨ម៉ោង កាលពីថ្ងៃអាទិត្យ ទី៧ ខែមករា ឆ្នាំ២០២៤។ (ខេមបូចា/ វ៉ា សុភានុត)
ក្រុមសកម្មជន និងយុវជនស្រលាញ់បរិស្ថានកំពុងចេញពីសាលាខណ្ឌដូនពេញ និងត្រៀមឡើងរថយន្តរបស់សមត្ថកិច្ចត្រលប់ទៅកាន់កន្លែងផ្ញើម៉ូតូនៅក្បែរវត្តឧណ្ណាលោមវិញ ក្រោយឃាត់ដើម្បីសាកសួរនៅសាលាខណ្ឌដូនពេញអស់រយៈពេល៨ម៉ោង កាលពីថ្ងៃអាទិត្យ ទី៧ ខែមករា ឆ្នាំ២០២៤។ (ខេមបូចា/ វ៉ា សុភានុត)

អ្នកឃ្លាំមើលសិទ្ធិមនុស្ស និងសកម្មជនបរិស្ថាន អះអាងថា ជនបរទេសមួយរូបនឹងត្រូវបាន​ឱ្យ​ចាក​ចេញពីប្រទេសកម្ពុជានៅថ្ងៃពុធនេះ បន្ទាប់ពីអាជ្ញាធរឃាត់សួរនាំរយៈពេលជាច្រើនម៉ោង​ពាក់ព័ន្ធ​នឹងការចូលរួមជាមួយយុវជនស្រលាញ់បរិស្ថាន​ក្នុងការធ្វើសកម្មភាពលក្ខណៈ​ហាត់​ប្រាណ និងលើកបដាដើម្បីជំរុញឱ្យអាជ្ញាធរដាក់កោះកុងក្រៅជា «ឧទ្យានជាតិសមុទ្រ»

ក្រុមយុវជនអះអាងថា អាជ្ញាធរបានដាក់កំហិតឱ្យជនបរទេសរូបនោះ​ត្រូវចាកចេញ​ពី​កម្ពុជា​ក្នុង​រយៈពេលដ៏ខ្លីខាងមុខ ខណៈអាជ្ញាធរបានលើកឡើងផ្ទុយពីនេះថា ជនបរទេសនោះជា​អ្នកស្ម័គ្រចិត្ត​ត្រលប់ទៅកាន់ប្រទេសកំណើតវិញដោយខ្លួនឯង។

អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានបញ្ជាក់ថា ជនបរទេសដែលត្រូវអាជ្ញាធរហៅសាកសួរកាលពីថ្ងៃអាទិត្យជាមួយក្រុមយុវជនស្រលាញ់​បរិស្ថាន នឹងចាកចេញពីកម្ពុជានៅថ្ងៃពុធ[ថ្ងៃទី១០ ខែមករា ឆ្នាំ២០២៤]នេះ វេលាម៉ោង៧យប់​តាមផ្លូវអាកាស។ 

លោកយល់ថា ប្រសិនបើការសម្រេចចិត្តរបស់ជនបរទេសរូបនោះក្នុងការចាកចេញ​ពី​កម្ពុជា​ដោយ​សារមានសម្ពាធ វាជាករណីរំលោភលើសិទ្ធិរបស់គេ។ លោកបានបន្តថា សកម្មភាព​របស់​ក្រុមយុវជន ជាការជួបជុំផ្សព្វផ្សាយក្នុងគោលបំណងការពារសម្បត្តិរបស់ជាតិ មិនគួរ​មានការហៅសួរនាំពីអាជ្ញាធរឡើយ។

លោកថ្លែងថា៖«សកម្មភាព [ក្រុមយុវជន] នេះយើងឃើញហាក់គ្មានអីប៉ះពាល់សណ្ដាប់ធ្នាប់​សាធារណៈអីទេ ហើយប្រធានបទហ្នឹងក៏ជាប្រធានបទមួយ​ដែលធ្វើឡើង​ក្នុងន័យការពារ​ធន​ធាន​របស់ជាតិដែរ របស់រដ្ឋដែរ។ ចឹងវាជាទិសដៅស្របគ្នា ខ្ញុំមិនយល់អំពីការចាត់វិធានការ​ហ្នឹងទេ លុះត្រាតែការធ្វើវាមើលទៅមានលក្ខណៈធ្ងន់ធ្ងរវាប៉ះពាល់ដល់សណ្ដាប់ធ្នាប់​សង្គម​អ៊ីចឹងទៅ ប៉ះពាល់ដល់សន្តិសុខជាតិដូចដែលច្បាប់ចែងទៅ វាជារឿងមួយដែលគួរចាត់​វិធានការ ប៉ុន្តែរឿងនេះវាមិនសាកសមនឹងមានវិធានការបែបហ្នឹង»។

កាលពីថ្ងៃអាទិត្យ នៅពេលដែលរដ្ឋាភិបាលកម្ពុជាកំពុងប្រារព្ធទិវា៧មករា ដោយរំលឹកពី​ការ​ផ្ដួល​រំលំរបបខ្មែរក្រហម មិនឆ្ងាយប៉ុន្មានពីទីលានប្រារព្ធពិធី អាជ្ញាធរខណ្ឌដូនពេញ បាន​ឃាត់​សកម្មជន និងយុវជនស្រឡាញ់បរិស្ថានចំនួន១២នាក់ និងជនបរទេសមួយរូប​អំឡុង​ពេល​ពួក​គេធ្វើការហាត់ប្រាណ និងលើកបដានៅសួនច្បារមាត់ទន្លេចតុមុខក្នុងគោលបំណង​ជំរុញ​ឱ្យ​អាជ្ញាធរដាក់កោះកុងក្រៅជា «ឧទ្យានជាតិសមុទ្រ»

ក្រុមយុវជនចំនួន១៣នាក់ ក្នុងនោះមានបុរសជនបរទេសម្នាក់ដែរ ពាក់អាវយឺតមានអក្សរ​កោះ​កុង​​ក្រៅ និងរូបត្រីទឹកសមុទ្រ បានប្រមូលផ្ដុំគ្នាហាត់ប្រាណ និងកាន់បដា នៅតាម​សួន​ច្បារ​មាត់​ទន្លេ​ចតុមុខ ក្នុងគោលបំណងស្នើឱ្យក្រសួងបរិស្ថានដាក់កោះកុងក្រៅជាឧទ្យានជាតិ​សមុទ្រ និងជំរុញឱ្យប្រជាពលរដ្ឋជាពិសេសយុវជនបានដឹងឮអំពីកោះកុងក្រៅ ក៏ដូចជាចូលរួម​ការពារ​ធនធាន​ធម្មជាតិ និងបរិស្ថាន តាមរយៈសកម្មភាពហាត់ប្រាណជាដើម។

នៅលើបដាដែលក្រុមយុវជនកាន់ បានសរសេរពាក្យថា «Sunday For Kohkong Island» និង «ថ្ងៃអាទិត្យដើម្បីកោះកុងក្រៅ»។ ក្រុមយុវជន បាននិយាយថា ពួកគេមានផែនការក្នុងការធ្វើ​សកម្មភាពនេះ​រយៈពេលមួយខែ និងធ្វើឡើងរៀងរាល់ថ្ងៃអាទិត្យ ហើយនេះជាសប្ដាហ៍ទី១​នៃ​សកម្មភាពសម្រាប់កោះកុងក្រៅ។

យុវតីវ័យ២០ឆ្នាំ កញ្ញា មាន លីសា ជាសកម្មជន​ចលនា​មាតា​ធម្មជាតិ ឱ្យដឹងថា អាជ្ញាធរបាន​ឃាត់​​ក្រុមរបស់នាងមាន១៣នាក់ ក្នុងនោះមាននារី៥នាក់ និងបរទេសម្នាក់ ដោយ​មូល​ហេតុ​​ពាក់អាវដោយភ្ជាប់នឹងពាក្យថា «កោះកុងក្រៅ» ថែមទាំងនាំក្រុមយុវជន​ទៅកាន់​សាលាខណ្ឌ​ដូនពេញ​ ក្រោមហេតុផលថា គ្រាន់តែបំភ្លឺរយៈពេលខ្លីអំពីគោលបំណង​នៃការធ្វើលំហាត់​ប្រាណ​នេះ។

ក្រុមយុវជនទាំង១៣នាក់ត្រូវបានអាជ្ញាធរឃាត់នៅវេលាម៉ោងប្រមាណ១០ព្រឹករហូតដល់​ម៉ោងជិត៦ល្ងាចទើបត្រូវបានដោះលែងវិញ។ អំឡុងពេលនៅក្នុងសាលាខណ្ឌ យុវតី លីសា និយាយ​ថា មន្រ្តីនៅទីនោះ បានសួរនាំយុវជនអំពីព័ត៌មានផ្ទាល់ខ្លួនពាក់ព័ន្ធនឹងឈ្មោះ ទីកន្លែង​រស់នៅបច្ចុប្បន្ន ស្រុកកំណើត និងមុខរបរឪពុកម្ដាយជាដើម។ ប៉ុន្តែ លីសា​ បានបដិសេធ​ក្នុង​ការរៀបរាប់ពីទីលំនៅបច្ចុប្បន្ន។

ជុំវិញការឃាត់ខ្លួននេះ កញ្ញា លីសា បន្តថា៖«វាប៉ះពាល់ទាំងផ្លូវកាយ ផ្លូវចិត្តរបស់យើង ព្រោះ​អ្នក​ខ្លះ​អត់សូវ​ស្រួលខ្លួន ដូចខ្ញុំម្សិលមិញ ខ្ញុំផ្ដាសាយ ហើយខ្ញុំទៅនៅក្នុង​បន្ទប់បិទ​ជិតធ្វើ​ឱ្យខ្ញុំ​ក្ដៅខ្លួនខ្លាំងមែនទែន។ មកផ្ទះវិញគឺសឹងអត់សូវស្រួលខ្លួន ហើយខ្ញុំបានលេបថ្នាំសម្រាក»។ កញ្ញាបន្តថា៖ «យុវជនយើងផ្សេងទៀតដូចគ្នាប៉ះពាល់ផ្លូវអារម្មណ៍មែនទែន ដោយនៅ​ក្នុងនោះ​ត្រូវបានរងការគំរាមកំហែងសម្លុត ហាក់បីដូចជាអំពើមនុស្សព្រៃធ្វើមកកាន់ពួកយើង គ្រាន់តែ​យើងសុំចេញពីបន្ទប់បិទជិតហ្នឹងគឺសម្លុតយើងឡើងបាត់មាត់តែម្ដង»។

យុវតីរូបនេះ សង្កេតឃើញថា អាជ្ញាធរមានអប្បកិរិយាមិនសមរម្យក្នុងការធ្វើ​ដាក់យុវជន​ជាពិសេស​ស្រ្តី ហើយយុវជនមួយចំនួនមានភាពតក់ស្លុតភ័យញាប់ញ័រនៅពេលមួយ​ដែល​ពួកគេ​បានដើរចេញពីបន្ទប់តាមម៉ោងកំណត់ដែលត្រូវចេញពីសាលាខណ្ឌ ហើយអាជ្ញាធរ​បានស្រែកសម្លុតទៅកាន់ពួកគេឱ្យត្រលប់វិញ។ បន្ថែមពីលើនេះ កញ្ញា​ថា មន្រ្តីនៅទីនោះបាន​ប្រាប់បុរសជនបរទេសឱ្យដោះអាវដែលមានអក្សរកោះកុងក្រៅទាំងក្នុងហ្វូងមនុស្សមានទាំងស្រ្តី​ទៀត។ ប៉ុន្តែយុវតីរូបនេះ បានជំទាស់ ហើយបានស្នើឱ្យជនបរទេសទៅដោះអាវ​នៅក្នុង​បន្ទប់​ទឹកវិញ។

កញ្ញាបន្ថែមថា៖«គ្រាន់តែយើងដើរចេញទៅបន្ទប់ទឹក៣នាក់​ គាត់ថាយើងទៅបន្ទប់ទឹកម្ដង​ឡើង​៣នាក់ យើងទទួលបានអារម្មណ៍ harassment (ការយាយី)ពីអាជ្ញាធរមែនទែន»។

កញ្ញាបន្តទៀតថា សមត្ថកិច្ចបានឱ្យបុរសបរទេសធ្វើកិច្ចសន្យាដោយថតជាវីដេអូ ដែល​មាន​ខ្លឹមសារ​ថា ត្រូវបានក្រុមយុវជនបញ្ចុះបញ្ចូលនិងបង្ខិតបង្ខំឱ្យចូលរួមកម្មវិធីនេះ។ បើតាម កញ្ញា ឱ្យដឹងទៀតថា អាជ្ញាធរបានសម្រេចឱ្យជនបរទេសនោះ​ចាកចេញពី​ប្រទេសកម្ពុជានៅក្នុង​រយៈ​ពេល​៣ថ្ងៃទៀត [ថ្ងៃពុធ]។

យុវជនមួយរូបទៀតដែលចូលរួមក្នុងកម្មវិធីនេះផងដែរ លោក ហៀម ផេត បានអះអាងថា លោកនឹងនៅតែបន្តធ្វើសកម្មភាពនេះដើម្បីជំរុញឱ្យអាជ្ញាធរដាក់កោះកុងក្រៅជាឧទ្យានជាតិសមុទ្រ។

លោកនិយាយថា៖ «ខ្ញុំយល់ថាជារឿងមួយដែលមិនសមនឹងធ្វើ ទាំងដែលពួកយើង​ធ្វើ​សកម្មភាព​ហាត់ប្រាណ ជាសាធារណៈប៉ុន្តែពួកគាត់បែរជាឃាត់យើង ហើយហាមពួកយើង។ ចឹងវាជារឿងមួយដែលអយុត្តិធម៌សម្រាប់ពួកយើងមែនទែន ទាំងដែលពួកយើងអត់បានធ្វើ​ខុសទៅលើលក្ខខណ្ឌណាមួយ គ្រាន់តែយើងធ្វើសកម្មភាព​ដែល​ពលរដ្ឋគាត់ធ្វើទូទៅ​គ្រាន់​យើង​មានអាវកោះកុងក្រៅ ហើយគាត់មកឃាត់ពួកយើង»។


អាជ្ញាធរដឹកក្រុមយុវជនស្រលាញ់បរិស្ថានត្រលប់ទៅកាន់កន្លែងផ្ញើម៉ូតូនៅក្បែរវត្តឧណ្ណាលោមវិញ ក្រោយសាកសួរចប់នៅសាលាខណ្ឌដូនពេញអស់រយៈពេល៨ម៉ោង កាលពីថ្ងៃអាទិត្យ ទី៧ ខែមករា ឆ្នាំ២០២៤។  (ខេមបូចា/ វ៉ា សុភានុត)

ខេមបូចា មិនទាន់ទទួលបានការឆ្លើយតបតាមប្រព័ន្ធអ៊ីម៉ែលពីលោក Jannik Levin ជា​ជនបរទេស​ដែលអាជ្ញាធរឃាត់សាកសួរនៅឡើយទេ​គិតត្រឹមល្ងាចថ្ងៃអង្គារ ខណៈលោក​បានបដិសេធក្នុងការផ្ដល់បទសម្ភាសភ្លាមៗនៅពេលដែលចេញពីសាលាខណ្ឌដូនពេញកាលពីល្ងាចថ្ងៃអាទិត្យ។  តែលោក Jannik Levin បានប្រាប់អ្នកកាសែតតាមទូរសព្ទដោយខ្លីថា​ លោកនឹងឆ្លើយតបជាមួយអ្នកកាសែតនៅពេលក្រោយ ហើយលោកនឹងនៅក្រៅ​ប្រទេស​កម្ពុជា។

ដោយឡែក ហ្វេសបុកផេកស្នងការនគរបាលរាជធានីភ្នំពេញ បានអះអាងថា បន្ទាប់ពីបញ្ចប់​ការសាកសួរ ជនបរទេសរូបនោះបានធ្វើលិខិតសុំទោស រួចទទួលស្គាល់កំហុស និងបាន​ស្ម័គ្រ​ចិត្តត្រឡប់ទៅប្រទេសដើមរបស់ខ្លួនវិញនៅថ្ងៃខាងមុខ។ សមត្ថកិច្ចបន្តថា ក្រុមយុវជនទាំង​នោះ​បាន​ធ្វើសកម្មភាពខុសច្បាប់ និងបង្កប៉ះពាល់សន្តិសុខសណ្តាប់ធ្នាប់សាធារណៈ ដោយ​សារមិនមានការជូនដំណឹងតាមច្បាប់ទៅកាន់សមត្ថកិច្ចជាមុនឡើយ។

អ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា បានបញ្ជាក់ថា អាជ្ញាធរគ្រាន់​តែ​ធ្វើការណែនាំដល់ក្រុមយុវជន ហើយជនបរទេស​នោះ​បានស្ម័គ្រចិត្តត្រលប់​ទៅប្រទេស​កំណើត​វិញដោយខ្លួនឯង។ លោកបានអះអាងថា ជនបរទេសនោះបាន​ចាញ់បោក​ក្រុម​យុវជន​ថា មកហាត់ប្រាណធម្មតា ដោយមិនបានដឹងអំពីសកម្មភាពទាមទារអ្វីនោះទេ។

លោកថ្លែងថា៖«តាមការសារភាពនៅចំពោះមុខសមត្ថកិច្ចក្រុមយុវជនបោកប្រាស់គាត់ [ជន​បរទេស] ថាមកហាត់កីឡា ចឹងគាត់ស្មានតែក្រុមទាំងណុងមកហាត់កីឡា ក៏គាត់​មក​ចូលរួម មិនដឹងថាក្រុមនោះមកទាមទារតវ៉ាអីរបៀបណាគាត់អត់ដឹងទេ ទាល់សមត្ថកិច្ច​ហៅ​សួរនាំ​បានគាត់ដឹង»

ស្នងការនគរបាលរាជធានីភ្នំពេញ លោក ជួន ណារិន្ទ មានប្រសាសន៍ថា ការកាន់បដារបស់​ក្រុម​យុវជនបានធ្វើឱ្យបាត់បង់នូវសណ្ដាប់ធ្នាប់សាធារណៈ ហើយការសួរនាំ​ជនបរទេស​នោះ​ជាកាតព្វកិច្ចរបស់មន្រ្តីក្នុងការអនុវត្តច្បាប់។ លោកបន្តថា សមត្ថកិច្ចបាន​សួរជនបរទេស​នោះ​ពាក់ព័ន្ធនឹងការងារ​ និងចូលមកកម្ពុជាបានយ៉ាងដូចម្ដេច ហើយមកកន្លែងធ្វើ​សកម្មភាព​នេះ​មាន​គោលបំណងអ្វី។

លោកថ្លែងថា៖«ជនបរទេសតែចូលទៅប្រទេសណាក៏ដោយត្រូវតែគោរព​ច្បាប់​ប្រទេស​ណុង​ហើយ គាត់ហ៊ានតែបំពាននៅពីក្រោយដែលហែហមទៅស្រែកអីៗ គេត្រូវហៅ​សួរចឹង​ហើយ អត់ខុសទេ សួរហើយចប់គេឱ្យគាត់ទៅវិញហើយ មានឃាត់មានអី»

បន្ថែមពីលើការអះអាងរបស់សមត្ថកិច្ច អភិបាលរាជធានីភ្នំពេញ លោក ឃួង ស្រេង បញ្ជាក់​ថា ករណីនេះត្រូវបានដោះស្រាយរួចរាល់ហើយ ខណៈក្រុមយុវជនទាំងនោះ​មិនបានជូន​ដំណឹង​​ពាក់ព័ន្ធនឹងយុទ្ធនាការនេះទៅកាន់អាជ្ញាធរមូលដ្ឋានឡើយ។ 

លោកមានប្រសាសន៍ថា៖«ខ្ញុំគ្រប់គ្រងមនុស្សយ៉ាងម៉េចទៅឥឡូវ បើគាត់ធ្វើអីអត់ជូនដំណឹង​មកខ្ញុំផង សិទ្ធិគាត់វាហៀរប៉ះសិទ្ធិអ្នកដទៃ»។

ជុំវិញការប្រើពាក្យសម្ដីមិនសមរម្យណាមួយ លោកថា ក្រុមយុវជនអាចដាក់ពាក្យបណ្ដឹង​ទៅ​កាន់​តុលាការបានប្រសិនបើមានភស្តុតាង។

លោកបញ្ជាក់ថា៖«បើមានភស្តុតាងគាត់ប្ដឹងទៅតុលាការទៅ។ […] អាជ្ញាធរខ្ញុំក៏រៀន និងមាន​សុវជីវធម៌​ដែរ»

អ្នកនាំពាក្យអគ្គនាយកដ្ឋានអន្តោប្រវេសន៍ លោក កែវ វណ្ណថន ប្រាប់អ្នកសារព័ត៌មានសួរទៅ​កាន់​អង្គភាព​ដែលឃាត់ខ្លួន។

លោកបញ្ជាក់ថា៖ «អង្គភាពណាឃាត់ខ្លួន? គួរសួរទៅអ្នកនាំពាក្យរបស់អង្គភាពនោះ។ អគ្គនាយកដ្ឋានអន្តោប្រវេសន៏មិនបានឃាត់ទេ»

នាយកកិច្ចការទូទៅ​អង្គការលីកាដូ លោក អំ សំអាត ចាត់ទុកការហៅសាកសួរក្រុមយុវជន​ដែលឈឺឆ្អាលរឿងទ្រព្យសម្បត្តិជាតិនេះ គឺជាការរំលោភលើសេរីភាព​ក្នុងការជួបជុំ​របស់​ពលរដ្ឋ។ លោកយល់ថា ប្រសិនបើមិនមានការឃាត់សួរ​នាំទេ ជនបរទេសរូបនោះ​ទំនងមិន​ចាក​ចេញពីកម្ពុជាឡើយ។

លោកថ្លែងថា៖«វាជាសេរីភាពរបស់ពលរដ្ឋជាមូលដ្ឋាន វាមិនមានបទល្មើសអីទេ ហើយនៅ​ពេល​ដែល​ឃាត់យកទៅសួរនាំអីចឹង វាជាការគំរាមកំហែង​បំភិតបំភ័យសម្រាប់យុវជន​ដែល​គាត់ស្រលាញ់បរិស្ថាន ស្រលាញ់ធនធានធម្មជាតិ ហើយកោះកុងដូចគាត់ទាមទារឱ្យមានការ​ថែរក្សា ឬក៏ដាក់ជាឧទ្យានសមុទ្រជាតិ អាហ្នឹងវាជាទ្រព្យសម្បត្តិជាតិមែនជារបស់បុគ្គល​ណា​មួយ​ទេ»។

មួយថ្ងៃបន្ទាប់ពីការឃាត់ខ្លួនក្រុមយុវជន ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ «ស្ពាន​សម្តេចតេជោ ហ៊ុន សែន​ កោះយ៉» ក្នុងស្រុកមណ្ឌលសីមា ខេត្តកោះកុង លោក​នាយករដ្ឋមន្រ្តី ហ៊ុន ម៉ាណែត បានចំអកដាក់មនុស្សមួយចំនួនរាប់ទាំងជនបរទេសថា​នឹង​មិនហ៊ានចូលរួមការពារបរិស្ថាននោះទេ នៅពេលដែលស្រុកកើតសង្រ្គាម។ 

លោកបញ្ជាក់ថា៖ «បើគ្មានសន្តិភាពតំបន់ទាំងអស់នោះ សួរថាប្រជាពលរដ្ឋនៅទីនោះ​ទៅ​រួច​ទេ អ្នកខ្លះឥលូវតាំងខ្លួនជាអ្នកស្រលាញ់ធម្មជាតិ ទាំងបរទេសអីចូលទៅធ្វើសកម្មភាព ថាខ្លួន​ការពារបរិស្ថាន តែបើកាលវាយគ្នាចាំតែចូលតើ ហើយម៉េចមិនចូលការពារបរិស្ថាន​ពេល​នោះ»

ប្រធានសមាគមបណ្ដាញយុវជនកម្ពុជា ហេង គឹមហុង អំពាវនាវឱ្យរដ្ឋាភិបាលបើក​លម្ហ​សិទ្ធិ​សេរីភាព​ដល់យុវជនក្នុងការធ្វើការលើកកម្ពស់ធនធានធម្មជាតិ និងបរិស្ថាន​ដែលជាផល​ប្រយោជន៍​រួមរបស់ជាតិ ដោយស្របតាមបរិបទសង្គមប្រជាធិបតេយ្យផងដែរ។

លោកលើកឡើងថា៖«ខ្ញុំស្នើសុំឱ្យរដ្ឋាភិបាលក៏ដូចជាអាជ្ញាធរពាក់ព័ន្ធ​បើកលម្ហសិទ្ធិសេរីភាព ជាពិសេស​គឺយុវជនដែលគាត់ជាអ្នកធ្វើការងារហ្នឹង លើវិស័យធនធានធម្មជាតិបរិស្ថាន វិស័យ​អីក៏ដោយ ជាផលប្រយោជន៍របស់ជាតិ ជំរុញនិងលើកទឹកចិត្តគាត់ទៅ ធម្មតា​សង្គម​ប្រជាធិបតេយ្យ ត្រូវការពលរដ្ឋសកម្ម ត្រូវការពលរដ្ឋដែលជួយឆ្លុះបញ្ចាំងបញ្ហាសង្គម គេមិន​ដែល​ធ្វើការរឹតត្បិតចឹងទេ ហើយការរឹតត្បិតសិទ្ធិសេរីភាពនេះជាសញ្ញាព្រួយបារម្ភថា សិទ្ធិ​សេរីភាពផ្សេងៗទៀតដែលនឹងត្រូវបានអនុវត្តដោយប្រជាពលរដ្ឋអាចនឹងត្រូវបន្តការ​រឹតត្បិត​ផងដែរ»។

កាលពីដើមខែធ្នូ ឆ្នាំ២០២៣ អាជ្ញាធរខេត្តសៀមរាបបានរារាំងក្រុមអ្នកការពារសិទ្ធិមនុស្ស និង​ព្រះសង្ឃ​ជិត២០អង្គ/នាក់ ដែលធ្វើធម្មយាត្រាដើរដោយថ្មើរជើងដើម្បីលើកកម្ពស់សេរីភាព និង​​យុត្តិធម៌សង្គម ដោយថា គ្មានសណ្ដាប់ធ្នាប់និងពុំបានសុំសហការជាមុន ប៉ុន្តែ​ក្រុម​អ្នក​ការពារ​​សិទ្ធិមនុស្សបានបដិសេធចំពោះការចោទប្រកាន់នេះ ហើយថា​ បានធ្វើធម្មយាត្រា​ដោយមានរបៀបរៀបរយនិងបានជូនដំណឹងទៅកាន់អាជ្ញាធរ។

យោងតាមច្បាប់ស្ដីការធ្វើបាតុកម្មដោយសន្តិវិធី មាត្រា៣ បញ្ជាក់ថា ច្បាប់នេះមាន​វិសាល​ភាព​អនុវត្តលើរាល់ការប្រមូលផ្ដុំគ្នា ឬ ការដង្ហែក្បួនធ្វើបាតុកម្មដោយសន្តិវិធី ប៉ុន្តែ​មិន​អនុវត្ត​ចំពោះ​ ការដើរហែក្បួនព្យុហយាត្រា ដើរហែសព និងការប្រមូលផ្ដុំគ្នា​ដទៃទៀតក្នុង​គោល​បំណង​បម្រើសាសនា សិល្បៈ វប្បធម៌ ទំនៀមទម្លាប់ប្រពៃណីជាតិ និងសកម្មភាព​ផ្សព្វ​ផ្សាយ​អប់រំ ដើម្បីផលប្រយោជន៍សង្គម៕

332 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម